برة التتر 3 "نجوم التوك شو"

بسم الله الرحمن الرحيم
جمهورية مصر العربية
المادة : توك شو
الزمن : علي قد طاقتك في الرغي

-يلا يا جماعة كل واحد يقعد مكانه عشان هاوزع ورقة الاسئلة و مش عايز صوت فاهمين؟؟ و بلاش غش انا باقولكوا اهو عشان انا عارف سمعة الفصل دة كويس...عشان اللي هيغش و يتعدي حدوده بتاعت المنهج "هاقفله ورقة الامتحان" و اقعده في البيت

-ايه دة؟؟!!!! لااااااااااااااااا الامتحان كله من برة المنهج و الاسئلة كلها صعبة جدا و مخدنهاش في المقرر
-ايه يا بني خضتني مالك في ايه؟ انت اسمك ايه؟
-انا اسمي معتز مطر
-و بتعترض علي ايه يا معتز؟؟ يا بني انت لسه مخدتش ورقة الامتحان و بعدين وطي صوتك شوية
-انت كمان بتعلي صوتك عليا يا استاذ...دة كدة اضطهاد و ظلم و بعدين باقول لحضرتك الاسئلة صعبة و ظالمة...و المنهج كمان غير اللي احنا مفروض نتعلمه و مكاني مش عاجبني كمان...اكيد اللي حط ارقام الجلوس مستقصدني
-طيب بتتعصب ليه يا حبيبي؟اهدأ بس و نتناقش
-انت اساسا مش مؤمن بالحوار و دايما لما بارفع ايدي محدش بيقومني اجاوب و دة ظلم واضح و صريح بس الله غالب


-مالك بس يا معتز؟؟ دة الامتحان جميل و سهل و كله من المنهج الرائع اللي حطاه وزارة التربية و التعليم...دة بالعكس انت لو ركزت شوية هتلاقي الاجابة واضحة جوة الاسئلة...شوف ورقة الامتحان شكلها يفتح النفس ازاي و لا ورقة الاجابة في منتهي الجودة و تشجع علي انك تحل كويس
-يادي النيلة يا بني انا لسة موزعتش لا ورقة اسئلة و لا اجابة...انت اسمك ايه ياض؟؟
-حسب توجيهات السجل المدني العظيم و وزارة الصحة اللي باشكرها انها وفرت لابويا ورق الولادة و احب اشكر الدكتور اللي ولدني
-اخلص ...اسمك ايه؟؟
-احمد موسي يا فندم
-طيب بطل كلام
-حاضر يا استاذ...اكيد انت تعرف اكتر مني عشان انت خبرة في المجال الامتحانات و دايما رأيك هو الصح لان واضح من كلامك انك شخص حنون و طيب
-يا بني هو انت تعرفني عشان تقول عليا كل دة؟؟ اسكت بقي


-يا جماعة اهدوا بس...الامتحان ما هو الا علاقة بين الاسئلة و الطالب ينتج عنها اجابات بس يارب تكون العلاقة شرعية هاهاهاهاهاها
-و انت مين يا ابو دم خفيف يا بتاع الافيهات
-اسمي الطالب تامر امين يا استاذ

-يا جماعة ايه اللي انتوا بتقولوه دة؟؟
-الامتحان هو ورقة حكومية مهمتها تقييم الطالب علي مجهوده طول السنة
-الله عليك يا عاقل ياللي بتقول كلام عادي كدة...اسمك ايه بقي؟
-اسامة كمال يا حضرة المراقب


 -الحق يا احمد معتز بيشتمك و انا قولتله ميصحش كدة قالي و لا يهمني هيعمل ايه يعني؟؟
-اقعدي يا لميس ساكتة متولعيش بين اصحابك عيب
-و حضرتك عرفت اسمي منين؟
-يا بنتي ما هو انتي البنت الوحيدة اللي اسمها في الكشف


-انت هتسكتله يا معتز انت كمان؟ دة يا جدع شتمك و احنا برضه زملاء عيب
-بس يا بني...دة ايه اللجنة المنيلة دي؟؟ انت اخو لميس؟؟
-لا يا استاذ انا اسمي وائل الابراشي
 -و مالك بتولعها ليه بين اصحابك؟؟
-انا معرفهمش اساسا يا استاذ بس دي اصول الزمالة في المدرسة و انا مستحيل اسمح بتجاوز هذه المبادئ



-طيب خلاص مش عايز اسمع صوت حد
-يلا يا استاذ بقي وزع الورق عشان نحل اول سؤال اصله محتاج صفحتين اجابة
-ايه دة؟؟!!! انت عرفت ازاي؟ انت اسمك ايه؟؟
-عمرو اديب...و اللي باقوله لحضرتك دي معلومات مجبتش حاجة من عندي يعني


*طيب يلا نبدأ عشان بعد كدة هتدخلوا الامتحان الشفوي
--------------------------------------------------------------------------------

**الامتحان الشفوي
---------------------

-ها يا احمد يا موسي؟؟ ما رأيك في البامية؟
-الله يا فندم علي السؤال و طريقة القاء السؤال اللي بتسهل علينا الاجابة...و الله يا استاذ البامية حسب تعليمات وزارة الزراعة هي محصول حيوي و دايما بتتباع باسعار الوزارة و حضرتك مستحيل هتلاقي غش في الاسعار و دايما بنلاقيها طازة و شكلها يفتح النفس

-اسامة كمال...ايه رأيك في البامية؟
-وفقا لكتاب الوزارة هي من المحاصيل الحيوية في مصر و يعتمد عليها الكثير من المواطنين اما من ناحية الكتب الخاصة فهي بيدور حولها العديد من الشبهات و مينفعش ندخل في تفاصيل عشان احنا دايما ملتزمين بالحيادية في كل شئ


-و انت ايه رأيك يا معتز؟؟
-يامية ايــــــــــــــــــــــــــــــــــــــه اللي انت جاي تكلمني عنها؟؟... انت عارف سعرها كام؟؟ و اكيد البامية دي رمز عشان تظلمني و خصوصا لو كانت بايته هتبقي رمز لناظر المدرسة اللي بيقعد سنين متحكم في الطلاب...انا ارفض هذا السؤال


-تعالي يا تامر يا امين قولي البامية اخبارها ايه معاك؟؟
-البامية المشمشية حلوة بس شقيه هاهاهاهاهاهاهاها
-اطلع برة يا تامر


-فين لميس يا جماعة؟؟
-معلش يا استاذ لميس و وائل ماسكين احمد و معتز برة و ماسكين علبة بيروسول و ولاعة


-ممكن ادخل اجاوب علي سؤال البامية يا استاذ؟؟
-يا بني انت حكايتك ايه بقي؟؟ بتعرف الاسئلة ازاي قبل ما تتقال؟؟
--يا استاذ انا باشوف مين اللي بيحط الامتحان و اروح اخد عنده درس...هو انا لسه هاوجع دماغي بمذاكرة و كلام فاضي لما ممكن اخد الاسئلة علي الجاهز...و لا عايزني اعمل زي شريف عامر هاري نفسه مذاكرة من كتاب الوزارة بس

------------------------------------------------------------------------------------------------------

**كويس انك تبقي جوة شاشة و الناس كلها بتتفرج عليك بس خلي بالك زي ما في ناس ماشيين وراك في ناس برضه فاهماك و عارفين انت عايز تقول ايه


-عمرو اديب ممكن ميكونش مذيع زي ما الكتاب بيقول بس قوته جايه من كواليس اخباره و من قوة مصادره...الناس اللي شغالين معاه ممكن نعتبرهم من اقوي فرق الاعداد في مصر و دايما حاول و انت بتتفرج عليه انك تركز في اللي ورا الكلام مش الكلام نفسه...اما اللي عكسه تماما فهو شريف عامر و دة ماشي جوة الحيط مش جنبه حتي...محايد زي ما كتاب المذيعين في كلية الاعلام ما بيقول


-لميس الحديدي هي رائدة طريقة السم في العسل...عندها القدرة انها تحط شخصين في نفس الظروف و نفس التصرف و تطلع منهم اللي ظالم و التاني مظلوم...هي بتذاكر كويس جدا بس طريقها دايما محتاج عربيات مطافي وراها

-و انت ماشي في طريق لميس هتلاقي وائل الابراشي اللي قرر يعتمد علي كل ما هو بيعمل بوووم عشان يعوض بيها قلة نسبة المشاهدة بتاعت قناته و بعد ما تولع الحريقة هتلاقي المصداقية طلعت و جناحات الملائكة بيطيروا و بدأ يقول مينفعش كدة يا جماعة...و الله يا رجل انت اللي مينفعش كدة

-تعالي بقي لاحمد موسي و دة اللي بيتقاله بيعمله بالحرف و بيجود فيها كمان...و دة بيقرر انه يدفن نفسه جوة الحيط...مؤهلاته كلها الايقاع " و اكيد مقصدش ايقاع الحلقة"...هتلاقيه بيدافع عن الحاجة و عكسها حتي لو طالعين من مصدر واحد لانه بيدافع عن المصدر مش عن الخبر


-و عكسه تماما رائد الانهيار العصبي...اول ما تلاقي نفسك اتفزعت اعرف ان معتز مطر بدأ حلقته..المعارضة عنده بقت علي اي حاجة و دة بيناقض قانون الطبيعة ان مفيش حاجة دائمة لا صح و لا غلط...طريقته ساعات بتوصل عند ناس انها اوفر كتير و عند ناس تانية واقعي بس هو عامل زي اللي بيضيع حقه بصوته العالي


-اسامة كمال عامل زي موظف الحكومة اللي اتعود علي اسلوبها و طريقة الادارة الحكومية و فجأة جاتله وظيفة في شركة خاصة فمقدرش يطلع من اسلوب موظف الحكومة و خايف انه يخسر وظيفته الخاصة بس في الاخر هو ملتزم بالمهنية


-تامر امين...من اكتر الناس اللي بتعرف تقسم وقت الحلقة و انه يعرف ازاي يظبط طريقة الحوار بس مشكلته انه دايما حاسس انه بيفهم بزيادة و انه كان لازم يبقي عميد كلة اعلام او علي الاقل مدير التلفزيون حتي افيهاته تحس فيها بافبهات رجل كبير في السن لما بيقول الافيه انك لازم تضحك حتي لو الافيه وحش


-من الاخر و بدون تجميل لكل واحد دوره و لكل واحد طريقته في انه يوصل المعلومة و هيتكلم بانهي اسلوب عشان توصل للي هو عايزه يعني بالبلدي كدة كل فولة و ليها كيال

**انتوا بتحاولوا تقنعونا بكلامكوا بس نسيتوا حاجة صغيرة قوي ان في التمثيل في نجم تتر و ممثل علي قده و مذيع
انتهي الدرس
بس كدة

#التتر
#نجوم_التوك_شو
#كريم_مجدي

الصديقان "اسامة انور عكاشة و اسماعيل عبد الحافظ"

-الو يا اسامة...اسماعيل عندك يا بني؟؟
-اه يا عمي دة كان عندي و نزل من دقيقة واحدة...معلش اصل تليفونه فصل شحن و نزل جري عشان يروح

----------------------------------------------------------------

-ايوة يا اسماعيل ابوك سأل عليك...مش تقولي يا بني عشان اعرف هاقوله ايه؟؟
-و اقولك ليه يا اسامة ما انا عارف انك هتتصرف


-مفيش حد فينا معداش بالزنقات دي و مكنش له صاحب تشيله الليله و و تخليه يتصرف و تبقي متأكد انه مش بس هينقذك دة ممكن يقلب الموقف لصالحك...و مش بعيد في موقف زي اللي فوق دة تلاقي ابوك يقولك انت تعبت يا بني من كتر المذاكرة اخرج شم هواء شوية

-الصاحب اللي دايما قبل ما تقول اول كلمة في الجملة يكون فاهمك و مكمل بقية الجملة...تلاقيه بينصحك اول ما يشوفك من زنقة حتي قبل ما تحكيله...حتي لما بتنزلوا تشتروا هدوم تلاقيه بيقولك ايه بيليق علي ايه...الصاحب دة مش بس بيكملك لا دة "بيجملك"..يعني لو لقاك بتلخبط في الكلام قدام حد يلحقك بأي اشارة بس المهم انه يشيل من عليك الاحراج...او يشيل من عليك "الاخراج" صاحب لما تبقي مش موجود و محتاج "تألف" اي حوار بيبقي قدها و قدود و يألفلك حوار و لا اسامة انور عكاشة في زمانه....

استني كدة...وسعت مني صح؟؟

لا انا سحبت كلمتي اصل مفيش زي عمنا اسامة انور عكاشة في التأليف او بمعني اصح في النسج...عارف شغل التريكو بتاع زمان؟؟؟
كان بيبقي مرهق جدا انك تحط فتلة جنب فتلة عشان في الاخر يطلع شكل رائع ممكن يكون برة كل التوقعات بس انت بتبقي الوحيد اللي شايف شكله في الاخر هيبقي عامل ازاي...او زي السجاد اليدوي اللي ناس كتير بتعتبره تحفة فنيه..اه هو اسمه سجاد و ممكن تلاقيه معروض جنب السجاد العادي بس من اول نظرة بتعرف ان دة جمال مختلف عن اللي حواليه...زي بالظبط في مسلسلات كتير بتتعرض تأليفها جيد جدا بس يوم ما بينزل اسم اسامة انور عكاشة علي التتر بيبقي عامل زي السجاد اليدوى يختلف عن اي حاجة تانية و من حق اي حد يتفرج عليه بس مش اي حد يملكه لانه ملكية خاصة لمبدعه اسامة انور عكاشة


-من عبقرية عكاشة انه بيقدملك منهج فيزياء ثانوية عامة في محتويات مجلة ميكي...فعلا انا مبهزرش يعني هتلاقي مسلسلاته فيها معاني و قيم و معاني فلسفية عميقة في صورة حوار بسيط مع كلمات ابسط يفهمها الصغير قبل الكبير...سهل انك تكتب حوار مسلسل لو كانت عندك الموهبة بس الاسهل لما تبقي عندك موهبة عكاشة في انك تنقل حقائب زمنية كاملة بتفاصيل صغيرة جدا و تحولها لنص تلفزيوني ناس تتفرج عليه و لما دة بيحصل لازم يقولوا دة احنا نعرف واحد زي اللي في المسلسل دة...او هو ايه دة ؟!!!
هو الرجل دة عرف يجيب الشخصية دي ازاي


-دايما تلاقي في مسلسلات عكاشة معني الكبير سواء في النصيحة و التوجيه او الحكمة و الفلسفة و صعب جدا انك تلاقي كومبارس في نص عكاشة...زي المدير اللي بيبقي عايز كل اللي عنده يشتغلوا...هو عكاشة كدة...معندوش حد مالوش لازمة في المسلسل...تخيل انا باقولك قولي كل اسامي الناس اللي عرفتهم اخر 10 سنين؟؟؟ اكيد هتنسي ناس و لو افتكرت الكل مش هتقدر تتكلم و تدي كل واحد فبهم حقه بالعدل...فما بالك بقي كمية العائلات و الافراد اللي بتبقي موجودة في نصوص عكاشة بكل تفاصيلهم


-قلم اسامة انور عكاشة من النوع الباركر بتاع زمان و اللي لسه في ناس بتستخدمه لحد دلوقتي لانه مش بس مفيش زيه...لا دة عشان كمان هو مناسب لكل العصور عشان كان دايما بيكتب عن الانسان فمهما اتغير الزمان و المكان بيفضل الانسان موجود و طول ما الانسان موجود هيفضل قلم عكاشة محفور في كل زمان و مكان ..اهو الورق خلص يلا بقي نصوره؟ ؟

و هو واحد بس اللي هينفع يطلع الكلام دة زي ما اللي كاتبه عايز و يمكن احسن...اصل مفيش غيره...فاكر الصاحب اللي هيخرجك من اي احراج؟؟

هو اسماعيل عبد الحافظ اللي هيحول كلمات اسامة انور عكاشة لناس لحم و دم و مشاعر...و لصورة جميله بتتعرض قدامك


-ما هي برضه حاجة مش سهلة
-ايه يا عم خضيتنا...ايه هو اللي مش سهل؟

-مش سهل انك تحول تفاصيل حياة كاملة مكتوبة علي ورق لتفاصيل مرئية بتتحرك و تتكلم قدامك...يعني ايه ترسم شخصيات ميكي عشان تشرح منهج الفيزياء المعقد

-اه دي سجادة جميلة جدا بس مكانه مش مبين جمالها و هي في وسط الزحمة...هاتولنا بقي عم اسماعيل عبد الحافظ عشان هو مش بس هيختار احسن مكان عشان يبين مكان السجادة اليدوي...لا دة كمان هيرتبلك بقية السجاد العادي عشان يطلعوا كمان بشكل جميل

-تخيل معايا انك مطلوب منك تحول ناس مختلفة في الزمان و المكان و المستوي الاجتماعي علي ورق لواقع متشاف من ناس لو كانت قرأت الرواية كانت هتتخيل حاجة تانية خالص...صعبة صح؟؟

عم اسماعيل بقي عمل ما هو اصعب
-انه مش سايبلك فرصه انك تتخيل حاجة تانية غير اللي هو بيعمله يعني بيخليك تشوف بعنيه هو يعني اي عمل لاسماعيل عبد الحافظ هتلاقي نفسك مستسلم قدام انك تختار ابطال غير اللي اختارهم هو

-مش اي حد يوضب شنطة العربية ساعة السفر و يخلي كل الشنط جنب بعض كدة في شكل يفتح نفسك علي السفر و يخلي كمان الشنطة تقفل و محدش يشيل حاجة علي رجله...زي ما تدخل محل انتيكات جميل و تلاقي طريقة توزيعها متوجعش عينك و تبقي عايز تشتريهم كلهم بس برضه هتلاقيك بترصهم زي اللي في المحل بالظبط عشان انت مش شايف اجمل من كدة ترتيب

-تعالوا بقي نشوف الصديقان لما بيحطوا دماغهم في دماغ بعض بيعملوا ايه؟؟

**في مسلسل اسمه "امرأة من زمن الحب" و هنا هتلاقي تفاصيل و كل طبقات المجتمع سواء في الثقافة او في طريقة الكلام و في العادات و التقاليد بين اهل الصعيد و اهل القاهرة...عكاشة في المسلسل دة بيشرح موضوع من اخطر مواضيع المجتمع و هي مبادئ التربية الصحيحة و ازاي تفهم الاجيال اللي بعدك و دي حاجة بتدرس في كليات متخصصة فهو يشرحها في 30 حلقة ممكن يشوفهم و يتابعهم اي حد...و هتلاقي الحوار خالي من اي تعقيدات سواء الحوار اللي بيدور بين "وفية" سميرة احمد مع "وجدي" احمد خليل و طريقة المناقشة في طرق التربية للحوار الممتع مع "لبيبة" عبلة كامل سواء مع سميرة احمد او مع الجيل الجديد اللي جه بعدها


- في المسلسل دة لازم كل مشهد يكون موجود فيه "خضر" اللي قام بالدور القدير رشوان توفيق هتلاقي فيه خبرة و عاطفة مش طبيعية و هيكون موجود فيه تفاصيل مش متشافة في شهامة اهل الصعيد...و لازم هتلاقي ان لكل جيل مفردات و كلام يليق عليه في اسلوب الحوار و دة بيبان قوي في تقسيمة المشاهد بين الجيل الجديد اللي كان بيمثله كريم و ياسمين عبد العزيز و جيهان فاضل و الاجيال القديمة اللي بتضم سميرة احمد و انعام سالوسة و هنا روعة عم اسماعيل و هو بيبدل علي كل حالة شوية بشكل ميخلكش تزهق و دايما تربط الاحداث ببعض ...دة كمان قدر يدي لكل شخصية حقها في الكاميرا زي الحوار و دة هيبان في المشاهد الاولي بين صبري فواز "فتوح" و تحس ان الصورة مهتمه به زي بطلة العمل بالظبط

-مش بس كدة عايزك تفتكر حركة الكاميرا في اي مشهد بيجمع الشباب بعمتهم و ازاي الفواصل بين كل بطل و التاني بيكمل جمال النص...نيجي بقي للجزء الاهم...لما تتفرج علي المسلسل عمرك ما هتتخيل حد مكان ابطاله...انا معاك ان اداء الممثل هو عامل مهم بس الاختيار هو الاساس و طول ما الاساس طلع كويس بيبقي سهل انك تقدم عمل حلو يعيش


**مش اي حد يقدر يدخل في العلاقات الانسانية و ينقلها بالظبط مع شخصيات من وحي الخيال بس في "الشهد و الدموع" يقدر الصديقان اسامة و اسماعيل انهم يقدموا وجبة درامية فيها كل العناصر الغذائية المتكاملة لاي حد...

-حلو قوي انك تشوف نفسك واحد من ابطال المسلسل او تشوف ابوك مكان البطل الكبير...او تاخد عظة من نهاية الظلم او تأمن اكتر بمبدأ الخير و انه دايما هو الرهان الكسبان...و الاحلي انك تعيش جوة المسلسل متقدرش تفصل نفسك منه حتي لو كان علي جزأين يعني لو اتفرجت علي جزء اول و جيت بعد سنة اتفرجت علي الجزء التاني هتلاقي نفسك عايش احداثه كأنها حصلت امبارح


-اصل مين فينا ينسي حافظ و شوقي رضوان و الصراع اللي موجود في كل بيت و ازاي بعد ما شوقي مات تلاقي "زينب" الام المصرية اللي حاضرة في كل شبر بحلوها بتربيتها لعيالها لجدعنتها في تحملها المسئوليه او حتي انها دايما بتفكرهم ياخدوا حق ابوهم...و لازم تندمج في التركيبة اللي ما بين ولاد العم و علاقتهم ببعض...هتلاقي منهم اللي عايز ينتقم و اللي مسامح


-و برضه مينفعش تتخيل الشهد و الدموع من غير يوسف شعبان و هو حافظ و لا محمود الجندي في دور شوقي و ابنه او خالد زكي و انطلاقه في شخصية احمد شوقي او حتي عفاف شعيب في دور "زينب"...و تركز في مشاهد الصراع في الاختلاف بين الاخوات و هتلاقي نفسك قدام كلام و تمثيل مقطوع من الواقع مش مجرد كاميرات بتصور و ناس بتقول كلام و خلاص


***و مين فينا معشقش الحلمية و لياليها و من تفاصيلها و ابطالها و من السنين اللي عدت علينا في 5 اجزاء مليانين بتفاصيل مصر اللي بجد من عهد الملك لاول التسعينات...و مع كل التغيرات اللي حصلت في السنين دي كلها قدر الصديقان بمنتهي العبقرية انهم يعملوا ملحمة تتحط تحت بند اعظم الاعمال الوثائقية علي مر التاريخ و بتصمم تعيش ليالي الحلمية كلها


-العبقرية في ليالي الحلمية مش بس في طريقة عرض بتفاصيل كتير جدا سواء في تعدد الشخصيات او ترابطهم ببعض..العبقرية الاكتر انك مخلي كل شخصية ليها اهميتها و بتكمل التابلوه الرائع اللي اسمه ليالي الحلمية...ليالي الحلمية هي رحلة عبر الزمن بيقوم بيها الصديقان و معاهم عشرات من اللي عايشين معاهم جوة الحلمية و ملايين بيتفرجوا عليهم برة الحلمية

-شوف الصراع الرائع اللي بتبقي بتقول يارب ما يتصالحوا عشان تفضل مستمتع بيهم و هو صراع سليم البدري و العمدة سليمان غانم و برغم من الاختلاف الطبقي بين ابن الباشوات اللي في الحضر و اللي في القري و كفاية ان صلاح السعدني مشهور لحد دلوقتي بلقب العمدة..او اتفرج مثلا علي مشهد انتصار حد علي التاني و شوف حركة الكاميرا و التدوير ما بينهم و كأن الكاميرا عارفة مين ظالم و مين مظلوم...او التركيبة الغريبة الراقية في شخصية "نازك السلحدار" و الجميلة صفية العمري..و الاختلاف الانساني اللي هتلاقيه في كل الاخوات موجود في الحلمية ما بين علي و عادل سليم البدري

-المعلمة في ليالي الحلمية بتتجسد في كمية العائلات اللي موجودة في كل الاحداث و كل عائلة ليها شجرتها و تركيتبها المختلفة عن اللي العائلة التانية و الشخصيات دي كلها رسمها قلم اسامة انور عكاشة و اخرجتها عيون اسماعيل عبد الحافظ...احاسيس انيسة" محسنة توفيق" لازم توصلك من كلامها و من طريقة تصوير مشاهدها...و حتي في مشهد للفنان الكبير محي الدين عبد المحسن و هو بيعاتب سليمان غانم علي بيع ارضه و ساعتها هتتأكد ان اي دور في المسلسل دة له اهميته...او يعني ايه متضحكش و تبكي في نفس الوقت من شخصية وصيفة "انعام سالوسة"

-الجمال في الحلمية و لياليها ان كل مشهد في المسلسل هتلاقي قدامه نفس المشهد علي ارض الواقع بكل تفاصيله...مش بس كدة اي مشهد بيبقي عبارة عن حصة تاريخ منفصلة بتحكيلك تاريخ مصر و مفيش احلي انك تتكلم عن تاريخ البلد غير من خلال اهل البلد


-و لكل واحد فيهم اعمال منفصلة متميزة بس لما تلاقي اسم اسامة انور عكاشة و اسماعيل عبد الحافظ علي التتر هتتأكد انك هتشوف عمل كتبه متفرد و اخرجه زرقاء اليمامة..و من اول مشهد هيبدأ من العمل دة هيتوقف الزمن اللي حواليك عشان في زمن تاني هيبدأ اسمه "زمن الصديقان"


#اسامة_انور_عكاشة
#اسماعيل_عبد_الحافظ
#الصديقان
#كريم_مجدي

برة التتر 2 "مش يمكن لما اجرب اطلع باعرف"

انت كدة هتفتح علي نفسك ابواب جهنم...سينمائية قوي الجملة دي صح؟؟ بس كام مرة حد فينا حب ياخد قرار في حياته و يلاقي التحذيرات من الناس و من نفسه انك تحاول تنفذ القرار دة و ساعات كتير بتبقي التحذيرات من التفكير نفسه يعني من الاول خالص...اوعي يا بني هو انت قد القرار دة؟ هتتعلم دلوقتي ما خلاص هو بعد ما شاب؟؟ مبقاش ينفع يا عم كبر دماغك

-كل واحد في الدنيا دي جواه شوية طموح علي حبة امنيات كدة نفسه يوصلها...يعني نفسك تجيب عربية او نفسك تشتغل شغلانة احسن و في اللي نفسه ضحكة من قلبه صافية و فيه اللي نفسه انه يبقي ملياردير بدل ما يكون مليونير ما اصل كل برغوت علي قد دمه 

-عارف انت اللي بيجيب موبايل جديد و اول حاجة بيسأل عليها طيب لو اتكسر اوديه فين من قبل ما يدفع تمنه اساسا...الفكرة ببساطة شديدة جدا ايه المانع لما تفكر في حاجة و تخطط ليها و تحلم توصلها و تنفذها...اه معلش تعالي نفسك و نفذها 

ما انت حاطط ايدك في المياه الباردة يا عم كريم و بتتكلم كلام نظريات 

-طيب بس يا سيدي تعالي نحسبها حسبة جميلة كدة ان كل واحد فينا شايف ظروفه انها اصعب ظروف و دايما بنقول ان الظروف هي اللي موقفانا بس تعالي امتحنك امتحان بسيط كدة؟؟؟

هو مين اللي الثابت و مين المتحرك؟؟

مش فاهم صح ؟

ابسطهالك 

يعني مين اللي ممكن يتغير و مين اللي واقف في وشنا دايما؟؟؟ ايووة كدة يا رجل الله ينور هو العنصر البشري هو اللي بيتغير يعني انت ممكن ترقص الظروف بلغة الكورة و تعدي منها مش جايز لو جربت تعرف ترقصها و تجيب جون؟؟؟

-اصل انت لو قعدت علي قهوة و انت اللي هتحاسب في الاخر علي اللي هتشربه فاشرب اللي هيعجبك مش هيبقي موت و خراب ديار يعني دفعت فلوس و كمان شربت حاجة مش بتحبها...هي كدة بقي يا كبير مش جايز لو جربت تعمل اللي انت "بتحبه" و عايزه تنجح؟؟

-انت دلوقتي قدامك هدف مجهول قدامك و خايف تاخد شوية قرارات عشان توصله و تمشي شوية خطوات عشان الطريق يبان قدامك اكتر...طيب افرض انك خوفت و معملتش حاجة و خدتها من قصرها و قولت مش عامل حاجة عشان خايف منجحش 

طيب استني كدة

هو الدنيا مش نهار و ليل...خير و شر...حياة و موت... نجاح و فشل ....صح اديك قولتها اهو يعني ممكن تنجح و ممكن لاء...لو عايز حتي تتعلم حاجة جديدة عليك خالص بس خايف متعرفش تتعلمها...طيب ما تبدأ تتعلم مش جايز تفهمها و تبدع فيها كمان...طيب تعالي ناخدها من زاوية كاميرا تانية؟؟

افرض انك خوفت و معملتش حاجة...ما انت كدة كدة في مكانك يا معلم 

عارفك يا كئيب و انت بتقولي افرض فشلت و رجعت لورا...هاقولك علي الاقل هتكون خدت خبرة فشل تنجح بيها في التجارب اللي جاية بعد كدة...اه و الله في خبرة اسمها خبرة الفشل زي ما تقع في حفرة و انت ماشي في شارع و تتعور مثلا اكيد لو مشيت في نفس الشارع مش هتقع فيها تاني الا لو انت اللي عايز كدة اصل الحفرة ثابتة و انت اللي متحرك 

شوفت ادينا رجعنا للثابت و المتحرك...خليك معايا بس هنعمل حاجة جامدة جدا

-خايف تضحك كتير عشان متقولش بعدها خير اللهم اجعله خير...طيب ما تضحك من قلبك دلوقتي و لو يا سيدي جالك النكد بعد كدة يبقي انت كسبت شوية ضحك من القلب ممكن يهونه عليك اي نكد...تخيل بقي معايا لو انت شايل هم الهم قبل ما يحصل لا هيبقي ليك نفس "بكسر النون" تضحك و هتضيع علي نفسك لحظة الضحك

-خايف تغير حاجة في حياتك عشان احتمال متنجحش و دة علي اساس انك مستريح دلوقتي؟؟ ما تاخد القرار يا بني و اشتغل عليه و زي ما في احتمال تفشل في احتمال برضه انك تنجح و ساعتها هتبقي من احسن الحاجات اللي هتحس بفرحتها و انت شايفها بتتحقق قدامك و صعب الحاجة اللي انت غيرتها ممكن تتمسح من حياتك الي الابد

-عايز تغير مسار شغلك و خايف؟؟؟ طيب ايه اللي عرفك انك لما تغير المسار متنجحش اكتر...علي الاقل ممكن تكون مستريح نفسيا و تديله مجهود اكبر و اكبر لما تشتغل في اللي انت عايزه...لا يا عم انا لسه هابدأ من الاول؟؟ هو العمر في كام سنة؟؟
هو انت عرفت هتموت امتي؟؟؟ جبتها من الكنترول مثلا؟
ما تجرب انت تتعلم و خد وقتك لاخر يوم في حياتك...ما انت كدة كدة قاعد في مكانك تبقي قاعد في مكانك و بتجرب مش جايز تتحرك من مكانك؟؟؟

-الحياة اقصر من انك تضيعها في مجرد تفكير...طيب ما تحاول تغير و تترجم التفكير للفعل مش جايز لو جربت تعرف..اقفش في حلمك و امش وراه مش جايز لو مشيت وراه توصل..عافر و اصبر علي حلمك يا اخي هو حلم حد تاني؟؟ دة ملكك انت يعني من الاخر ذنبه في رقبتك لو منفذتوش ...خد قرارك و بص لنفسك و نفذ اللي يريحك و يوصلك للي انت بس عايزه..اعمل كشف حساب لنفسك كل فترة و شوف انت وصلت لايه و موصلتش لايه...عاتب نفسك و خليك متصالح معاك حتي لو قاعد في اوضه لوحدك..هات ورقة و اقسمها اتنين كدة و اكتب في كل نص اللي هيحصل لو وصلت و لو موصلتش و قارن و اختار عشان انت بس اللي ادري بحالك و بحلمك 

-مش جايز لو جربت اطلع باعرف؟؟ ما تيجوا نجرب 

#الحياة_تجربة

#برة_التتر_2

#كريم_مجدي

سناء يونس

الست دي ب 100 رجل...اكيد سمعت الجملة دي قبل كدة و في حياتنا كلنا في ستات ب 100 رجل مش بس بالكلام لا دة بالفعل كمان ...هتلاقي ستات شقيانة علي لقمة العيش و لا اجدعها رجل ممكن يكون قاعد علي القهوة...حتي في وعدها للناس عمرها ما تخلفه ابدا و زي ما بنقول كلمتها بتبقي سيف علي رقبتها ...ست و انت واقف بتتكلم معاها الاحترام يكون سابق كلامك عشان عارف انك واقف بالبلدي كدة قدام ست ميضحكش عليها بكلمتين و لو حبيت تهزر معاها متحاولش بالبلدي كدة تروش عليها او تعمل عليها نمرة عشان ممكن تعمل منك و لا اجدع فقرة كوميدية في مسارح درجة رابعة من كتر خفة دمها.


-وجودها في المكان بيعمل بهجة و لا رائحة لبس العيد الجديد عشان هي بتبقي عاملة زي قريبتنا اللي جاية من برة و جايبة معاها الهدايا و الحاجات اللي عمرنا ما شوفناها غير علي ايديها...هي الست اللي ربت اخواتها و طلعتهم رجالة ...هي اللي صرفت علي ابوها من غير ما تشتكي...هي اللي لو قعدت تشكيلك همها هتضحك من كتر خفة دمها اللي تغلب احلي نكتة في قهوة موجودة علي الناصية


-اصل مينفعش تبقي سناء يونس موجودة و ندور علي اي ست...اصلها الست المصرية بكل تفاصيلها...هي اللي تقدر تشوفها في المطبخ متبهدلة وسط الاكل و هي اللي هتلاقيها علي ترابيزة الاجتماعات في اكبر شركات البلد بتاخد قرارات مصيرية

-عارف لما حد يهددك و يقولك متلعبش مع الكبار...اهي سناء يونس مبتلعبش غير مع الكبار
مش فاهم صح؟؟

-صعب انك تدور في وسط سيدات السينما علي نجمة كوميدية دمها خفيف بالفطرة...لكن من الحالات النادرة انك تلاقي ست خفة دمها ممكن تنافس بيها نجوم عمالقة في الكوميديا و اقولك علي حاجة كمان دي ممكن تاكلهم


-من بدري و احنا بنشوف ممثلين علي خشبة المسرح ممكن يعملوا مونولوج لوحدهم بس قليل لما تلاقي ست تعمل كدة سواء كوميديا او تراجيديا...سناء يونس من الستات "الحريفة" اللي بالبلدي كدة ممكن ترمي عليها حمل اي مشهد في المسرحية عايز تعمل منه ضحك حتي لو البطل اللي قدامها واخد اجازة


اهدي علي نفسك يا عم كريم؟؟؟ واخد كام عشان تقول كدة؟ :D
هاثبتلك هو انت اول مرة معانا في التتر و لا ايه؟؟
كل حاجة عندنا بالدليل و المنطق


-بس المرة دي سناء يونس سهلت الموضوع عليا علي الاخر لانها مش محتاجة شرح...كل اللي محتجاه كوباية شاي و سيجارة و ياريت تبطل تدخين
و متسرحش عشان هنثبت الكلام دة سوا دلوقتي


-بص يا سيدي ممكن تلاقي ستات كتير شاطرين في التلفزيون و السينما بس صعب جدا انك تلاقي ست تبقي غول مسرح...في الدراما بيكون فيه اعادة للمشاهد لو الاداء مكنش قد كدة بس علي المسرح حسابك بيبقي في لحظتها و عمره ما هيستني و لو مش قادر تضحك او تقنع الجمهور هيبقي عمرك علي خشبة المسرح من عمر اللي المشهد اللي هتعمله...يعني عشان تبقي قد المسرح لازم تبقي واثق من نفسك و من موهبتك او تبقي زي سناء يونس

يلا قوم صب كوباية الشاي عشان نتكلم

-فاكر لما قولنا ان وقفة المسرح مرعبة صح؟؟
طيب ايه رأيك في وقفة علي مسرح فؤاد المهندس
لا دي صعبة قوي
دة بالنسبة لك انت يا باشا
بالنسبة لسناء يونس هي حاجة سهلة جدا ...لان معاها من الادوات اللي يخليها قادرة تخطف الكاميرا و ضحك الناس من اي حد...خفة دم و تلقائية و سرعة بديهة غير طبيعية

-تعال نشوف عطية مديرة الملجأ في مسرحية "هالة حبيبتي" و افيهاتها اللي عمرها ما هتتنسي علي مر الزمن و في المسرحية دي بيبان قد ايه ان سناء يونس ممكن تقعد شايلة المشهد او المونولوج الكوميدي لوحدها و دة بيبقي واضح قوي في مشهدها مع دلال عبد العزيز في بداية المسرح لما قالتلها " داري جمالك و لا وزعيه علي الغلابة اللي زيينا" او مين ينسي "صورة يا فؤاد" في كل ما تديها حاجة من هدايا الملجأ

-اول لما دلال عبد العزيز سألتها مين دول قالتلها"دة الفريق القومي بتاع المغرب" و حتي لما بدأت تتكلم في التاريخ لما قالت"شيد في عهد السلطان عبد الباسط" و هنا هتلاقي ان الضحك كله جاي من شخص واحد...اكتر من 20 دقيقة الضحك له مصدر واحد...او لما بتقول للبنت الصغيرة" ام احمد انتي عندك دم؟ طيب ماعندك دم مبتتبرعيش به لييييييييييييه؟ " و دايما هتلاقي سناء يونس ترد علي الاسئلة المنطقية و الجد جدا باجابات توقعك من الضحك زي السؤال بتاع دلال عبد العزيز "انا نفسي اعرف من اللي عينك هنا" فردت سناء يونس برد خارج كل التوقعات " القوي العاملة بس كانت الرغبة الاولي سجن الرجال"

-و زي ما ضحكتك عندها القدرة الغريبة انها تبكيك في نفس المشهد لما قالت انها ضحية المجتمع و انها تابت عشان خلاص زهقت من اللي بتعمله

شايفك ياللي بتقول ما هي تألقت عشان قدام ممثلة مش كوميدية

-طيب مين ينسي مشهدها مع الاستاذ فؤاد المهندس و الافيه الاشهر "شعااااااااااااااااااااااااااع" و هنا هتلاقي بدون مبالغة ماتش في الكوميديا متبقاش عايزه يخلص


-من غيرها مينفعش تسك علي بناتك ما هي فوزية و من اول مشهد ليها في المسرحية بيجيلك يقين ان اللي جاية دي هي بطلة المسرحسة بدون شك و منافس قوي جدا للاستاذ فؤاد المهندس

-من اول مشهد و هي ماشية علي رجل و رجل بتضحكك حتي من غير ما تقول و لا حرف و مع اول افهاتها لشريهان " هو انا هاعمل حاجة...هاروح اغسل هدمتين حنفي و اغسل المواعين و اغسل رجليا بالحجر و اصلي التروايح و انام"

-و عشان دايما الحريف بيحب الماتشات الكتير فسناء يونس بتعشق الماتشات مع العملاق المهندس و كفاية اني افكرك باول مشهد ليهم و هي بتشرحله عملت ايه في حنفي و لما قالتله "قولنا سوري بقي ما تقرفوناش في عيشتنا" او لما المهندس سألها " لا هو من ساعة ما خطبك من سبع سنين مكنش مسك ايديك" فترد "يستجري دة انا كنت قاطعتهاله " او الافيه الكنز "قال ايه بيعديني"

-او المشهد العذاب كل يوم ساعة الضرب و لما قالت "بابا ..و ليكن في معلومك و ليكن في معلومك...احذر هذه المنطقة...ممنوع الاقتراب او التصوير"  او لما قالت لحنفي "اسكت يا ابن الوارمة "

-سناء يونس مش بد خلت ماتش في المسرحية دي مع المهندس..دي بدأت بلغة المسرح تعلي الافيه عليه و الدليل لما قالتله " ماله فؤاد المهندس برقبتك..فؤاد كان قاعد هنا و ام المهندس قاعدة هناك "...او لما قالتله كلم يا مسهوك او بيت الشعر اللي قالته كأنها بترسم لوحة الانسان المعاصر بتاعت عادل امام لما قالت " ماذا اري يا هل تري و بمقلتيا هنا اري الانوف تدلدلت و كأنها اصبحت ورا و عجبي" و في الاخر بتمضي بمنتهي الثقة فوزية رأفت

-و شوف حنية البنت لما قالت للمهندس "دة انت بابا" بعد ما كانت كوكو واوا


- و عشان سناء يونس عملت اصعب حاجة و هي المسرح فهي ممكن تعمل اي حاجة زي اللي دخل هندسة و طلبوا منه يذاكر منهج ابتدائي


-تعالي شوفها في "الدنيا علي جناح يمامة" و القلقاس الشهير او الاكلة الغامقة بينها و بين الرائع محمود عبد العزيز لما عملت دور طمطم ...او شوف "استر" في العميل 1001 و التركيبة العجيبة للست اليهودية البخيلة و الحادة مع اهل الحارة و في نفس الوقت اللي فيها حنية الدنيا كلها لما شافت ابن اخوها و تتفرج علي سناء يونس او استر و هي بترفض تسيب مصر


-دور علي سهرة تمثيليه اسمها الوريث و هتتفرج علي تركيبة غريبة لسناء يونس و خط تمثيل مختلف عن الكوميديا و هتلاقيها حريفة قوي فيها و عشان اقربلك الموضوع شوية اتفرج علي فيلم الجوع و دور زينب الست الغلبانة اللي راضية بحالها لما قالت الجملة لما جوزها اتجوز عليها واحدة غنيه" لو دة اللي هيغنيني انا راضية بفقري"  و ساعتها هتلاقي قدامك موهبة تبهرك


-من الاخر كدة سناء يونس من الستات الحريفة بجد اللي هتلاقيها بتعمل حاجات دايما برة الصندوق...و عشان تتفرج عليها من برة هتبقي ضامن انك هتشوف حاجة تقول بعدها الله

#سناء_يونس
#الحريفة
#التتر
#كريم_مجدي

ياسر عبد الرحمن "الرحــــــــــــــــــالة"

للسفر سبع فوائد و مين فينا مبيحبش السفر..و عشان تعرف طباع و عادات اي بلد لازم تروح هناك و مش بس كدة انت لازم تعيش معاهم عشان تعرف هم ايه و بيعملوا ايه؟؟ و دي حاجة مش سهلة لانك ممكن تتعرف علي بلد واحدة او اتنين بس صعب انك تكتشف عادات بلد باهلها في وقت قصير..و لما تروح اي بلد مش بس بيبقي هدفك انك تتعرف علي الناس دة انت كمان بيبقي نفسك تتفرج علي البلد كأماكن و تبقي عايز تعرف تاريخها و تكتشف عالم ممكن تكون ملحقتهوش او كنت تتمني انك تعيش فيه


-في مثل شعبي بيقول "من عاشر القوم 100 يوم صار منهم " يعني انت محتاج 3 شهور عشان تتعرف علي طباع اي بلد و تبدأ تكون واحد منهم...ايه رأيك بقي في اللي يعرفك علي بلد بلد في مصر و يعرفك طباع البلد في 4 دقائق بالكتير...اه و الله و ما عليك عليا حلفان

مش مصدق؟؟! طيب قطعتني ليه ؟؟؟ هو انا لسه قلت حاجة


-ياسر عبد الرحمن او "رحالة الكمنجة" ممكن يخليك تلف بلد بلد في 4 دقائق هي متوسط اي لحن تتر بينسجه..ياسر عبد الرحمن عبقريته مش بس انه بيعمل كل حاجة بأله واحدة...لا... دة عبقريته بتخليك تفتكر مسلسل 30 حلقة ممكن تنسي احداثه في 4 دقائق موسيقي


-اول لما بتسمع موسيقته عقلك بيدي خيالك امر بتخيل شوارع و ناس و حب و كره و دايما مش هتلاقي شارع زي التاني و لا هتلاقي بلد زي التانية..اكبر عيوب الرجل دة ان اي عمل او لحن بيعمله بيحطه في اختيار صعب جدا لانه بيبقي مطلوب منه ان اللحن اللي بعده يبقي احسن و احسن

و دة عيب يا عم كريم؟ احنا هنهزر بقي

-اه طبعا لانه بيسبب ضغط عصبي علي المبدع غير طبيعي انه دايما لازم يقدم الاحلي من اللي الاحلي و انه حط نفسه في مكان زي اللي واخد رقم موبايل كله اصفار سهل انك تحفظه و في نفس الوقت تبقي بتسأل هو ازاي وصل للرقم المميز دة


-جهز شنطتك بقي عشان مسافرين مع ياسر عبد الرحمن


-مين ممكن يصدق انك تحول صوت خطوات حصان لبداية لحن تتر مسلسل "فارس بلا جواد" و ممكن متبقاش فاكر كل اسامي الشخصيات او الاحداث في المسلسل بس مينفعش تنسي تتر المسلسل او بالاصح موسيقي ياسر عبد الرحمن اللي بتحكي كل تفصيلة في المسلسل...و دايما متخيل ان كل مشهد في المسلسل لو مفيهوش موسيقي بيبقي ناقص حاجة مهمة


-في فيلم حسن و مرقص مين ينسي علو صوت الموسيقي المعبر اكتر عن الصورة لما تشوف مشهد لما الشيخ و القسيس كانوا في شقتين جنب بعض و دة بيقول ابتهالات و دة بيقول ترانيم و غمض عينك ساعتها هتلاقي موسيقي ياسر عبد الرحمن بتكملك المشهد و مش محتاج تشوف المشهد تاني لان كل اللي هتفتكره و هتستناه هو انك تسمع الموسيقي و هي بتقولك ان المشهد دة من اهم مشاهد الفيلم من غير ما تبقي قاعد جنب المخرج في الكواليس و هو بيشرح اهمية المشهد


-ياسر عبد الرحمن ممكن يخليك تعرف احداث العمل قبل ما تشوفه من موسيقي البداية
متستغربش قوي كدة

-اسمع موسيقي ملاكي اسكندرية و قبل ما تتفرج علي الفيلم هتعرف ان الفيلم هيبقي عبارة عن لغز و ساعتها هتحس ان الموسيقي هي اللي بتجري عشان تحل اللغز دة


-حتي في في مسلسل "سارة" تحس من اللحن انك داخل لعالم براءة و طفولة جميل مفيش فيه لا نفاق و لا كذب و حتي في لحظات الوجع متقدرش تفصل ما بين الموسيقي و تعبيرات الممثلين و كلامهم


كل دة احنا لسه في القاهرة...هو انت هتريح قبل ما نطلع...يلا بيننا علي وجه قبلي

-موسيقي ياسر عبد الرحمن بتحب وجه قبلي و الدليل انها شبهه...وجه قبلي هتلاقي فيه الرجولة في المواقف الصعبة و الحزن الشديد وقت المواجع و فرح و مزمار وقت الفرح

ايه دة؟!! استني كدة

-ما هي دي موسيقي ياسر عبد الرحمن...اول لما تسمع دخلة المزمار بتاعت الليل و اخره لازم هتلاقي نفسك شايفها قبل ما تسمعها لانك هتتخيل انك ماشي في وسط شوارع قنا مثلا و عايش فيها بقالك زمن

-او استني مين فينا يقدر ينسي تتر الضوء الشارد و ازاي كان بيعبر عن كل مشهد في المسلسل حتي في مشاهد الحزن ساعة وفاة شخصية محمد رياض و تحس ان الموسيقي فعلا زعلانه عليه و في مشاهد الحب المستخبي بين ممدوح عبد العليم و مني زكي مكنش هيبقي ليها طعم من غير الوسيقي المكسوفة اللي اتعملت بايد ياسر عبد الرحمن

هي البلد دي مفيهاش متاحف
شكلك بتحب التاريخ...متخافش عنده كل حاجة...ما تيجي نروح مكتبة اسكندرية


-فيلم ناصر 56...ياسر عبد الرحمن عمل لحن مزيج ما بين مشاعر ناصر و علاقته بالشعب و قوة قراراته في الاوقات المستحيلة...
و الفرحة ساعة لما اعلن تأميم قناة السويس و كأن الموسيقي كانت عايشة في وقتها و فرحانة زيها زي البشر من لحم و دم و احساس..حتي في وقت الانكسار تحس ان الموسيقي ماشية مع الناس بتقول لناصر اوعي تمشي

-عمرك سمعت موسيقي بتاخد قرار؟!!!
انا مش مجنون يا عم و الله العظيم

-كل ما هتشوف فيلم ايام السادات و المشاهد اللي بيتاخد فيها قرارات حاسمة هتلاقي الموسيقي هي اللي بتاخد القرار مع الريس و كأنها بتضيف صعوبة علي اتخاذ القرار دة

وحشتك القاهرة صح؟؟

-طيب و انت راجع بقي هتنزل شوارع الحسين مع المال و البنون و اللي تعتبر من اعظم اعمال الرحالة اللي مع اول بداية اللحن هتلاقي ايدك بتتحرك معاه و تقعد تفتكر الشخصيات واحد واحد كأنك عايشها و بتتحرك جواك و هنا هتلاقي نفسك بتسمع موسيقي "اجتماعية" هتلاقي فيها اهلك و اصحابك و ناس تعرفهم من زمان

-معلش بقي و انت معدي تخطف رجلك علي شبرا عشان تشوف هي فوضي و الموسيقي اللي مع انكسار منة شلبي بعد رجوعها البيت و هي موجوعة بالام الاغتصاب و هنا هتلاقي الموسيقي مظلومة و ساعة انتفاضة الناس ضد الظلم و حاتم هتلاقي الموسيقي غضبانة...ما هتعمله ايه ؟؟ ما هو يقدر يخلي الموسيقي تحس و تتحس

-هو دة ياسر عبد الرحمن...كل اللي انت محتاجه معاه انك تغمض عينيك و تسيب الباقي عليه...هينقلك من مكان للتاني و من حزن لفرح و من انكسار لقوة

-ياسر عبد الرحمن مش مجرد ملحن اسمه بيجي من نجوم التتر...دة هو اللي بيدي طعم لاي حاجة بتتكتب عليها "صنعت بواسطة ياسر عبد الرحمن"

#ياسر_عبد_الرحمن
#الرحالة
#التتر
#كريم_مجدي