نجاح الموجي

- في ايه يا كريم مالك؟
-يا عم وعدت الناس اني اكتب عن نجاح الموجي
-طيب ايه المشكلة ...دة فنان جامد قوي
-ايوة يا سيدي ما انا عارف انه جامد قوي و دة اللي مخوفني
-نعم؟!!! ايه بقي اللي مخوفك
-هاقولك يا سيدي


-عشان تكتب عن نجاح الموجي بالذات لازم تذاكر مذاكرة ثانوية عامة لدرجة انك تفتكر مشاهده بمجرد ما يتقال قدامك اسم العمل..صعب انك تكتب عن واحد موهوب بس الاصعب انك تتكلم عن شخص متعدد المواهب..واحد فيه كل معاني الافيه المصري بكل بساطته و حلاوته..واحد لما بس بيتكلم ممكن يطلعك سابع سماء من كتر الضحك و ممكن ينزلك سابع ارض من كتر الوجع اللي في صوته

-نجاح الموجي هو فقرة الساحر اللي تخطف عينك من وسط مليون فقرة ممكن تتقرج عليهم...ساحر بيطور نفسه لدرجة انك متعرفش هو ممكن هيعمل ايه عشان هيخليك تسافر معاه في عالم بتاعه هو بس..عالم جراب الحاوي او جراب الموجي


-نجاح الموجي هو ابن البلد ابو دم خفيف و هو المواطن اللي الدنيا طحناه..هو صبي القهوة اللي ممكن تقابله كل يوم..هو الصوت اللي ممكن تسمعه في شوارع مصر و اللي بيخلي اي كلام هو كل الكلام...لازم تمشي في وسط البلد و تشوف البياعين عشان هتلاقي فيهم حاجة منه ...و تنزل علي الحسين و تشوف بياعين الكلام قبل البضاعة و اللي ممكن يبيعولك الهواء في ازايز

-و تروح شارع محمد علي عشان تسمع الطقاطيق اللي تطربك و تاخدك في عالم تاني و متبقاش عايز ترجع او صوت الطبلة اللي تخليك ماشي بخطوات الايقاع مش بخطوات رجلك انت..و تروح قهوة العاطلين و تسمع كلامهم اللي يوجعك من كتر الفقر و يضحكك من كتر ما بيتريقوا علي حالهم..لازم تروح لحلاق في حواري شبرا من بتوع زمان اللي هتلاقيهم لابسين الجلابية و فوقيها الجاكيت..او سافر الشرقية و تشوف خفة الدم الفلاح الفصيح..و لو جالك فرصة لازم تقعد مع واحدد محشش دمه خفيف و استحمل الضحك اللي هيطلع منه

-و عشان اكتب عن الموجي لازم اعيش في زمانه و اتخيل ازاي موهبة تسبق صاحبها و زمنها بسنين...لازم احضر سباق خيل من ايام الملك عشان اقدر اشوف مين هو الحصان البريمو اللي هيسبق كل اللي حواليه و كل اللي بيتفرج عليه عارف انه هيسبق بس مستنيين يشوفه ازاي هيجري وسط الخيل و هو بس اللي باين..لازم ادل المعتقلات في الستينات عشان اعيش وجع الاعتقال و ازاي و امتي بيتقال صوت الوجع و الظلم

-حتي لو كتبت عنه ازاي هاقدر اقول كل اعماله اللي سابت بصمة في جيله و الاجيال اللي بعده ...يعني مثلا


-ما اصل لازم اقول علي المعلم الهرم تاجر المخدرات في فيلم الكيت كات و اشهر افيهاته لما المأمور سأله "انت بتتاجر في المخدرات قطاعي صح و لا هتنكر؟" فيرد الهرم بمنتهي البسااطة و العبقرية "صح بس هانكر"

-و انت قاعد بتحلق لازم تفتكر دوره في فيلم زيارة السيد الرئيس و مشهده مع مرعشلي الرجل العجوز لما قاله"شلن , انت فاكر نفسك بتحلق عند جزمجي"

-هو ماتش الاهلي امتي؟؟
لا لو علي الكورة لازم تفتكره في فيلم 4-2-4 لما قال "هاتوا اي ماركة عربية بس المهم انها في الاخر تنفع تاكسي" و تحس ان الجملة في اولها فيها تضحية و عقل بس دة في اولها بس عشان نجاح الموجي هيحول اخر 3 كلمات لافيه مينفعش يتنسي


-فكر الخناقات ايام التسعينات لما تحب تقول لواحد انت عملت ايه في واحد عمل فيك حاجة مش صح؟؟
كنت بتقول "في واحد عمل زيك كدة راقد في المستشفي دلوقتي" اهو الافيه دة متسجل باسم نجاح الموجي في فيلم اربعة في مهمة رسمية مع العبقري احمد ذكي


-نجاح الموجي هو اللي اخترع ال thug life اللي بنقول عليه من كام سنة قريبة
عايز تعرف ازاي؟؟

-مرة عملها في دور الهرم لما قولتلك عليه في الاول و تاني مرة في فيلم اسمه اغتصاب في مشهد الاوتوبيس لما الست قالتله يا استاذ مينفعش كدة فيقولها بمنتهي الثقة "اومال ازاي"


-ايه دة؟؟!! تخيل صبي القهوة دة و هو بيتكلم عن الاقتصاد فكرني بمزيكا في مسرحية المتزوجون...ابن بلد علي قده و عامل فيها فاهم كل حاجة...فاكر القعدة بتاعته و هو حاطط رجل علي رجل و جورج سيدهم بيسأله بتفهم في السياسة ياض يا مزيكا؟؟ فيرد الموجي و كأنه دارس كل العلوم السياسية "انا الشعب"


-هو النصاب الشعبي في طأطأ و ريكا و كاظم بيه اللي في الاخر بيكتشف انه مهما نصب فهو نصاب غلبان علي قد حاله لما بيقابل نصاب الطبقات العليا و شوفه و هو لابس الزي البحري و بيتكلم بمنتهي الثقة و كأنه بيمثل انه بيمثل انه قبطان


-ما تيجي نسمع اغنيه؟ و لا اقولك استني..اسمع اتفضل من غير مطرود و هتشوف المجنون العاقل جدا اللي بيشرح هموم البلد و مبدأ تمشي عليه في اغنيه زي الاسكتش الخفيف و كأنه بيدي محاضرة في الفلسفة و هنا هتشوف الصوت قبل ما تسمعه لان كل ما هيقول جمله هيجي في دماغك مشهد يترجم الجملة دي


-لو مش عايز تسمع اغاني...افتحلنا التلفزيون و قلب كدة شوفلنا حاجة نتفرج عليها

لا ارجع كدة

دة فيلم التحويلة..خليه كدة...في مشهد هنا لنجاح الموجي لما الضابط بيقول للمعتقلين قولوا تحيا مصر بعنف و حب و يقوم نجاح الموجي بمنتهي الشجاعة و يقول كلام في منتهي الوجع و ازاي حركة جسمه بتقول حاجة و صوته بيقول حاجة تانية
لما قال" تحيا مصر و تحيا مصر في كل ناحية و كل حال..تحيا مصر في المصانع في المزارع في الجبال..بس انتوا سيبوها تحيا و هي تحيا و تبقي عال"

-بص نجاح الموجي ممكن يتعمل به فيلم في 2017 لانه فعلا سابق زمنه


كريم...ما انت خلاص كتبت المقال

-ايه دة؟!! تصدق صح

و لسه في الجراب يا مــــــــــــــــــــــــوجي

#نجاح_الموجي
#لسه_في_الجراب_يا_موجي
#التتر
#كريم_مجدي

مصطفي شعبان

اوعي يغرك جسمك

دي الجملة اللي محمد سعد نصح بيها علاء ولي الدين في فيلم الناظر بس كأنه كان بينصح فيها حد تاني خالص..قبل ما نبدأ اي كلام ما تيجي تفتكر معايا فيلم مافيا...معظم الناس طلعت من الفيلم دة بنتيجة مشتركة و هي ان في ممثل تقريبا كان مغطي علي الفيلم كله و انه في اوقات و مشاهد كتير سرق الكاميرا من بطل الفيلم نفسه

كابتن حسام او زين التاجي الشهير بمصطفي شعبان اللي من ساعة الفيلم دة قرر التتر انه يحط اسم مصطفي شعبان من ضمن نجومه اصحاب المقام الاول و بدأ مصطفي شعبان انه يرد الجميل للتر انه قد المكانة دي خصوصا انه كان قدم افلام فيها جرعة تمثيل في فيلم النعامة و الطاووس

و اتنقل مصطفي شعبان لمرحلة الدراما و قدم العميل 1001 اللي ممكن نعتبره انه فيه تمثيل تقدر تقول عليه بداية مميزة خصوصا انه كان مع مؤلف زي دكتور نبيل فاروق و توريك ان في ممثل شاطر جاي في السكة

و بدأ اسم مصطفي شعبان يطلع في الصفوف الامامية للتر في فتح عينيك و فضل مصطفي محافظ علي مستوي تمثيله اللي مخليه وسط نجوم التتر في الوقت دة و نيجي بقي لفيلم "احلام عمرنا" و هنا بدأ مصطفي شعبان انه يخلط حياته الشخصية بالسينما في حب الفروسية و هنا لازم تفتكر الجملة الاكثر افورة في تاريخ السنما "محدش بينجرح قوي غير لما بيحب قوي" و من ساعتها قرر مصطفي شعبان انه لازم يتحب في اي عمل بيقدمه حتي لو معدي من قدام الكاميرا...دي مني زكي نفسها حبته مين مجنونة تانية ممكن ترفضه

فاكر فيلم العار؟ اكيد فاكره 

في بقي مسلسل اسمه العار بس دة حاول تنساه...ليه بقي؟

لان مصطفي شعبان في المسلسل دة قرر انه يكمل في مدرسة الافورة في تقليد النجم نور الشريف في العمل الاصلي و حتي في مشاهد الحزن هتلاقي نفسك قدام مشهد فيه تمثيل بمعناه الحرفي زي ما تقول لواحد صاحبك انت هتمثل؟؟

فاكرين موضوع الفروسية؟؟

اهو بقي مصطفي شعبان قرر في نقل رحلة تدينه في حياته الشخصية و كأنه مكسل يمثل فقالك يلا عشان ابقي علي طبيعتي 

و قرر انه ينتقم من قهر نور الشريف لما حرمه من الجواز في "عائلة الحاج متولي" و قرر انه يتجوز اربعة زيه زي ابوه و هي فكرة مستهلكة و برغم انه كان في جرعة كوميديا مش بطاله بس متقدرش تحط تصنيف للمسلسل يعني هو لا كوميدي و لا دراما و لا اجتماعي حتي و هو كل فكرته ان يتجوز 4 بس اهم حاجة ان الزوجة الرابعة متخلفش...30 يوم همنا كله ان مراته الرابعة متخلفش..و كل اللي الناس فاكراه من المسلسل دة كلمة واحدة

ايووووووووووووووووووووة هي 

"احبوش"

و قرر مصطفي شعبان بقدرة قادر انه يدخل مرحلة السوبر مصطفي او بمعني تاني الشخصية الاسطورة  اللي دايما الناس كلها عايزة تنتقم منه عشان غيرانه منه و كل الستات تحبه برضه...الشخصية اللي دايما بتسامح و دايما كل اللي حواليه محتاجينه في حياتهم 

و عمل مسلسل مزاج الخير و دور خميس افندينا اللي برضه كل الستات بتجري وراه و هو الكبير دايما...اه صحيح اصرار مصطفي شعبان انه يتحول لممثل كوميدي في شويه مشاهد من المسلسل توريك قد ايه الرجل دة واثق جدا انه هيعجب الناس

هو عشان الستات كلها تحبه و هو بيحب التخصص فراح عامل دكتور نسا و دة مسلسل مش محتاج كلام كتير عشان هو ماشي علي نفس فكرة اللي قبله و اللي بعده

و يستمر في مسيرة السوبر مصطفي بس مع تغيير الديكور تقريبا بس المرة دي في مسلسل مولانا العاشق و كل اللي اتبقي من المسلسل الجملة اللي المؤلف اكيد ايده وجعته من كتر كتابتها اللي هي "حبيبي يا ربنا"

و بمنتهي الثقة اصر مصطفي شعبان انه يبقي موجود في رمضان بمسلسل اللهم اني صائم و هو فعلا انسب عنوان للي هيشوف المسلسل

-مشكلة اعمال مصطفي شعبان انها بقت محفوظة عايز تعرف ازاي؟؟
ورقة و قلم و اكتب ورايا كدة:
1-عدد سبحة معاه طول الفيلم
2-عدد 30 جلابية بيضاء عشان العرق بس في التصوير
3-عدد من 3 ستات او اكتر عشان يحبوا الاستاذ
4-عدد 1 ست يحبها الاستاذ و لازم تسيبه او تموت في الاخر 

تعالوا نقول الخلاصة 

مصطفي شعبان كان بياخد ثقته مش من نجاحه عند جمهوره..دة كان بياخد الثقة من الشخصيات اللي بيمثلها يعني خلص المعلم في الزوجة الرابعة فراح عامل خميس افندينا لقي نفسه جامد فراح طالع بمولانا العاشق

مش عيب انك تنجح في الدور التاني علي طول بس عيب متبقاش قد الدور الاول 

خد قرارك و افتكر دايما زين التاجي 

#مصطفي_شعبان

#التتر

#كريم_مجدي

ثريا ابراهيـــــــــــــــــــــــــــــــــــــــــــــــــــــــــــم

لما تبقي الموهبة صوت و صورة

زي ما قالت الاسطورة زمان ان التربية بتيجي قبل التعليم هنا هنتكلم ان الصوت ممكن يجي قبل الصورة..صعب انك تبقي موهوب و تقنع الناس بكدة و انت بتمثل صوت و صورة قدامهم بس الاصعب انك تقنع الناس بموهبتك و انت مستخبي ورا ميكروفون..مش سهل انك تفرح و تزعل و تتنطط و تتألم و كل دة و الناس مش سامعة غير صوتك و انك لازم توصلهم كل الاحاسيس دي

مش بس كدة دة انت مهمتك بتبقي اصعب لانك قدام الكاميرا بيبقي ليك زاوية تبص عليها و حركات معينة بتتحركها و دة بيسهل شوية انك تمشي الحوار بتاعك مع خطواتك بس انك تبقي واقف قدام الميكروفون و تعمل كل اللي فات دة ..فدة معناه انك موهوب بشكل غير طبيعي و النهاردة....

ثريا ابراهيم بتثبت ان الموهبة بالصوت بتكون اقوي انك تبقي صوت و صورة...ثريا ابراهيم من الناس اللي موهبتهم برة الصندوق..تخيل معايا انك بتسمع صوت متركب علي شخصية تانية خالص و انت طول ما انت بتتفرج هتفضل رابط الصوت بالشخصية طول عمرك

تخيلت؟؟ لا استني بس شويه متفوقش دلوقتي

زود الخيال شوية ان الشخصية التانية دي هي شخصية كارتونية...اه و الله

ثريا ابراهيم اقادرة انها توصلك صوتها بس بكل انفعالات الشخصية اللي هي بتعملها من غير حتي ما تعرف مين صاحبة الصوت دي

ما تيجوا نسمع صوت ثريا ابراهيم

هتفرحوا و الله

-مدام روز في "شركة المرعبين المحدودة" و جملتها الشهيرة "انا باراقبك و هاراقبك" و ساعتها هتحس ان مدام روز الشخصية الكارتونية اتحولت بقدرة قادر لشخصية لحم و دم حتي لو هتقول جمل قليلة او عادية جدا فالتميز هنا جاي من الصوت اللي تفوق علي الصورة

هتشوفها المديرة الكلاسيكية في جملة "خلصت تقاريرك النهاردة" و هنا ثريا ابراهيم بتحول جملة في فيلم من افلام ديزني العالمية الي طعم مصري خالص بكل تفاصيله و هنا تقدر تقول في وش التخين ان الست دي هي اللي عملت نجاح مدام روز و تفوقت علي الصوت الاساسي للشخصية

مين مضحكش لما قالت "وشوشني دمك خفيف"و ساعتها عمرك ما هتتخيل ان الكلام اللي راكب علي الشخصية قوي كدة ممكن تكون صاحبة الصوت قاعدة علي كرسي و قدامها حتة حديدة اسمها ميكروفون

-في فيلم كارتون اسمه "ابطال خارقين" ...ثريا ابراهيم كانت بتعمل دور "دانة للموضه" و هنا بيصغر صوت ثريا ابراهيم في العمر من مدام روز الكبيرة في السن لدانه للموضه اللي بتتكلم بثقة زيادة تصل الي حد التناكة في اوقات كتير و هي بتقول "دة انت لحوح قوي"

هنقول انك ممكن تتخيل ان اللي فاتوا دول تلاقيهم في ارض الواقع بس ثريا ابراهيم هتخليك تتخيل ان في عربية ممكن تتكلم..قادرة و تعملها

-في فيلم () او سيارات في دور "نظلة" و هنا هتعرف لو العربيات القديمة اتكلمت صوتها هيبقي عاملة ازاي بمزيج من العزة و الفخر و انها مش مصدقة انها راح زمانها للعربيات الجديدة و كل ما تشوف عربية قديمة هتبقي متأكد ان ثريا ابراهيم قاعدة جواها

-دور علي فيلم اسمه "اطلانطس الامبراطورية المفقودة" و اسمع مدام بكار و هي بتتكلم زي ستات البيوت المصرية و هتنسي انه فيلم كارتون انتاج خارجي

يلا فتح عينك من التخيل كدة و تعالي علي ارض الواقع شوية

-ثريا ابراهيم ممكن تضحك علي ضحكتها زي ما عملت مع هنيدي في وش اجرام ...و خلينا مع هنيدي لما عملت ام فوزي و الكلمة المشهورة"هتموتني يا موكوس يا ابن الموكوسة"

-الست دي بتحول انك تتعاطف مع ست كبيرة في العمر سمعها علي قدها لمادة خام للكوميديا زي ما عملت في حريم كريم مع طلعت زكريا و هنا ثريا ابراهيم بتعمل حاجة احلي من الكوميديا اللي هي انك بالبلدي كدة تباصي الافيه للي قدامك عشان يجي حد تاني يشوط و يجيب جول

-و هتلاقيها الام العاقلة قوي اللي خايفة علي بنتها في "احلام عمرنا" مع منة شلبي و جملتها اللي فيها معاني الام المصرية "دماغك ناشفة ..طالعة لابوكي "

صعب انك تأثر علي ناس كبيرة بس الاصعب بكتيير انك تبقي مؤثر علي اطفال بيصدقوا بقلبهم و عشان يصدقوا بقلبهم لازم يصدقوا بودانهم الاول

ثريا ابراهيم عملت اللي كل اب و ام يتمنوا انهم يعملوه مع ولادهم...انهم يخلوهم مرتبطين بيهم حتي بالصوت

الصوت بس كان كفاية انه يخلي ثريا ابراهيم نجمة من نجوم "التتر"

الله يرحمك و شكرا يا مدام روز

#ثريا_ابراهيم

#التتر

#كريم_مجدي  

هشام نزيــــــــــــــــــــــــــــــــــــــــــــــه

تعرف ترسم فرخة؟ اه دي سهلة قوي

طيب تعرف تأكلها؟ احنا هنهزر بقي 

طيب اصعبها عليك اكتر 

طيب تعرف بعد ما تأكلها تحس بالشبع؟؟

هشام نزيه..الاسم اللي كل ما هتسمعه لازم يجي في دماغك ابداع في تحويل الامور من صورة لصورة تانية دة مش بس كدة...دة انت لازم متحاولش تتخيل لان اكيد اللي هيعمله هيعدي مرحلة الخيال

هو اللي ممكن يخليك تسمع بودانك الفيلم اللي بتشوفه في ساعات في خلال دقائق 

-شايفك ياللي بتقول عادي ما هو  لازم لكل فيلم الموسيقي التصويرية بتاعته 

بس اللي مش عادي انه يخليك تسمع مشهد مشهد بودانك..صعب انك تحول كلام مكتوب لموسيقي تفكرك به بس الاصعب انك تجيب موسيقي تفكرك بالكلام دة

-هشام نزيه بيشوف الفيلم غير اي حد تاني..بيشوفه بودانه و تخيله..الرجل دة ممكن متاخدش بالك من اسمه علي التتر بس مينفعش متشوفوش جوة الفيلم

-ازاي تخلي الموسيقي تفرح لو البطل فرحان...و ازاي تخليها غامضة في وسط احداث مش واضحة و ازاي زي ما فرحتها تزعلها وقت ما الاحداث تطلب 

-كل واحد فينا ممكن يتخيل السيناريو و يعمله فيلم من ابطال و مشاهد بس هشام نزيه بيتخيل السيناريو لابطال و بيحول الابطال لمشاهد 

--تعالوا نشوف شوية من الاعمال بحاسة السمع بطريقة هشام نزيه: 

-مينفعش تشوف طريقة مشي احمد السقا في خروجه من الملجأ في فيلم تيتو من غير ما يكون وراها موسيقي فيها مزج ما بين التوهان و الضعف انك مش عارف انت خارج ليه او حتي هتعمل ايه...او مينفعش تشوف فرحة احمد السقا بمباركة خالد صالح له من غير ما تحسسك موسيقي هشام نزيه ان البطل قد ايه فرحان

-لما تتفرج علي الفيل الازرق مينفعش الفيلم كله يبقي قائم علي عالم افتراضي و الموسيقي تكون واقعية فأبدع هشام نزيه في الخلط ما بين الموسيقي الكنسية و الابتهالات في الفيلم عموما و في مشهد فتح باب المدينة لما تخيله كريم عبد العزيز بالاخص...و لازم لما يبقي في مشاهد ذكريات هتلاقي موسيقي تعيشك الذكريات دي مع البطل

-لا نوسع شوية كدة عشان هنتكلم عن ابراهيم الابيض و هنا هتشوف من المرات القليلة اللي هتسمع فيها الموسيقي بتلعب اكشن و هتلاقيها اتحولت في مشاهد الوجع

-لازم تحول 4 اخوات بيتشاركوا في الاجرام زي اللي في اولاد رزق لموسيقي تنقلك ليهم كانك ساكن جنبهم و شايف تحركاتهم و انفعلاتهم و اختلافهم...و لازم ساعة تبدل الاحداث يسمعك رتم يخليك مستني المفاجأة اللي جاية

-ما هو برضه ميرضيش هشام نزيه ان فيلم زي اكس لارج يعدي كدة من غير موسيقي تفكرك بالاحداث و التغيرات اللي حصلت في الشخصية ما بين رومانسي لما وقع في الحب و اصرار لما تصدم و حزن ساعة الفراق و فرح ساعة النجاح و موسيقي بترقص ساعة الافيه الحلو

-و زي ما هيبتا محاضرات كان لازم هشام نزيه يعمل الموسيقي التصويريه زي المحاضرات كل جزء شارح نفسه و بيسلم للي جاي بعده

طيب 

شوفت مسلسل افراح القبة صعب ازاي في مجهوده؟؟

تخيل بقي معايا ان الرجل دة لازم يكون من عوامل ان تخليك تصدق زمان و مكان المسلسل...يعني لو عملك موسيقي سريعة او جديدة هتلاقي نفسك رافض تسمعها و يعمل هشام نزيه رائعة افراح القبة اللي تحس انها اتألفت و اتعزفت في وقتها

-هاقولها حاضر...السبع وصايا و الموسيقي التصويرية لمسلسل بيشرح حالة من الغموض و حل الالغاز غير طبيعي بطريقة الصوفيه و مزجها بالغموض اللي بيكمل حالة المسلسل

هشام نزيه من العوامل اللي ممكن تخليك تصدق العمل او ترفضه...هو السينما التخيليه كاملة الاركان بس بتتسمع 

شكرا هشام نزيه 

ضياء الميرغني

لما تبقي الكوميديا بنت بلد

عارف النكتة اللي بتتقال علي قهوة في الحسين او افيه حلو يترمي في حواري الحلمية القديمة..نفس النكتة ممكن تسمعها في اي مكان بس جو المكان هو اللي بيديلها طعم..ضياء الميرغني هو الجو دة يعني ممكن تسمع الافيه بتاعه من اي حد بس تضحك لما هو يقوله اكتر

الكوميديا انواع و ضياء الميرغني صاحب مدرسة خاصة من مدارس الكوميديا اللي تقدر تقول عليها المدرسة الشعبية و هنا الشعبية بمعناها الاصيل الللي احنا متعودين عليها..ضياء الميرغني هو من عوامل نجاح اي مشهد بيبقي موجود فيه..يعني تقدر تقول كدة انه عامل زي زراير الذهب في قميص البدلة اللي من غيره هيبقي قميص بدلة زيه زي غيره

ضياء الميرغني ممكن تضحك معاه في عمل و ممكن تلاقيه في عمل تاني شرير او حاقد او حتي مريض نفسي..هو من مدرسة الافيه اللي بيجي من الهواء و ساعات الافيه بيبقي جملة عادية جدا بس هنعمل ايه بقي؟

لازم تضحك اصل هو اللي بيقولها

صعب انك تلاقي صوت بيضحكك لوحده..مش مصدق؟

طيب هاتله اي مشهد كوميدي و اقفل الصورة و اسمع الافيه هتلاقي نفسك بتضحك

ضياء الميرغني من الناس اللي لما بيعلي صوته مبيحصلكش خضة دة انت هتلاقي نفسك بتضحك اكتر لانه مش متوقع..يعني متعرفش هو هيقول ايه بس انت عارف ان اكيد هتضحك

طولت عليكوا صح؟ بس هو يستاهل

طيب ما يلا بينا نصمم تتر ضياء الميرغني

-لازم تفتكر "شحتة السباك" في فيلم النوم في العسل و هنا لازم تركز شويه عشان هتشوف تركيبة كدة من القلعة مثلا..الصنايعي اللي اهم حاجة عنده رجولته و سمعته و مش عايز يقول علي سبب قتله لمراته حتي لو هيتعدم...شوف كسرته و هو بيقول لعادل امام "متنتظرش مني كلام تاني و خصوصا هنا..ربنا أمر بالستر"

و هتلاقي نفسك قدام واحد بيمثل بنبرة صوته..هتلاقيه برضه بيضحكك لما قال "راحت مطرطشة بكلام من اللي يفور الدم ,دمي فار , طيرت رقبتها" الجملة هنا عادية صح؟

بس ما احنا قولنا بقي ضياء الميرغني هو اللي قالها

طيب عمرك متتكلمش غير حرفين و تضحك برضه؟؟ شوفه و عادل امام بيقوله يعني مفيش خالص؟ فيرد ضياء من تحت لتحت كدة بحرفين هم " اه" و كرر عادل امام السؤال لما قاله بح؟ ااااااااااااااه

-نكمل مع عادل امام برضه بس المرة دي في بوبوس و هنا هتشوف ضياء بيقدم نوع مختلف من الوجع الكوميدي..هتلاقيه الرجل الشعبي اللي علي قد حاله الموجوه ان رجل اعمال طرده من الشغل و شوف الكوميديا بتاعته لما عادل امام قاله مساء الفل فيرد عليه "انت بتقولي مساء الفل ليه؟ شايفها بتخضر شايفني باتحزم و ارقص" و بعدها علي طول هيخليك تبكي و هو بيحكي بعزة نفس ابن البلد ازاي طردوه من شغله و كأنهم جابه ممثل تاني يعمل الجزء دة

طيب نكمل رحلته مع الزعيم؟ اكيد مفيش مانع و خصوصا لو كان في اختلاف

-هتشوفه الشيخ مصطفي في حسن و مرقص و هنا تتأكد ان الرجل دة مينفعش يكون بيمثل كوميدي..من اول صوته لحد مسكة السبحة في ايده و تعبيرات وشه بيقولوا حاجة واحدة بس و هي ان الرجل دة هو الشيخ مصطفي مش ممثل اسمه ضياء الميرغني و عايز دليل علي كلامي شوف حدة صوته و هو بيقول لعادل امام "اطلع بيتك يا شيخ حسن و لو فيهم رجل يتعرضلك"

طيب سيبك من كل دة

-ضياء الميرغني عمل دور كله عبارة انه بيقول ابيات شعر..ما هو اللي قال ابيع نفسي و السنونو في مرجان احمد مرجان و هنا هتلاقيه بياخد نفسه و يروح طالع بابيات شعر و انت لازم تضحك معاه

-كان من ابطال فيلم امير البحار برغم انه دوره كله ميكملش 5 مشاهد في دور الريس حزنان..و مين فينا ينسي صوته و هو مصمم علي اغنية كوتوموتو او لما قاله ضحكني يا قصير..و بعد ما ضحك و اتبسط بعد الاغنية تحس انه كان عايز يرد الجميل و يضحكك لما قالهم برررررررة...هتشوف ثقته و هو بيقول للمساعد بتاعه احنا كام قاله 9 فرد الريس حزنان لا احنا 8 و ضربه بالنار

-هو الناظر في "رمضان مبروك ابو العلمين حمودة" و يواصل الميرغني في اثبات نفسه بموهبته مش بعدد المشاهد..ما هو برضه مينفعش حد غيره يقول لهنيدي "ياختااااااااااااااااي ياختي" لما لقاه معلق ابن الوزير...او لما مساعد الوزير قاله رمزي باشا بيلعب اسكواش عندكوا اسكواش؟ فرد ضياء قاله "ها" نوجدله ...و مينفعش تتخيل حد تاني بيمثل نفس الدور من واحد غيره

-طيب نختم بابو بطة الاسطورة و هنا ضياء الميرغني بيوريك يعني تطلع من فيلم فاكر الافيه اكتر من الفيلم نفسه...و دة اللي عمله في فيلم الحب كدة مع حمادة هلال لما قاله "ما تبطل شغل الهوات دة و اتفرج علي علي شغل المحترفين" شوف الاسطورة هيعمل ايه

شوفه لما اي حد في الفيلم و يقوله الاسطورة؟!!! يقوله اه الاسطوووووورة

من الاخر كدة لما تقول اسم ضياء الميرغني لازم تسبقها بلقب نجم و انت مغمض

شكرا ضياء الميرغني صاحب مدرسة الكوميديا بنت البلد

#ضياء_الميرغني

#التتر

#كريم_مجدي

مسرح مصر

رحلة اونطة..عايزين فلوسنا

دي اشهر جملة كانت بتتقال زمان و احنا راجعين من رحلة احنا حفظناها و بنطلعها كل سنة عشان المدرسة مش بتطلع رحلات غير المتحف المصري و السندباد و الحديقة اليابانية و كل سنة بنطلعها برضه عشان حبناها من اول او تاني مرة روحنا فيها الاماكن دي

تعالوا بقي نحكي الحكاية

يا جدعان هاتوا الحياة الحمراء عشان في مسرحية جديدة تياترو مصر

-ايه تياترو مصر دة يا بني؟

اشرف عبد الباقي(مع حفظ الالقاب) جايبين شباب جداد مش عارفين اساميهم ايه بس دمهم زي العسل و بيضحكوا جدا..يوم ورا التاني و مسرحية ورا التانية و موسم يجر التاني..و التتر بعد ما كان مجهول الاسامي و بعد ما كانوا شوية شباب بقي كل واحد فيهم له جمهوره و كيانه

كتير مننا حبناهم عشان حسينا فيهم نجاح لاي حد فينا عشان هم شباب زينا و تحس دايما انهم شبهنا و شبه اصحابنا و كان المجهود باين عليهم عشان يقدروا يقولوا للناس احنا موهوبين اهو خلي بالكوا مننا

-يلا يا عم نروح دي التذكرة ب 75 او 100 جنيه و مسرحيتين جامدين جدا و نضحك علي ناس بتضحك قوي

ايه دة يا عم يخرب بيت الضحك

-دة علي ربيع فقري بينسي الحوار كل شوية و اصحابه دايما بيفكروه و يتريقوا عليه...و ويزو اول دخلة ليها بتبقي علي موسيقي و بتعرف ترقص و لا الريشة و حمدي دة بقي مشكلة عشان بيتريق علي سنته المكسورة و شكله و كريم بيقول علي نفسه دبدوب و اوس اوس و هو بيقول الافيهات بنرفزة..و خاطر بيقول افيهات مسرحيات قديمة..او كل واحد يدور علي السوشيال ميديا و يلاقي كوميك يقوله  

ايــــــــــــــــــــــــه دة ؟!!!!

استني كدة

هو انا باتكلم علي انهي موسم؟

الاول و لا التاني من تياترو مصر و لا مسرح مصر؟؟

تصدق كلهم شبه بعض و لا كأني خدت بالي

في المواسم الاولي كان في واحد بيعمل حاجة طول الموسم انه ميتكلمش و هو ابرام سمير و دايما "يتقاله انت ايه؟" و لما ابرام بدأ يضحك تفتكر سكتوا؟؟ لا و الله ما ينفع

في اخر موسم ليهم جابوا وائل يقول طول الموسم(هو انا هاعمل ايه)

و كأن دة لسان حال الفرقة و كلها و كانت لازم الجملة تبقي "هو احنا هنعمل ايه؟"

و دايما لازم استاذ اشرف عبد الباقي يطلع صاحب او رئيس المكان بمنطق "انا صاحب الكورة" اللي بيقول الحكمة اللي بقت زي العادة اللي بتعملها كل يوم عشان اتعودت تعملها مش عشان هي حاجة كويسة

-اه نسيت اقولك بلاش يا عم نروح دي التذكرة بقت ب 300 جنيه

احنا بقينا داخلين اول مسرحية في اول كل موسم  و عارفين انها هتبقي بالشخصيات الحقيقة و كأن الممثلين خارجين بعد المسرحية جايين بهدومهم و مروحين علي طول و لازم تكون تريقة علي مسلسلات رمضان اللي قبلها

و لازم تلاقي ويزو داخلة علي موسيقي و علي ربيع بينسي الكلام و حمدي .....تصدق زهقت من تكرار الافيهات

مسرح مصر ماشي بمبدأ (الضحك بالسمعة) زي محل الاكل اللي بني اسمه بأكل جودة عالمية و اسعار علي قد ايد الناس و لما كبر قوي قلل من جودة الاكل و غلي الاسعار و اعتمد علي اسمه

-يا نجوم مسرح مصر و لكم عبرة في نجوم مسرح زمان الناس مش فاكرة افيه واحد منهم دلوقتي لانهم حولوا النجاح لسبوبة..مين ينسي محمد نجم و سيد زيان من ملوك المسارح كاملة العدد لمرحلة انك تعصر دماغك عشان تفتكر عمل او اتنين ليهم..او الموهوب في علم التوهان يونس شلبي لما حبس نفسه في نفس الدور و لما حاول يغير فشل

-زمان كان كل اسبوع مسرحية علي التلفزيون بس دلوقتي عيد يا بني المسرحيات القديمة عشان الاعلانات تزيد بس الناس هتزهق..الاسرة البسيطة اللي انتوا رجعتوها تتفرج علي مسرح تاني و ياما رسمتوا علي وشوشهم الضحكة الحلوة و ياريت تعوضوهم بمسرحية جديدة كبيرة تعملوا فيها كوميديا بجد و ترجعوا للناس الضحكة اللي انتوا كنتوا دايما سبب ليها  

*في شخصية في ديزني بالمصري اسمها عم دهب

عم دهب عنده قرش الحظ و دة اول قرش جابه من تعبه و بيعتبره سبب ثروته و كل يوم بيلمعه و مهتم به اكتر من اي حاجة تانية عشان عارف انه لو ضاع ثروته كلها هتضيع

حافظوا علي قرش الحظ و متخلوهاش رحلة اونطة و مش عايزين فلوسنا..احنا عايزينكوا نجوم في التتر

عباس صابر

^{عباس صابر"الة الزمـــــــــــــــــــــــــــــــــــــن"}

هو انا لو سألت اي حد فيكوا حد معاه بلوفر تملي معاك بتاع عمرو دياب؟ هيبقي السؤال سهل و ممك الاقي كتير لسه عندهم البلوفر

او لو سألت حد معاه نوكيا 3310 فمعظم الناس هتقول ياااااااااااه انت لسه فاكر بس برضه هالاقي ناس معاها اللي باسأل عنه

بس لو سألتك عندك تاج لشهر زاد او رمح قطز طبعا هتبصلي كأني معتوه او معايا شهادة معاملة اطفال بس لو سألت عم "عباس صابر" عن الحاجات دي فالوضع مختلف لانك اكيد هتلاقيها عنده

عم عباس صابر او الة الزمن..عم عباس هو كنز الاكسسوارات المتمثل في كائن حي يمشي علي الارض...و هو فعلا اله الزمن لانه قادر انه ينقلك من زمن لزمن و من عصر لعصر تاني و يخليك متشكش لحظة انك في زمنين مختلفين

عباس صابر دايما هتلاقي الاجابة عنده"حاضرة و موجودة"

يعني لو سألت عن ابريق في عصر سي السيد او بدلة عسكري انجليزي ايام الاحتلال او حتة عضمة ديناصور منقرض برضه هتلاقيها حاضرة و موجودة

و لو عقلك تجاوز عصور ما قبل التاريخ برضه هتلاقيلها حاجات عند عم عباس

عايز تعرف قيمة الرجل دة؟ يبقي تركز معايا شوية

-ينفع تتفرج علي مسلسل ايام الملك و تلاقي انتريه موديل السنة من ان اند اوت مثلا...او تتفرج علي عصر سي السيد و تلاقي كرسي القهوة بلاستيك...مينفعش تتفرج علي حارة اليهود و متلاقيش العمود اللي عليه فازة جنب باب الشقة

-عم عباس هو الكنبة اللي مكنش في غيرها في ارابيسك..هو الرجوع لحنين الحلمية و لياليها..هو مفارش و اكسسوارات الملك في الف ليله و ليله هو السلاح في ايد الغفر ايام الاحتلال الانجليزي و المسلسل بيتصور في ما بعد 2010

-ام كلثوم عاشت في الفترة ما بين 1904 لسنة 1975 و لما اتعملت شخصيتها مسلسل اتعمل 1999..عباس صابر رجع بالزمن 90 سنة عشان يوصلك احساس عصر ام كلثوم الحقيقي بالملابس و الجرامافون و الجلاليب و الصواني و كل حاجة هتوصلك لاحساس انك في العصر الحقيقي للشخصية

-عم عباس هو كلمة السر ما بين الممثل و المتلقي و هي اكبر كلمة سر.. هو المسئول ان الممثل يصدق انه في العصر اللي بيمثل فيه فعلا و هو المسئول برضه ان لما المشاهد عينه تيجي علي اي تفصيلة في المشهد ميخرجش برة الاطار الزمني اللي عايش فيه المسلسل

عم عباس صابر هو مجموعة قصاقيص صغيرة جنب بعض و يطلعلك في الاخر تابلوه لاي وقت انت تتمني تتواجد جواه

مش عمل او اتنين هنقولهم يدوا الرجل دة قيمته..دة له بصمة في كل مشهد في تاريخ السينما المصرية

يرحل من يرحل و يتألق من يتألق ويظل عباس صبار هو ميزان المياه في السينما و الدراما و صاحب اكبر ارشيف لكل العصور الزمنية

كرموا الة الزمن عباس صابر بجد مش اكسسوار

#عباس_صابر

#التتر

#كريم_مجدي 

صابر الحمامي

عم صـــــــــــــــــابر

لما الاسم دة بيتقال لازم افتكر اتنين..اتنين من اهم نجوم التتر اللي بيرسموا ملامح اي شخصية من الناحية الشكلية يعني من الاخر هم اللي بيطلعوا تفاصيل الشخصية مناسبة للي مكتوب علي الورق

الاتنين دول هم عم عباس صابر و عم صابر الحمامي

عشان تتخيل شخصية اول حاجة بتتخيلها هي شكلها و دة دور عم صابر الحمامي...انك لازم تعمل لكل شخصية شكل الشعر اللي يخليك تكمل في الخط انك تقتنع بكل حرف بيتقال من الشخصية دي عشان العين بتشوف قبل ما الاذن بتسمع

يعني مينفعش تشوف محمد صبحي في سنبل و المليون و هو بشعر واحد عايش في القاهرة و لا ينفع تشوف هانم من الزمالك بشكل فلاحة من قري مصر

ازاي تقتنع ان اللي الممثلة اللي قدامك دي هي هي م كلثوم بجد غير و هي عاملة شكل الشعر اللي مشهورة بيه...الموضوع مجهود و مذاكرة..مجهود انك لما تشتغل في عمل زي السيرة الهلالية فانت بتتعامل مع كمية ابطال مختلفين في الشكل و المطلوب منك انهم يطلعوا من تحت ايدك زي اللي علي الورق بالظبط عشان يشوفهم ملايين و يصدقوا انهم عايشين في العصر دة فعلا و يفضل صورتهم محفورة في دماغنا...مجهود انك لما تشتغل في فوازير شريهان و الاستعراضات الكتير اللي كانت بتتقدم و انت مطلوب منك انك تعمل و تجهز كل دة بمهارة و سرعة...لما يحصل كل دة قدامك و تلاقي الصورة ماشية مع الزمن اعرف انك هتلاقي اسم علي التتر لرجل موهوب و بيحب شغله اسمه صابر الحمامي

طيب عرفنا المجهود ...طيب ليه بقي المذاكرة؟؟ ما انا قايلك بقي يا عم فوق انه بيحب شغله

تعالي نتخيل انك قدام رسام هيرسملك لوحة فاول حاجة بيسأل عليها تفاصيلها الصغيرة و يسألك انت متخيلها ازاي و لو رسام شاطر يذاكر التفاصيل..ليه بقي؟؟

انا سعيد انك سألتني السؤال دة

عشان عم صابر الحمامي كان بيروح لكل ممثل و ممكن ياخد نسخة من السيناريو عشان يذاكر و يشوف الشخصية دي ممكن تطلع بانهي شكل عشان مينفعش شخصية مكتوبة انها بتهتم بنفسها و جمالها و يبقي شعرها منكوش...او مثلا حد لسه قايم من خناقة و شعره متسرح عادي كدة

عرفت بقي محتاجين المذاكرة في ايه؟

عم صابر هتلاقيه في العصيان..سنبل و المليون و خاتم سليمان و ريا و سكينة و احكي يا شهر زاد و ابو العلا 90  و السيرة الهلاليه و فيلم ام كلثوم و هتلاقيه في نشرات الاخبار و هتلاقيه مع اي فنان او مغني في الوطن العربي...شوفت التتر بيظلم ازاي؟

استاذ صابر هو البرواز اللي بيحاوط اي صورة عشان يكمل شكل الصورة الحلو و لو البرواز شكله وحش عينك هتيجي علي ابرواز مش هتيجي علي الصورة

صابر الحمامي من نجوم التتر اللي ظلمهم سنين طويلة و من العدل ان الناس تعرف واحد من نجوم التتر

اه علي فكرة و عم صابر عرف يربي

#صابر_الحمامي

#التتر

#كريم_مجدي

انتهاء الموسم الاول من التتر

يلا يا بني الفيلم خلص؟

استني يا عم لما اقرأ التتر الفيلم لسه مخلصش...الفيلم بيخلص لما التتر بيخلص

البداية كانت من الجملة دي و ازاي الناس كانت مستغربة انت ليه بتركز في التتر اكتر من الفيلم نفسه؟!!!

الاجابة اتقالت في مكتب صغير في الشغل و نص ساعة تفكير و ورقة و قلم و كتبت اول مقال عن الزعيم "عادل امام" و نشرته علي الصفحة عندي و لقيت ايه بقي يا سيدي؟؟

اللي يقولي مستحيل تكون انت اللي كاتب كدة و اللي يقولي انت اكيد نقله فلقيت نفسي باقول الله دة انا ممكن اكمل في السكة دي

اللي هي ايه السكة دي؟؟

اني اكتب عن موهوبين بلغة المتفرج العادي بعيدا عن اي فلسفة او كلام عميق يصعب علي امثالنا فهمه

و لقيت ان النجوم الكبار مش محتاجين موهوب صغير يكتب عنهم بس في ناس بتشيل افلام و الناس حافظين افيهاتهم بس مش عارفين اساميهم و محدش كتير اتكلم عنهم

بذمتك يا اللي بتقرأ الكلام دلوقتي...كام مرة حاولت تقرأ التتر في اخر الفيلم عشان تعرف مين هم الناس اللي نجحوا العمل دة؟؟؟

الحكاية بدأت مع عم يوسف عيد او تميمة الحظ زي ما انا باحب اسميه و بعدين دخلنا علي عم محمد شرف و روحنا لاسطي المسرح المنتصر بالله و استمتعنا بانعام سالوسة و كان مسك الختام مع عم سيد رجب

الصفحة لما كبرت الحلم كبر و الطموح زاد و نجوم التتر الباقيين بدأوا يجوا علي بالنا كتير

شكرا لكل واحد شارك معانا برأي او بكلمة شكر

شكرا لكل واحد انتقدنا و قالنا انتوا ناسيين حاجة

و شكرا لكل واحد شتمنا او تفهنا او قال احنا واخدين فلوس عشان نكتب كدة

و اسفين لاي حد اتضايق في الصفحة

الموضوع بدأ هزار بس الهزار قلب حلم كبير

و اسفين ان البوستات بتبقي قليله عشان الصفحة ماشية بالجهد الذاتي

و ان شاء الله نكمل الحلم سوا

الحمدلله خلصنا الموسم الاول من نجوم التتر و ان شاء الله بنجهز لحاجة او مشروع يارب يعجبكوا

مع التتر "اي حاجة منسية هنفتكرها"

و اي حد التتر ظلمه احنا هنعمله تتر لوحده

اه صحيح

انا اسمي #كريم_مجدي

استنــــــــــــــــــــــــــــــــــــــــــــــــــــوهم قريبا جدا 

نبيل الحلفـــــــــــــــــــــــــــــــاوي

يا عم دة كبر و مبقاش قادر يمثل..كام مرة قولنا الكلام دة علي اكتر من ممثل اتقدم بيهم العمر و مجهودهم مبقاش زي الاول؟

الجملة دي اصبحت و لا ليها اي لازمة مع نبيل الحلفاوي اللي ماشي بمبدأ "كل ما تكبر تحلي" او بمعني ادق "كل ما تكبر تتقل"

نبيل الحلفاوي من نوعية المواهب الغريبة اللي متعرفش تحطلها عنوان..هو لايق علي اي عنوان و كل ما العمر بيعدي به تحس ان حالة التحدي عنده بتزيد و ك\انه بيقول لخانة العمر في البطاقة وريني اخرك ايه؟؟

الحلفاوي هو الموهوب الشيك اللي تحس انه لو عمل فقير او غلبان هتلاقيه فقير شيك و لازم تكون متوقع انك هتشوف من الرجل دة ادوار و هتسمع منه معاني مش هتسمعها غير منه و بطريقته هو بس ..نبيل الحلفاوي اثبت ان الانتشار بيجي من الموهبة مش بكتر الادوار و كل عمل بيشارك فيه بيبقي عبارة ملعب لوحده بيستعرض فيها مهاراته في التمثيل

-ما تيجوا بقي نثبت الكلام دة بالدليل و قدام عينك كمان 
طيب نبدأ بايه؟
ما تيجي نبدأ ب "نديم هاشم" او قلب الاسد في رأفت الهجان و هنا هتشوف المعني الحقيقي لكلمة الثقة بالنفس الغير طبيعية و التلقائية في طريقة كلامه و كأنك قدام ظابط مخابرات حقيقي مش ممثل بيعمل دور و ماشي بعد ما يخلصه

-في مشهد مع الراحل محمود عبد العزيز لما قاله"يعني انت قررت انك راجع مصر" و تشوف الاسلوب الحاد اللي مخلوط معاه خوف علي ضياع المهمة و هتلاقي نفسك فصلت خالص عن الحلفاوي و ركزت مع نديم هاشم

- تعالي شوف معلا قانون و الدور النفسي العظيم اللي عمله في غوايش و هتشوف الحلفاوي في تجسيد رائع للصعيدي المتسلط

-ما تيجي ندعبس كدة في الاعمال التاريخية و مين فينا ينسي الزيني بركات و دور زكريا بن راضي و كان نبيل الحلفاوي ماسك ادوات الدور كأنه عايش في الوقت دة

*خد نفسك كدة عشان لسه الحلفاوي عنده كتير

-انت ممكن تلاقي ممثل بيعمل دور يتألق فيه...و احتمال يعمل دورين في نفس العمل و ينجح فيهم او انه ياخد جانب من جوانت اي شخصية من البشر فدة طبيعي لكن لما تلاقي ممثل بيعمل كل الجوانب الشخصية باتقان جدا فانت قدام نبيل الحلفاوي

مش مصدق؟؟؟
طيب تعالي نشوف عمك ياقوت عمل ايه فينا في ونوس

-عم ياقوت الرجل اللي عمل كل حاجة غلط في حياته و اتفاقه اللي برضاه مع شيطانه زي ما في ناس كتير بتعمل في حياتنا العادية..بس انت عمرك ما تتخيل ان دة عم ياقوت اللي ظهر انه ندمان و بيتوب لربنا و مصمم انه ميرجعش يغلط تاني و انه بيحاول يهرب من ونوس طول الوقت

-و تلاقيه الاب اللي ساب عياله و مسألش فيهم و فجأة تلاقيه الاب اللي بيحميهم و يجمعهم تاني

-كل مشهد مع واحد من ولاده هتلاقي اب مختلف مع كل مشهد مع حد فيهم...هتلاقيه بيتعامل بحنية و خوف مع نبيل و نيرمين و هتلاقيه بيتعامل بحدة و قسوة مع عزيز و الشيخ فاروق

-ازاي في مشهد مع نيرمين انه بيقنعها انه معاها في شغل تحضير الجن و فجأة بيحرقلها كل الكتب و كأنه بيمثل جوة التمثيل...و تشوفه لما بينصح الشيخ فاروق ازاي انه يكسب المناظرة و استفزازه له

-تشوفه خايف من ونوس انه يرجع يصاحبه تاني و تلاقيه في منتهي القوة مع ونوس برضه لما بيخدعه و يخليه يحققله كل طلباته

-عم ياقوت قفل المسلسل بمشهد لازم يتقال عليه "و ختامه مسك" لما قال جملة "مش قولتلك دي النهاية" و هنا هتلاقي ان ادوات التمثيل اتحولت للايد في وقعة القلم من ايده و نبرة الصوت اللي خلاص عارف انها خلصانة
------------------------------------------------------
مشي عم ياقوت...يسكت نبيل الحلفاوي؟ ابدا

عمل الاب النموذجي اللي يتمناه اي حد فينا..الاب اللي في ضهرك و يسندك..الاب اللي لو وقعت يمد ايده و يطلعك

عم مخلوف في لاعلي سعر..الاب المصري اللي زي ما قال الكتالوج..و دايما مشاهده مع نيللي كريم بتبقي عاملة زي المحاضرات اللي مفيهاش غياب و لا امتحان بس انت قاعد عشان عاجبك الدكتور و كلامه

-تعالي نشوف مشهده مع نيللي كريم و هو بيزعقلها انها شمتانة في جميلة انها عملتلها فضيحة و برغم انه عارف ان بنته مظلومة بس مقدرش يفصل بين تربيته الصح و ما بين احساسه ببنته و مش سهل الفصل دة

-في مشهد هتلاقيه في معظم البيوت المصرية لما قال" بقي مخلوف يتذل علي علبتين سجائر" و تلاقي احساسه بوجع الاحتياج مع الرضا الكامل لما بيكلم فنجان القهوة و هو بيقوله هاشربك برضه

-نرجع لمشاهده مع نيللي و لما قالها برغم اللي انتي فيه بس في الاخر انتوا في حضني..و هنا برضه بيمارس الحلفاوي في هوايته في الحاجة و عكسها انه يتمني الخير لبنته حتي لو بعيد عنه

-لو عايز تكمل مع الحلفاوي اتفرج علي عفريت لكل مواطن و الزير سالم...هتنبسط

من الاخر صعب انك تعمل اعمل قليلة و متتنسيش بس الاصعب ان اعمالك تبقي قليلة و لما ترجع تبقي صاحب المكان و اتقل واحد في القعدة

شكرا يا حلفاوي

#نبيل_الحلفاوي
#التتر
#كريم_مجدي