راجح داوود

-انت ايه اللي خلاك تشتري البتاع دة؟

-البياع

-نعم؟!!!!

-بصراحة طريقة البياع عجبتني ...خلاني ابقي عايز اشتري المحل كله

-الف سلامة يا حبيبي

*ملكوش دعوة به دة بيقول اي كلام اصلا...خليكوا معايا انا متسرحوش...في حياتنا عموما لازم نقابل البياع المتطفل اللي هو اول ما تدخل تلاقيه بيعتبرك كرة و بيترمي عليك زي الحضري كدة و بابتسامة سمجة يقولك "اقدر اساعدك في حاجة" و في اللي قابل البياع العشوائي اللي هو مبيفرقش بين رجل و ست يعني مثلا ممكن يقول للرجل في انواع تانية تحب تتفرج؟ و هو اساسا معظم الرجالة بيبقي داخل علي هدف معين بالشبه يجيبه و يمشي ...و المحظوظ اللي فينا بقي اللي يقابل البياع اللي بالبلدي كدة "مفتح" البياع الشاطر اللي هتلاقيه عارف هيبيع ايه و لمين و امتي ...يعني هتلاقيه له نظرة في اللي داخل يتفرج بس فيحمسه انه يشتري او اللي داخل يشتري اساسا يخليه يشتري اكتر

-البياع الشاطر مستحيل تلاقيه كتير لانه بيتعامل مع كل صنف و لون من البضاعة و البشر...يعني مثلا لو هتلاقيه في محل في وسط البلد هتلاقيه بيبيع باسلوب يناسب اللي نازلين وسط البلد و اللي هيفاصلوا و هو عارف ان اللي نازل معاه فلوس علي قد الحاجة فعايز يشتري حاجة تعيش معاه و لو ربنا كرمه و راح محل في مول كبير هتلاقي طريقته اتغيرت مع الزبون اللي بيدخله عشان عارف ان اللي يهمه الشكل و المعاملة و طريقة العرض بس في الحالتين اهم حاجة عنده انه يحافظ علي زبونه و يربي ثقة

-انا عارف انت نفسك تقول ايه؟

ايه الطريقة البلدي بتاعت المقدمة المرة دي صح؟

هو انا تلميذ؟ انا باحس بزبوني بس مش زي راجح داوود

-راجح داوود مش بس بياع موسيقي شاطر...لا ...راجح داوود بيعرف يعمل موسيقي فين و امتي و ازاي ...غريبة صح؟

و الله ما غريبة

-موسيقي راجح داوود تقدر تقول عليها ورق المذاكرة اللي ممكن لو متفرجتش علي العمل تستنتج قصة العمل نفسه...طيب و الله زي ما باقولك و كله هيبقي بالدليل...راجح داوود بيقدملك موسيقي فلسفية بشكل بسيط يناسب اي سيناريو محطوط...موسيقي لو سمعتها لوحدها تقول دي لازم تتعزف في ارقي اماكن في العالم و لو شوفت العمل اللي محوطة عشانه الموسيقي هتلاقي نفسك بتقول انا شوفت الفيلم دة قبل كدة فين بس الادق انك تقول ان سمعت الفيلم دة عن طريق موسيقي راجح داوود

-الرجل دة من الناس اللي تعرفها من اول ثانية في الموسيقي التصويرية...حاجة كدة تقدر تقول عليها متلازمة راجح داوود و لو بتسمعه كتير هتكتشف ان الموسيقي بتاعته لها عقل و منطق...عقل بتفكر تمشي و تحلل مشاهد العمل و منطق تثبتلك به انه موسيقي مناسبة لكل ثانية في اللحن و ما يقابلها في المشاهد

***ما تيجي نلف في محلات راجح داوود و اكيد هنشتري

-تعالوا نبدأ بموسيقي الكيت كات و هما راجح داوود هيبيع موسيقي فيلم من اعظم و اصعب اعمال السينما المصرية ...تركيبة فيلم فيها الدراما و فيها الكوميديا و فيها الشجن و عشان تعمل موسيقي فيلم بطله الساحر محمود عبد العزيز لازم تعمل موسيقي يبيعها راجح داوود...في موسيقي الكيت كات هتحسها موسيقي فقدت بصرها...اه و الله هتحس في بداية اللحن ان الموسيقي كفيفة و بداية صوت العصايا اللي بتوريها الطريق فين...و لازم لما تسمع الموسيقي دي بالذات تتخيل نفسك اعمي ....بس هتشوف بفلسفة راجح داوود...و انت بتسمع اللحن هتحس بمشاهد الفيلم و حالة المعاناة اللي كان فيها محمود عبد العزيز مع كل المشاكل اللي حواليه...و في حتة في وسط اللحن كدة هتحسسك انك بتاخد نفسك عشان تستريح شوية و ترجع تكمل المشوار

-تعرف تمثل انك خايف؟؟ ممكن تكون سهلة صح ....ممكن بقي تعزفلي الخوف نفسه بقي؟؟

متخافش راجح داوود عاملها في موسيقي ارض الخوف...و بلاش القلش اللي هيقولك ما هو عشان اسمه ارض الخوف تسميه خوف...و الله عارفكوا

-لا يا سيدي مش عشان كدة بس عشان لو شوفت الفيلم و شوفت تعبيرات وش احمد زكي سواء بياخد تعليمات بتنفيذ عملية او حبس الانفاس و هو بينفذها او خوفه في مشاهد كتير...هتلاقي كل دة مترجم حرفيا لموسيقي التتر اللي عملها راجح داوود...راجح في الموسيقي عمل حاجة فعلا حلوة لما دخل ضربات القلب في وسط اللحن عشان يوصلك احساس الخوف و الذعر اللي بتقوم عليه فكرة الفيلم غير ان اللحن عموما تحس انه معمول حتة واحدة يعني مخدش في ايده وقت...بالظبط زي الصوت اللي بيتعمل مع اللحن هتلاقي متركب بالمللي مع المجهود اللي بيعمله البطل في العمل  

-عارف محلات البدل و الفساتين اللي لسه موجودين من زمان...اللي دايما بتلاقيهم فاضيين دول...بس هم الحقيقة مش فاضيين...هم ليهم زباين معينين متعودين دايما عليهم...هو دة بالظبط اللي عمله راجح داوود في تتر هوان جاردن سيتي...تتر بيرجع بيك فعلا لزمن هوانم زمان بطريقة شيك و بشكل ناعم كدة...يعني تحس انه تتر انثوي جدا ...و دة يمكن يبان مع اول جملة بتغنيها هدي عمار اللي هتحس بعدها ان اللحن بالظبط عامل زي السكر اللي دايب في الشاي...انت مش شايف السكر بس حاسس بطعمه...تتر هادي يوضحلك الزمن اللي المسلسل كان عليه ...اصله مينفعش تعمل تتر لهوانم جاردن سيتي و تعمل لحن فيه ايقاع...الحياة كدة كانت شيك و مريحة

-عايز تكتب كدة "موسيقي المحاربون" و مش عايزك تشوف العمل...عايزك تسمع اللحن و انت هتعرف العمل و زي ما قولتلك راجح داوود بيعرف يبيع ايه و امتي و ازاي ...يعني مثلا في اول اللحن خالص هتحس بحالة الاستعداد اللي بتسبق الحروب و دة حتي لو مشوفتش عنوان اللحن صدقني و اشتري مني هتعرف ان عنوان اللحن هو المحاربون و اللي بيميز راجح داوود ان في وسط اي لحن هتلاقي تحول في احداث التتر نفسه و تترجم ساعتها ان في تغيير في احداث العمل فعلا و كأنه بيعرضلك الفيلم و انت مغمض عينك

-تعالي اسمع موسيقي فيلم الريس عمر حرب و انت هتشوف عالم الليل في الموسيقي اللي بتتعزف و هتلاقي نفسك بتشاور علي حتة في اللحن و هتقول ايوة هي دي شخصية خالد صالح بالغموض و الصرامة و كأنك شايف الفيلم بكل تفاصيله و بكل انفعالاته ...الموسيقي هنا باعتبرها صعبة يمكن عشان هتوصف تمثيل حد تقيل قوي زي خالد صالح "في مقالين عنه معلش اتعب نفسك و شوفهم"

-عارف فيلم مواطن و مخبر و حرامي ...الموسيقي بتاعته تحس انها متقسمة علي ال 3 شخصيات بالحرف يعني المواطن المثقف و المخبر الرغاي و الحرامي اللي واخدها بالدراع و كل التحولات دي هتلاقيها مثلا في دقيقة و نص بالكتير ...و دة هيقولك انك هتعمل توصيل زي امتحانات ابتدائي كدة...هتوصل موسيقي المواطن بشخصية المواطن في الفيلم و كذلك المخبر و الحرامي

-في لحن هتحسه بسيط جدا بس في نفس الوقت شايل مسلسل كامل اسمع رجل في زمن العولمة و هتشوف الموسيقي و هي في نفس الصراع النفسي اللي في البطل و طول التتر هتركز في مشاهد المسلسل بعقلك الباطن بس و انت ماشي هتلاقي العقل ربط الاحداث مع ودانك و هتسمع من خلالها موسيقي التتر

-مش فوق قولتلك انه عمل تتر انثوي...طيب ايه رأيك بقي انه عمل تتر انساني بيجمع بين رجل و ستات و مكان...طيب و ما ليك عليا حلفان عمل كدة...اسمع تتر الراعي و النساء و انت هتسمع الصراع اللي ما بين الرجل اللي عينه زايغة و الستات اللي حبوه و الصحراء و طبيعة المكان اللي هم عايشين فيه و هتعرف ان الصحراء ممكن تسمعها و صوت الاغنام ممكن يتعمل لحن مختلف عن صوتهم بس يوصلك للي هو عايزه

-بتحب البحر؟ و مين فينا مبيحبش البحر و لو مبتحبوش يبقي راجع نفسك او اقولك راجع تتر فيلمين رسائل البحر و البحر بيضحك ليه...و التترين مختلفين علي فكرة بس في الغالب بعد ما هتسمعهم ممكن تاخد شنطتك و تطلع علي اسكندرية "خليك في الشتاء هتتبسط اكتر"

**راجح داوود مثال لتحويل الصورة لاحساس و لحن...هو مش محتاج نقد فلسفي او كلام عميق عشان تتكلم عنه...هو لازم تتكلم عنه بطرقة بسيطة جدا عشان لو حاولت تتكلم عنه بطريقته غالبا و الاكيد انك هتخسر عشان مش هتبقي بياع شاطر زي راجح داوود

#البياع_الشاطر

#راجح_داوود

#التتر

#كريم_مجدي

#لو_عاجبك_المقال_معلش_تعالي_علي_نفسك_واعمل_شير