استيفان روستي

-طفيت علي الاكل يا كريم و شوفت استوي و لا لاء؟

-و انا هأعرف منين بس انه استوي و انا صايم؟ هو جنان و لا ايه؟ ساحر انا مثلا

-يا بني ما انا قولتلك ربع ساعة كدة و اطفي علي الاكل هتلاقيه استوي

-ما شاء الله عايش مع الشيخة خديجة المغربية بتعرف الاكل هيستوي امتي من غير حتي ما تشوفه

**اكيد زي ما اتعودنا ان الحوار دة كلنا عدينا عليه سواء مع امهاتنا للمش متجوز او مع مراتك "لو بتعرف تطبخ طبعا" و كل واحد فينا يستغرب ازاي بيعرفوا ان الاكل استوي لا و الاكتر من كدة يعرفوا هو فاضله قد ايه عقبال ما يستوي...و دايما الموضوع دة بيعصبني اكتر في رمضان ازاي بيعملوا اكل 30 يوم و مش قادرين حتي يدوقوا الاكل او الثبات الانفعالي اللي بيبقوا فيه...يبقي قدامهم كل انواع و اصناف الاكل و لا كأنهم صايمين يا أخي

-بس في الاخر لقيت ان الموضوع موهبة و خبرة...يعني تتقل تاخد حاجة نضيفة...و لو ربنا كرمك و روحت عزومة كبيرة او دخلت مطعم كبير و اكلت هناك اكل حلو قوي عمرك ما هتنساه اول سؤال هيجي في دماغك بعد ما تحسب ثروة اللي عازمينك او علي الاقل تحسب صاحب المطعم بيكسب كام؟؟ ان مين اللي عمل الاكل العبقري دة و ازاي قدر يطلع كمية الاكل دي و بسرعة قوي كدة و بالجودة دي ..و ازاي مكان بالحجم دة او شخص يعزم العزومة الكبيرة دي يثقوا في شخص انه بالبلدي كدة يبيض وشهم مع العلم ان الشخص دة غالبا مبيظهرش و لا انت عارف شكله و لا حتي اسمه و ممكن المحل يقفل او صاحب المحل يموت بس اللي يفضل محفور في عقلك هو طعم الاكل الحلو

-احنا بقي في التتر اقل من المطاعم و الشيفات؟ و الله ابدا

-احنا كمان عندنا شيف بيعمل اكل مكتوب عليه اسمه و بيعمله علي نار هادئة قوووووي من غير ما يتحرق او ينزلك ناقص حاجة...شيف وجوده في الافلام قليل بس تأثيره في مشاهده اكبر بكتيــــــــــــــــــــــــــــــــر من مشاهد رئيسية في الفيلم و كل ما يجي اسم الفيلم قدامك لازم تفتكره اول واحد...دايما هتفتكر استيفان روستي

-استيفان روستي او الشيف لما تشوفه في اي فيلم لازم تتأكد انك هتسمع افيه "مظبوط" ...لا مش حلو ...هتسمع افيه "مظبــــــــوط" الصعب انك تعمل افيه حلو و يضحك بس الاصعب و الاصعب انك تقول افيه مظبوط بالسنتيمتر و وشك مبيقولش اي حاجة بس غصب عنك لازم تضحك...اصل الاكله لازم تطلع مظبوطة علي الشعرة...موهبة استيفان روستي زي الشيف اللي تلاقيه بيعمل اكل في افخم فنادق و تلاقيه هو هو لما بيروح البيت بيعمل احلي قرص بيت مقلي عشان يتعشي به و لو عنده اجازة يجهزلك اجمل طبق فول فيه طاقة اكبر محطة نووية في العالم

-استيفان في كل افلامه هتلاقي افيهاته مش كتير بس هتلاقي كلامه بيضحك اكتر...مش مفهومة صح؟ عاذرك و الله

-يعني انت تلاقيه من الناس القليلة ان لم تكن النادرة اللي بيلعب هات و خد مع نفسه عشان يقدر يقول الافيه اللي هيفضل قول مأثور في اذهان كل اللي بيسمعه "حلوة اللغة العربية الفصحي دي "...يعني هتلاقيه هو اللي بيمهد الافيه بطريقة بسيطة و يروح قايل الافيه زي بالظبط لما ينزلك طبق الاكل بطريقة شيك اصل دايما العين بتاكل الاول

**جوعتوا صح؟ طيب تعالوا بقي نقعد و نختار من منيو مسيو استيفان روستي و كله هيأكل

-نبدأ بفيلم " ملك البترول" و وجبة الكوميديا في الفيلم دة هتلاقي معظمها من ايد استيفان روستي و تعالي نشوف مشهد لما راح يصطاد لما قال " اصل البندقية دي عزيزة عليا قوي...اصلها بندقية اللورد هيبالالا...و لما قاله عبد المنعم ابراهيم  يبقي السر في براعتك في التنشين فيرد استيفان بمنتهي الروقان " ما انا مخلصنيش اقولك كدة" و يكمل عبد المنعم ابراهيم متواضع يا عمي و طول عمرك بتحب تنسب الفضل لغيرك فيكمل المسيو بروقانه " اه ما انا طبعي كدة" طيب و الله قالها احلي من نيكول سابا ....و مينفعش تنسي في نفس المشهد لما قال " تحبه مشوي و لا محشي" فيسأله ابراهيم و دة ماله بالنيشان فيرد استيفان بثقة قوي "انت جاهل دة له ضرب و دة له ضرب" ...و في اول الفيلم سألته زهرة العلا يعني العربية متصلحتش و يرد استيفان يقولها "متنيلتش" ...و لما وصلهم اسماعيل ياسين بحماره زهرة العلا قالت كله بفضل دكتور حسونة قالها بمنتهي التناكة "ابدا الفضل يرجع للحمار" و في مشهد زهرة العلا كانت عايزة تروح المولد و بتقوله هاخد الكلب يحرسني قالها " ابن عمك أامن من الكلب" و مينفعش تنسي مشهد لما قال عبد المنعم ابراهيم "دة طلب طلب يستاهل عليه الاعدام رميا بالرصاص فيرد استيفان " لا بالبلغ "

**و زي ما كل شيف مشهور بأكلة معينه بيعرف يعملها قوي برضه مسيو استيفان مشهور بأكتر من افيه محفورين باسمه و صوته و طريقته علي مر العصور

-في فيلم "حبيبي الاسمر" و جملته المشهورة " نشنت يا فالح...اسفوخس علي اللي شايلهولك " و عايزك تتخيل معايا ان جملة صغيرة عادية جدا تتحول بطريقته الي مثل شعبي بنستخدمه كل يوم في حياتنا العادية و دايما فاكرين ان استيفان هو اللي قاله...الفكرة مش مجرد جملة...الفكرة هي الموهبة اللي بتقول الكلام و بتقوله ازاي و امتي

-تعالي شوف كلامه في فيلم "شاطئ الغرام" لما قال " عاجبك كدة؟ دي اللي كنت جايباها تهزأيها؟ الا ما في حد ما اعجبش بيها" و برضه الجملة دي هتفضل من علامات الفيلم حتي لو في لحظة نسيت الفيلم او مين ابطاله بس هتفضل مركز علي كلام استيفان روستي

-دور علي فيلم "رقصة الوداع" و شوف مسيو استيفان و هو بيطبخ علي نار هادئة و حتي لما بيتعصب تحس انها عصبية جاية من الزمالك كدة لما الست قالت " مش ممكن..مستحيل..اصل بصرة الشايب مع البنت متنفعش " فيرد المسيو بانفعال حلو جدا " مساء الخير يا طنط...انما انا يا شاطرة و انتي الصادقة...الجوكر ...الاس "

-حتي لما عمل بلطجي شعبي عملها بشياكة و روقان زي ما عمل "زكي بشكها " في فيلم المليونير و كفايه و هو بينطق الاسم كذا مرة و كأنك جايب واحد من فرنسا يقول شعر لصلاح جاهين ...لو لما قاله اسماعيل ياسين تلعب بصرة تلاقي استيفان روستي بيرد و كأنه طفل مقموص "لا ملعبش بصرة"

**تعالي ندخل علي بوفيه السلطات بقي و ناخد افيه من كل فيلم كدة قبل ما ندخل علي الطبق الرئيسي

-في فيلم "حسن و ماريكا" لما بيقول لاسماعيل ياسين و هو عامل ست " انا اموت في الصنف البلدي دي " و تشوفه و هو بيقولها بحركة جسمه و لا اجدع عاشق ولهان في زمانه...او في فيلم "تمر حنة" لما قال لاحمد رمزي "اموت في الشراني " او لما زينات صدقي بتدعيله و بتقوله ربنا يعمر بيتك فاللي جنبه بيسأله بيت مين فيرد المسيو بمنتهي السرعة "مش انا" ...او لما قال لسامية جمال لما قالتله لا يا خويا مرقصشي قدام الناس فيرد استيفان بعبقرية و رد منطقي جدا " اومال هترقصي في ايه...في سرك"

**الطبق الرئيسي اتأخر صح؟ ما انا قولتلك بقي انه بيطبخ علي نار هادئة بس اوعدك هتأكل حاجة محدش هيعرف يعملها غير المسيو

-تخيل انت فيلم فيه فاتن حمامة و عمر الشريف يعني انت مستني فيلم رومانسي في قصة حب ملتهبة بس الحقيقة ان اللهب كان كوميدي و دي عبقرية استيفان انك في وسط مكان مش بتاعك تظهر و تتألق و مش بس كدة دة انت تحفظ كلامه عن احداث الفيلم كله...و مش هاكون مبالغ لو لما اقول ان في ناس كتير مطلعتش في فيلم "سيدة القصر" غير بجملتين من اشهر افيهات تاريخ و مستقبل السينما المصرية

-اولهم لما قال لفاتن حمامة و معرفش جاله قلب منين " كونياك...طبعا طبعا...الكونياك دة مشروب البنت المهذبة" و لازم نقفل بأشهر جملة في تاريخ استيفان لما قال لفردوس محمد "مدام تسمحيلي بالرقصة دي" و قالتله ما ترقص يا اخويا و انا حايشاك" قالها " كدة...طيب بس اروح اتحزم و اجيلك" و الافيه دة كفايه يثبتلك انه صاحب مدرسة الافيه المظبوط و ان النار الهادئة بتطلع اكل احلي زي كوباية القهوة من السبرتايه

-استيفان روستي هو الشيف اللي بيشتغل عشان بيحب شغله و حابب يشوف اعجاب الناس لما تأكل من ايده...او تضحك من جملة قالها مهما اتعادت قدامهم...موهبة المسيو فطرية و مش محتاجة لا تدريب و لا تطوير...هي مادة خام للافيه المظبوط

شكـــــــــــــــــــــــــــــــــــرا مسيو استيفان

#استيفان_روستي

#الشيف

#الافيه_المظبوط

#التتر

#كريم_مجدي

القصـــــــــــــــــــــــــــــــــــري

ها الفتحة دي فوق و لا تحت...يمين و لا شمال ؟؟ طيب تعرف تقولي الرقم اللي في الوسط دة ايه؟؟

اكيد سمعنا الجملتين دول و غيرهم عند دكتور العيون..و اللي برضه اكيد ان كتير مننا و انا اولكوا بنخاف من الدكاترة عموما و دكاترة العيون بالاخص اصله معلش يعني لو الغلطة جت في العين هاشوفك فين تاني عشان اطلع عينك؟؟ يعني لازم تروح لدكتور متجرب عشان تضمن انه دكتور كويس و موهوب كمان...و طبعا عارف هتقولولي ما كل دكتور لازم يكون شاطر عشان تروحله...اشمعني يعني دكتور العيون؟؟؟ صح؟ اصل خلاص حفظنا بعض

لسببين...اول سبب ان دكتور العيون ربنا جعله سبب انه يخليك تشوف حاجات احلي و احلي و انه بيدخل جوة عينك و يشوف اللي ناقصها عشان تجيب زوايا مكنتش بتقدر تشوفها قبل ما تروحله سواء بالعلاج او هو اللي بيديك مقاسات النضارة اللي هتشوف بيها احسن و اوضح...و لو كنت مش محتاج علاج فهو يطمنك انك شايف كويس و ماشي تمام

*و تاني سبب ...هاقوله اخر المقال معلش

-و زي ما في دكتور عيون في مجال الطب...في كمان دكتور عيون في الفن و دكتور موهوب قوي كمان اسمه عبد الفتاح القصري...و كل ما تروح للرجل دة في عيادته ...ايوة تروحله يا سيدي اصل اللي زي القصري لازم انت اللي تدور عليه و تروحله...موهبة الرجل دة انه بينورلك زوايا في المشهد عمرك ما كنت هتلاقيها لوحدك ...و بيوقع عينك علي افيهات مكنتش هتبقي متخيل انها هتتقال في الموقف دة حتي لو كنت متأكد انك بتتفرج علي فيلم كوميدي بس برضه في مناطق انت يا سيدي مش هتشوفها لوحدك بس القصري دارسها كويس قوي و عارف يروحلها امتي و ازاي

-دايما هتلاقيه واقف ورا البطل في كل مشهد بيبقي مشارك فيه ...هتلاقيه زي ما يكون بياخد مقاسات النضارة بتاعت البطل عشان يخلي الرؤية قدامه بعد كدة...هتلاقيه يا بيمهد لافيه و عايزك تركز قوي في النقطة دي عشان القصري بيملك حاجة عبقرية انه بيمهد للافيه بافيه و بيعمل لعبة كدة انه بيعلي سقف طموحك في الضحك لما بيقول افيه انك تلاقي اللي قدامه لازم يقول حاجة توقعك من الضحك...يا هتلاقيه بيقفل المشهد بافيه مفيش حد هيقدر يقول من بعده حاجة و كأنه خلاص خد مقاسات النضارة و خلص الكشف

***لا مش هنخش علي الادوار دلوقتي...مش معني اني قولت انه خلص الكشف اني خلصت ...محدش يستعجلني

-القصري عمل مش بس عيادة صغيرة...دة حولها لمركز علاجي متكامل...غير صوته اللي مستحيل تتلخبط فيه حتي لو سمعته بيقول كلمة واحدة بس فهتعرف مين اللي قالها و هتحفظها و تفضل مرسومة في دماغك...بس انت مخدتش بالك انا ليه كتبت مرسومة و مش محفورة؟؟؟ حويط انا مش سهل

مرسومة لان اداء القصري الحركي بيكمل نسبة كبيرة جدا من افيهاته...يعني لازم هتكون رابط نص افيهاته بحركة او مشيته او طريقة ايده و كأنه ماسك الافيه في ايده او كأنه بيعزف الافيه...اه يمكن تكون مشيته جلابيه بلدي بس افيهاته بدلة من حفلات ام كلثوم

--خلاص خلصت عشان متقولش عليا رغاي ...يلا بيننا ندخل عيادته و نشوف كل كشف بيعمله

-تعالي شوفه في "اسماعيل ياسين في متحف الشمع" لما عمل دور الحانوتي ساعة لما واحد معدي في الشارع و سلم عليه فيرد القصري بمنتهي السرعة " و عليكم السلام...اتفضل مقاسك موجود" و ساعتها هتسأل نفسك هو جابها منين...اول لما صحي اسماعيل ياسين و قاله حي فيرد القصري " حي حي هو مفيش ميت ابدا" و لما جابوا سيرة عزرائيل فتلاقي وصف القصري له مش موجود في كل كتب البشر لما قال عليه " اومال رجل قلبه حامي بتاع شغل" و ساعة لما سمعوا صوت حادثة عربية و راح يشوف و رجع بيقول لاسماعيل ياسين " طلع عدم اختصاص...فيه الروح و الاسعاف جت شلته" و لما اتريق علي اسماعيل ياسين و قاله " ربنا يجعل في بوقك القبول" و في المشهد دة هتلاقي اسماعيل ياسين نجم الشباك وقتها مالوش وجود في وجود القصري

-تعالي شوف مرافعته في فيلم "الاستاذة فاطمة" لما قال بمنتهي الثقة مرافعة لو قرأتها بالكلام بس ممكن متكملش نصها بس لما تشوفها بطريقة القصري هتفضل تعيد فيها و تزيد...لما قال "يا حضرات المستشارين...يا سيادة الرئيس" فيرد القاضي المحكمة مفيهاش مستشارين فيرد القصري " و ماله يا حضرة القاضي كل شئ فضلتك" ...و يكمل القصري " قضيتنا اليوم هي قضية الحق و قد ظهر الحق و زيهأ الباطل (هو اللي قالها كدة مش كاتبها غلط يعني) ...ان المتهم الواقف امامكم خلف القضبان الحديدة مجرم اثيم و قاتل لئيم اعتدي علي الشرف و الفضيلة الذي و التي يحميهن القانون" و لما القاضي قاله ايه الفصاحة دي يا حاج دة انت شكلك متعلم قوي قال" و النبي قوله عشان مش مصدقني" و هو صاحب الاهتمام الاغرب في تاريخ السينما لما قال "قتل حقوق الانسان"

-و لو انت موظف و عايز علاوة اتفرج عليه في فيلم " لو كنت غني" لما بيقول لمديره " اللحمة اللي ب 4 صاغ بقت ب 8 و بناكلها بكماشة ...علبة السجائر اللي بصاغ بقت بصاغين و من غير كبريت...و الارز بنسمع عليه سمع" و لما مديره قاله يعني ايه علاوة فيرد القصري بسخرية ولاد البلد " اع  ال اوه" و ساعتها هتلاقي الافيه في حتة مستخبية ميعرفش طريقها غيره...و انت خارج من الشغل بقي و ملقتش علاوة و عايز تعاكس القصري في نفس الفيلم له اشهر معاكسة في تاريخ الابيض و الاسود لما بيقول " يا صفايح الزبدة السايحة...يا براميل القشطة النايحة...يا حلو يا لوز" و لازم تعمل زيه لما بيقول لبشارة واكيم اغمض عيني اليمين و اغمزلها بالشمال"

-حتي لما بيجي يشتم لازم يضحكك لما تشوفه في فيلم "سكر هانم" لما بيقول فكيهة يا بنت الوارمة...الولعة يا بنت المجعلصة...حاسبي يا بنت المبطرخة...كفاية يا بنت المكعبرة" ....او لما قال لعبد المنعم ابراهيم " ست!!! انا مش شايف ايتها ست...دة انا جنبك ابقي مارلين مونرو" او لما قاله مش شايف القوام فيرد القصري " هو فعلا قوام عايزله بردعة و لجام " او لما قال " تقوليلي خرجوا و تضحكي عليا يا مرضعة كليوباترا " ...و مين ينسي نومته و هو بيهز رجله و هو بيسمع المكالمة

-و الله يسامحه بقي طلع علي كل الرجالة انهم كلهم حنفي في "ابن حميدو" و كلمته المشهورة و المرسومة بحركات ايده " انا كلمتي لا ممكن تنزل الارض ابدا" ...حنفي..."خلاص هتنزل المرة دي بس اعملي حسابك المرة الجاية لا ممكن تنزل ابدا" ...او لما راح للباز افندي و قاله "بعتلهم نورماندي...اصلي باحب اشجع الشباب الناهض" ...و لما الباز افندي قاله " افندي!!! خلاص خليته افندي زيه زيي كدة" فيرد القصري بافيه مستخبي من بتوعه و قاله "لامؤاخذة يا باز افندي اصل دلوقتي بقينا جمهورية "

و من اول ظهوره في الفيلم هتتأكد انه اللي هينور مناطق مختلفة لما مراته قالتله الحق بناتك قاله "مالهن...حد اعتدي عليهن" ...او لما قالتله يعني انا مقدرش اشتمك فيرد حنفي بقي " انتي!!! و حياة شرف ابوكي لو فتحتي بوقك بكلمة هاقطم رقبتك" و لما اتشخط فيه قال "ايوة كدة اتعدلي" ...او لما قال للباز افندي استني بقي لما نلاقي عريس لحميدة...هي دي حاجة سهلة يا حبيبي

-و تعالي اضحك معاه في فيلم "مليون جنيه" لما مراته بتقوله انا عاملالك كوارع فيقولها " جتك روماتيزم في كوارع اللي خالفوكي " و كمل قالها "و رحة شنب جدي الماظ باشا اوغلو لاعمل تطهير للعائلة و و اطلعك برة التطهير"

-او دور علي فيلم اسمه "البنات شربات" و شوفه و هو بيقول سجع كوميدي حلمنيشي كدة مالوش وجود اساسا لما بيقول " الفرح و المرح و الهيصة و الميصة و الدخلة و المخلة...بس اوعي يحصل فركشة و مركشة و اطلع من المولد بلا حمص و ممص"

--اخر كشف كدة حاجة صغيره تقدر تقول عليها استشارة...في الدقيقة 11 من فيلم " حماتي قنبلة ذرية " في جمله قالها عدي مرحلة العبقرية و التلقتئية لما قاله لماري منيب " تصدقي باللي خلقك و صورك رجل" و تحس انه بيقول جملة عادية جدا يعني

***دلوقتي بقي هاقولك علي السبب التاني لموضوع دكتور العيون ؟؟؟ هتلاقيك نسيت و مش مركز

---عزيزي العبقري عبد الفتاح القصري ...اوعي تفتكر انك فقدت بصرك...اه صحيح في اخر ايامك مكونتش بتشوف بس خليت اجيال و اجيال من بعدك تشوف زاوية جديدة من الكوميديا ...مفيش حاجة اسمها فاقد الشئ لا يعطيه...انت غيرتها لفاقد الشئ يعطيه بقوة ...بقيت دكتور العيون اللي بيفتح كل عين علي كل ضحكة حلوة

شكرا يا قصري

#عبد_الفتاح_القصري

#دكتور_العيون

#التتر

#كريم_مجدي

ماري منيب

هو انت يا بني لازم تتسرع كدة و تدبس نفسك في شخصيات تقيلة... ماري منيب هتكتب عليها ايه و لا ايه... و طبعا مهما تكتب مش هتقدر تدي لموهبتها حقها... مالها الشخصيات البسيطة اللي تتكلم عنها بسهولة

طيب اعتذر للناس و اغير الشخصية؟ لا مينفعش
طيب اغير الشخصية من غير ما اعتذر!؟؟ دة انت جاي تهزر بقي

اصل ماري منيب لو ليها إجابة نموذجية للمقدمة بتاعتها كنت ارتحت و كتبت المقال... استني كدة يا عم كريم إجابة نموذجية ايه اللي بتدور عليها و ماري منيب نفسها هي الاجابة النموذجية لاي مشهد كوميدي في تاريخ السينما
لقيتهااااااااااااا

انسوا بقي الكلام اللي اتقال فوق دة... اهو الواحد بيكلم نفسه ساعات كدة.. و نركز شوية مع بعض الله يكرمكوا

الاجابة النموذجية هي المرجع لاي حاجة في حياتنا بنرجعلها عشان نتأكد من صحة اجابتنا او تصرفاتنا... يعني مثلا اجابتنا في الامتحان بترجع للاجابة النموذجية بتتقارن بيها و علي اساس المقارنة دي بتاخد الدرجة...
"بطني وجعتني لما جيبت سيرة الامتحانات"
و لو موقف انت عملته بترجع للاجابة النموذجية اللي بتقولك اسه الغلط و ايه الصح.. و هنا بنعرف قيمة يعني ايه يبقي في حياتنا اجابة نموذجية... اجابة تثق فيها لدرجة انك توافق انك تقارن تصرفاتك كلها بيها... و الاجابة النموذجية في الكوميديا عموما و الكوميديا النسائية خصوصا هي ماري منيب

ماري منيب مش مجرد موهبة كوميدية غريبة كدة متقدرش تلاقيلها توصيف محدد... ما هو اصل مش ممكن ان في ممثل يقدر يخليك تضحك و هو في وضع السكون او بالبلدي كدة و هو قاعد و هاقولك ازاي كمان كام سطر

لو هتدور علي اجابة نموذجية لدور الحماة في تاريخ الكوميديا كله و عشان تاخد الدرجة كامله لازم تكون اجابتك ماري منيب... لانها الشمس اللي بيدور حواليها الكواكب او بمعني اصح هات اي عروسة او اي ممثلة يعني تعمل دور الزوجة و اي ابن يمثلوا قدامها و اي قصة و اي حاجة في اي حتة و انت هتلاقي الشمس طالعة في كل مشهد بس كل مرة بطعم مختلف و من اصعب ما يمكن ان ممثل يتحط في منطقة واحدة و تلاقيه بيتفوق علي نفسه في كل مرة

خلاص ذاكرنا كتير و سلمنا ورقة الاجابة و جه وقت ايه بقي؟؟ ايوووووة
جه وقت الاجابة النموذجية

"تعالي نشوفها في فيلم "الناس اللي تحت
لما قالتلها جمالات زايد كلمته بعد ما ضربه سي عبد الخالق فترد ماري منيب بإفيه "ضربه؟ ضربه ازاي؟ و ازاي يضربه و يضربه ليه و ازاي يضربه"
او لما بصت لصورة جوزها و قالتله "اجيبك منين يا بسيوني بيه... يا اخي احيه... يا اخي احيه"
و كملت بعبقرية لما قالت "الله يرحمه و يحسن اليه... اهو راح لحاله جاته نيلة... و مش هتقدر تنسي جاته نيلة بصوتها عشان اكيد و انت بتقرأ سمعتها و هي بتقولها... متنكرش
و في نفس المشهد تقدم ماري منيب مونولوج صامت غريب رهيب  وبسيط جدا لما مسكت المرايا عشان تبص لشكلها و تقعد تمسح في المرايا كذا مرة عشان اكتشفت الحقيقة اللي في الفيلم بس الحقيقة اللي في الواقع انها في منتهي جمال الروح.

تعالي شوفها في فيلم "اعترافات زوج... في دور نازلي و هنا ماري منيب بتتحدي بموهبتها و بتراهن علي نجاحها قصاد اتنين مش بس من عمالقة الكوميديا دول اتنين من عمالقة السينما علي مر العصور هما المهندس و يوسف وهبي... و تعالي افتكر مشهدها لما شالها المهندس و اداها السماعة ببوقه و قالت" عاذنك كلب... او لما سألها يوسف وهبي انتي تعبانة فترد بمنتهي كيد الحموات" لا دة انا مستريحة خااااالص... او لما كملت و قالتله معاك ترنك في التليفون التاني؟ لا براحتك باقولك مستريحة خالص... و قفلت المشهد بعد كل دة لما قالت "جتك نيلة وجعت صدري

تعالي نشوفها في حماتي ملاك و الافيه الاشهر لماري منيب "اسأليني انا... انا مدوباهم اتنين و كأنها عارفة انها بتحط اجابة نموذجية تعيش بعدها بسنين... و زي ما قولتلك فوق انها ممكن تضحكك و هي قاعدة... الكوميديا مش بس في كلامها... الكوميديا الاكتر تلاقيها في طريقة كلامها و نبرة صوتها اللي ملهاش مثيل.. عمرك شفت حماة عايزة تشوف الدنيا بتولع و مع ذلك بتحبها؟؟ اه و الله تحبها بس اكيد في الافلام بس

و شوفها وهي بتعرف بنتها ازاي تكشف جوزها لما بتقول لها البند الاول '' الرائحة ''.. و لما بنتها قالتلها إن ماينفعش رائحة متسكتش بقي ماري لا مايصحش تقولها خلاص يبقي اللي كان عندها كانت لسه صاحية من النوم ملحقتش تتريح.. و كملت
البند التاني'' لطعة البودرة تفضح'' او جايز اللي كان عندها مالحقتش تتبدر.. هي اي مصيبة و خلاص... مش هتهمد انا عارف

و لما لقت المصيبة تلاقيها بمنتهي السعادة كأنها لقت الماظ مثلا... و قالت دلائل الجريمة اهي... اهي... اهيييييي
و طبعا لازم تقفل المشهد بختم ماري منيب لما بتقوله "كل دة يطلع منك يا بتاع الصابون... إما زحلقتك علي ملا وشك و لعبتك علي الشناكل يبقي دة علي رجل

تعالوا بقي للمشهد العبقري لما جوز بنتها عمل عفريت و فجأة الجبروت دة كله يقلب خوف عيل صغير خايف من اوضه الفئران و الافيه العبقري لما قالها يا حماتي ياللي مدوباهم اتنين و قالتله انا يا اخويا؟ دول هم دابوا لوحديهم... و تحس بقي ان بقية المشهد و كأنها بتغني راب كوميدي... اه و الله راب كوميدي... لما قالها اركعي قالتله كام ركعة يا اخويا... او لما قالها هزي كمان فترد بتلقائية الا ما هزيت ايام المرحوم في ليلة دخلته هاهز دلوقتي

و محدش يقدر ينسي ضحكتها اللي تعتبر من اشهر ان لم تكن اشهر ضحكة كوميدية نسائية "اهاهاها... و لما قالت الخناق و النقار دول فيتامين الجواز... و النبي ما في شركة ادوية تعمل الوصفة دي

كفاية ان ماري منيب هي اللي حطت امتحان اختيار العروسة لما عملت فيلم هذا هو الحب... و تكسير البندق و شد الشعر و المنهج اللي مشينا عليه سنين كتير و بسببه بنات كتير قوي اتعذبوا

تعالوا شوفوها علي المسرح و شوفوا جبروت الكوميديا في مسرحية تعيش و تاخد غيرها لما عملت مونولوج كله شعر و سجع لوحدها و خلت صوت الضحك في الصالة هو اكبر دليل انها اجابة نموذجية لاي كلام هيتقال منها و بما قالت "الاقيها منين و لا منين... من لعب العيال بيا و لا من العزوبية... و بين كل افيه و افيه بتدي للناس فرصة للناس تضحك و مش اي حد يعرف يعمل كدة علي المسرح اصلها مش افيهات هترميها و تجري
و تكمل ماري" اه ثم اه ثم اه... للراغبين في الجواز حايشكوا عني مين... دة انا وردة و مفتحة بس انتوا مزكومين...

و احنا لسه في المسرح و تعالوا نشوفها و هي بتقول 4 كلمات في مسرحية الا خمسة... ممكن تنسي المسرحية كلها و تفتكرهم" انتي جاية تشتغلي ايه... بس اسمحيلي مدام ماري اقولك انتي جاية تشتغلي ايه؟

انتي جاية تشتغلي ضحكة تترسم علي اي وش زعلان لما يسمع صوتك... عن فرحة تخش القلب اول ما صورتك تطلع علي الشاشة... علي عشم في الضحك طول ما اسمك موجود علي التتر

انتي عملتي ما هو اصعب من ان الناس تفتكر اسم الشخصية بيكي... انتي خليتي ماري منيب يبقي هو اسم كل الشخصيات اللي عملتيها و اللي اتحفرت في عقول اجيال و اجيال... اللي هيدور مش هيهتم قوي بإسم الشخصية بس كل اللي هيشغل باله انه هيضحك يعني هيضحك عشان الاجابة النموذجية هي ماري منيب

#ماري_منيب

#الاجابة_النموذجية

#التتر

#كريم_مجدي

زينات صدقي

استني يابني أوعي تأكلها .... دي بقالها كتير في التلاجة و هتلاقي تاريخ صلاحيتها انتهي ..... وريني كده ... شوفت مش قولتلك الصلاحية انتهت من زمان ... أبقي خد بالك بقي.

-كل حاجة في الدنيـــا حوالينا بيبقي ليها تاريخ صلاحية بيجدد تقدرتستخدم أو تأكل المنتج ده لمدة كام يوم .. و ساعتها بنعرف ان بمرور الايام المنتج ده أهميته و جودته بتقل يعني أول يوم من تاريخ الانتاج الصلاحية و من قبلها بيوم كمان بنبدأ نخاف و بنقرر أننا نرمي المنتج ده ، و بنجيب منتج جديد .. اهي المقدمة صغيرة اهي .. ركزوا بقي في اللي جي .

-و نقدر نطبق نظرية تاريخ الصلاحية علي الممثلين اللي في منهم تاريخ صلاحيته بينتهي مع خروجك من السينما أو مع نزول التتــرفي اخر الفيلم وفي منهم تاريخ الصلاحية بتاعه بيقعد شوية في دماغ كل واحد فينا وفي بقي منهم اللي تاريخ صلاحيته مفتــــوح للابد زي زينــــات صدقي اللي دايما هفضلمحفورة في دماغنا بإفيهاتها و تمثيلها ..

-زينـــات صدقي مش مجرد أنها ست بتضحك مع اني شايف ان ديه حاجة في منتهي الصعوبة خصوصاً في وقت ظهورها اللي كان زحمة جداً من الممثلين الرجالة و اللي كانوا في مطحنة كوميديا و اللي مش قد المطحنة ديه كان بيتفرم ، فتلاقي ست طالعة من تحت الارض و دور تاني و يمكن تالت و هتلاقيها بتنافس و بتتقوق علي أبطال و نجوم العمل اللي ناس اساساً واقفين طوابير عشان يتفرجواعليهم واللي المنتج كان بيتعاقد مع النجم قبل الفيلم ... هتقولي الناس زمان كانت رايقة و ممكن تضحك علي اي حاجة ؟

        سامعك والله يا أبو قلب أسود مليان بلاوي انت ، طيب ايه رأيك ان إفيهات زينـــــات صدقي عملت المعادلة المستحيلة لانك وانت بتتفرج عليها مستحيل تقول اشهر جملة وهي "احنا ازاي كنا بنضحك علي الكلام ده "

و ساعتها بس هتعرف ان إفيهات زينــــات صدقي غير قابلة لمنطق انتهاء الصلاحية .

عبقرية زينــــات صدقي هتلاقيها انها برغم من ضعف الامكانيات ساعتها إلا أنها تقدر تسحب الضحك منك زي ما تقدر تسحب مفرش عليه 100 طبق فوق بعضه من غير مايتكسر ولا واحد و عمرك ما هتحسانها بتمثل يعني لو غمضت عنيك و سمعتها هتعرف علي طول انها زينات صدقي .. الإفيه اللي بتقوله بتسمعه في كل بيت مصري .. في كل صورة لشوارع وسط البلد القديمة .. للمطاعم الشيك اللي كانت في وقتها.

تخيل في زمن البدل السموكن و الفساتين السواريه و فتيات الاحلام تظهر ست بملامح مصرية أصيلة تسحب البساط من كل الناس و احفظ الاوبشن ده عشان هنثبته بالتفصيل بعد كده .

*طيب استني بقولك ايه ماتيجي نثبت الكلام كله بالاعمال بتاعتها ؟

 طبعا موافق صح؟

*هي حميدة في " ابن حميدو " و تعالي شوف زينــــات صدقي بتمثل مع مين في الفيلم ده "اسماعيل ياسين و عبد الفتاح القصري و توفيق الدقن " و دول بس اللي في ملعبها ده غير طبعاً احمد رمزي و هند رستم و ما بالك بالاتنين دول ... بس قدرت في وسط العمالقة دول انها تحفر اسمها كبطلة أولي للفيلم ده بدون مبالغة.

* اصلك مينفعش تنسي افيه " يعني ايه..يعني هافضل طول عمري عايشة لوحدي ..وحيد ولهان شريد حيران ...ابكي و انوح علي هوايا و اضحي قلبي في يوم في يوم في يوم هنايا " طيب و الله اتلخبطت كذا مرة و انا باكتبها فانت بقي متخيل هي بتقولها بمنتهي السهولة و كملت الافيه بالجملة العبقرية " دة حتي مش كويس ابدا علي عقلي الباطن "

-و تعالي شوفها و هي بتتفوق علي ملك الكوميديا "وقتها" اسماعيل ياسين في مشهد المطبخ و هي بتغنيله "بتبصلي كدة ليه و المكر جوة عينيه" او لما قالتله " مد ايدك خد المفتاح ...يا قاتل يا غادر يا سارق قلوب العذاااااري" او الافيه القاتل " انسان الغاب طويل الناب " و في لحظتها هتعرف مين بطل الفيلم اللي بجد و اللي يقدر يخليك تحفظ كلامه مهما عدت السنين...او لما قالت لاسماعيل ياسين بدلع قوي "ازيك يا ابن الحلال" و هنا عملت الكوميديا الرومانسية اللي يتمناها اي رجل في اي ست...زي لما قالت للقصري " لا يابا دة سرق بس" او في اول الفيلم لما قالت " مفيش مرة يا ربي اسحب الشبكة يطلعلي رجل"

**او مين ينسي دورها في فيلم "عريس مراتي" و المونولوج المسرحي اللي نقلته للفيلم " ايه فايدة الحلاوة من غير ما حد يحلي بيها يا ام كامل...ايه فايدة التفاحة الحلوة من غير ما حد يقطمها يا ام كامل...ايه فايدة الحلاوة السمسية من غير ما حد يقرقشها يا ام كاااااااامل" او كلمتها المشهورة " ياختي ياختي" او لما قالت " الشارع كله مليان رجالة محدش فيهم يصلي علي النبي و يتفضل"

**تعالي شوفها في اسماعيل ياسين في مستشفي المجانين و شوف مشهده مع عبد المنعم ابراهيم لما بيقولها "انا عمري ما حبيت...حبيت ازاي انا معرفش" و ترد عليه بكوميديا رايقة كدة " يا ندامة كدة من اول نظرة" و تقفل المشهد بعبقرية لما قالت " حتي الرجل اللي عرف يقولي كلمتين حلوين طلع مخه براني"

**او افتكر فيلم انت حبيبي لما قالت لفريد الاطرش " الست و جوزها لما يتخانقوا مع بعض معناها بيحبوا بعض..بيموتوا في بعض..ربنا يزيدكوا خناق...ربنا يزيدكوا عكننة" و كملت يا ندااامة دة انا معرفتش نفسي باحب جوزي غير لما كلت حتة من دراعه"

--لا وقف الضحك شوية بقي عشان اللي فات حاجة و اللي جاي حاجة تانية خاااااالص

**هي سنية ترتر في شارع الحب و تخيل بقي فيلم في معشوق الجماهير في وقتها و علي مر الزمان حليم و واحدة من جميلات السينما صباح و عملاق كوميديا زي النابلسي و القصبجي و محمد يوسف و غيرهم و تيجي زينات صدقي بكل عفوية و موهبة تتفوق علي الكتيبة دي و تفرض نفسها بطلة للفيلم...مين ينسي " انا الانسة حنفي يا مهدي الي الحديقة يا وارد افريقا " او لما قالت " يخلصك كدة يا حسب الله...تسيب حرمة ضعيفة زيي في بيت طويل عريض لوحدها..ييجري ايه لو ربنا يهديك و نتأهل..و تملالي الوسادة الخالية...انني لا انام" و هنا زينات بتعمل حاجة مش علي دماغ اي بشر انه بتستخدم اسماء افلام عادية جدا و تحولها لافيهات زي ما تجيب عجينة شبه بعض و تحولها لبسكويت له كذا شكل و طعم ...و تعالي شوفها و اضحك من قلبك و هي بتقود الاوركسترا في الاغنية اللي بتنافس بيها فرقة حسب الله...او لما قالوا فلتسقط الستات و دخلت زينات كأنها حصان محبوس و اتفتحله الباب عشان يجري في ارض واسعة و قالتلهم " يا اخي ان شاء الله تسقط بطنكوا زي ما سقطت من الجوع و ضربت محمد يوسف بالقلم" لو لما النابلسي قال "اللي اسمها مقسوم اتنين تر..." فترد زينات بصوت يهلك من الضحك تررررررررررررر

--لسة مخلصناش بس عشان متشرقش

*مش انا قولتلك انها بتستخدم اسماء افلام و تعملها افيهات طيب ايه رأيك انها هتقول جملة لغة عربية فصحي و هتضحك عليها...افتكر معايا كدة ساعة لما النابلسي قال هيتجوزها و قالتله " يا لهول تلك الصاعقة" و مين ينسي "نوم العوافي يا عريس متعافي" و نرجع تاني للغة العربية الفصحي لما قالت للنابلسي "العربون..العربون خليني اقدح زناد فكري" و اموت و اعرف جابتها منين.. طيب و الله لو اديتها روسي هتعملها افيهات...و قفلت المشهد بأشهر افيه " ياختي شبابه حلو...ياختي جماله حلو"

**انك تبقي نجم في سوق الانتاج فدة نجاح بس لما تبقي نجم تتر عند الجمهور فدة النجاح الاكبر و المستمر...زينات صدقي هي الملاية اللف اللي ظهرت في وسط فساتين السواريه...هي الضحكة اللي من القلب اللي طالعة في وسط الدراما و التمثيل العميق...هي اللي ملهاش تاريخ صلاحية...هي منتج تقدر تستفيد منه مدي الحياة

**الله يرحمك يا اشهر ضحكة في الزمان و اجمل ذكري في الحاضر و احلي علامة في المستقبل

#زينات_صدقي

#تاريخ_الصلاحية

#التتر

#كريم_مجدي

خالد صالح 2

-لا مش كفاية مقال واحد يا كريم...انت ازاي تكتب كل دة و تنسي دوره في الفيلم دة...بص هو المقال حلو بس مش كفايه عليه...هو يستاهل اكتر من كدة علي فكرة...المقال دة يعتبر مقدمة عنه دة يستحق يتكتب عنه مقالات اكتر بكتير...لا يا عم كريم فلتت منك المرة دي ...يعني يوم ما تجيب الرجل دة في التتر تنسي الدور دة

**دة كلامكوا انتوا فبلاش تتعشم ان المقال بدأ عشان لسه بافكركوا بس

-بصوا انا عارف اني جيبتوا لنفسي بس هأقولكوا علي سر ...هو فعلا يستاهل اكتر من مقال...حتي لو هاستغني عن مبدأ اساسي عن مبادئ التتر و هي التركيز علي الموهبة اكتر بس عشان كل دور له هو موهبة لوحدها...و انا هاكون باعمل ايه يعني؟؟ كل اللي باعمله اني باكتب عنه و دي متعة بس المتعة الاكبر اني قبل ما اكتب اي دور باتفرج عليه و هو بيمثل و دي بالنسبة لي بصراحة مكافأة لوحدها ...و اقعد اقول لنفسي دوس يا عم كريم هو مديك الاذن و موهبته بتعمل من الكتابة وسيلة من وسائل الراحة بعد تعب طويل...و لقيت نفسي بعد المقال الاولاني بالاقي زاوية مختلفة يمكن حتي في نفس الدور فسكت كدة و قولت يلا اكتب الجزء التاني من سي السيد خالد صالح


-خالد صالح هو التعريف الحرفي لنظرية احساس الاعمي "اه و الله باكلمك بجد" و خليني اقولك ازاي ما اصل انا مش باذاكر كدة علي الفاضي يعني :D  ...بمعني انك لو تخيلت نفسك اعمي في مدة اي مشهد لخالد صالح هيقدر هو يوصلك المشهد بعين المخرج اللي قال اكشن و باحساس خالد صالح و برؤية الكاميرا اللي مركزة معاه في المشهد...حتي هو مبيديش الفرصة انك تتخيل حاجة اعلي من اللي هو بيعمله لان اداؤه بيكسب اي رهان مهما كان خيالك واسع


-الرائع بقي في موهبة خالد صالح انه لما بيبقي عايز يعمل حاجة بيعملها يعني لو كوميدي سهلة...عايز دراما و الله موجود...نصاب معانا برضه...كلام يتعمل قانون لا بقي دة عندنا منه كتير و كل دور عن التاني بيخليك تحس ان اللي قدامك دة موهبته متجدده و حاطط في كل دور منهج...اه الدور و المنهج ثابت بس ممكن اكتر من جيل يستفيد منه

-كفاية كلام بقي و تعالي نتكلم بالدليل و محدش يخاف هنقول حاحات متقالتش في الجزء الاول :

-تعالي غمض عينك و تعالي نسمع مسلسل الريان و نشغله علي الصوت بس و هنجيبه علي مشهد و احمد الريان بيعاتب اخوه علي انه بقي مدمن و اسمع حواره لما بيقوله "مينفعش الناس تسيب البنوك و بتيجي تشيل فلوسنا معانا و بلاش بدل ما يشوفوا زبيبة الصلاة يشوفوا عيون مكسورة و ناس مدمنة" و هتحس هنا بطاقة وجع و خوف كأنك شايف المشهد بيمتثل قدامك و فجأة تلاقي الضعف دة اتحول لقوة غير طبيعية لما باسم سمرة قاله هتضرب اخوك يا احمد فيرد احمد الريان الشهير بخالد صالح و يقوله لو علي الضرب هاعملها او لو حتي هاغيرلك دمك بس دة مش هتشوفه تاني" و هنا هتلاقي ان خالد صالح بيلعب و هو بيستمتع بلعبة المشاعر انه ممكن يتنقل من الضعف الي القوة في شوية ثواني انت مبتلحقش تفتح عينك فيهم عشان تكون الصورة حتي...او تعالي شوفه و هو بيقول "البلد دي فيها احلي شغل " و بيقول حتة مبدأ اقتصادي بطريقة عبقرية لما قال "الحكومة مديونه عشان بتخلص شغل الساعة 2 و تروح ننام " لدرجة انك تتمني انك لو موظف حكومة تستقيل و تشتغل معاه


-تعالي نشوفه في دور ابراهيم فيلم احلي الاوقات و هتستمع بدور الرجل التقليدي قوي في بيته بس بخفة دم ممثل كوميدي مش طبيعي و مع ان دوره مكنش كبير بس مجرد وجود سي السيد في عمل فالترجمة الحرفيه انه بقي بطل من ابطال العمل و مين ينسي الافيه المشهور " الحب من غير امل اسمي معاني الحاجات يا يسرية" و بيقولها بمنتهي العمق اللي في العالم ...و حتي لما سألته هند صبري هو ممكن حد يدور علي حد بيحبه من 14 سنة فيرد ابراهيم باجابة منطقية جدا و في نفس الوقت توقعك من الضحك " اه لو فاضي" و دة حقيقي 14 سنة و لسه هندور او لما قالتله "اطلع ارمي نفسي من فوق السطوح يا ابراهيم" و يرد عليها بافيه اقوي بقي بكتير "تفتكري كدة هاشبع يا يسرية"


-هو الريس عمر حرب و هنا كان هو الحاجة اللي منورة في الفيلم كله و خلينا نفتكر لما شرح الناس لهاني سلامة و قاله "الناس هنا نوعين يا خالد...ناس معدومين الموهبة و كل طموحهم لقمة العيش و دول اللي يتحطلهم القانون...القانون سور يحميهم و يقيدهم في نفس الوقت ...النوع التاني...الموهوبين..اصحاب الاحلام و القدرات الخاصة...اللي يعرفوا معني الحرية...دول يتحطلهم متحطلهمش القانون غير عشان يكونوا فوقيه" و الله لازم تسقف بعد الكلمتين دول و خصوصا لما كمل و قاله " لو بس جاتلك الجرأة انك تحلم و تصدق حلمك "...في الدور دة خالد صالح كان بيعمل مشاهد بطرقة وان مان شو " one man show " كأنه واحد واقف لوحده علي المسرح و كل الممثلين يومها خدوا اجازة و هو طلع و عمل مونولوج لوحده يستاهل انه يبقي سي السيد...في مشهد عبقري لما قال لهاني سلامة "انا مدير كل الموظفين و الفاسدين ...الاتنين...و مش لازم كلهم فاسدين ...غلط...مش في مصلحتي حتي ...بس اذا قررت تبقي فاسد مينفعش ترجع تبقي برئ " و كل مونولوج تقدر تصنفه زي القوانين كدة و تبقي عايز تسمعه اكتر من مرة و هتلاقي نفسك حافظ الكلام بنفس تقسيم سي السيد


**ما تقوم كدة تفتح عينك و تعيش الواقع شوية عشان اللي الدور اللي جي دة محتاج ذهن صافي و عيون مرتاحة


-هو جعفر الرحالة في الجزيرة 2 و في الدور دة خالد صالح بيعمل كل حاجة و عكسها في دور واحد بمنتهي السهولة هتلاقيه في منتهي درجات السلطة و القوة لما بيتفاوض مع خالد الصاوي الممزوج بالثقة لما قاله "في دبور ما هتقدر تخلص منه ه الحين...خلينا في الدبور اللي سهل تخلص منه" و لما خالد الصاوي بيقوله ما تطلعوا بقي من تحت الارض و اعملوا حزب فيرد جعفر بسرعة و مصداقية غريبة و قاله " الرجالة اللي تحت ايدي مينفعش اتحكم فيهم غير تحت الارض" و شوفه و هو بيقول الخطبة بتاعت الطاعة و تشوف الثقة المصطنعة و كأنه بيمثل انه بيمثل عشان مع اول سؤال بيتقاله بيرد عليه بطريقة مختصرة قوي كأنه عايز يخلص من الاجابة و خلاص...و عايز تشوف سي السيد بجد شوفه في اخر مشهد في الفيلم و هو بيحاول يتفق مع الاتنين مع بعض و هم كلهم في صورة واحدة لما قال لخالد الصاوي " لا دي اول مرة و لا اخر مرة نتفق فيها " و لما ملقاش امل راح لافف للسقا و قاله " يا منصور انا و انت قوة غاشمة محدش هيقدر علينا اسمع كلامي و نتفق " و ساعتها هتتاكد ان الرجل اللي قدامك دة ممكن يعمل اي حاجة في اي وقت


**يلا فتح عينك و عيد المشاهد دي تاني صوت و صورة و اراهنك انك مش هتحتاج عينك في حاجة تاني.
شكرا يا سي السيد لان مهما اتكتب عنك  هتلاقي القلم حبره بيزيد و الورق بيجوع اكتر

#سي_السيد_2
#خالد_صالح
#التتر
#نجم_الشهر
#كريم_مجدي

خالد صالح

يـــــــــــــــــــــــاه فين ايام سي السيد...و حلاوة و جمال سي السيد..شخصية كدة تحس انك قدام معادله صعب انك تحلها..الكلمة المسموعة في البيت و اللي محدش يعرف يكسرها او حتي يعترض عليه...لما يتكلم الكل يسمع و في اوقات كتير عشان يتعلم و لما بيغيب احترامه موجود و تلاقي كلمته لسه بتتقال في كل مكان في البيت...لما يقول علي حاجة تتعمل اعتبرها اتعملت و لو اعترض علي حاجة...

لا استني كدة...يعترض علي ايه؟!!!

هو حد يقدر يقول اقتراح من غير ما يحس انه هيتقبل عند سي السيد...في عز الشدة هتلاقيه وتد يتسند عليه و في وقت العواطف مفيش احن منه...مراعي بيته و محافظ عليه و برة بيته ناجح في شغله و كلمته اللي جوة البيت مسموعه فهي برة البيت متقدرة بشكل يخليك تتمني ان احترام الناس للرجل دة يكون من نصيبك...الهيبة اللي في كل جملة بتتقال...الجملة الي بتبقي مناسبة لاي موقف لا فيها زيادة و لا نقصان حتي في وقت البصبصة و الدلع فهو حريف انه يتنقل من مرحلة الجد قوي لمرحلة الهلس قوي...و مش اي حد يعرف يعمل كدة انك حتي  و انت بتهزر لك هيبة


**بيني و بينك كدة...مين فينا متمناش في يوم من الايام انه يبقي زي سي السيد؟؟
بس من غير كذب و كلام افلام

-اه ممكن تبقي سي السيد في حياتك او حتي لو بتشتغل اي شغلانه بس انت لو ممثل مستحيل تكون سي السيد عشان التمثيل بيحكمه سي السيد واحد اسمه خالد صالح


-خالد صالح زيه زي اكتشافات ناسا كدة...اه و الله فعلا...انك لازم تدرسه قبلها بسنين عشان تعرف توصل لاكتشاف مفيش منه في العالم و مش بس كدة دة بيبقي مطلوب منك انك تقول لباقي العالم عن الاختراع دة في صورة بسيطة جدا يفهموها و تفضل موجودة و مؤثرة في حياتهم لاخر يوم بس هم شايفنها سهلة جدا بس ميعرفوش ان المجهود اللي وراها يهد جبال


-هو دة بقي يا سادة خالد صالح ...موهبة تكتشف كل يوم فيها حاجة و كل دور بيعمله تلاقيه بيمثله و ينسجه بمنتهي السهولة و في اخر كل عمل هتلاقي خالد صالح بيصحيك من حلم هو راسمهولك زي ما هو عايز...دنيا افتراضية هو اللي غزل تفاصيلها و لون جدرانها


-صعب انك تلاقي سي السيد في زماننا بس خالد صالح خلي انك تلاقي سي السيد في التمثيل سهل جدا كأنه بيقولك هو في حد غيري و لا ايه؟؟!!!

مهما كان اللي واقف قدامه في المشهد هتلاقيه باصصله كأنه سي السيد...ما هو محدش يقدر يعدل عليه او حتي يناقشه لان القرار محسوم عنده...انه سي السيد المشهد و هو اللي يقول للمشهد امتي يهدأ و امتي يثور


-يلا بينا علي العالم الافتراضي المملوك فقط لسي السيد خالد صالح...البس النضارة بقي و استعد


-هو كمال بك الفولي في عمارة يعقوبيان و مش هتلاقي كمال الفولي غيره...و احب اقولك ان كل مشاهده في الدور دة هو سي السيد فيها...يعني الكاميرا لازم تاخد اذنه قبل ما تروح علي الممثل اللي قدامه...
عارف هتقول ايه؟؟
حتي لو كان اللي قدامه نور الشريف بكل جبروته بس لو مش مصدفني...هاخلي كمال الفولي يثبتلك

-شوف اول مشهد بينه و بين نور الشريف لما بيقوله"انت عارف احنا مسميين دائرة قصر النيل ايه في المجلس؟ حتة الجاتوه" و شوف الثقة لما قاله "ايه رأيك في الرسم"....و تعالي شوف المبدأ اللي بيحطه كمال الفولي لما قال "اي حد عايز يرشح نفسه يرشح نفسه مش هنقوله لاء بس ينجح ازاي؟ مش تزوير لا سمح الله" و هنا هتلاقي النفوذ الكوميدي...او اشهر جمل الفيلم لما قال" الشعب المصري ماسك في ديل الحكومة كأنها امه اللي خلفته حتي لو امه دي ماشية علي حل شعرها" و لما بيكمل مشاهد الثقة لما قال " انت بتكلم رجل يعرف يوقف البلد و يقعدها"

-صعب انك تبقي بطل في 5 مشاهد...بس الاصعب انك تبقي سي السيد في الفيلم في نفس ال 5 مشاهد و ان من وسط مليون بطل كلامك يفضل محفور


-و نكمل مع رفعت السكري في تيتو و مين فينا هينسي شرح الخرارة اللي في اول الفيلم و حتي لما سأله الظابط الصغير علي معناها...خالد صالح عمل الافيه دة انه يقفل الجاكيت و رد فعل يخليك تستغرب ان هو نفس الشخص اللي كان بيتكلم جد قوي...و مينفعش نقول السكري من غير ما نفتكر اشهر جمل اتقالت "انا بابا يالا" و فعلا هو بابا اي مشهد بيظهر فيه...يا رجل و الله تحب فساد السلطة منه...و تحب الفلوس قوي لما قال " عايز تبقي محترم بجد...الفلوس هي اللي هتخليك محترم" ...دة وصل لمرحلة انه يمثل بالغمزة و حتي لما بيغمز ليها طعم تاني في التمثيل مش طبيعي لما قال لاحمد السقا علي اسمه الحقيقي


**خد نفسك بقي شوية


-فاكر لما قولنا انه صعب تبقي سي السيد في مشهد قدام ممثل تقيل...طيب ايه رأيك ان كاميرا يوسف شاهين بكل جبروته سمعت كلام و اوامر خالد صالح في دور حاتم في هي فوضي...و انك تلاقي شاهين اللي طول عمره بيركز بالكاميرا علي جوانب و اركان المشهد انه يتحول فجأه انه يركز مع خالد صالح في كل مشاهده فدة معناه انه سي السيد و محدش قده

-مين فينا ينسي "اللي مالوش خير في حاتم مالوش خير في مصر" او لما ضرب حرامي اللوحة و قاله " و حياة امك مانت شايف نور الشمس تاني" و علي قد الجبروت اللي انت شايفه قدر خالد صالح انه يغير جلده 180 درجة في مشاهد ضعفه و هو بيشوف منه شلبي و هي بتختار حد غيره و هنا بس تحس ان الدور مهما كان ايه هو بيجي قدام سي السيد و يستني يشوف هيتعمل ازاي؟؟؟


-حتي لما عمل بكر الرويعي في حرب اطاليا عمله بشكل يخليك تعشقه حتي و هو شرير...يعني ازاي متضحكش لما قال "اهرب اهرب يا ياسين ربنا معاك" او لما قال " و حيــــــــــــــــــــــــــاة امك ما هارحمك حتي لو جيتلي شايل كفنك" او الافيه لما ضرب خالد ابو النجا و قال " بيان علي المعلم"

-و شوفه و هو بيسلم علي السقا و هو مجبر و هتلاقي ساعتها ان وش خالد صالح تحول لاداة سهلة جدا يقول بيها كل اللي جواه و مش بس كدة دي توصلك كمان زي ما هو عايز


-هو دكتور حسن في فبراير الاسود و شوف مشهده العبقري لما قال " وصل ان الحياة في البلد لمرحلة البي البي و ان اي كلام عن الامل هو نوع من الوقاحة" و عايزك تركز قوي بقي لما بدأ يشرح مين هم الطبقات اللي من حقهم يعيشوا كويس في البلد و لما جه ناحية الطبقة الثرية قال " و دي ممكن تشتري اللي فوقها" و عايزك تركز قوي في تحويجة اداء خالد صالح اللي هتكون احلي من افخم تحويجة بن من البرازيل...مونولوج لوحده فيه كوميديا و وجع و خوف من اللي جاي...و يوصلك لمرحلة انك تحتار ما بين انك تضحك او تبص في الارض مكسوف ان دة الواقع...و في وسط الاداء الممتع دة تحس انه هينصب نفسه سي السيد بجد علي التمثيل


-تبقي عايز تحضنه في كل مشهد بتشوفه من الحرامي و العبيط و هو بيعمل فتحي...اداء كدة تحس انك عايش في وسط اطفال البراءة ملياهم في جنينة كلها زهور و ورد و لازم تدمع لما بيقول لخالد الصاوي "انت اخويا" و هتقع من الضحك لما بيقوله "مبعرفش اسوق ورا" ...عمل الدور و غلفه بلفة هدايا مكتوب عليها انك تحس بقلبك قبل ما تشوف بعينك


-و عشان يلمس قلبك قوي عمل بعد الفراق و هتعيش حالة اجتماعية غريبة مع خالد صالح ...خصوصا خالد صالح و مع كل حلقة هتلاقي نفسك بتتعلق به اكتر...و كل ما تنزل جامعة الدول هتفتكره في اداؤه السهل اللي لما تشوفه تتمني انك تبقي عيل من عياله


-عايزك تركز معاه في عن العشق و الهوي و الحوار اللي مليان خبرة و وجع رجل في منتهي القوة لما قال لمني زكي "ينفع اخلي الناس تغنيلي بس صعب قوي يغنوا عليا" و لما قال " كل اللي محتاجه شوية حنية" و تحس في نفس الوقت ان الجملة نفسها فيها كل حنية الدنيا


-هو القنصل و الكوميديا اللي عملها صالح في الدور دة حاجة كدة علي نار سبرتايه في عز البرد تدفيك و تديك احلي فنجان قهوة...فاكرين لما قال "انا قولت 1 ش الشهيد اوتومان" او لما قال وجع قلبنا كلنا لما صدق ان عصام دة ابنه و مات منه في المقابر


-قولنا انه بيمثل بالغمزة و بالوش و بقفلة الجاكيت صح؟؟
-طيب ايه رأيك لما يمثل بصباعين لما سأله احمد عز في ملاكي اسكندرية خدت كام فيشاورله في مشهد مش باين فيه حتي وشه بس محفور في دماغنا كلنا

-حتي مشهد الموت علي المسرح اللي عمله بتلقائية شديدة جدا...تخيل معايا كدة بيمثل بالاداء دة من غير اي ادوات تساعده غير اداه واحدة بس اسمها خالد صالح


**عمنا نجيب محفوظ اكيد لما كتبت الثلاثية و شخصية سي السيد انه كانت واقع من الحارة المصرية...بس احنا كنا محظوظين مرتين اننا قرأينا الثلاثية و محظوظين اكتر اننا شوفنا سي السيد التمثيل في شخص يدعي خالد صالح


**اسمحلي بس في اخر المقال اني اقولك ان دة من المقالات القليلة اللي كل مشهد اكتبه و كل حرف اقوله عنك عيني بتدمع و باقول الله يرحمك و اكيد كل ما حد هيفتكر المقال هيفتكر مشهد ليك هيبقي و يلوم الموت انه حرمنا منك...تعيش فينا يا سي السيد و نعيش بيك


#خالد_صالح
#سي_السيد
#التتر
#كريم_مجدي

المذيعين في الكرسماس

تعلن المدرسة نتيجة مادة التوك شو و هي النجاح بالاجماع "سبحان الله" و عشان كدة قررت المدرسة تطلع الناجحين كلهم رحلة لمول "مصر" مكافأة ليهم...يلا يا استاذ ادخل بلغ الطلاب بالقرار دة

-لا و النبي يا حضرة الناظر اكتب ورقة و علقها عشان لو دخلت اتكلمت معاهم في اي حاجة مش هيسيبوني

-حاضر يا سيدي و عاذرك...و ادي الورقة ...ميعاد التجمع 9 و هنتطلع بالاوتوبيس 9 و نص و محدش يتأخر

------------------------------------------------------------------------------------------


-يلا يا معتز واقف كدة ليه يا اخي ما تركب؟

-سيبني يا احمد مش مرتاح للرحلة دي حاسس انها كمين و معمولنا

-بالعكس يا صاحبي دي بتعبر عن ذكاء المسئولين عن التعليم في مصر و عشان كدة قادرين ازاي يعرفوا يفرحونا

-يا احمد ارحم نفسك شوية دة احنا حتي واقفين لوحدنا و محدش سامعنا و بخصوص محدش سامعنا دي عايز اقولك انا هاموت و اقول انها هتبقي رحلة حلوة بس مش قادرة تطلع مني يا جدع

-بس قولي يا معتز مش المدرسة قالت اننا نيجي بالوان موحدة عشان شكلنا يبقي حلو؟؟ ايه اللي انت عامله في نفسك دة بقي؟

-انت عايزني اسمع كلام المدرسة و اعمل زيك يا احمد يا موسي...انا عارف مصلحتي كويس و عارف ايه الهدف من انهم يقولولنا كدة و مش عايز اتكلم؟؟

-طيب وطي صوتك يا عم فضحتنا...هم عارفين مصلحتنا اكتر مننا اومال عايزني اعمل زي شريف عامر و اسامة كمال و اجي بلبس المدرسة

---------------------------------------------------------------------------------------------

-ازيك يا شريف ...و الله فرحتني انك كمان جيت بلبس المدرسة

-اه طبعا يا اسامة كله الا تعليمات المدرسة لازم نمشي عليها و لا نيجي يمين و لا شمال...الطالب دايما محايد خلينا ننجح من سكات كدة

-الا قولي يا شريف احنا هنبدأ مذاكرة كيمياء امتي؟

-كيميــــــــــــــــــــــــــــــــــاء ايه و بتاع ايه؟؟؟ ما هي شكلها رحلة زي الفل و قشطة علينا كلنا اهو و ان شاء الله لو عايزين الامتحانات لحد عندكوا قولولي بس و ملكوش دعوة

-طبعا يا عم عمرو حقك ما انت الوزير كل شوية يكلمك و الجزء اللي مش عاجبك من المنهج بقدرة قادر بيتشال..دة حتي يا رجل معاك ارقام اللي بيحطوا الامتحانات اللي احنا حتي مش عارفين شكلهم


-اومال فين تامر يا جماعة مجاش ليه؟

-مين دة اللي مجاش؟ مجاش باللحمة ههههههههههههههههه

-يا تامر كفاية افيهات بقي يا اخي متقفلش الرحلة من اولها

-لا باقولك ايه يا عم شريف انا فاهم في الرحلات اكتر منك و ليا في المولات فيستات و اسأل عني


**ها يا جماعة كله جه؟ نتحرك؟

-لسة يا استاذ وائل و لميس بيجهزوا السنة اللهب و بيخلصوا في خناقة في 3\3 و جايين علي طول

و يتحرك الاوتوبيـــــــــــــــــــــــــــــــــــــــــــــــــــــــــــــــس


-يا وائل متقعدش في الكرسي الاول عشان دة بتاع عمرو اديب يا حبيبي

-قصدك انه هيبقي مشرف علينا...ما ترد يا عم معتز؟؟

-لا مفيش حد واصي علينا و الزمن دة عدي خلاص و لازم كلنا نبقي سواسية بس الله غالب يا عمرو يا اديب

-يا جماعة اكيد السواق شايف حاجة في زميلنا عمرو احنا مش شايفنها

-بس انت يا احمد و  متتحركش من علي الكرسي القلاب


**و يوصل الاوتوبيس المول


-يا معتز افرض سحنتك يا اخي دة المول شكله يهبل

-انت اي حاجة هتعجب يا احمد و بعدين دة حتي باين من اسمه مول "مصر" و دة اسقاط علي مصر انها مجموعه من الحاجات التافهة و الغالية و سايبين الفقراء ياكلوا في بعض

-دة بالعكس يا ميزو دة متسمي كدة عشان اتبني بسرعة زي كل حاجة في مصر بتتبني بسرعة و ان مصر وصلت ان يبقي فيها رفاهيات كتير جدا جدا الناس مش شايفها...تعالي بس محلين اهم بتوع هدوم ندخل نتفرج عليهم

-انت بتهزر يا احمد يا موسي مدخلنا محل مكتوب عليه "صنع في مصر" من اولها كذب كدة...هو في حاجة بتتصنع في مصر و خلو فيه هتلاقي خامتها وحشة جدا و اسعارها غالية قوي

-دي الخامة دي احلي حاجة في المحل دة و شوف الوطنية و الاخلاص في المسئولين عن المحل دة حتي من كتر التعب نايمين..طيب تعالي شوف الجاكيت الاسود دة شكله حلو و كمان عليه خصم

-و لا خصم و لا حاجة هتلاقيه فنكوش في الاخر و نصباية...باقولك ايه تعالي نشوف المحل اللي جنبه

-اه يا لئيم بتاع "صنع في تركيا"

-اه اهو كل واحد ينام علي الجيب اللي يملاه

-اتفضل يا سيدي اهم نايمين هم كمان نفس النومة

-لاااااااااا اوعي تظلم الناس ...هتلاقيهم نايمين من كتر التعب و الشغل في ترتيب الهدوم

-يا بني دة نفس ترتيب الهدوم

-لا بس دول موظفين من برة يعني ترتيب عن ترتيب يفرق..انت ايش فهمك انت؟؟ اسكت بس و تعالي نشوف الجاكيت الاسود دة عليه خصم؟؟

-انت هتجنني يا معتز؟؟ ما هو نفس الجاكيت و نفس الخامة

-مستحيـــــــــــــــــــــــــــــــل دة مصنوع في تركيا...روح انت يا اخويا هات التاني


-----------------------------------------------------------------------------------------------------

-عمو عمو...حضرتك اسمك فؤاد؟

-اه يا حبيبتي عايزة حاجة؟

-لا بس انا سمعت الست اللي كانت واقفة مع حضرتك بتتكلم مامتها في التليفون و بتقولها فؤاد دة بخيل قوي فكنت باتأكد ان حضرتك البخيل...ٌصدي فؤاد و لا لاء؟

-طنط حضرتك تعرفي الرجل اللي واقف مع لميس هناك دة؟

-مين لميس دي يا حبيبي؟

-دي زميلتي في المدرسة اصلي سمعتها بتقوله معلش استحملها انها بتصرف كتير...شكله كان بيشتكيلها...دي حتي قالتله عيب يا عمو تقول الالفاظ دي قدامي

-هو قال كدة؟

-اه بس انا جي اقول لحضرتك عشان تقوليله عيب احنا متربيين


**ها يا لميس المحل كدة بقي فاضي...ندور براحتنا بقي
**لا لسه في بياع هناك اهو
**طيب يلا بيننا

-عمو كنت عايزة اشوف البنطلون الكحلي و البلوزة الموف و الجزمة البرتقالي و الشراب الاحمر

-واحد واحدة يا حبيبتي انا لسة مستلم وردية

-لا يا عمـــــــــــــــــــــــو لو انت مش قد البيع سيبها و امشي

-في ايه يا لميس انا جيبت صاحب المحل اهو

-الحقني يا وائل بيقولي مش قادر يجيبلي كل طلباتي

-شوفت يا سيادة المدير و دة هيأثر طبعا علي مصير و سمعة المحل اللي طول عمرها في السماء

-لا مينفعش طبعا يا وائل...انا هاجيبلها كل الحاجات بنفسي و هامشي البياع و امسك انا مكانه ..بس قوليلي طلباتك واحدة واحدة

-انت كمان؟!! لو انت كمان مش قد البيع سيب المحا و امش.....

-انتي بتقولي ايه؟!! انا صاحب المحل

-اه صحيح...ومحدش يقدر عليك يا محل ...الله عليكــــــــــــــــــــــــــــــــــي يا هدوم

---------------------------------------------------------------------------------------------

-يلا يا جماعة ...يلا يا تامر اومال فين شريف و اسامة؟؟

-دة الجزء التاني بعد بسنت و دياسطي كدة هههههههههههههههههههههه

-يا بني ما هو خفة دمك دي هي اللي مش بتخليك تعمر في مدرسة واحدة...هم فين يا بني؟؟

-في محل الكتب هاروح اناديهم

-يا اسامة ...يا شريف...يلا عشان نروح ...هو انتوا جيبتوا ايه؟؟

-جيبنا شوية كتب و كويس اننا مروحين عشان نلحق نخلصهم...انت مش هتجيب كتب معانا يا تامر؟؟

-انا اجيب كتب!!! يا بني انا ممكن اكتب كتب احسن من دي 100 مرة...دة انا تامر امين يا بني

-------------------------------------------------------------------------------------------


-يا جدعان محدش شاف عمرو ...من اول الرحلة محدش شافه؟؟

-مشفتهوش يا معتز

-قصدك ايه يعني؟؟ بتحملني مسؤلية اختفاؤه

-يا ابني ارحمني بقي ...خلاص ملكش دعوة...روح يا احمد اسأل عليه في مكتب الامن

-دة انسب قرار حضرتك قولته و مفيش احلي من مكتب الامن اللي يعرف كل حاجة...اصله مين فينا كان هيبقي عنده بصيره زي حضرتك كدة

-يا ابني اهدي علي نفسك شويه و روح...مكونتش تتوه معاه و نخلص

-علي الطالب عمرو اديب الذهاب الي مكتب الامن عشان تروح مع الاوتوبيس

*تليفون مكتب الامن بيرن

-الطالب عمرو اديب قاعد مع صاحب المول و هيروح معاه في عربيته

-------------------------------------------------------------------------------
في نهاية 2017 كل واحد فيهم هيروح بيته و ينام و هيصحي تاني يوم في 2018 هيكمل اللي بيقوله...مش مهم بقي كل واحد فيهم بيقول ايه...الاهم انت ياللي بتتفرج عليهم هتفهمهم ازاي؟؟؟؟

كل سنة و انتوا طيبين

#التتر
#خليك_انت_اللي_فاهم
#كريم_مجدي

ماجد الكدواني

كل واحد فينا عنده كلمة سر في حياته صح؟
مش كلام عميق متخافش

-يعني الايميل بتاعك له اكيد كلمة سر انت بس اللي عارفها..موبايلك له كلمة سر..و لو ربنا كرمك بفلوس في البنك برضه بيبقي ليها كلمة سر..كل حاجة في حياتنا ليها كلمة سر و اكتر واحد يعرف يقدر و يحط كلمة السر لاي حاجة هو صاحب الحاجة نفسها..و علي حسب اهمية كل حاجة بتبقي كلمة السر بتاعتها..عشان مش بس محدش يعرفها لا دة كمان عشان دي بتبقي الوسيلة اللي هتوصلك لحاجة مهمة بتبقي عايز تحافظ عليها...في اللي بيعمل كلمة السر تاريخ ميلاده او اسم حد بيحبه او لو فكر يسهلها قوي بيعملها رقم تليفونه...بس في الاخر بتكون حاجة تخصك او حاجة مهمة في حياتك عشان دايما تفتكرها...و ساعة لما تعمل كلمة سر علي حاجة مهمة شويه بتبقي مركز زي الثانوية العامة كدة..يعني من الاخر لازم لما تختار كلمة سر تكون دايما برة الصندوق و محدش يقدر يحلها غيرك انت...انت و بس


-كلمة السر عمرها ما هتتنسي عشان انت عارف قد ايه هي مهمة و مينفعش تتحط اي حاجة و السلام و عشان اي فيلم ينجح او بمعني اصح لو عايز اي كاميرا فيكي يا مصر تنور و تفرح لازم تحطلها كلمة سر دايما تكون برة الصندوق..لازم تكتبلها "ماجد الكدواني"


-ماجد الكدواني مش مجرد كلمة سر لاي نجاح عمل بيشارك فيه دة هو اللي بيعمل نجاح اي عمل...موهبة متعرفلهاش هي ايه؟؟!!
عبقري و لا بسيط...كبير و لا صغير..مركب و لا خيالي...عميق بجد و لا شوية افيهات توقعك علي نفسك من الضحك و خلاص بس في كل الحالات اللي فاتت انت بتطلع من اي عمل محفور في دماغك كلمة سر اسمها "ماجد الكدواني" و اي حاجة متعلقة بيها بتفضل محفورة في عقلك عشان اول لما بتدخل الفيلم بيبقي قدامك الحاجة مقفولة متعرفش لسه ايه اللي بيحصل جوة بس اول ما بيجي الكدواني كلمة السر بتفك اي شفرة و تفتح عينك علي زاويا عمرك ما تتخيل انها موجودة


**تعالوا بقي نفك شفرات شوية من كلمات سر العبقري ماجد الكدواني


-نسافر تايلاند و نشوف فطين في "حرامية في تايلاند" و في الفيلم دة هتشوف طفل دمه خفيف قوي اسمه الكدواني...كوميديا تضحكلها من قلبك كأنك شايف طفل صغير بيقول حاجة انت مكونتش متوقعها...و شوفه في افيه لما كريم عبد العزيز كان عايز يطرده و قال "ما انا برضه مكنش ينفع اقوله حاجة زي كدة" و تلاقيه سكت شوية و يقول " بس انا قولتله ايه" و الافيه اللي مينفعش يتنسي "ابراهيم احنا قولنا هنجرب الفستان بس" و في الدور دة تحس ان الكدواني انه بيعمل فيلم كارتون في صورة انسان كبير و تحس انه طفل جدا لما حضن اخوه و قاله " انا بحبك قوي يا ابراهيم"


-في المواقع الصغيرة زي بتاعت الاغاني بيطلب منك انك تعمل كلمة سر اي كلام كدة عشان تقدر تدخل علي الموقع..او ماجد الكدواني بيعمل كلمة سر خاصة به حتي لو في عمل ترفيهي او تقدر تقول تجاري زي فيلم " مقلب حرامية" و دور توفيق الارم و الكدواني لسه بيتحدي انه في اي عمل لازم يبقي له بصمة ان شاء الله يكون معدي من قدام الكاميرا من اول افيه " هي الشبكة القديمة راحت فين" و حتي لما طلب فلوس و قال " 20 الف اخضر " و شخط فيه صلاح عبدالله راح اتعدل بسرعة و قال " اخضر عشرينات يعني" او لما ايمان العاصي سألته هم بيشربوا ايه قالها "مقويات" و عايزك تتفرج عليه و هو بيتكلم محمود عبد المغني و هو واقف قدام الاسلام و هو بيقوله "صلي علي النبي..طيب زيد النبي صلاة ..وحد الله بقي " و لما قاله احمد السعدني اصله يا طوفي قاله " بلا طوفي بلا لبان"...و زي ما ضحكك عنده القدرة انه يبكيك لما اتضرب بالنار و قال " نزلني هنا يا سيد"


-هو اجدع نبطشي افراح فيكي يا مصر و من بعده محدش عرف يعمل كلمة سر زي العسلي في فيلم الفرح من اول سمعني ذئاب الجبل ذيب ذيب لحد ابو شيماء اللي اتهووووووور" و الكلام ممكن يكون جمل محفوظة بس طريقة الكدواني اديتها شهادة الايزو انه تطلع بشكل محفوظ باسم الكدواني...و له جملة في الفيلم زي ما يكون هو اللي بيقولها للدور لما قال لخالد الصاوي "هو انت جايب اي حد ..دة انت جايب العسلي" و فعلا محدش هيعمله زيك يا كدواني...و في مشهد لما قال لامه بمنتهي الغل و الغلب "نسيني اللي عمله في وشي ياما و انا اسامحه" و هنا تحس ان الرجل دة عنده القدرة انه يتحول باكتر من احساس في نفس الشخصية الواحدة


-هو خميس حامد في كبارية و هنا كلمة سر عجيبة قوي يا اخواننا انك تشوف صاحب كأس و في كباريه و تتعاطف معاه و تحبه زي لما قال " مش عارف ليه بس الموت مش واخد باله مني" و هنا بيمارس الكدواني هوايته المفضله انه يلعب بالكلام و الاحساس مع بعض...و الكلام عنده قميص بدلة بس لازمله زراير دهب عشان تبين قيمته و هي دي الاحساس


-هو العبقري " كلاوي" اللي مبيعرفش غير الكمبيوتر ابو سلك عشان مخدوش في الكلاس...هو صاحب الافيه "اصل العبوة كانت صغيره شويه و برغم ان الافيه عادي بس طريقة كلاوي تخليك تضحك...او لما قال ثقب صغير في ال details كدة و برضه تحس انك مش قادر تتخيل كلاوي تاني غير الكدواني



-هو مارد الكدواني في طير انت ...و فعلا كان يستحق انه يقول الجملة اللي علي اسم الفيلم..مين فينا ينسي افيه " هو انا لازم اطلعلك بقرون و حوافر عشان ابقي عفريت" و يصعب عليك و هو بيقول "انا بقالي 112 سنة في 3 اعدادي" او لما قال " 3 حاجات مقدرش اتحكم فيهم الحب و الموت و اي حاجة تتعلق بسياسة الدولة العليا"
و الافيهات لسه حاضرة لما قال " الله يخرب بيت السيما اللي سوءت سمعتنا دي..يا بني كل دة جرافيكس" و لما قاله "بس دة شريف منير و دة مصطفي قمر بس انت لو تحدد بس"
و تحب شبرا لما سأله مكي انت منين و قاله من شبرا...عارف سينما شبرا بالاس اول شمال عند الحاج ابراهيم بتاع الكارباتير..و هنا الكدواني بدون اي مبالغة شريك اساسي في اكتر من نص الضحك اللي في الفيلم


-و عشان نكمل كلمة السر مع مكي مينفعش منقولش "سراج بيه" في لا تراجع و لا استسلام و من اول مشهد و صورته و هو بيشرح المهمة و تحس ان الكدواني مش هيعديها علي خير...و في الفيلم دة عايزك تركز في وشه و تعبيرات وشه لما بيقول نعم علي كلام اللي قدامه زي لما المترجمة قالتله " بيستأذن بس يفك مياه" او لما دنيا سمير غانم قالتله "كنت راكنة صف تاني عند سمسمة " و هتلاقي ردود فعل وش الكدواني هتوقعك من الضحك حتي لو مكنش قال افيه...و لما كان متنكر في سوق نص نقل و تاكسي وقفله و بيقوله اي خدمه قاله " بوليس" او مين فينا مبيستخدمش افيهات "ادينا بنروح في داهية اهو" او "هاتلي الحباية من علي الجمل بسرعة" و منقدرش ننسي خزنة الوزارة اللي دايما مش هيطلع منها غير اقل من اللي طلبه حزلقوم


***ما تقوم تعمل قهوة دوبل كدة عشان الصحصحة
علي ايه يا عم كريم قهوة؟ ما هي شكلها كلها افيهات
طيب اتقل...عشان خاطري تتقل


-شفت بقي الكدواني و هو بيضحك...عايزك تتفرج علي فيلم اسماء و هتشوف المذيع محسن السيسي و هو نموذج لمذيعين كتير "هتلاقي مقالهم في الصفحة بالمناسبة" و كل مهمته انه يخلي اسم برنامجه صفيح ساخن اسم علي مسمي...و شوف في اول الفيلم مشهده و هو راجع البيت لما حد من ضيوفه بيقوله ايوه كدة افضحهم و يرد الكدواني بمنتهي الصدق الغريب" يا عم كلنا بناكل عيش..يعني انا لو كنت باعرف اغني كان زماني عامل حفلة علي البحر في مارينا دلوقتي..كلنا علينا اقساط يا برنس" و هتلاقي احساس الكلام بيدحلب عشان تصدق ان الشخص دة انتهازي فعلا...او المشهد في الاسانسير مع رئيس جمهية الايدز لما بيقوله " ايه رأيك اعمل حلقه الم فيها تبرعات و نشتري بيهم جاز و نولع فيهم كلهم ما هو كدة راعي الغنم لما ميلاقيش يأكل غنمه بياخدهم الصحراء و يسيبهم يموتوا...و لازم تشوف مشهد النهاية لما قال ان في فاعل خير اتبرع ب 300 الف جنيه عشان يعالج اسماء و هنا الكدواني بيمثل انه بيمثل...اوضحها؟؟
يعني هو كان بيمثل انه وصولي بس في الاخر ضحي بفلوسه عشان يعالج واحد هو ميعرفهاش بس اتعلم منها حاجة


-اي كلمة سر مع ماجد الكدواني دايما بتبقي "تحت السيطرة" زي ما عمل رؤوف المدمن و اول ما بيظهر علي الشاشة بتحس احساس ان واحد صاحبك مشفتوش من سنين و قابلته صدفه...و في المشهد دة الكدواني قدر انه يتفوق علي 30 حلقة بمشهد مدته 9 دقايق...مونولوج لوحده فيه الوجع و الكوميديا السوداء و الاصرار و وجع الاب علي ولاده و ندمه علي تقصيره في حق امه...ازاي كان موجوه و هو بيحكي انه شد الحلق من ودن بنته و ازاي كان ندمان انه كان بيرجع دواء امه عشان ياخد فلوسه و يجيب بيها مخدرات...و عايزك تركز علي عنيه و هو بيحكي اللقطة اللي قرر فيها انه يبطل لما ابنه شافه في الحمام و شاف في عيونه نظرة رعب و ساعتها تبقي عايز تروح لابنك تحضنه في الحقيه...او لما قال "اكتشفت ان وجع التبطيل اقل بكتييير من وجع الضرب" و هنا الكدواني بيحط مبدأ للتمثيل انك ازاي تبقي بسيط قوي في كلامك بس تكون مؤثر بعد ما تقوله


-و هو صاحب المبدأ و المحاضره و يا اخي تحب الحب بعد ما تشوف المشهد العبقري في المحاضرة لما قال " الحب الكامل و لو لدقيقة واحدة هو اللي بيحسسنا في لحظة النهاية انه قد ايه الحياة حلوة...حلوة بجد"  " كلنا عيزين نحب...كلنا ممكن نحب...كلنا نقدر نحب بس لازم نكون عارفين حاجة مهمة جدا انه تمن الحب هيتقسط علي كل دقيقة في عمرنا" و هنا ركز مع حركة ايده و هتلاقيها برضه بتقول كلام و في قعدته تحس بحنية العاشق مع التنهيدة اللي في المشهد حتي بعد المحاضرة و عنيه اللي مليانة شوق تحس انك شايف طاقة محسوسة فيها اشتياق لحاجة غير طبيعية و ساعتها انت دماغك هتوديك لحاجة انت مشتاقلها بقالك كتير



***ماجد الكدواني كلمة السر اللي حدش يعرفها غيره و لا حد يقدر يفكها...و لا تقدر علي نسيانها

انت عبقري يا كلمة السر

#ماجد_الكدواني
#كلمة_السر
#التتر
#كريم_مجدي

محمود البزاوي

-ايوة يا كريم ...مال صوتك؟؟
-جدول الامتحانات نزل يا عم و احنا لسه مذكرناش حاجة..هنعمل ايه؟؟
-زي كل سنة
-ايه هنسقط يعني؟
-لا يا عم هنحجز مع المدرس اللي قولتلك عليه...دة "برنس" و هيضمنلك انك تفهم اي حاجة صعبة باكتر من طريقة
-تصدق صح..طيب يلا بيننا

ط
-مع كل مرحلة في التعليم بيبقي قدامها مرحلة من الانبهار بمدرس معين و بيكون في الطبيعي واحد او اتنين باكتير..و بيجي انبهارك دة من ان ازاي في شخص ممكن يشرحلك حاجة انت شايفها درب من دروب الخيال في صورة مبسطة جدا...يعني ايه تحس انه خايف عليك من اي معلومة غلط ممكن يديهالك...يبقي طاير بيك لما تفهم و يزعل قوي من نفسه لو فشل انه يوصلك المعلومة..من الاخر كدة تحس انه عنده ضمير لسه صاحي..يدخل الحصة في ميعاده و لو عندك اليوم كله هتلاقيه عدي كأنه نص ساعة


-و كل ما نكبر مستوي انبهارنا بيزيد عشان مستوي المعلومات بيزيد بس بيفضل اول مدرس بنقابله هو اللي بيحط او طوبة في مبني شخصيتك لان احترامك له بيبقي في قمة مستواه و مش عشان بس بيديك معلومات لا دة كمان بيبني شخصيتك معاك من غير حتي ما تاخد بالك


-كل واحد فينا اكيد لازم يبقي حافظ جملة قالهاله المدرس بتاعه زمان لما لقي ان مجهوده مبيضعش علي الفاضي...لما بيزعل لما بنجيب درجة مش تمام و هو قوي لما بيواسيك في وقت ضعفك و يطبطب عليك و قد ايه هو قوي في الحصة و في نفس الوقت بيبقي طفل زيك عشان يقدر يوصلك المعلومة علي قد دماغك و لو نزلنا فسحة و قابلنا ناس اكبر مننا و جبنا سيرته نلاقيهم بيقوله عليه احلي كلام و ساعتها انبهارك بيتحول لاعجاب ممزوج بطموح...اعجاب انه ازاي ارجل دة قادر يخاطب اللي زينا و اللي اكبر مننا و طموح انك تبقي زيه مش بس مدرس بس كانسان


*يلا بينا بقي ندخل فصل استاذ محمود البزاوي اصله عندنا اساسي و احتياطي النهاردة



-اول حصة معانا هتبقي "همام في امستردام" و دور طه القناوي و الكوميديا اللي عملها في الفيلم دة هي بطريقة الشوكولاته الصغيرة اللي تلاقيها علي مكتبك الصبح او علي باب بيتك اخر النهار...حاجة صغيرة بس بتحلي اليوم كله و هي دي بالظبط مشاهد البزاوي في الفيلم...قليلة بس بتحلي الفيلم كله يعني مين ينسي "تاويته" و كأنه بيقتل حد و هو مخبي ريش اساسا بس بطريقة البزاوي عمل من كلمه افيه يحلي الفيلم و طبعا مينفعش يسكت علي كدة لما اتكشف مكان الريش و هو بيقول لهنيدي "ايه حد التقاه يا استاذ همام" او الحماس اللي قال به "افتح الكـــــــــــــــــــــــــــــوز" و شوف موهبة البزاوي و هو بتحفر في دماغك مشهد الشكوي لهنيدي و كأنه طه تاني خالص غير بتاع الريش



-تاني حصة مع فرقة ناجي عطالله و عشان تقف قدام الزعيم فمعني كدة انك في مرحلة الوحش بس انك تتتضحك قدام الزعيم فانت عديت مرحلة الافاتار و ان عندك اللي مش عند كتير...الشيخ حسن عمل مزج غريب بين الجد و الضحك يعني مثلا لازم تضحك في مشهد رفض الشيخ حسن انه يسرقوا البنك بس لما عرف انه في اسرائيل رد بمنتهي الحماس و حول الجد لضحك و قال " و ان ينصركم الله فلا غالب لكم" و لو عايز تشوف البزاوي بعيد عن الكوميديا دور علي مشهد شرح ناجي عطالله لسيناريو سرقة البنك و هو بيقول و الشيخ حسن قادر دلوفتي يعملنا قنبلة في 40 ثانيه فيرد البزاوي بمنتهي التركيز " و اقل من كدة كمان ان شاء الله" و مع انها جملة عادية بس هو قدر يوصلها و كأنه شايف المشهد دة و عاشه علي ارض الواقع مش مجرد ممثل واقف في وسط ديكور



-تالت حصة مع الادهم في دور بهجت طاحون و هنا بقي نبدأ الحاجات اللي ممكن تيجي في الامتحان ..بهجت هو نموذج "الدماغ" في اي عائلة بينها خلافات سواء مالية او معنوية و فيها عمل البزاوي دور نفسي داخلي اكتر من تمثيل خارجي...اصلك مينفعش تعمل دور اللي بيخطط لاي مصيبة بتحصل عشان في الاخر كل حاجة تيجي في مصلحته هو حتي لو مظهرش..لا و مش بس كدة دة بيوصل لكل الناس انه في صفهم و هو في صف نفسه بس..من الاخر البزاوي في الدور دة كان بيمثل علي الممثلين نفسهم ..طيب اقولك علي حاجة اتقل؟؟
البزاوي في الدور دة مثل بنفسه "اللي هو الشهيق و الزفير" في انه قدر يقسم حركات تنفسه عشان يوصلك هو قد ايه خايف يغلط من اي كلمة او خطة بيحطها


**يلا فسحة عشان هنرجع و نشرح اللي هيجي اكيد في الامتحان

عمرك شوفت بطل من جملة واحدة؟؟
زي ما باقولك كدة....هو انا هاغشك يعني؟؟

-شوف فيلم من 30 سنة و جملته "هتقتل تسعة" و انت هتخاف و انت بتتفرج علي الفيلم عشان انت هتنسي خالص ان دة ممثل بيقول جملة مكتوبة في سيناريو و هنا لعب البزاوي علي موهبة صوته و طريقة توقيفه لشريف منير و كملها حلو قوي مع نظرة عينه



-هو البرنس في ظرف اسود و مشهد لما بيقول لخميس ابنه اخد الحق صنعه و الدنيا مش بالدراع...و في نفس المشهد تلاقيه بيحيرك اذا كان بيتكلم جد و لا هزار لما قال " اوعي ياض تفتكر ان اسم البرنس دة جه بالدراع و خلاص...دة جه بالحب...و عشان كدة اهم حاجة في الحياة دي كلها ان الناس تحبك بس في نفس ذات نفس الوقت يخافوا منك و يبقالك هيبة" و ساعتها هتحس انه بيشرح مبدأ من مبادئ الحياة بس انت و فهمك بقي يا تضحك يا تاخد المشهد جد بس في كل الاحوال هتفهم و تتعلم


-و مشهده مع دربالة و هنا البزاوي بدل ما يمثل بالكلام قرر يستغني عنه و يدخل تحدي اصعب انه يمثل بتعبيرات وشه لما عمل المونولوج الصامت و هو بيسمع صلاح عبدالله و هو بيقوله " انت شغال براحتك عشان لسه دورك مجاش"
ها شوفت ركزت ازاي مع تعبيرات وشه مش الحوار؟؟؟ و العبقرية ان الكلام مش معاك بس انت خاطف الكاميرا و تدي رد الفعل في لحظتها و الاكثر عبقرية انك تمشي مع الكلام بتعبيرات وشك حرف بحرف...ما هو استاذ بقي
او ساعة لما سأله بمنتهي الخوف " لا مؤاخذة يا باشا هو سعيد باشا دربالة برضه له ملف؟ " و هتشوف الخوف في وشه و هتسمعه بودانك



***نركز بقي شوية عشان الشرح اللي جاي دة هو السؤال التاني في الامتحان
ثقة صح؟؟ واثق فيه يا جدع


-الريس صديق في جراند اوتيل و التعريف العبقري لمفهوم الفرص الضايعة لما قال " كلمة حلوة متقلتش...صباح الخير اترد عليها من غير نفس" و كمل " و اللي منحسش بقيتمه غير لما حد يتخطف من وسطنا" و بعد ما تشوف المشهد عايزك تعيده بس و انت بتسمعه بس و هتلاقي نفسك انك مش عايز تسيب اي فرصة تضيع بعد كدة ..كمية القلق اللي في صوت الريس صديق هتتسحب لقلبك قبل عقلك و تخليك تفكر انا ناسي مين...شوفت بقي شرحلك القلق في جملتين بس ازاي؟؟



----ايــــــــــــــــــــــــــــــــــــوة جينا للسؤال اللي عليه اكبر درجة في الامتحان...صلاح الطوخي في كلبش

-و عبقرية البزاوي في هدوء الاداء...عارف انت يا واد يا تقيل...في كل مشهد بتبقي عايز تقول يا طوخي يا تقيل عشان هتبقي قدام ظابط مباحث عارف هو بيعمل ايه بروقان و لا روقان سفن اب


-التركيبة اللي عملها في مشاهده مع ريم مصطفي...لما في مشهد قال " انا ظابط مباحث و سليم مجرم و شغلتي اني اقبض عليه و بس" تركيبة عجيبة انه يديك اكتر من احساس...احساس انه فعلا شاكك ان في نسبة براءة و لو حتي قليله و احساس تاني يقولك لا دة بيشوف شغله و بس و راكن مشاعره علي جنب و بيسيب اللي بيتفرج يقرر هو فهمها ازاي...او في المشهد لما قال " انا بتوتر من العصبية جدا" و تبقي عايز تقوله بعدها علي طول يا واد يا رااااااااااااايق و صوته لما قالها واضح انك مبتخنيش و طفي السيجارة بمنتهي الهدوء اللي في الدنيا...و مين ينسي افيه" المايك دة عهدة" و كأنه مش عايز يفوت الفرصه انه يضحكنا برضه


***باقولكوا ايه بقي ...اقفلوا الكشاكيل عشان المشهد اللي جاي دة مش هتحتاجوا تكتبوه لانه هيتحفر


-في اخر مشهد في كلبش و هو بيقول لسليم" مش عايز اسمع عنك مشاكل تاني" و بدأ يحكي الحكاية و فجأة تحس كام حاجة كدة مع بعض...بتحس بضعف زي ضعف الاطفال كدة بالرغم من كل القوة و الثبات اللي في باقي الشخصية و هتحس انك بتسمع حاجة من متعة السيرة الهلاليه و احساسه بالوجع لما قال "ابويا خد رصاصتين في ضهره و قعد علي كرسي و الظابط اتعالج و رجع شغله و قعد يترقي و يترقي"...و جملته العبقرية لما قال " انا كنت مصمم اني اجيبك بايدي و اسناني عشان في الاول كنت شايفك نسخة مصغرة من عماد بس لما اتأكدت انك برئ شوفت فيك نسخة مصغرة من ابويا" ...و كأن البزاوي في المشهد دة بيقولك انسي بقي كل اللي حصل عشان لسه عندي كتير ...لسه عندي موهبة و تمثيل كتير...ازاي صوتك يقول وجع و اصرار في وقت واحد...ازاي مخبي الم حزنك علي ابوك عشان بس تجيب حقه و ضميرك مستريح و احلي وعد لما قاله "لا تظلم و لا تساعد ظالم"



-في اخر جملة في المسلسل بيقول " لسه الحكاية مخلصتش...الحكاية لسه هتبدأ" و كأن البزاوي بيقولها لنفسه

الحكايــــــــــــــــــــــــــــــة لسة بتبدأ يا استاذ


#محمود_البزاوي
#الاستاذ
#التتر
#كريم_مجدي
#شير_و_النبي

تامر كروان

عرض لا يقاوم...طبعا اول بنسمع الجملة دي بتيجي في دماغنا حاجة من الاتنين ملهمش تالت...يا العرض فعلا لا يقاوم و هتبقي الحاجة تستاهل تمنها و انك تجري عليها عشان تشتريها يا الموضوع هيطلع علبة شيكولاتة سويسري تفتحها هتلاقي جواها شوكولاتة كوفرتينا.

و عشان تقدر تحكم علي العرض لازم برضه حاجة من الاتنين يا تبقي عارف كل حاجة عن اللي رايح تشتريه عشان ميضحكش عليك او تاخد معاك صاحبك اللي واثق انه مش هيقولك رأيه و يخليك تشتري حاجة حلوة لا دة كمان ممكن يكون تاجر فيها قبل كدة عشان تضمن انك متلاقيش كوفرتينا


و لان كلنا بنحب نسمع موسيقي فيوم ما نحب نسمع يبقي نسمع موسيقي تدحلب كدة جوانا و تحس انها بسيطة و سهلة يا نقعد نجرب و اللي يطلع حلو و اللي يطلع وحش ما هو انت و بختك بقي يا نروح لتامر كروان


تامر كروان مش بس هيدلنا علي موسيقي حلوة لا...دة هيديك عليها ضمان مدي الحياة انها تفضل عايشة جوانا و تبقي متجددة في كل مرة بتسمعها...خصوصا لو هي موسيقي تتر مسلسل تقيل

*طيب يعني ايه مسلسل طويل؟؟
دة سؤال هايل

-مسلسل يكون مثلا عن فترة زمنية لا احنا و لا حد من اللي مكتوب اسمه علي التتر كان عايش وقتها و يا سلام بقي لو في تفاصيل في شخصية كل واحد في المسلسل سواء كانت حاجات نفسية او صراعات و يكمل التقل ساعة لما تحس انك واحد من الشخصيات دي يعني عايش معاهم و مستني تشوف رد فعل الشخصية هيبقي زيك و لا لاء...و ساعتها صناع العمل بيبقوا في تحدي مش طبيعي انهم يوصلولك صورة تبقي واثق انها طبق الاصل من الواقع و تخليك متقدرش تفصل ما بين الدراما و الواقع

طيب المؤلف قدامه تحدي انه يقنعك في 30 حلقة و المخرج قدامه تحدي اكبر انه يترجم الكلام دة و يحوله لصورة تزود اقتناعك بالكلام اللي بتسمعه و تشوفه في المشهد...اما بقي تامر  قدامه 3 او 4 دقائق بالكتير يعني بشكل تاني قدامه 240 ثانية عشان يخليك تعيش احداث مسلسل و تفاصيل شخصيات من اول التتر ما يبدأ و عشان اول ما تسمع الموسيقي تعرف دة مسلسل او فيلم ايه

صعب صح؟؟

طيب ما تيجي نشوف تامر كروان بيعملها ازاي و عشان تضمن انك لما تلاقي اسمه علي اي عمل ان مش هيتضحك عليك

-لما يجيلك مسلسل زي "سجن النسا" بيناقش حالة خاصة  جدا من الحياة الاجتماعية فلازم اللي يطلب منك موسيقي تتر لمسلسل زي دة يكون متأكد انه رايح لشخص هيلخص تفاصيل ابطال من لحم و دم في 30 يوم في 240 ثانية موسيقي بتشرح كل احداث المسلسل في نغمات تستقبلها ودانك فتبقي مش حاسس بغربة و انت بتشوف المسلسل...و اسمع بنفسك التتر هتلاقيه ماشي معاك بنفس هدوء مسلسل اجتماعي و هتلاقي التتر فجأة انفعل مع الاحداث في اخر دقيقة في الموسيقي..حي مفهوم السجن هتلاقيه معمول في اول التتر لما تسمع خطوات زي غربة السجن...حتي التتر تحس انها موسيقي نسائية لايقة قوي علي المسلسل

*سمعت تتر سجن النسا؟؟

-عايزك تغمض عينك بقي و تسمع تتر "تحت السيطرة" و ساعتها هتتأكد انك مينفعش يتضحك عليك و انت بتسمع موسيقي بيمضي عليها تامر كروان اللي قادر يخلي الموسيقي شخص لحم و دم و احاسيس مشارك في احداث العمل سواء فيلم او مسلسل..في تتر تحت السيطرة التتر بيعملك حالة زي النضارة ال 3D ...موسيقي بتعبر عن الواقع اللي هيتناقش بعد كدة في المسلسل بس يتحس الاول لما تسمعه...و انك ازاي تعمل موسيقي انسانية...اه و الله انسانية..بالفرح و الوجع و الخطر و الامان

-كان في فيلم مش من زمان قوي اسمه ميكانو..و هنا بيتألق كروان انه يعمل تتر هادي زي احداث الفيلم بنفس البراءة اللي هتلاقيها في بطل العمل..فهتحس و انت بتتفرج علي اي مشهد وراه موسيقي انها بتكملك بقية اللوحة و بتغذي عندك الاحساس بشخصية البطل اللي عنده حالة نفسية و بقي عامل زي الاطفال في براءتهم و مينفعش تشوف تشوف براءة و متسمعهاش او خلينا نقول انك صعب انك تشوف براءة بس صعب جدا تسمعها 

-و مينفعش نقول تتر لتامر كروان و منقولش "ذات" دة حتي ربنا يحاسبنا و الله...فكرة انك تحول رواية لصنع الله ابراهيم لموسيقي دي في منتهي الصعوبة لانها دايما مليانة تفاصيل اللي هي من جوة قوي دي..تفاصيل بشرية ممكن تقرأها بس لما بتسمعها بتحس احساس "ايه دة؟!! الله" ...هو جابلها منين دي؟؟ يعني ايه يبقي التتر يقولولك هنا في صراع او هنا في حب او هنا حتي يبقي في انسان...حلو قوي انك تحول بيت مصري لنوتة موسيقية و انك تشرح تفاصيله في كل ثانية تشم فيه رائحة البيت المصري في فترات زمنية مختلفة و حتي طباع الناس لما تتغير كمان هتلاقي التتر بيتغير زي ما يكون حاسس بالناس اللي في العمل

-تامر كروان خلي الموسيقي تحكيلك حكايات في "احكي يا شهر زاد" و لما تسمع التتر هتحس بحاجة من رائحة الرائعة ابلة فضيلة و ساعتها هتتأكد ان الحكاية مش بس لازم تسمعها كلمات لا انت هتستمتع بيها اكتر لما تسمعها موسيقي لانك بيبقي عندك ميزتين انك بتسمع موسيقي بتبقي ترجمة حرفية للاحداث و انك بتشوف الفيلم كله باحساس و حاسة السمع اللي بتدي اضعاف ما هتشوف العمل بابطاله المعروفين

*ممكن تعمل فنجان قهوة؟؟ بس بن فاتح 

-في اول المقال كنت باقولك ان تامر كروان بيلخص العمل اللي مليان شخصيات و تفاصيل لموسيقي تحس انها بطل من ابطال العمل بس في حاجة ناقصة مقولتهاش 

*و مقولتهاش ليه يا عم كريم بس و لا هي دوخة و السلام

-مقولتهاش عشان لما اقولك ان الرجل دة عنده القدرة انه مش بس بيترجم اي نص "تقيل" لموسيقي...دة عنده القدرة انه يترجم زمن هو مشافوش و لا عاش فيه لموسيقي واقعية جدا ممكن لو معاك الة الزمن اكيد هتسمعها في وقتها يعني بالبلدي بيحول كتاب التاريخ لكتاب الموسيقي

دي وسعت منك يا بومبو

و لا وسعت و لا حاجة

*عملت القهوة؟

-تعالي بس اسمع تتر واحة الغروب و دة لوحده لو عمله و اعتزل فهيفضل من افضل صور تمثيل الواقع ساعتها ايام الاحتلال الانجليزي و الثورة العرابية...العبقرية في التتر انه بيجمع ما بين الحب و الحياة و الطبع العسكري و الدراما و دة صعب تلاقيه ممزوج في اغنية واحدة و شوف المسلسل و بعدها علي طول اسمع التتر و اراهنك انك هتفتكر المسلسل مشهد مشهد و دة اكيد بيجي من مذاكرة جبارة لانسان موهوب "فاهم" يقدر يحول التفاصيل الانسانية المعقدة لموسيقي و يفض اشتباك اي صراع بايقاع هادي يخليك تهدي عشان تفكر ازاي تحل الاشتباك دة

-تترات تامر كروان زي العروض اللي فعلا لا تقاوم و من اهم مميزاتها انه مستقلة...براءة الاختراع بتتاخد لصاحب الاختراع بس بيستفيد بيها منها باقي البشر و براءة اختراع التترات الانسانية بيتكتب عليها تامر كروان بس احنا محظوظين اننا بنسمعها وقت ما بنحتاجها 

شكرا تامر كروان 

#تامر_كروان

#الفاهم

#التتر 

#كريم_مجدي