خيرية احمد

خيرية احمد

ها يا ماما عاملة ايه النهاردة اكل؟

-عاملة كشري علي الله بس يتاكل؟

-و ايه لازمته التنغيص بس؟

-ما انتوا بتاكلوه زي القرود في الشارع و بتيجه هنا في البيت مش عارف بيحصلكوا ايه؟؟

وحشتكوا دخلات التتر صح؟؟ و المصحف صح انا عارف

اصل كلنا عدينا بالموضوع دة...حب اكل الشارع او بمعني انضف المحلات اللي في الشارع...ممكن تبقي متأكد ان الاكل اللي في البيت انضف و معمول باتقان اعلي و مضمون بس في حاجة بتشدك انك تاكل نفس الاكل في الشارع و دة بيبقي له مصطلح كلنا بنقدمه مبرر لنفسنا هو "ربنا محلل رزقه كدة" هنعترض يعني ؟

بس غير ان رزقه كدة...في حاجات كتير ممكن تحلل في عينك الاكل برة البيت...يعني مثلا الجو اللي في المحلات...شوية الهواء اللي بتشمهم و انت بتأكل...مجرد فكرة انك لابس و نازل دي لوحدها تفتح نفسك اصل بالعقل كدة نفسك مش هتتفتح و انت بتأكل علي ورقة جرايد صفحة الوفيات و لو انتوا عائلة غنية بقي هيبقي علي مفرش اكبر منك ب 5 سنين مثلا ...هو كدة...الرزق كدة....ربك ممكن يحلل رزق ناس عشان يديهم مع ان هتلاقي كتير غيرهم بيعملوا نفس الحاجة بس هم عندهم حتة زيادة اسمها رزق القبول

-و عشان الفن و التمثيل نسخة مصغرة من حياتنا فبرضه في رزق القبول في التمثيل و دة مش هتلاقيه في ناس كتير لانه بيعتمد علي رزقه...يعني ممكن تلاقي في وقت ظهوره في ممثلين بيقدمه نفس اللي بيعمله بس هو ربنا رزقه بقبول انك كل ما تفتكره تضحك او حتي علي الأقل تبتسم...رزق القبول دة عند خيرية احمد

-خيرية احمد دايما هتلاقي عندها الرزق دة بالرغم انها مخدتش الشهرة و النجاح الجامدين قوي بس خدت اللي احسن من الاتنين...خدت موهبة فطرية تدل قلب معظم الناس اللي بيشوفوها او بيضحكوا علي جملة قالتها زمان...كوميديا خيرية احمد هي كوميديا "اكل الشارع" ...الكوميديا اللي تشم فيهم هواء الضحك النضيف و الخفيف...هي هي نفس الكوميديا يمكن في ناس تانية بس سبحان الله هي عندها الرزق انك تقبلها منها...الرزق في موهبة خيرية احمد انك تحس انها من منطقتك او خلينا نقول تحس انه المحل اللي بتأكل منه و مكمل معاك عمرك لحد ما تكبر و تفضل فاكر كل تفاصبله و المكان اللي بتقعد فيه...و تفضل فاكر يافطته كانت مكتوبة ازاي و كل ما تعدي عليه تضحك و تدور فيلم سينما في دماغك

****يلا البسوا بقي عشان هنخرج في شوارع و مطاعم خيرية احمد...هم مش كتير صحيح بس محفوظين

-نبدأ بفيلم عريس مراتي و تخيل معايا كدة محلات اكل كبيرة و مشهورة جدا في شارع واحد و يجي محل صغير لسه فاتح و بيعمل حاجات بسيطة يأكل منهم الجو...حاضر هاوضح اكتر من غير زعيق

يعني انت متخيل فيلم فيه إسماعيل ياسين و النابلسي و زينات صدقي "اللي بدأنا بيها الموسم الخامس" و معاها مين كمان أستاذ الكوميديا علي مر العصور فؤاد المهندس و من الحاجات اللي متقدرش تنساها في الفيلم دة هي كلمات خيرية احمد...و هو دة بقي رزق القبول يعني مين فينا ينسي محموووووووووووووووووووووود يا حبيبي و تعالي نفتكرهم واحد واحد كدة و ادينا ماشيين في الشارع ...لما قالت للمهندس "محمود انت نايم يا حبيبي؟ حوداااااااا"

و لما قالتله " انام من غير ما اتعشي يا حبيبي" و طبعا فؤاد المهندس مش هيسكت و هيقولها "يا ستي روحي اتعشي براحتك" تقوله بمنتهي البلاهة الكوميدية جدا و اللي جواه ذكاء كوميدي و فطرة مش طبيعية "نفسي في علبة تونا يا حودا " و لما قالها بكرة اجيبلك بكرة" تقوله "يعني بلاش اتعشي الليلة يا محمود"

او المشهد القاتل لما قالتله "محموووووووووود انت بتعملي مرجيحة يا حبيبي" و لما قالتله " انت نسيت تربط دة في الحبل التاني يا حبيبي"...و لما المهندس جاب الفيشة و يقولها صوباعك يا حبيبتي تقوله بنبرة صوت بتدي لاي كلام طعم كوميدي من الدرجة الاولي و تقوله "عينيا يا حودة" و في عز ما هي بتتكهرب تقوله " متبقاش تقولي بنسحب كهرباء كتير يا محمود"

-و يستمر استغلال صوت و طريقة خيرية احمد في محموووووووود لدرجة ان بقالها فقرة كاملة في السلسلة الرائعة ساعة لقلبك و بالرغم من  قوة ساعة لقلبك ساعتها الا ان مصدر قوة كوميديا خيرية احمد اللي خلي الناس تستني حلقتها مع المهندس عشان يسمعوا مراته هتقول ايه او بمعني اصح خيرية احمد هتقول ايه؟

عارف يعني ايه تجتمع انت و المهندس في عمل واحد و الناس تبقي مستنية اللي انت هتقوله و انك تمهد افيهات لعملاق كوميديا زي عمنا المهندس...دي حاجة لازم تيجي من موهبة ربنا مديها القبول ان كلامها يفضل عايش حتي لو بالصوت بس...لدرجة ان الدور اتسمي خيرية لانك مش هتقدر تفرق ما بين كوميديا الواقع و التمثيل

-دور علي حاجة اسمها "الزوجة الصاروخية " و شوف المهندس و هو بيقدم دخول لافيه خيرية مراته لما بيقول و قاعد و لا بيا و لا عليا اسمع صوت و كأنه بيفتح الستارة عشان خيرية تدخل بأشهر كلماتها "محموووووووووووووود" و اسمعها و هي بتقوله مش محتاجين في المصيف غير المايوهات يا حبيبي" فيقولها و هنغير فين فترد عليه كالعادة بمنتهي البساطة القاتلة و تقوله " نبقي نروح مصر نغير و نرجع يا حبيبي"  و دور بقي مثلا علي محمود و خيرية في السينما او لازم تسمع في الملاهي عشان تشوف رزق الكوميديا بتاع خيرية احمد اللي بتاخد تصقيف ساعات اعلي من المهندس " و الله بدون مبالغة" لما بتقوله عايزة اروح الملاهي يا محمود فيقولها ليه يا شيخة عايزة تروحي فترد خيرية " اهو نتلهي شوية يا محمود"

-او لما عملت غرام في الطريق الزراعي

-و مش سهل ابدا انك لما بتختفي فترة انك مش هتتنسي و دة اللي حصل معاه بالظبط ان من علامات الرزق للست دي انها برغم اختفاءها الا ان كوميديتها فضلت تتكلم عنها و تفكر الناس بيها حتي لو في وسط الاختفاء دة في كام حاجة بيعدوا بسرعة بس الأساس موجود

-و زي ما قولنا فوق كدة انك مش سهل تبقي في مبارزة كوميدية مع عمالقة كوميدية برضه هيبقي صعب ان أي ست تتحط في دور مقابل لدور سناء جميل زي ما اتحطوا سواء ركنين مسلسل ساكن قصادي اللي اتربي عليه أجيال و أجيال و مين فينا ينسي ضحكة خيرية احمد في المسلسل دة اللي ممكن تحفظها اكتر من تتر المسلسل نفسه...في المسلسل دة خيرية احمد عملت حاجتين انها قدرت تعمل كوميديا عائلية خفيفة علي معدة أي واحد مكشر مع المعلم محمد رضا و في نفس الوقت كانت مراية او "مرأة" لكوميديا سناء الجميل الارستقراطية و تستبدلها بالكوميديا البلدي و دي حاجة كمان مش سهلة لان في الكوميديا صعب انك تقلب الافيه في وقت كانت الدراما واخدة خط الدراما الإنسانية

-و زي أي محل لما بيكبر بيبقي الأداء بيكبر و ينضج عملت خيرية احمد بحكم السن انها تعمل دور الام في مسلسلات كتير زي مسلسل العميل 1001 و هتشوفها و هي بتعمل دور الام المصرية اللي عدي عليها كل الوجع و كل الافراح...و ازاي قادرة تربي أنواع مختلفة من الأبناء و شوف وجعها لما عرفت ان ابنها استشهد هتلاقيها عملته برضه لا من غير افورة و لا مزايدة...عملته صادق ...زي مشاهد لما بتواسي جوزها اللي شاف ذل النكسة في الحرب و تحس بجدعنتها في التمثيل

-و زي ما قدمت الام العاقلة...مش هتهدي غير لما عملت الام الكوميدية في فيلم ظاظا و الكوميديا اللي قدمتها في الفيلم ساعة لما قامت و جريت و تحس ان في طاقة كوميديا ملحقتش تطلع

***في ناس اشتهرت من افيه واحد و لما حاولو يكرروه قابلوا فشل زريع بس الرزق انك تشتهر بشخصية او طريقة أداء و تعملها كل مرة بشكل مختلف و دة رزق خيرية احمد ...خير الكوميديا ضحكته و خير خيرية احمد في كلامها اللي لسه بيضحكنا لحد دلوقتي...الله يرحمك

#خيرية_احمد

#رزق_القبول

#التتر

#كريم_مجدي