محمد رجــــــــــــــــــــــــــب

-بابا انا هأدخل هندسة
-يا بني هتدخل هندسة ازاي بمجموعك دة؟؟
-مليش دعوة... "اشمعني" اصحابي؟
-يا بني هتلاقي اصحابك بيذاكروا اكتر منك
-لا يا بابا دة انا اكتر واحد بيذاكر فيهم
-دة اللي انت فاهمه...انت شايف نفسك بس
-هادخل هندسة زيهم حتي لو بفلوس


-عشان توصل لاي هدف في الدنيا لازم تكون عندك شوية حاجات كدة من اهمها انك تبقي عندك ادوات تخليك توصل للهدف دة زي بالظبط المذاكرة يعني انت لو مبتحبش الرياضيات مثلا مينفعش تقول انا عايز ادخل هندسة...و لو حاولت كذا مرة و معرفتش لازم تتأكد انك فيك مشكلة

ما تيجوا نقنع محمد رجب انه يذاكر او ممكن نقنعه ان عنده مشكلة

-محمد رجب بدأ اولي ثانوي بخطوات نقدر نقول عليها مبشرة يعني مثلا دور معتز في ملاكي اسكندرية و دة كان في جرعة تمثيل كانت بتقول اهو في ممثل هيبقي له مستقبل كبير بس مكنتش بتقول لسه انه ممكن يكون نجم صف اول بس بعدها بسنة رجب عمل تمن دستة اشرار و هو فيلم يتحط تحت بند الافلام الترفيهية بس كان في توازن كبير ما بين الافيهات و التمثيل حتي في المشاهد اللي فيها دراما كانت مظبوطة و دة يمكن عشان كان في غول اسمه خالد صالح و ممثلة تقيلة زي ياسمين عبد العزيز


-يلا نجحنا في اول امتحان اهو...نكمل مذاكرة بقي و فعلا محمد رجب كمل مذاكرة و عمل كلاشنكوف و برضه قدر يحافظ علي التوازن ما بين الكوميديا اللي مكانها و التمثيل و حتي في قصة الفيلم مكنتش نهايتها تقليدية ان البطل يتجوز البطلة و كان من اميز حاجات الفيلم انك مكونتش قادر تفرق بين محمد رجب و بطل الفيلم...و من المشاهد اللي هتوريك ان في ممثل كويس بجد موجود في الحالة النفسية للشخصية انه قادر يوصلك كل الصراع الداخلي اللي مش باين يعني بالبلدي انك تحس بالوجع اللي جوة الشخصية


*و هنا محمد رجب بدل ما يفتح دولاب افكاره..فتح دولاب هدومه و قرر انه يرفد اي استايلست يشتغل في اي فيلم له..اصلها ملهاش لازمة ما الهدوم كتيرة و موجودة الحمدلله و محدش هيخاف علي شكله اكتر منه


-و عمل محمد رجب فيلم " المش مهندس حسن" و دي الحاجة الوحيدة "الصادقة" في الفيلم..اصل مفيش كلية هندسة علي مستوي المجرة زي اللي كانت في الفيلم...عرض ازياء طول الفيلم بس الشهادة لله كانت معاهم لوح و مساطر حرف تي عشان مصداقية الفيلم بس...هدوم بطلات الفيلم نفسهم كفيل ان امن الجامعة يقبض عليهم...حتي في طريقة لبس محمد رجب كانت في منتهي التطرف يعني يا فقير قوي جاي من الفلاحين بقفلة اول زرار و النضارة و الشنب يا يلبس علي اخر موضة حتي و هو فقير و دة بيبان في اول مشهد للفيلم و هو بيستعرض هدومه و محتار يلبس ايه...دة غير قصة الفيلم اللي هتعرف نهايتها بعد اول مشهدين


*معلش يا استاذ ...في مسلسل اسمه ادهم الشرقاوي
*مفيش مشكلة ما الدولاب موجود
*لا حضرتك دة ادهم الشرقاوي بتاع زمان و اكيد مش هيلبس شورت يعني

-و جه علي نفسه فعلا و عمل ادهم الشرقاوي بصورة طبيعية جدا و عمل المسلسل بصورة جيدة جدا و كانت الموهبة ظاهرة و التمثيل طبيعي سواء في مشاهد الصراع او حتي مشاهد الحب

-و بدأ محمد رجب ياخد طريق نجمة الجماهير نادية الجندي في اسلوب افلامها بمعني انه لازم يطلع فقير و مظلوم في اول الفيلم و لازم ينتصر في الاخر و كل بنات العمل بيحبوه و بيجروا وراه

-و عمل محترم الا ربع...و طبعا لازم الدولاب يشتغل حتي لو هو رسام كاريكتير يعني اللي جاي علي قد اللي رايح..بس هيتظلم برضه و كل واحدة هيقابلها في الفيلم متاخدش في ايده اكتر من نص مشهد و تبقي بتحبه و بتحلم به...و فجأة يتعرض لصدمة و يبدأ يبني نفسه و سبحان الله يوصل و يقر ينتصر في الاخر و البطل يتجوز البطلة..حتي النقلات اللي في الفيلم مش مفهومة يعني ازاي اتحول من فاشل لناجح فجأة بعد الاغنية..طيب ما هي سهلة اهي

-في مشهد في الفيلم كان مأفور اكتر من مشهد " محدش بينجرح قوي غير لما بيحب قوي" و هو مشهد حبيبته لما جاتله في العربية و قال ايه غلطت في اسمه "بطريقة بلدي قوي" لا و ايه؟ تقوم تقوله "تشرب مياه " فيرد البطل بتأثر شديد لا ما انا شربت


*نتيجة الترم الاول ظهرت و نجح في كل المواد الادبية بس هو مصمم يدخل هندسة اصل كل اصحابه في الفصل نجحوا في المواد العلمية

-و دخل الترم التاني و في اول امتحان نجح في انه يقدم شخصية فاروق عبد الكريم في فيلم الحفلة بخفة دم متوازنة كدة و في مكانها و خصوصا في مشهده في السوبر ماركت مع محمد ممدوح او مع مشاهد استجواب اصحاب البطل عن ايه اللي حصل في الحفلة..حتي تحس ان الشخصية منطقية في كلامهم و طريقة لبسها و انفعالاتها...لا بتفرق برضه يا جماعة و الله


-طيب يلا كمل ادبي بقي و انجح في المجال دة...و الله ما يحصل ابدا و كأن محمد رجب في افلامه "مستكبر" يبقي شخصية عادية...او انا ممكن امثل فقير بس يكون فقير من كونكريت مثلا ...لا برضه مدام نادية الجندي ليها تأثيرها مفيش كلام


-و عمل سالم ابو اخته و للامانه عمل مشهد الختام من اروع ما يكون و قدر يوصل كمية مرارة الظلم اللي جواه في مدة قصيرة جدا بمونولوج لوحده بحرفنة كبيرة تخليك تقول ما اهو في تمثيل في مكانه اهو...طيب ليه بقي دولاب الهدوم؟؟
بس برضه هتلاقي اي ست في الفيلم لازم تحبه

-واحشكوا الدولاب صح؟؟

-ما هو عشان خلبوص عمل شخصية يوسف اللي برضه كل البنات بتحبه و في الفيلم دة غالبا كان جايب كوليكشن جديد و هنا عايزين نقف عند مشكلة خطيرة...انت اول طرق الاقناع بأي شخصية هي لبسها يعني مينفعش تجيب بدلة شيك قوي و تلبسها لشخصية شاب مكافح او مليونير تلبسه بدلة الموظفين الصيفي بتاعت ابو حفيظة...محمد رجب مبيفرقش ما بين المكافح و المليونير في اختيار الهدوم

و النبي ما تزهقوا قربنا نخلص

 لسه في رف في الدولاب مجناش جنبه و عشان كدة عمل صابر جوجل و الفيلم بيحكي عن شخص شاطر جدا في اختراق اجهزة الكمبيوتر و بيمثل خطر كبير علي الشركات الكبيرة و طول الفيلم يا مؤمنين متعملش اختراق حتي لصفحة في برنامج الرسام بس مش مهم...المهم ان النجم يطلع في احسن صورة

-مش شرط بطل العمل يكون دمه خفيف و طول الوقت بيرمي افيهات علي الفاضي و المليان و مفيش رجل في الدنيا كل ما ست تشوفه تحبه..حتي شخصية السوبر بطل اللي مفيش حاجة تهزمه دي مش موجودة علي ارض الواقع...لازم تقنعني انك الشخصية اللي في الفيلم مش طول ما انا باتفرج بابقي متأكد اني باتفرج علي ممثل اسمه محمد رجب


-عدم وجود منطق هي من اخطر مشاكل محمد رجب...ازاي اصدق انك فقير و انت لابس ماركات و ازاي هاقتنع انك هتوصل لحلمك مش بس لانك بطل الفيلم اللي لازم ينتصر في الاخر و ازاي اصدق انك نجم تتر من غير ما خرج من الفيلم كلامك محفور في دماغي

-الموضوع مش افيهات و هدوم...الموضوع انك تنزل علي الارض و تفتح عينك قوي و تشوف انت نجحت في ايه؟ و فشلت في ايه؟ و ليه؟
العند من الاخر هيوصلك لمرحلة انك تدخل علي جوجل و تدور علي "ازاي ابقي نجم تتر"

#محمد_رجب
#التتر
#كريم_مجدي 

سامي سرحان

-يا استاذ مينفعش

-هو ايه اللي مينفعش بس..ما الورق كله قدامك اهو سليم و كامل

-ناقص اهم حاجة انك تلاقي "ضامن" يمضي معاك عشان تاخد القرض 

-نعم؟!! ضامن ايه ان شاء الله...لازمته ايه بقي؟؟

-الورق عمره ما يمشي من غيره ...حتي المدير مش هيمضي علي الورق غير لما يلاقي اسم الضامن

-و الضامن دة له شروط برضه؟؟

-طبعا باقولك دة اهم شخص...لازم يكون موثوق فيه و سيرته تكون كويسة كمان و مضمون ان لما يمضي علي ورقة يبقي قد الامضاء و المسئوليه 

-هو مفيش غيره..عم سامي سرحان و مين هيمضي علي حاجة زي كدة غيره يعني؟؟

سامي سرحان او الشرير المحبوب هو تركيبة غريبة يعني صعب تلاقي زيها...صعب تلاقي شخص بدأ يبقي ايقونة لعمل معين و هو في سن كبير ...مش بس كدة لا دة انت تبقي مميز كمان...و مش بس كدة دة انت تبقي صاحب بصمة و انت بتمثل في وسط نجوم من اصحاب الصف الاول و ليك تأثير كمان

-و التأثير نوعين يا يبقي الدور هو اللي مخليك مؤثر بكتر مشاهده او ان العمل قايم علي محاور انت تكون واحد منهم يا تبقي عامل زي سامي سرحان لو قالوله تعالي امضي علي ورقة في مشهد من غير كلام هتبقي "ضامن" ان المشهد هيبقي ناجح و هتطلع من الفيلم فاكر حاجات كتير منها المشهد اللي هو طلع فيه...و حتي لو مفيش افيهات تفتكر هيغلب؟؟ و الله ابدا

-عم سامي عنده من الادوات اللي ممكن يقول فيها جملة او حتي كلمة ملهاش اي علاقة بالكوميديا او حتي بالموقف نفسه و هتلاقي نفسك واقع من كتر الضحك...زي ايه؟؟

متستعجلش هأقولك بس عايزك تاخد بالك من حاجة صغيرة كمان

-ان سامي سرحان من الناس القليلة اللي تألقت زي ما قولنا في وسط نجوم كبار ...بس كوميديا عم سامي مختلفة شوية في انها بتقفل الموقف...يعني ايه؟؟ حلو السؤال قوي

يعني في نوع من نجوم التتر بيفرشوا الافيه للي قدامهم عشان يضحك بس سامي سرحان يقول الافيه من هنا و تلاقي المخرج نقل علي المشهد اللي بعده من هنا...لان مفيش افيه هيعلي علي الافيه بتاعه خلاص اتعشت و هتلاقيه في معظم مشاهده بيكون اخر امضاء اصله الضامن

-يلا بيننا علي الاثبات...ما تقوم يا جدع بلاش كسل

**نبدأ من الزعيم اصل مفيش اكبر من كدة يعني 

-تعالي شوف بدوي في التجربة الدنماركية...شوف بقي فيلم بطولة عادل امام و يطلع سامي سرحان بافيهين مستحيل تنساهم اولهم " فين مجانصي و ترابيسي يا سعادة الباشا" و هتلاقيهم كلهم بيضحكوا فعلا علي طريقة الافيه اكتر من الافيه...او الافيه الاشهر "اصل الدكتور قالي اقف في حتة طراوة" و سعاتها الزعيم يقوله يلا يا بدوي من هنا و كأنه بيقول يلا مش عايزين افيهات تانية من ابطال الفيلم 

-او مع دوره في فيلم النوم في العسل و دور مدير الامن و هو بيقول لعادل امام  "ليله امبارح لما اخطرتني و عن عمد حبيت اجرب" و هنا هتلاقيها جملة عادية جدا بس هو طريقته بيحول التراب لدهب او الكلام الاقل من العادي لافيه 

-او دور اللواء عرعر في الارهاب و الكباب و في الفيلم دة عم سامي بيعمل دور اللواء الظالم و في نفس الوقت كان لازم يقفل مشاهده بكوميديا لما سمع ان في تنظيم ارهابي لما قال يا نهار اسود " و جري 

-تعالي شوفه في "جواز بقرار جمهوري " في دور فوزي مدير الارشيف و الافيه اللي فتح به دوره "هو انت طويل قوي كدة ليه؟ لا انا مبحبش كدة" او لما عرف ان الرئيس جي الفرح و بيقول لهاني رمزي باقولك ايه يا عمورة قصدي يا عمرو بيه...و برضه هتلاقي المشهد دايما بيخلص عنده...اصل هتعلي عليه هتقول ايه يعني؟؟

**لا المقال مخلصش لسه...اصبر دة لسه الشغل كله جاي

-هو نظمي بيه في فيلم الناظر...و بالرغم من ان سامي سرحان مكنش علي افيش الفيلم لا بالاسم و لا بالصورة بس مش مهم اصله كدة كدة هيخليك تعتبره من ابطال الفيلم اللي محدش يقدر ينساهم...اصله مين ينسي "جري ايه يا صلاح هو انا بتاع كشري" او لما قال "عايز امضي اهاااا...كمان امضاء اهااااااا" او مثلا لما قال "بص يا صلاح يا ابني انا موافق انا موافق" او حتي لما جرب يقول اي كلام قدر ضحك الناس لما علاء ولي الدين قاله يعني مش هيبقي في الناظر فيرد عم سامي يقوله " بلا ناظر بلا بتاع بقي "

-اصله هو اللي قال علي نفسه " عم اشقياء مصر" في فيلم فول الصين العظيم و هو كان معاه حق الصراحة اصل محدش يعرف يعمل جابر الشرقاوي غيره لما قال "منين يا حسرة عمامك التلاتة القرع مش قادرين يجيبولي حفيد يكمل المسيرة" او لما ضياء الميرغني قاله خلي يا سيد المعلمين فيمشي سامي سرحان عكس الناس كلها و يرجع الفلوس و يقوله "تشكر طريق السلامة انت"

و عمرك ما هتلاقي حد بيشرح خطة جريمة بحلاوة شرح جابر الشرقاوي لما قال " ما علينا" بعد ما ضرب واحد بالنار في رجله...او لما قال "الله يرحمك يا زلطة" و لو انت زهقان من حد و مش عارف تخلص منه و مش عارف تقولها ازاي عم سامي بيقولك "اضربك بالرصاص اخاف الرصاصة تيجي في جمجمتك و ترد فيا و اموت...ادبحك و اشرب من دمك جايز دمك ملوث يخلص عليا"

قول ان شاء الله كدة

قولت؟ عادية صح؟ دة معاك انت بس مع سامي سرحان اتحولت افيه لما ام هنيدي قالتله " هيقتلوا ابني حبيبي" فيرد عليها عم سامي بمنتهي التلقائية " ان شاء الله"...و لازم الصين تعمل جائزة باسم الرجل دة بعد ما عملها دعايه بافيه " الصين حلوة"

العبقرية في سامي سرحان مش الافيه...العبقرية في طريقة الافيه اللي بتخلق من كلام عادي لنقش علي الحجر عمره ما يروح مهما عدي عليه الزمن 

سامي سرحان كسر كل معايير الافيشات ان اللي بيتكتب اسمه يبقي من ابطال العمل...عمل لنفسه تتر بطله و الضامن بتاعه اسمه سامي سرحان

#سامي_سرحان

#الضامن

#التتر

#كريم_مجدي 

لطفي لبيب"بداية الموسم الرابع"

-انزل يا كريم هاتلي ابرة خياطة
-يا ماما هو لسه حد بيخيط بالماكينة دي دلوقتي
-انزل من سكات و بسرعة

و قعدت ادور و محلات تشيلني و محلات تحطني و اقعد اسأل علي نوع الابرة اللي عايزاها امي و اللي يبصلي من فوق لتحت و اللي كأنه شايف ديناصور منقرض جاي يسأل علي عنوان كهف واحد قريبه

-يا مامـــــــــــــــــــــــا ملقتش و دورت في كل حتة عشان قبل ما تسألي
-سألت " الخردواتي" ؟؟
-نعم؟!!! ايه الخردواتي دة ان شاء الله؟؟
-يا بني المحل اللي تحت البيت...دة اقدم محل في الشارع كله...انزل بس و اكيد هتلاقي عنده...دة دايما بتلاقي عنده كل حاجة مش موجودة عند غيره

و نزلت اشوف ايه الخردواتي دة ؟؟ و يعني ايه اللي عنده مش هتلاقيه عند غيره؟؟

-و اول ما دخلت المحل و قبل ما اتكلم مع اللي واقف عيني جت علي كل حاجة في المحل...فعلا اللي شوفته من محتويات في المحل دة غير اللي شوفته في كل محلات المنطقة...حتي نضافة المكان و اهتمام صاحبه بترتيب حاجته في شكل جميل غير فكرتي عن كل محلات الخردواتي اللي اصحابها يا غيروا نشاطها يا الاهمال قعد اصحابها في البيت


-الجميل في محل الخردواتي هي ندرة الحاجات اللي عنده حتي لو كانت بسيطة زي ابر الخياطة بانواعها و زي الروائح القديمة بس تحس انها انتاج السنة من كتر لمعانها في الفاترينة..حتي الالعاب القديمة البسيطة اللي عنده لما تشوفها تتمني ترجع عيل صغير عشان تلعب بيهم


-حتي رائحة المكان كانت مميزة عن باقي المحلات اللي دورت فيها...و من اكتر الحاجات اللي خلتني ابرق كدة زي ما اكون شايف كائنات فضائية اني لما طلبت منه الحاجة رد عليا بمنتهي البساطة؟؟ بس كدة؟؟ عايز كام واحدة؟؟
يعني انا بعد ما دوخت كل دة و لما اجيلك احس انها حاجة بسيطة جدا كدة...و مش بس كدة دة راح بسرعة البرق عشان يجيبها و دة لانه حافظ كل شبر في محله بيكون في ايه؟

و دة طبعا قبل ما يصححلي اسم ابرة الخياطة اللي نطقته غلط...و الثقة في كلامه كانت واضحة و سهلة

-من الاخر كدة كل حاجة كانت مميزة في المحل و صاحبه و كأنه كان بيقول " ممكن اكون عمري كبير بس اللي عندي مش عند غيري"


-و دة بالظبط اللي بيميز لطفي لبيب او " الخردواتي" عم لطفي من الناس اللي تحس بأناقة التمثيل معاهم..يعني لما تشوفله مشهد تحس انك شابف رف في محل معروض عليه احسن اللي موجود بطريقة تخطف عينك انك تتفرج و ممكن تشتري كمان..هو دة لطفي لبيب "الجمال المرتب" كل مشهد بيعمله سواء كوميدي او تراجيدي "اه عمل تراجيدي متستغربش كدة" بيبقي عامل زي الحاجة النادرة اللي بتشتريها من محل الخردواتي...اه ممكن مترحلوش كتير بس لو روحت عمرك ما بتنساه


-لطفي لبيب تحسه شايل كل الادوار عنده في درج و كل ما يتطلب منه دور يفتح الدرج و يشوف اللي يناسبه و يعمله و لولا ان لكل شخصية ملابس و اكسسوار كان عمل الدور او ما يفتح الدرج...عم لطفي مش بس كوميديان بطعم البساطة...دة كوميديان بنكهة الطاقة المتجددة زي الشمس كدة...كل دور غير اللي قبله و كل افيه مينفعش يتقال تاني...دة حتي يبقي عيب في حقه


-صعب جدا انك تلاقي كوميديان واثق انه حتي لو متكلمش الناس هتضحك و دة بيعمله لطفي لبيب بمنتهي الارتياح انه مش بس عارف انه هيضحك الناس لا دة واثق ان الناس هتحفظ الافيه دة


-ممكن تلاقي لطفي لبيب واقف وسط نجوم كوميديا شباب بس دايما هتلاقيه زي محل الخردواتي وسط محلات القرن الواحد و العشرين و هتلاقي عينك دايما بتيجي عليه حتي لما بيقف قدام نجوم كبار سنا و مقاما طبعا بتلاقيه محافظ علي نفس مستوي محل الخردواتي بتاعه


يلا اهو عم لطفي فتح المحل...ما تيجي نتفرج و نشوف عنده ايه؟؟


-اهو راضي السواق اللي بيضحك علي السياح في عسل اسود و الافيهات اللي عمرها ما هتتنسي من عم لطفي من اول "its very best" علي العربية بتاعته او لما قال لحلمي دول يادوب يخلوني افتكر نصك التحتاني...او الافيه العبقري اللي رماه قدام الظابط لما حلمي طلع الباسبور بتاعه و قاله "بطاقة تموين يا مصري" و قد ايه يوريك انه الافيه عنده متشال و حاضر لاي موقف...و اهم حاجة انك ترحم امه العيانه


-بص اهو هناك اهو منتجات احمد مكي اللي دايما موجودة عند عم لطفي في الدكان...شايفه و هو عامل سرناقوسي " اتش دبور" لما قالها كدة يا ارواح يا بنتي سايبة البيت من غير ستروباري و مجرد ظهوره بلبس زورو دة كفيل يقولك ان الرجل دة ممكن يضحكك بأي وسيلة و بأي شكل...او لما عمل معاه طير انت و افيهاته المحفوظة زي "الحمد لله شتراةس الجنزبيل" و طبقة صوته اللي تحسسك انه لقي كنز مش تذكرتين حفلة او لما الهوت شوكليت ضرب في وشه و قال لمكي يا بني ارحمني "جننت امي " ...او دور انتوسيت و الكلب ريكس في "سيما علي بابا" و ساعتها هتحس ان لطفي لبيب هو رمانة الميزان في الفيلم خصوصا في الجزء التاني منه خصوصا لما اي حد يشتم التاني و يقوله يا كلب و يعتذرله و تلاقي لبيب بيرد " و لا يهمك يا بني"



-تعالي بقي لرف هنيدي و نبدأ بفخري مدير القناه و لما مسك وش هنيدي و قاله بذمتك دي خلقة تنفع تبقي واجهة قناه...او الافيه الاشر "دة انا احبس نسمة ذات نفسها" و في يا انا يا خالتي و ساعتها عم لطفي مكنش عنده مانع خالص انه يدمر اسنانه تقريبا كلها عشان بس لما تشوفه تضحك و كام فينا مستخدمش كلمته " ابعـــــــــــــــــــــــت" في مواقف كتير في حياتنا...و تعالي بقي في امير البحار في دور امير البحر و هنا تضحك علي صوته بس لما قال لهنيدي "خدتها ليــــــــــــــــــــــــــــــه"


-فاكر لما قولتلك لطفي لبيب ممكن يضحكك من غير ما يتكلم؟؟
اكيد فاكر ملحقتش تنسي...اهو في فيلم السفارة في العمارة لما عمل دور ديفيد كوهين السفير الاسرائيلي ضحكنا و هو داخل ياخد تورتة عيد الميلاد اللي جابها بعد ما اتطرد او مين ينسي في نفس المشهد لما دخل و غني "سنة حلوة يا جميل" و هنا عم لطفي بيمارس هوايته انه يعمل كوميديا خاصه به هو


-مين محبش قلة الادب و السفالة بعد افيه عم لطفي في فيلم EUC لما قالهن دي سفالة و قلة ادب و انا باموت في السفالة و قلة الادب...و لما قال للشباب مش انتوا لوحدكوا اللي بتعرفوا تنصبوا و دة يوريك ان السن بيرجع بالعكس مع الرجل دة..و هتلاقي عكس الرجل دة في مشهد لما اقنع الطلاب ان التعليم في الجامعة دي مختلف عن الجامعات التانية و كأنه عمل دورين مش دور واحد بس


-في فيلم اسمه كلام في الممنوع و دور عبد العزيز عاطف الدكتور المفصول بسبب مبادءه السياسية و المشهد العبقري لما بيقول لنور الشريف باقعد الف علي الدكاترة و ادي لدة عينه و اشرح لدة المواصفات العظيمة للدواء و ساعتها هتشوف ممثل فعلا اللي عنده مش عند غيره


-ما يلا بينا علي درج المسلسلات و نشوف الرايق في الاب الروحي و هنا بقي لطفي لبيب بيقول انا تقيل قوي علي فكرة و الكوميديان التقيل بتبقي حاسس ان مفيش جمله هتعدي بشكل طبيعي و لازم يبقي ملزوق فيها افيه...زي لما عرف احمد عبد العزيز بو قالهم "طبعا غني عن التعريف و غني غناء فاحش" ...او لما رد علي مي سليم لما بتقوله هتشغل بنتك رقاصة...قالها اشغل امي رقاصة و فجأة سكت كدة و قالها الله يرحمها كأن المبدأ موجود بس الظروف مسمحتش


-و زي ما قال انا تقيل في الكوميديا هو كمان تقيل في التراجيدي و التمثيل و دة ممكن لطفي لبيب يوريهولك في مشهد واحد و بيكون كفايه عشان تعرف انك بتتفرج علي ممثل اللي عنده مش عند غيره زي دور قربان في مسلسل ونوس و الرعب اللي بيبقي فيه قدام يحيي الفخراني و القوة و المكر اللي بيبقي فيه مع غيره و محدش يقدر يعمل كدة غير عم لطفي


-شوفه في ارابيك و دور زقزوقة و في زيزينيا و دور كوستا و هتشوف عم لطفي بشكل مختلف كتيييييييييييير عن اي ممثل عمل نوعية الادوار دي


-اي مشهد بيعمله بيبقي عبارة عن منتج مميز هو واخد حق بيع بيتحط في رف في محل كبير قــــــــــــوي مكتوب عليه من برة "الخردواتي لطفي لبيب" و تحتيه "ليس للابداع فروع اخري"
شكرا يا خردواتي

#لطفي_لبيب
#الخردواتي
#التتر
#كريم_مجدي

المقال التجربة 1

-من زمان و من زمان قوي يوسف وهبي قال علي لسان شكسبير " و ما الدنيا الا مسرح كبير"..و كان فعلا المقولة دي في وقتها صادقة و معبرة جدا بالنسبة لمعايير الزمان اللي كانوا بيعيشوه..بس احنا دلوقتي يا استاذ يوسف الدنيا عندنا مبقتش مسرح كبير..بقت فيس بوك كبير

اهدي كدة و مش عايزك تتعصب

بص هاقنعك                                      

-علي ايامك يا يوسف بك كان المسرح ابو الفنون و اصعبها و كان دايما مفتوح للجميع يعني مثلا لو زمان عجبك ممثل كنت ممكن تضمه لفرقتك و يبقي واحد منكوا بس دلوقتي بقينا بنعمل اضافة و بكدة نبقي سمحنا للشخص دة انه يدخل مش بس حياتنا لا دة كمان من حقه يعرف اي حاجة عننا و له كل الحقوق انه ينقد اي حاجة انت بتكتبها بتعبر عنك شخصيا

-الموضوع اختلف في الدنيا خالص يا استاذ يوسف..دلوقتي قوانين السوشيال ميديا هي الاقوي و كلمتها هي اللي بتمشي

اكيد مش قادر تفهم الموقف...صح؟

عاذرك...و الله عاذرك

طيب خليني اوضحلك اكتر

-زمان كان المسرح هو وسيلة التنفيذ لاي رواية بتعبر عن الجياة الانسانية بس دلوقتي كل المعاني الانسانية اتلخصت في شوية زراير..يعني لو عجبني كلامك بتدوس لايك و لو عايز انقل رأيك لحد تاني بادوس شير و لو حبيت اخد كلامك من غير اسمك برضه موجود...زمان لما بتبقي المسرحية مش حلوة الناس كانت بتطلع تقول للي حواليها بلاش المسرحية دي مش قد كدة بس دلوقتي الموضوع مختلف خــــــــــــــــالص...دلوقتي لو مش عاجبني كلامك او مش عاجبني موقف معين ممكن بمنتهي السهولة يا اشتمك في وشك ما انت مش قدامي فمش هاتكسف و دة بيحصل حتي من غير مناقشة...يا باعمل شير من وراك و برضه باشتمك

-زمان كان المسرح بيحكمه قوانين...يعني الجمهور معروف دوره...و الممثل معروف انه طالع يقول دوره اللي في السيناريو ...من الاخر كان قانون الاحترام هو اللي بيحكم بس دلوقتي و في دنيا السوشيال ميديا البقاء للي معاه باقة انترنت اكبر...يعني طول ما انت اونلاين و معاك باقتك بقيت المسيطر...بقيت البطل في بروفايلك و بقيت الناقد علي بروفايلات اللي حواليك

-زمان يا استاذ يوسف كان معروف ان دة ممثل بيعمل دور مختلف عن شخصيته لان الجمهور بيبقي شايف بعينه و سامع بودانه و مقتنع بقلبه بس دلوقتي بقي في غموض في الشخصيات علي السوشيال ميديا يعني متعرفش مين اللي بيتكلم قدامك هل هو صح و لا غلط و الاتنين سواء الصح او الغلط هيكلموك بالمنطق و بالدليل و انت عليك الاختيار

-في المسرح مهما قدمت فالجمهور قدامه رواية واحدة بتحكي عن عدد محدود من جوانب الحياة اللي هم عايشينها بس دلوقتي مش عايز اقولك يا يوسف بك...معرفش كان علي ايامك الاوبن بوفيه و لا لاء؟؟

بس دلوقتي الروايات بقت علي كل شكل و لون و كلها برضه بدوسة زرار واحدة و المعروض يوم عن التاني بيزيد

-زمان المسرح كان بيحكمه الرقابة الاخلاقية قبل ما تكون الفنية عشان انت عارف ان في ناس هتتفرج عليك بس في عهد السوشيال ميديا...هو يعني ايه رقابه معلش؟!!!!

-الناس و هي قاعدة في المسرح كانت الهيبة حتي في هدومهم بس دلوقتي انت بتقعد قدام الدنيا بالهدوم اللي انت عايزاها..ما هي مش محتاجة مشاوير و تعب عشان تبقي متوصل بالدنيا

-للمسرح فرحة انك قاعد بتتفرج علي ناس انت بتحبهم بيمثلوا بس دلوقتي بقت الفرحة علي الفرجة علي الفضائح و المشاكل اللي ساعات كتير بنبقي احنا سبب اصيل فيها...يعني مين اتجوز مين و مين فسخ عشان ايه؟؟ و شوف دول بيتفسحوا قد ايه

و النبي ما تزهق دة انا شايل و معبي اصبر عليا صفحة كمان معلش

-لما كان ممثل بيتعب كانت تحيته علي المسرح اول ما يرجع بتكون اقوي من اللي قبل كدة بس دلوقتي انت لو تعبان علي السوشيال ميديا كبيرك الف سلامة و صورة لو انت عزيز عليا قوي...او حتي في حالات الوفاة لو انت محظوظ و امك دعيالك هاكتبلك دعاء بس لو انت مش قد كدة عندي هاكتبلك البقاء لله

-في موسم الاعياد طبيعي الممثل بيقول للجمهور كل سنة و انتوا طيبيبن صح؟

احنا بقي سهلنا الموضوع علي الاخر...بقي بالصور...رمضان يعني فانوس...و العيد الصغير دبدوب او علبة كحك و العيد الكبير لامؤاخذة صورة خروف

-اه صحيح يا يوسف بيه لما تيجي تختلف مع حد في الفرقة كان بيمشي من عندك بس دلوقتي بقي عندنا البلوك و دة لو دوسته يبقي انت بتطرد الشخص دة من حياتك كلها.

-الدنيا بقت اسهل مش كدة؟؟

بس المتعة قلت يا فندم عشان انت بقيت عايش تعيش اللحظة عشان تحطها علي بروفايلك مش عشان انت تستمتع بيها...[قيت حابس نفسك جوة موقع اعتبرته هو الدنيا و العلاقات الانسانية زي ما قولنا عبارة عن شوية زراير

الدنيا مبقتش مسرح يا استاذنا...دة المسرح بقي اوسع كتيييييييييييييييييييييير من دنيتنا دلوقتي

#المقال_التجربة

#يوسف_وهبي

#التتر

#كريم_مجدي

حسن مصطفي

بلاش تتكلم مع دة بالذات...دة مسنود و له ضهر جامد قوي

دايما كل واحد فينا بيبقي محتاج ضهر يسنده لما يقع و يقويه في ضعفه و يزود نجاحه من غير ما يبقي باصص انه يشاركه في النجاح دة..الضهر هو انك تطمئن ان النجاح موجود بوجود الشخص الضهر دة...ساعات كتير محدش بيبقي عارف ضهرك غيرك...يعني في اوقات كتير بيبقي شخص مختفي عن الانظار بس قيمته موجودة في كل حاجة ليها علاقة بيك...وجوده هو رمانة الميزان لاي تجمع او قعدة..دايما لو موجود بتبصله قبل ما تقول الكلام عشان تاخد الموافقة من رد فعله..يعني لو عينيه وافقت تقول و لو حصل العكس يبقي ابلع الكلام قبل ما يطلع...و لما تحاول تاخد قرار في حياتك هتلاقي نفسك رايحله و بتقوله اعمل ايه؟؟

-دايما هو شغال في كواليس حياتنا بس دوره بيبقي ساعات اقوي من ابطال العمل نفسهم..الضهر مش لازم يكون شخص بيملك سلطة بس لازم يكون يملك خبرة و حكمة...خبرة التعامل مع المواقف بمرور الزمن و الحكمة اللي بينقل بيها الخبرات دي...و لما بتختار شخص يكون ضهرك مش لازم يكون انجح منك بالعكس دة ممكن يكون يتمنالك النجاح اكتر منك...الضهر دة ممكن يكون ابوك او اخوك او صاحبك او ممكن يكون " حسن مصطفي "

-حسن مصطفي مينفعش تقول عليه غير انه ضهر شديد يقدر يتحمل و يشيل اي نجم بيقف قدامه...حتي علي المسرح اللي الممثلين بتتسابق انها تضحك الناس تلاقي حسن مصطفي في منطقة تانية لوحده كأن عنده الثقة بموهبته اللي تخليه يسند نجم العمل و بلغة المسرح كدة "يفرش الافيه" عشان اللي قدامه يجي ياخد ضحك الناس بس بتفضل عيون الناس علي صانع الافيه اللي مكوناته مع واحد بس اسمه حسن مصطفي...اه هتضحك بوجود نجم المسرحية بس هتحس بفرق بطعم الافيه في حضرة الاستاذ حسن مصطفي

-و زي ما كلنا عارفين و التتر واجع دماغنا ان المسرح هو مرحلة الوحش..و اللي هيعمل مسرح يعمل اي حاجة و وجود حسن مصطفي في اي مشهد في اي عمل بيديله امان

امان؟!!! هو في امان في المشاهد؟؟

طبعا و هاقولك ازاي

-الامان انك تحس ان اللي هيتقال حاجة مختلفة عن اي حاجة انت هتبقي متوقعها و امان اكتر انك عمرك ما هتحس ان اللي بيحصل قدامك دة تمثيل بالعكس انت كل معلوماتك عنه و تفتكر بس اسم الشخصية اللي قدامك...و مبيبقاش امان ليك لوحدك كمتفرج...دة بيبقي امان للممثل اللي واقف قدامه يعني اكيد لما تلاقي ممثل كبير بيسندك هتبقي متطمئن انك هتمثل براحتك قدام شخص مش هيحاول يبان اكتر منك...دة بالعكس دة هو اللي هيلمعك اكتر

**اتكلمت كتير عن حسن مصطفي صح؟؟ بس هو يستاهل

لا استني خلصت كلام ايه؟؟؟ دة احنا لسه بنبدأ

ما تيجي نثبت الكلام دة بأعماله؟؟ موافقين؟؟

طبعا موافقين هي دي فيها كلام

-سهل انك تبقي ضهر لممثلين لسه عايزسن يظهروا بس صعب جدا انك تبقي ضهر لواحد زي الاستاذ فؤاد المهندس...انك تفرش الافيه" و اللي ميعرفش يعني ايه يقرأ اول المقال" لواحد من اباطرة المسرح فدة معناه انك واثق في نفسك و في موهبتك و انك تملك من الادوات اللي تخليك نجم في الكواليس اللي قايم عليها العمل

-مين ينسي "حسن مفتاح" في سيدتي الجميلة و هنا حسن مصطفي عمل مزيج ميعملوش غير معلم في شغلانته...مزيج بين تمثيله كصاحب بيدبس صاحبه في حاجات كتير و بين انه ضهر لكل نجوم العمل و تعالي نفتكر مثلا الافيه الاشهر " ما انت عارفني يا كمال لما احط مناخيري في حاجة لازم انهيها كما يجب" لدرجة انه وصل الجمهور انه لما يقول اول حرف من الجملة دي هتلاقي الناس بتضحك لوحدها و هنا عم حسن مش بس بيفرش الافيه للممثل اللي قدامه بطريقته اللي بتخلي المهندس لو قال اي حاجة من بعده هتضحك...دة كمان بيفرش الضحك للجمهور لانه بيخليهم يتعايشوا معاه و ينسوه ان فيه خشبة مسرح.. -و بعدين مينفعش منقولش " يا اسطي عطا...يا اسطي عطا" و هتلاقي طريقة حسن مصطفي في خوفه بتدي فرصة لاي كوميديان قدامه حتي لو كان مبتدئ انه ضحك لو عمل اي تصرف صغير   

-روحت مصلحة حكومية قبل كدة؟؟؟ لو حظك حلو و مروحتش حسن مصطفي جبهالك لحد عندك لما عمل دور "عويجة افندي" في ارض النفاق و قضية الشنكل اشهر مشكلة علي مر الزمان و في الفيلم دة اتولد الافيه الاشهر اللي ممكن نكون لسه بنستخدمه لحد دلوقتي "لجنة ينبثق عنها لجنة" و في الفيلم دة تابع اداء حسن مصطفي و ساعتها هتعرف ان من قوة الرجل دة ان كل كلمة بتطلع منه افيه لوحده بيعيش و متسجل باسمه

-هو فانتوماس السكرتير لفؤاد المهندس في مطاردة غرامية و حسن مصطفي في الدور دة هو البطل المقابل لبطل العمل الاساسي لانك دايما هتلاقي ان اي تصرف من المهندس بيقابله موافقه او معارضه من البطل المقابل له فانتوماس بصفارته

-عرفت بقي انه ضهر لفنان عملاق زي المهندس

يسكت بقي حسن مصطفي...و الله ابدا

-يفضل ضهر بس المرة دي لشوية العيال اللي في مدرسة المشاغبين...و من اول مشهد في المسرحية هتكتشف ان حسن مصطفي عمود من الاعمدة اللي شايلة المسرح بالمسرحية...من اول افيه " بقي ابنك انت يضحك عليا انا و يبيعلي البتاعة دي و يقولي بتقشر بطاطس" و افيه "دة تلف اخلاقي انا يا محترم" و عبقرية حسن مصطفي مكنته انه يعمل حاجتين من اخطر ما يمكن انه يساعد ممثلين صغيرين انهم يظهروا و انه في نفس الوقت يحافظ علي الميزان انه ميجيش عليهم و يفرشلهم افيهات تعليهم و تفضل افيهاته حاضرة علي مر الاجيال...يعني مين ينسي "في الصف يا اهبل يا ابن الاهبل" او "مقدمة ابن خلدون" او لما قال "يا حبيبي يجيلك و يحط عليك يا حبيبي عيب" او لما قال للاستاذ الملواني بعد ما دوخه "يخرب بيت اهلك"

-و لما العيال تكبر لازملهم اب و مفيش اجمل من بابا رمضان السكري في المسرحية الخالدة " العيال كبرت" و بيمارس حسن مصطفي هوايته المفضلة انه يبقي سند لكل ابطال العمل...بس المرة دي هو اب مش ناظر فكان الاحتواء اكبر...من اول " بط و وز و فراخ و لحمة...فلوسي يا ولاد الرفدي فلوسي" او حتي " ابقي سلملي علي جوزك يا اسماعيل بيه" و حتي هزاره مع ماما كريمة مختار لما قالها " يا زينب الام مدرسة...لعب و فن و هندسة" او لما قالها "في الخزنة يا زينب"

-و هتشوف تمثيل قوي منه في مشاهد العتاب مع ولاده سحر و سلطان و هنا عمرك ما هتقدر تفرق بين الممثل حسن مصطفي و بابا رمضان السكري و دة يبان اكتر في اخر مشهد لما قالهم " قولولها بابا مش موجود...تعبان..مش هيسافر" و لازم تحس بوجع و حنين الاب في نقطه ضعفه اللي هي عياله

-كفاية دراما و نرجع نضحك تاني عشان نسيت اقولك علي الافيه العالمي بتاع " عليا الطلائع ما انتوا نافعين ابدا"

**خلصنا من السينما و المسرح اهو...ندخل بقي علي التلفزيون

-هو دان رابينوفيتش في رأفت الهجان القائد العسكري القوي جدا في شغله و الضعيف جدا قدام مراته و لازم لما تشوف مشاهده في الدور دة تركز في انه ازاي عرف يعمل كدة...يبقي قوي جدا لما يتكلم في شغله و فجأة تلاقيه ضعيف ضعف الاطفال اول ما يبدأ يتكلم عن مراته و علي فكرة التحول دة مش بيحصل في نفس المشهد دة ممكن يحصل في نفس الجملة

-هو عم طاهر الجار الفضولي او بالبلدي الحشري في عباس الابيض في اليوم الاسود و هو جار موجود في كل حارة مصرية اللي عايز يعرف كل تفاصيل عن حياة جيرانه و هو حاسس ان دة من حقه و جملته الشهيرة بعد ما بيفشل انه يعرف اي حاجة و يقول "عيلة غجر"

حسن مصطفي هو نجم بكل ما تحمل الكلمة من معني ...اه صحيح النجم بالمقاييس التجارية هو اللي بيتحط اسمه الاول علي الافيش بس بمقاييس التتر مش هالاقي احسن من عم حسن نقوله انك ضهر اي مقال يتكلم عنك

شكرا يا عم حسن

#حسن_مصطفي

#الضهر

#التتر

#كريم_مجدي