-اديني اهو
يا عم دخلتك الفيلم اللي انت عايزه قبل ما تسافر عشان تتبسط و ميبقاش في نفسك حاجة
-اه و الله يا بني كان بقالي كتير مدخلتش
سينما و بتعجبني دماغ احمد عيد " مش هو صاحب المقال " بس عارف ايه اكتر
حاجة عجبتني في الفيلم؟
-اكيد احمد عيد؟
-لا احمد عيد كدة كدة بطل الفيلم انا اللي شد
انتباهي قوي اللي عمل دور العسكري شلبي
-انت خرجت ساعتها...واد يا عاصم فعلا موهوب و
و كنت قولتلك عليه قبل كدة اني اتفرجت عليه في مشاهد كدة في مسلسل حنان و حنين و
اتبسطت انه عمل دور حلو
-و الله يا كريم لا اتفرجت علي دة و لا علي
دة
-لا بصراحة عمل حتة مشهد تحس انه مشهد مصري
من بتوع ايام زمان...عسكري غلبان مطحون كل اللي بيفكر فيه انه يرجع البلد عشان
يتجوز اللي بيحبها و خلاص...و عمله بمنتهي التلقائية و الحرفنة...خصوصا لما قالهم
الليلة دي هتنفض امتي عشان عايز ارجع البلد و تحس بقي بكمية فطرة تشوف فيها بقي
الاراضي الزراعية بتاعت زمان
-ايه يا عم كريم؟ انت بتتكلم عن احمد زكي؟
-يا بني الواد دة موهوب و هيبقي حاجة...اهم
حاجة بس و انا مسافر لو عمل حاجة حلوة قولي
-حاضر يا سيدي اسمه بقي ايه اللي سايب عشانه
وصية دة؟
-اسمه محمد رمضان
و تمر
سنيـــــــــــــــــــــــــــــــــــــــــــــــــــــــــــــــــن مش كتير
"عشان مبقاش اوفر"
-حمدلله علي السلامة يا ابو كيمو
-الله يسلمك يا كبير...ها اخبارك ايه و اخبار
الدنيا معاك ايه؟
-الحمدلله يا كريم
-ها قولي اخبار محمد رمضان ايه؟
-الاسطورة
-ايه دة؟هو بقي اسطورة...مش انا يا بني
قولتلك ؟
-متستعجلش بس تعالي...انا جمعتلك كل اعماله و
اتفرج عليها براحتك في البيت
***و بعد ما اتفرجت علي
الحاجة...تعلالـــــــــــــــــــــــــــــــي حالا عايزك
-هو دة اللي بقي اسطورة
-مالك يا كريم ايه اللي حصل؟
-مفيش يا سيدي قعدت اتفرج و قولت ابدأ من
القديم للجديد...استني هاعمل شاي و نقعد نتكلم "عشان شكلهم زهقوا من
المقدمة"
--بص يا سيدي...بعد ما شوفت دور شلبي في فيلم
"رامي الاعتصامي" توقعت اني هاشوف خطوات صغيرة بس حلوة و فعلا اتفرجت
علي مشاهد قليلة بس تحس ان فيها تمثيل فعلا قوي جدا ...زي مثلا سعيد الخفيف في
احكي يا شهر زاد و الدور كان فيه مساحة تمثيل كبيرة بالرغم اني كنت معترض علي شوية
كلمات بيقولها بس لو بصيت علي الدور من فوق هتلاقي ممثل بالبلدي كدة واقف علي رجله...او
زي مثلا المشاهد اللي عملها في فيلم ساعة و نص في دور صلاح الشاب اللي سافر و بدل
ما يرجع لاهله بالفلوس و تحقيق الاحلام راجعلهم بالخيبة و كل الاحلام متحطمة علي
صخرة الفقر و زي ما كان صلاح سند و ضهر لصاحبه كان محمد رمضان سند و ضهر لكريم
محمود عبد العزيز في مشاهدهم سوا و حتي لما كان بيقول افيهات كنت بتضحك علي افيهات
طالعة بس بعدها بثواني بتتوجع من القهرة اللي طالع بيها الافيهات دى
-قولت بقي بعد المشاهد دي اكيد هالاقيه في
دور اكبر و لقيته في بطولة مطلقة و فرحت بقي و قولت خلاص هاتفرج علي ممثل تقيل و كلامي
هيطلع صح ...المهم باشغل الفيلم و من اول اسمه يا بني شكيت...ايه "عبد موتة
" دة كمان؟
قولت يا واد يا كريم استني بلاش تحكم...و
لقيت محمد رمضان بدأ يحسبها تجاري بدل ما يحسبها تاريخ...كلامي مجعلص مش كدة؟
يعني من الاخر لقي انه لو اشتغل بموهبته بس
هيقعد كتير عقبال ما يوصل...فقرر يشتغل تجاري ...يعني اللي يعجب الزبون اعمله و اي
حد ينتقدني اقوله ما هو دة الواقع...انا جيبت حاجة من عندي؟
السينما و الفن حقيقي بتعكس الواقع بس اللي
مش حقيقي ان الواقع يتنقل بنفس كل السلبيات و المبالغة فيها من غير اعتبارات ان في
ناس بتشوف في بطل الفيلم قدوة حتي لو خليت نهاية بطل الفيلم سوداء و شاف عقاب بس
انت طول الفيلم مصدر مشهد ان كل الستات بتحبه و انه لما اشتغل في المخدرات مثلا
قدر يعمل كل اللي هو عايزه...ساعتها اللي هيتفرج عليه هيقتنع انه بدل الحلال اللي يشتغل
به ما سكة الحرام سهلة اهي و لو البطل اتمسك بقي في الفيلم انا مش هاتمسك في
الواقع...و طول مشاهد الفيلم تلاقي التركيبة التجارية...هات اغاني شعبية من هنا
علي كام رقصة من هنا علي كام جملة فيهم سجع...و طبعا كل ابطال الفيلم شايفين في
عبده موته انه محصلش و لا هيحصل
**قولت ياض يا كريم يمكن حد لعب في دماغه و من
اول الفيلم اللي بعده هيعمل حاجة تبين الموهبة اللي عنده اللي هي فعلا موجودة
-بس اللي توقعته ملقتش منه حاجة...عمل فيلمين
بعدها صورة طبق الاصل العلقة اللي فاتت ...الالماني و قلب الاسد...زي بالظبط لما
حد يقولك تجارة المخدرات ممنوعة فتبطل و تخطف عيال...نفس التركيبة بالحرف مع
اختلاف طبعا الابطال و اسماء الشخصيات عشان الجمهور بس ميتلخبطش بس الحقيقة ان
الجمهور اتلخبط بين الالماني و قلب الاسد و عبده موته "و الله تحس اني باقول
اسماء متهمين في قسم الخليفة"
-مش عيب انك تبين عيوب مجتمعك بس العيب قوي
انك تبينها مرة بعد مرة باوحش و اوحش...البلطجة موجودة بس ليها مليون سكة تعبر
بيها عنها...زمان كانت اتاوة الفتوات عيب في المجتمع بس لما السينما عملتها جابت
دلالات عليها مجبتش بلطجي عمال يدبح في الناس عشان تقولك دة عيب مجتمع...محمد
رمضان في ال 3 افلام دول شاف الطبقة اللي هتشوف فيه قدوة و حاجة نفسهم يوصلوا
ليها...حالة من النجاح "المزيف" ان في ناس بتقلده بغض النظر مين اللي
بيقلدك او بيقلدك و بيعمل رعب و تلوث بصري و سمعي و ساعات بتوصل لجرائم...بس مش
مهم...المهم ان في ناس بتقلدني
-نيجي بقي للي بعد كدة لسنة باعتبرها نعمة و
نقمة علي محمد رمضان نفسه...ايوة الله ينور عليك...هي سنة ما عمل مسلسل ابن
حلال...المسلسل هي تركيبة و فكرة مكررة اتعملت كتير في تاريخ الدراما و الصراع بين
السلطة و الفن اتهرست في مليون مسلسل و فيلم و لازم حد فقير يشيل الليلة موجودة في
الواقع و الدراما بس في سببين بصراحة نجحوا المسلسل...اولهم تركيبة النكد
"طيب و الله ما باهزر" ...احنا المصريين بنحب قوي حالة النكد و الحزن
علي الظلم و الفرحة لما ياخد حقه...و السبب التاني فعلا موهبة محمد رمضان و دة
يبان قوي في تحول شخصيته من مشاهد الصعيدي الجدع اللي عايش جنب الحيط لحتي و هو
بيهزر مع اخته او حتي مشاهد تحوله للمظلوم و اللي يبين قوي موهبة رمضان الحقيقة في
المشاهد اللي ما بعد دخوله السجن يعني مثلا لما قلب من ضعيف لكبير السجن و اكتر
مشهد عايز تحكم علي موهبته فعلا اللحظة اللي بيقتل فيها اخته و بيدور عينيه في
لحظة وجع صادقة جدا انه هيقتل حتة منه...و ساعتها هتقول اهو بدأ يرجع تاني الموهوب
و يقدر يعمل حاجة مختلفة و قوية
-بس الحقيقة ان المسلسل كان نقمة لان خلي
رمضان بالبلدي كدة "يصدق نفسه" و الواحد لما يصدق نفسه و ميعرفش مكانه
فين للاسف بتفلت منه كل مفاتيح تحكمه في موهبته...بيحس ساعتها انه لو طلع يكح
الناس كلها هيجيلها برد...و انه لو عمل اي حاجة هتنجح
-و راح عامل فيلم شد اجزاء بس بيني و بينكوا الفيلم فعلا في تمثيل بتعبيرات
الوش تبين تحكم في الموهبة بشكل كويس جدا و خصوصا في مشاهد الصراعات اللي بيعشها
الظابط عمر...اه يمكن حواليه ناس تسنده كتير زي ياسر جلال مثلا و محمد شاهين و
محمد ابو الوفا اللي كان من اسباب نجاح مسلسل ابن حلال...فتحس ان التركيبة فعلا
مؤهلة للنجاح
**التمثيل حلو اهو يا رمضان خش بقي و اثبت
للناس موهبتك التقيلة يا جدع
-عمل الاسطورة بس مبقاش الاسطورة لسه...و بدأ
يكرر انه تاني يشتغل تجاري...و التجاري مش غلط بس هاقولك ايه الغلط...الاسطورة
مسلسل كان قايم علي تركيبة النكد ...اه في شوية افيهات في الاول بصراحة حلوة بس في
الاخر انت عارف النهاية ايه...يمكن رمضان في المسلسل دة كان في شخصية ناصر احسن
بكتير من شخصية رفاعي و حقيقي المسلسل نجح جدا و علق مع ناس كتير طريقة الكلام و
افيه "دة انت تمسك الشيشة بقي " و دة تكملة للنجاح اللي حصل لابن حلال
بس المرة دي النقمة كانت اكبر...انه تحول من مرحلة انه يعمل ايه حاجة بتنجح لمرحلة
"انكار الفشل" يا نهار اورق فشل دي كلمة كبيرة...دة وصل لمرحلة انكار
"انه محدش ناجح غيره"
-المرحلة دي تبان قوي في اللي بعد الاسطورة
من اول ما قال علي نفسه و قبل كل كلمة الاسطورة لحد ما عمل جواب اعتقال...لعب علي
نغمة الارهاب بسيناريو و تمثيل اقل من العادي بصراحة...فيلم تحسه اتعمل مجاملة او
عشان ينزل بفيلم و خلاص و طبعا حالة انكار ان المستوي قل لسه موجودة و بنتزيد مع
الوقت
-بس لما تشتغل مع عبد الرحيم كمال كمؤلف و
شريف عرفة كمخرج اكيد هتعمل حاجة اقوي و دة اللي حصل في فيلم الكنز...جرعة تمثيل و
اتقان علي درجة كبيرة جدا من الموهبة ...و تحس ان المشاهد متقاسة بالمسطرة...و تحس
برائحة كلمات عبد الرحيم كمال و عين شريف عرفة في مشاهد ابطال الفيلم ...الفيلم دة
يثبتلك ان اللي حواليك ممكن فعلا يسندوك او من الاخر لما تلاقي اصحاب جدعان بتبقي
زيهم
-اخر ديك في مصر...فيلم لطيف
-نيجي بقي لنسر الصعيد و اللي خلاك تحس ان
محمد رمضان لازم يعمل اعمال ليها لقب عشان الناس تناديله به مش عشان الشخصية تثبت
في دماغهم...نفس التركيبة اب و اينه نفس الشكل بنفس طبقة الصوت ...لازم امه هي
اللي تعيش عشان تبقي راضيه عنه...سوبر مان بيتصرف صح دايما ...معندوش
غلطات...للامانه في شوية افيهات فعلا حلوة ...بس محمد رمضان مش بس مصدقش ان في
مسلسلات نجحت زيادة...لا دة قرر انه ينصب نفسه رقم واحد علي كل الاعمال و الابطال
و عمل اغنية فعلا
اقل ما يتقال عليها انه خايف و الخوف بيطلع بطريقة اضرب في اي حاجة
اقل ما يتقال عليها انه خايف و الخوف بيطلع بطريقة اضرب في اي حاجة
فكرة انك تفضل خايف لحد ما الخوف يكبر لحد ما يبقي زي فقاعة الصابون اللي تتحبس جواها...من الاخر بتقول الحاجة اكتر من مرة عشان تصدقها انك رقم 1
-بص يا ابني
الاسطورة مبيقولش علي نفسه الاسطورة...انت مش
هتبقي اسطورة بمسلسلين و كليب...مش هتبقي اسطورة و انت دايما مقتنع انك رقم واحد
مهما عملت...مفيش اسطورة بتتعمل في 5 سنين...الاساطير يا بتبقي طول العمر يا بتبقي
خرافات نسمع عنها و نضحك...الاسطورة تاريخ بيتبني مش حيوانات بتتمسك...الاقوال
المأثورة اللي بتقولها يا تفهمها يا متقولهاش...النجاح لما بيبقي مزيف بيبقي عمره
قصير...التجارب اثبتت انك لما بتبقي في وسط ناس تقيلة بتنجح و اللي كدة ميبقاش
اسطورة
-النجاح مش كام مشاهدة علي اليوتيوب او ناس
بتغنيلك...شوف نفسك من فوق و شوف مكانك فين...و مش عايز اقولك اساطير
بجد في التمثيل عشان هاظلمهم بصراحة...انت فعلا موهوب بس مش اسطورة
بجد في التمثيل عشان هاظلمهم بصراحة...انت فعلا موهوب بس مش اسطورة
#محمد_رمضان
#التتر
#كريم_مجدي
ليست هناك تعليقات:
إرسال تعليق