انا كريم...انا الشخص اللي عمره شوية كلام
علي ورق متبعتر في وسط زحمة عيوب و مزايا...حياة اولها وحدة محبوسة بين 4 حيطان
مخنوقة اللي باين منها عنوان كبير اسمه "يا بني ما انت عندك كل حاجة ...محتاج
ايه بس" خوف شديد من اي جديد...سموها لهفة سموها دلع سموها تربية مش مهم
الاسم المهم انها تتحس حبل بيلف جسمك حتة حتة و حتي لو حاولت تفك عقدة هتلاقي
مليون عقدة بيطلعولك لسانهم و يقولولك مش هتقدر ...اوقات تيجي عليا انا رافض
مكاني...رافض حياتي...رافض احداث يومي...بس هو الحل مفيش غيره ...اعمل يا كريم
عالم اعمل فيه اللي انت عايزه...اكدب...زور حياتك...فصل احداث يومك علي مقاسك اللي
تشوف انه مظبوط عليك و بدأت الحكاية...بدأت حكاية تقسيم الناس ...ناس يعرفوا نص
الحقيقة و ناس يعرفوا ربع الواقع و ناس عشان توصلهم لازم تعيش بعكش واقعك...مع ان
الشخص واحد بس الشخصية مختلفة...و علي كل لون يا شخصية في احداث بتترسم...يعني
نفسي ابقي مخترع...سهلة يا سيدي ما تخترع هو الخيال بفلوس...اه صحيح مش بفلوس بس
خيال بيعجبك يوصل معاك انك ترفض الواقع اللي كاتبه ربنا بمنتهي العدل و الحكمة بس
هتقول ايه الخيال ممتع بس لو شطح منك ممكن ينسيك انت مين
-عملت العالم الافتراضي؟
ايوة عملته ...طيب تصدق اني امبارح كلمت
الشباك في موضوع و قالي رأيه...دي حتي كوباية البيبسي عليها خفة دم محصلتش ...يا
رجل دي حتة شباك السرير ليا فيه حكايات...الموضوع بدأ يكبر و مبقتش كريم اللي انا
عايزه برضه و لا اللي الناس عايزينه...اصل هم شايفني و الله انسان كويس بس ليه
بيحور؟؟ هو شخصيته حلوة...اهو كل الكلام دة الناس كلها شايفاه الا انا ...انا كريم
-انا كريم اللي لما باقعد مع نفسي باقول ايه
البلاوي اللي عملتها دي...يا بني ما تعيش بطبيعتك...اه صحيح مفيش انسان خالي من
العيوب بس انت بقيت خالي من نفسك...انت بقيت واقع افتراضي عايش مع ناس حقيقية...و
ناس تيجي و ناس تمشي و ناس تحبني و من كتر حبها بتبقي الصدمة الكبيرة...ما هو اصل
انت مش محتاج تكذب يبقي ليه بتعمل كدة؟؟
-كلهم دايما بيسألوا السؤال دة بس عمرهم ما
لاقوا اجابة...لان الاجابة عندي انا بس
-الاجابة يا سادة يا كرام تتلخص في شوية
كلمات تتحكي و تتحس بالخيال مش بالواقع الافتراضي...عمرك ما هتحس بوحدة تخليك شايف
نفسك متكتف ...نفسك تعمل كل ما هو ممنوع بالنسبة لك بس مسموح لغيرك ...اه مسموح
لغيري...نفسي اسافر...نفسي العب...عايز اخرج...عايز امشي في الشوارع من غير انت
فين؟ اوعي تكون بتعمل غلط؟؟
الغلط اللي انتوا بتعملوه معايا...انا ابسط
من اي حاجة يا اخوانا...اصرخ باعلي الصوت سيبوني اجرب مش جايز افرح؟؟
طيب مش جايز انفع؟ طيب مش جايز ....
و لا ليه احلم تاني؟؟
ارجع تاني لكوباية البيبسي اتكلم معاها اهو
اضحك شوية
-جت الاجازة...طلعت من الاوائل...اخرج بقي
-تخرج ليه ما هي كل حاجة موجودة في البيت
-اه صحيح ...3 شهور اجازة باتفرج علي نفس
المسرحية بالليل ...ايوة مكنتش باحس بملل عشان الملل بالنسبة لي بقي مجهول ملامحه لوضوح
تأثيره في حياتي...لازم تنام وش الصبح يعني؟
لا لازم انام عشان جسمي مش قادر يستحملني و
انا باجي عليه و باقوله اسهر عشان متبصش في الشارع و تلاقي اصحابك خارجين
-فضلت في العالم الافتراضي دة كتيييييييير؟؟
يووووووووووووووه لحد ما قابلتها...في الاول
اتخانقنا بس روحت اعتذرت...معرفش ليه؟
بس حسيتها زعلت مني و مكنتش باحب اشوفها
زعلانة...اتغاظ قوي لو شوفتها مع حد تاني و ابقي مبسوط و انا شايف نظرات غيرتها و
انا واقف مع غيرها...ما تخلي عندك دة و تحسي باللي فيا يا شيخة...حتي اليوم اللي
مكنتش بتسلم عليا فيه ...باحس اني رجعت العالم الافتراضي تاني...في مرة قولتلها
احنا اصحاب 16 مرة بس بين السطور عايز اقولها انتي صاحبتي و حبيبتي و بنتي ...و
لما شوفتها بتتألم قلبي ادي لعقلي شفرة هي بس اللي تفهمها...كفاية واقع افتراضي يا
جدع انت اهي جت اللي تخليك تنزل علي ارض الواقع
-كان تحدي ليا و ليها...انك تنزلي ادم من
الجنة فدي عملتها حواء من زمان بس انك تنزلي ادم ارض الواقع فعملتها حواء اللي
حبها قلبي ...خلاص انا مش هاعيش في واقع افتراضي تاني...انا هاحبها و بس...مشاكل
تجر مشاكل و تعب يجر هم بس في الاخر انا هدفي هي ...هاوصلها و مليش
دعوة....استحملتني؟؟
اه كتير ...و بصراحة اكتر من استحملت نفسي
....كانت ليها قوقعة السمع اللي رجعت اسمع بيها...الالوان اللي بتدي صفحة ابيض و
اسود طعم...ضهر اتسند عليه وقت تعبي و همي...زعلتها؟
برضه كتير...و انا عارف ايه السبب؟
-خناقة بين اللي كنت محروم منه في بداية
العتمة و ما بين الواقع بكل الحلو و الوحش...و الذنب مش علي الواقع ...كل الذنب في
عالم افتراضي عيوبه اكتر من مميزاته
-قررت اجرب ...لا انا
هاعيــــــــــــــــــــــــــش و انزل علي ارض الواقع...الوقاع معاه احسن من
الخيال من غيرها...قررت ساعتها اني اكتب اعتراف..اعتراف اني قررت خلاص اسيب كل ما
هو افتراضي...مينفعش تسيب حاجة بتحبها عشان اي حاجة مؤقتة في عالم خيالك...ارضي بنصيبك
و اشتغل علي واقعك اللي محدش هيعيشه غيرك
-لقيت اللي بيفرحني بسيط...صورة شكلي فيها يطلع حلو...كلمة حلوة تتقالي بعد مجهود باعمله...معاملة طفل شبطان في لعبة بس و
مش زنان
و هي عملت كل دة و عشانها قررت استغني عن اي حاجة افتراضية او واقعية تزعلها
-المعادلة بسيطة...ربنا بيديك حياة زي لعبة
الميكانو و عليها حروف اسمك يا تاخد بالاسباب و تكون كل اللي يفرحك يا تلخبط كل
المكعبات علي بعض و ساعتها و لا هتوصل لشكل و لا هتعرف ترتب المكعبات زي ما كانت
-مش عيب انك تعترف بغلط و العيب هيبقي قوة لما تقول الغلط مسيره يتصلح
-انا كريم...هاعيش الواقع بكل ما فيه...اصل اللي بيه عاجبني بحلوه و مره
-انا كريم...هاعيش الواقع بكل ما فيه...اصل اللي بيه عاجبني بحلوه و مره
**هذا المقال تجريبي منه ما هو صحيح و منه ما
هو افتراضي
#انا_كريم
#التتر
#كريم_مجدي
ليست هناك تعليقات:
إرسال تعليق