محمد سعد

-الحق يا عم محمد سعد نازل بفيلم جديد..ما تيجي ندخله؟

-لا يا عم تعالي ندخل الفيلم التاني احسن

هو دة بالظبط اللي بيتقال لما حد فينا بيشوف بوستر لفيلم لمحمد سعد حتي من غير ما يبص علي اسم الفيلم

يلا بينا نحكي الحكاية؟ يلا بينا 😉

محمد سعد فعلا من المواهب الغير طبيعية في التمثيل عموما و في الكوميديا بالاخص..بدأ محمد سعد في ادوار صغيرة اثبت فيها فعلا انه عنده الموهبة اللي تخلي منه في يوم من الايام نجم من نجوم الصف الاول

-لسه فاكره في مسلسل"من الذي لا يحب فاطمة" و دور الشاب المغترب اللي عمله بمنتهي السلاسة او اغنيته الحلوة جدا في "الطريق الي ايلات" لما غني مصر ياما يا سفينة و قلت بس دة هيبقي محصلش و هيكسر الدنيا و نزلت مسرحية اسمها "رد قرضي" اللي كان سعد فيها هو مايسترو المسرح بمعني الكلمة و هو ميزان الضحك في المسرحية و لما كان بيطلع في اي مشهد كنت لازم تضحك

-و بدأ محمد سعد في رحلة اثبات نفسه و ركوب قطار النجومية من اول 55 اسعاف مع احمد حلمي و تقديم الكوميديا اللطيفة اللي تخلي اي حد يضحك..و وصل محمد سعد اول محطة في النجومية و كانت محطة فيلم الناظر و كان نجم الفيلم بلا منازع مع الراحل علاء ولي الدين.

-و اتنقل محمد سعد من الدرجة التانية للدرجة الاولي المكيفة عن طريق فيلم اللمبي و دة كان منطقي و طبيعي بعد نجاح الشخصية في فيلم الناظر و فعلا اثبت محمد سعد في الفيلم انه قادر يستمر في الدرجة الاولي بس للاسف زي اللي ركب درجة اولي مكيفة و نازل اسكندرية و عاجبه التكييف فقالك لما اكمل لحد اسوان...بدأ محمد سعد رحلة الرهان الخسران لما عمل فيلم اللي بالي بالك و هو استغلال لاستغلال نجاحه لفيلم الناظر بس مكنش حاسس ان التكييف بدأت حرارته تعلي عليه قبل ما تكون علي الناس

-و بدأ منحني النجاح ينزل و بدأت الافيهات تتكرر و بدأ محمد سعد يتقمص دور صاحب الكورة انه دايما بيلعب مهاجم و بيجيب اجوان و مينفعش يقف حارس مرمي

-و حقق اللي بالي بالك نجاح بس مش زي اللمبي طبعا..فقرر محمد سعد الدخول في مجال افلام الشخصيات من تاني و انه لازم يسمي الفيلم باسم البطل و مفيش سبب للموضوع دة غير انه كان عايز يربط اسم الشخصية باسمه ليس الا...و بدأ بعوكل و كان للامانه خط جديد في الكوميديا و كان لشخصية اطاطا نجاح اكبر من شخصية عوكل لانها كانت جديدة مع انه استخدم صوتها في مسرحية رد قرضي...و استعان في الفيلم بايقونة النجاح في وقتها عم حسن حسني و ممثلة يتوافر فيها كل شروط الجمال زي نور

-ارمي كل اللي فات دة بقي ورا ضهرك عشان لسة في قدام

😎

-نجاح محمد سعد في تقديم الشخصيات باسمها خلاه يصمم علي تكملة الطريق بمنطق "اللي تكسب به العب به" و بدأ يختار ابطاله باسلوب من اللي هيأكل مع الناس في الوقت دة ..فعمل "بوحة" و كان معاه ساعتها حسن حسني و مي عز الدين و الفيلم اتحفظت منه شوية افيهات و بدأ نجاح محمد سعد يتنقل من مرحلة فيلم حلو لمرحلة افيهات حلوة

-لا انا هاعمل فيلم لوحدي دة انا محمد سعد..دة انا لو طلعت متكلمتش الناس هتضحك 🙄🙄🙄🙄

دة لسان حال محمد سعد و هو بيقرر يعمل كتكوت اللي تقريبا كان بيمثل فيه لوحده و تقريبا فشل الفيلم و كأن محمد سعد مكنش راضي يجيب معاه حد تقيل عشان يفضل هو النجم اللي باين

-فيقرر النجم انه العيب في الجمهور و بدل ما يقول ان في حاجة غلط يصمم انه يعمل فيلم تاني لوحده😯

قرر انه يعمل كركر بس المرة دي لولا الزنقة و فرق الاعمار كان عمل ادوار رجاء الجداوي و حسن حسني و ممكن كمان ياسمين عبد العزيز

و فشل كركر فشلا ذريعا

-طيب كويس..من الفيلم اللي جاي بقي هيعرف الغلط منين؟

ايه دة؟!!

بوشكاش 🤔🤔

دة طلع العيب في الجمهور برضه

-و قرر محمد سعد الاستعانة بمؤلفين و مخرجين طيبين و بيسمعوا الكلام..يعني بيقولوا حاضر و نعم

-اكتب الافيه دة؟ حاضر

-نشيل الدور دة؟ طبعا يا استاذ

-لازم اغني في الفيلم...هو الفيلم يبقي فيلم من غير صوتك

-نعمل استعراض؟ ما هو الغني لازمله رقص معروفة يعني

-و زي ما التاجر اللي لما بيخسر فلوسه بيدور بقي هو كان مسلف مين عشان يرجع ياخد منه فلوسه..قرر سعد انه يرجع اللمبي من تاني بس المرة دي 8 جيجا و برضه معاه مي عز الدين و ماجد الكدواني علي خفيف كدة

-و تقريبا عشق محمد سعد لاسماء الشخصيات فراح عامل فيلم تك تك بوم ..قلنا كويس اهو حاجة جديدة..لقيناه مرجع رياض المنفلوطي اللي في بالي بالك

الله؟ ليه طيب ؟ 😫😫

خلاص بلاها نادية و خد سوسو

بلاها سينما و اعمل تلفزيون..هات شمس الانصاري

بس استني!!! دة مسلسل كله دراما 🤨🤨

يـــــــــــــــــــــــــــا مؤلف اكتب شخصية كوميدية هو ينفع محمد سعد من غير كوميديا؟؟

فعملوا شخصية البياع العبيط عشان الاستاذ يعرف يضحك

وفشل الاستاذ

--اوعوا تكونوا زهقتوا عشان لسه الزهق جاي ورا

تتح...يا نهار مش فايت...طيب ايه؟ ما هو لازم شخصية فيها لدغة او حركة في الجسم عشان تضحك؟

هو لازم نغني كل فيلم؟

اه يا عم انت ايش فهمك انت؟؟

الحقونا يا جدعان النجم زعلان؟؟ طيب دور كدة

ايوة🤗🤗🤗

-هات اطاطا نعمل بيها مسلسل بقي بس المرة دي هات معاها اللمبي مش عوكل عشان التجديد 🤨

ايه دة منجحش 🤔🤔

طيب نرجع تتح تاني في حياتي مبهدلة؟؟

برضه منجحش

خلاص رجع بوحة و اعمل به برنامج؟

لا دة بقي هينجح 🤓🤓

برضه منجحش

باختصار محمد سعد فعلا لو عايز يرجع نجم اول بجد لازم يعمل حاجة تكون رهان علي نفسه و تحدي له

يا يرجع نجم يا يبقي "تحت الترابيزة"

اه صحيح تحت الترابيزة دة اسم اخر اعماله و كأن كان قلبه حاسس

محمد سعد..اسمك مبقاش كفايه علي التتر عشان العمل ينجح..رجع اسمك و مكانتك

#محمد_سعد

#التتر

#كريم_مجدي