-تعرف سمسار مضمون؟

-و مين فينا مبيدورش علي سمسار مضمون سواء كنت بتدور علي شقة تسكن فيها و عايزها في منطقة كويسة او حتي عشان تبيع شقة او لو الزهر لعب معاك بقي بتبقي عايز سمسار يجيبلك شقة علي البحر و اخر نوع دة يا معلم اخطرهم لانه ممكن يعملك من البحر مش بس طحينة...دة ممكن يعملك كول سلو و يقولك يا باشا الشقة شايفة البحر و تدخل الشقة تبقي محتاج تبقي نيللي كريم و ترقص باليه عشان تشوف خط لون ازرق جاي من بعيييييد خير اللهم اجعله خير...بتبقي عايز سمسار يبقي واضح معاك حتي لو جابلك شقة في منطقة مش قد كدة بس بيختارلك انضف حاجة

-و من اجدع انواع السماسرة اللي يبقي عنده اكتر من حل و اكتر من اختيار يعني بالبدي كدة مش هيغلب حتي لو مش منطقته و يا سلام بقي لو طلبت منه شقة في منطقة اعلي شوية من اللي هو فيها...هتلاقيه برضه رايح و واثق انه هيقدر يقدملك احسن اختيار باكتر مجهود و دة بشرط انك متحسش انه تعب في حاجة او حتي تلاقي علي وشه انه متضايق او تلاقيه بيقولك انا احسن سمسار في الدنيا

-و لكل حاجة سمسار شايف الدنيا من برة و يعرف تفاصيل و تفاصيل غيره ممكن عينه متجبهاش و في التمثيل في سمسار اسمه خالد النبوي

-خالد النبوي مش مجرد سمسار ادوار بيعرف يختار الادوار حتي لو العمل في الاخر طلع مش قد كدة بس لازم تلاحظ كام حاجة كدة في موهبة النبوي اهمها انه بيدرس كل المناطق اللي بينزل فيها او بالمعني الاوضح كل دور بيعمله لازم مذاكرته تبان عليه "سامعك ياللي بتقول يعني انت كنت بتقعد جنبه و هو بيذاكر الدور" اقولك و عهد الله ما حصل بس المذاكرة بتبان من حركة الجسم و طريقة الكلام حتي شكل الشخصية كل دي مذاكرة مش مجرد حد جاي يقول كلمتين و خلاص...و لو زودت التركيز شويه هتلاقي ان في تطور كبير و تقل كل ما بيقدم عمل ورا عمل و دي مش موجودة عند ناس كتير...خالد النبوي هتلاقي مشاهده سنة ورا التانية بتبقي واثقة من نفسها زيادة و طريقة اداءه للشخصيات بقي فيها تمكن اكتر زي اللي مبيبقاش عارف شوارع فيمشي علي رجله حتة حتة عشان يحفظها

**معلش ممكن تركز معايا شوية كمان "هاتعبك بس استحملني "

-خالد النبوي في تمثيله مش بياخد الكاميرا من اللي قدامه لا ...دة بيعمل حاجة احلي...دة بيدي للي قدامه تقل و ثقة يخلوا اي مشهد هو فيه يطلع بيبص علي البحر" مش فاهم يعني ايه؟ راجع المقال من الاول يا استاذ و نركز شوية"

**خلاص المقدمة خلصت "بتفرحوا انتوا قوي لما المقدمة بتخلص" ...يلا بيننا ندور علي شقق و اشتري مني هتشوف حاجات حلوة و صف اول كمان علي البحر

-في شقة اسمها خطة بديلة و هتشوف سمسار له كذا منطقة شقق يعني في اول الفيلم هتلاقيه عادل ابو الدهب المحامي الشريف اللي عايز يمشي صح و تلاقيه عامل مشهد لما رفض من محامي زميله قضيه مش مظبوطة لما قاله "تجيلي بالقانون ادوس معاك..تجيلي شمال مليش فيه" و هتلاقيه رومانسي مع مراته لما بيقولها "احنا امتي قولنا مريم...اه صحيح قولنا مريم " و شوفوا تحوله لما جاله مندوب من عند الناس اللي اغتصبوا مراته لما عادل ابو الدهب قاله بمنتهي الوجع و الثبات الانفعالي الغريب" بتساوموني علي شرفي و حياة ابني ...روح قول للي بعتينك...و لا اقولك متقولهمش هم هيشوفه بنفسهم" و عايزك تركز قوي في مشهد المحكمة لما اتحكم بالبراءة لما قال للقاضي "اقعد فين" و تحس انه غل الدنيا كله في حركة ايده و هي بتخبط علي الخشبة و ساعتها هتشوف المذاكرة فين ..و لما طلع من السجن هتلاقي مشهده مع تيم الحسن و هو علي لسانه جملة واحدة "هات اللي عندك" هتلاقي لغة جسد غير طبيعية و هتلاقي اداء تيم الحسن نفسه بيعلي مع اداء النبوي  

-طيب عمرك شوفت حد بيكتب المشهد بايده و يمثله في وشه؟ هو انا هاضحك عليك يعني

شوفه لما في مشهد كتب "كبق الانتقالم يتاكل بارد" و اتفرج علي تعبيرات وشه اللي مليانة تفكير و وجع علي اللي حصله و تصميم علي انه ياخد حقه...و تعالي شوفه في مشهد لما احتمع بالناس الكبيرة و قالهم "يعني بالصلاة علي النبي لو زعلتوني ...هازعل اتخن شنب فيكوا"

-تعالي بقي نشوف علي الحلواني في فيلم الديلر و تقدر تقول و انت في بطنك محصول بطيخ صيفي ان الفيلم دة تقله جاي من خالد النبوي بس ...من اول مشاهده لوحده و كل مشاهده مع احمد السقا اللي كان بطلها فعلا خالد النبوي ...يعني مثلا لما بيقول لمي سليم "لما تبقي متجوزة علي الحلواني..عيب تجيبي سيرة رجل تاني" او لما قالها بهزار "طالبة الحلال يا موحة" هتحس انك قدام سمسار يعرف يجيبلك كل الاسعار اللي انت عايزاها او في مشهد لما قال "اهي حاجة علي طرف المعلقة" و شوف دة كله بقي و ركز لما بقي رجل سياسة و هتحس بمذاكرة غير طبيعية في اللغة و التمكن اللي بيتكلم بيهم بشكل محترف جدا و غير طبيعي و تعالي شوف حنية الاب لما بيقول لابنه روح لعمك مصطفي و مفيش رجالة بتخاف

-تعالي نروح لشقة حلوة قوي ...معتز الفرماوي في مسلسل 7 ارواح لما وكيل النيابة بيسأله" ايه علاقة هالة بوجود السيوفي مدبوح في شقتك؟" فيرد النبوي بمنتهي التقل بقي و يقول " يا محمد؟!! واحدة ميته محكوم علي اللي قتلها بالاعدام تظهرلي في التوقيت دة بالذات ...و تطالبني اني اطلع اللي قتلها بالبراءة و اللي قتلها يطلع براءة مدبوح جوة بيتي"

و لما سأله "انت بتاخد حاجة؟ " و هو بيقول بمنتهي الثقة " انا معتز الفرماوي و لو نسيتوا افكركوا" ...او مشهده مع اياد نصار و الهدوء الشديد اللي كان بيتكلم به معاه و هم مش طايقين بعض و برضه هتحس ان خالد النبوي ممكن يعلي اي مشهد بيشارك فيه...لما قاله "اسألك السؤال بطريقة تانيه...محمد اخوك فين؟"

او لما قال لمراته " و لا انتي عايزة تسمعي كلمتين حلوين و تلاقيه بيقول احلي كلام اي ست تتمناه لما قالها انتي اهم من الفرماوي الصغير و الكبير كمان"

-في شقة بقي هواها حلو قوي اسمها " واحة الغروب" و خالد النبوي في المسلسل دة تقريبا عمل كل حاجة من اول القوة لما هدد اهل الواحة و يقولهم "حي علي الفلاح..كل واحد يعرف مقامه و حدوده" او في مشاهد الرومانسية مع منة شلبي لما حط راسه علي مخدتها في وقت لو كان في حوار مكنش المشهد هيطلع بالقوة دي ...او لما قال لنعمة "ازاي بتفتحي نفسي علي الاكل و انا نفسي مسدودة عن الدنيا كلها...انتي ازاي كدة"

او لما كان في منتهي الضعف من اول ما بيتوضأ لحد ما صلي و هو حتي بيقرأ القرأن تحس في صوته انه ضعيييييييييييف جدا لدرجة انك تفصل من اللي حواليك و تركز في صوته بس ...و عمل الكوميدي اللي مع سيد رجب لما قاله دي نشيطة جدا فيرد النبوي يقوله "قوي ما هو جاي فوق دماغي اهو "

-فاكر لما قولنا فوق ان السمسار الشاطر يعرف يدخل اي مناطق حتي لو اعلي من منطقته ...اتفرج علي المسافر و شخصة ابراهيم و هتحس انك قدام...لا هتحس ايه يا عم كريم؟

انت هتتأكد انك قدام ممثل من هوليوود بيعمل الدور و الطريقة اللي بيعمل بيها الدور بمنتهي التمكن و كأنه بقاله سنين بيمثل بلغة غير لغته و طريقة غير اللي اتعود عليها

-تيجي نشوفه في القصور مع شاهين و فيلم المهاجر و شخصية رام ...الشخصية اللي تثبتلك ان السمسار بيتولد تقيل...انك تمثل مع شاهين فيلم من اهم و اصعب افلامه دة مش سهل و الاصعب انك تتألق في دور فيه كل جوانب الظلم و العزة في عمل واحدو حقيقي لازم تشوف رام غير في خالد النبوي لانه سجلها ببصمة تمثيله

**و الله ما اقدر انسي

-انك تبقي مشترك في مسلسل ضخم بحجم "حديث الصباح و المساء" يبقي تبقي ممثل شاطر بس انك تبقي من اركان العمل اللي فيه مئات الشخصيات فانت لازم تبقي سمسار شاطر و دة اللي عمله النبوي في دور داوود باشا و عايزك تركز في مشهدين قوي الاول لما قال لتوفيق عبد الحميد"احنا جينا الدنيا ليه؟" و تحس ان السؤال عادي بس ركز في وشه هتلاقي فيه حيرة الدنيا و الاخرة لشخص مبقاش عارف هو عايش ليه

و المشهد التاني لما بيشوف مراته داخلة عليه و بيتكلم بمنتهي الهدوء اللي في الدنيا لما بيقولها" شوفي يا بنت الناس امي عاشت مع ابويا عمرها كله مرفعتش صوتها عليه و مكشرتش في وشه و كانت بتجيبله طشط كدة في مياة دافيه و تدعكله رجله فيه وكانت تقوله يا سيدي يا تاج راسي...تعرفي تقوليلي يا سيدي و تاج راسي ؟" و ترد عليه موناليزا بمنتهي الاستفزاز و تقوله "انا مش امك ..انا سنية الوراق"

و هنا هتشوف ردور فعل علي وشه فيها كل معاني الغضب بيحولها بحرفنة و سحر لهدوء لما يقرب منها و يقولها "سنية هانم...الوراق...انتي طالق" طيب و الله تبقي عايز تصقف وقتها

-او مشهده مع جوهر لما قالها "الله ...الله" و تحس باشتياق و حب الدنيا كله في نغمة صوته و لما سألها "بتحبي فيا ايه" هتحس انه محروم من حنية الكلام و مشتاق حد يقوله كلمة حلوة و الصعوبة في داوود باشا انه باشا عايز يعيش حياة طبيعية فانت بتمثل جوة التمثيل

**خالد النبوي سمسار يعرف يعمل اي دور في مكان...هو السمسار اللي بمجر ما تشوف اسمه هتتأكد انك هتشوف شقة علي البحر و صدق انه هيوفي بوعده و يقدم حاجة حلوة

#خالد_النبوي

#السمسار

#مقال_العيد

#التتر

#كريم_مجدي