سحر الكتابة "احمد خالد توفيق"

قررررررررررب قرب هنا يا أستاذ ...خدي فكرة يا هانم ...من بعد ما لف العالم كله وصل عندنا...عندنا احنا و بس...اللي هيخطف عينك بسحره و هيوقع قلبك لما تلمحه و هو بيختفي و يظهر من قدامك ...اللي الدنيا بتتكلم عنه هتشوفه و تبقي قريب منه...قرررب قرب بقي يا أستاذ

-يا الله علي شعورك و انت صغير و انت نازل المولد و تشوف ضرب البمب بالنشان و تشوف الناس و هي بتضرب حلقات الحديد و يشوفه مين هيوصل لابعد مسافة و يدهشك قوتهم و كل ما تعدي بلعبه بتبقي عايز تنزل و تلعبها و تقول ازاي تفوتني...و انت قاعد علي كتف ابوك بتحس انك ملك متوج بيتفرج علي احتفالات تنصيبك في مماكة من دروب الخيال ...رحلة عينك فيها بتشوف مشاهد عمرها ما هتغيب عن عقلك و مهمة عقلك ساعتها انه يحوشلك الذكريات دي لوقت ما تحتاجها او لما تعدي علي نفس الشارع و تلاقيه فاضي بس بيكون مليان بذكريات كتيرة مالية قلبك و عقلك

-و من اشهر فقرات المولد هو الساحر ...و انه ازاي بأدوات بسيطة بيقدر يبهرك و فعلا يخطف عينك و ينقلك من عالم واقعي لعالم افتراضي هو اللي بيتحكم فيه و يعرف امتي يفرض عليك العزلة و امتي يسمحلك بالخروج منها بس العزلة المرة دي عزلة ممتعة لانه بيسيب جوة عقلك مليون سؤال و انه ازاي بيعمل كدة...يعني ازاي مثلا تبقي نار مولعة و فجأة تلاقيها حمامة...و حتي بعد ما تكبر و تعرف سر الألعاب السحرية دي بتفضل متعتك موجودة و حاضرة لو مكانش عشان خفة ايد الساحر بتبقي عشان هتبقي جزء من تشكيل شخصيتك و انت بتكبر يوم عن التاني ...و كل ما تكبر بتلاقي نفسك بتدور علي ساحر يرضي عقلك و يبقي تحدي ليكوا انتوا الاتنين انكوا تكملوا حياتكوا بنفس الشغف و الانبهار

-بس الساحر أبو ايد خفيفة دة سهل جدا تلاقيه...الساحر الأصعب أبو قلم خفيف...ايوة زي ما قرأت كدة ...ابو قلم خفيف

-انك تقدر تخفي حاجة في ايدك او تجيب حاجة من الهواء اه بتبقي حاجة صعبة بس انك تختفي انت شخصيا او تيجي من الهواء فدي الحاجة اللي في منتهي الصعوبة...سحر الكتابة مختلف عن أي سحر ...عطر الكتابة عمره أطول من اغلي عطور باريس ...ذكريات الكتابة نقوشها اثبت من النقوش أيام الفراعنة

**شايفني مبالغ صح؟ يمكن عشان بقالي كتير مكتبتش ؟!!

طيب ما تيجي نتراهن سوا و يا اقنعك يا اقنعك

-أي ذكريات في الدنيا بتبقي قايمة علي حاجتين يا حلوة يا لا حول و لا قوة الا بالله صح؟ اديك قلت صح

-يعني مثلا لو شوفت فيلم حلو بيتبني جواك ذكريات كتير ناحية مشهد معين عاجبك كان معمول حلو...او كان معمول وحش ...او مشهد اوفر شوبة بس تكمله عشان بس تضحك...من الاخر بقي يا كبير ان ذكريات الأفلام مثلا قايمة علي العين و واضحة قدامك يعني نسبة ابداعك في التخيل تكاد تكون معدومة

**سامعك ياللي بتقول ما الراديو موجود؟؟ اصل انا مش جديد...انا بأحس بيكوا

-الراديو زمان وحتي دلوقتي سواء مسلسلات او برامج بيسيبلك نصف مساحة من التخيل ...يعني انت في الراديو من حقك تبقي المخرج و مهندس الديكور...و ساعات النص دة بيقل للربع لما تبقي عارف مين اللي بيتكلم و عارف شكله و بكدة تتنازل عن ربع ابداعك اللي كان من حقك

**اما بقي الكتاب ...و يا عيني علي الكتاب ...طب و الله قلبي انشرح من اول ما جيبت سيرته" و عارف الافيه بتاع ما عدا كتب المدرسة بس خلاص حرقته من قبل ما تقوله"

-أي كتاب في الدنيا بيديك مساحة من الحرية و الابداع مفيش حد تاني ممكن يديهالك...اصلك بالعقل كدة انت اللي بتنزل تشتريه و انت اللي بكامل قواك العقلية بتديله من وقتك عشان تقرأه...مع اول صفحة من الكتاب اوعي تقرأ الفهرس عشان تعيش الرحلة بكل ما فيها ...خش يا معلم علي طول علي اول الكتاب و دي بتبقي اول خطوة في مارثون تكوين شخصيتك لانك ساعتها لو وقعت في كتاب شاطر هتبقي ملك ايده و كلماته و هتسيب نفسك لتجربة هو الحاكم بأمره فيها و مينفعش تخرج عن قواعده ...يعني لو بدأت لازم تنتهي ...قواعد اللعبة كدة

-اول ما تقرأ أسماء الشخصيات و مع اول اسم بتتحول الكلمات لجداول عشان تعرف كل اسم وراه شخصية ايه و عشان متجيش فجأه تقول مين دة؟!! و جه امتي؟

و مع توالي الاحداث بيزيد ابداعك و تخيلك في رسم صورة لكل مشهد بتقرأه و بيتحول قدامك لديكور من تصميمك انت و لما الاحداث يحصل عقد و كلاكيع بتلاقي نفسك اتحولت لدكتور نفساني و تحاول تحل كل المشاكل و كأنك بطل الرواية...اي كتاب في الدنيا هتطلع منه معلومة هتفضل محفورة في دماغك لحد ما يجي الوقت و تستخدمها...يعني مثلا لو ربنا كرمك و دخلت طب و في امتحان شفوي ممكن تلاقي إجابة سؤال في رواية قرأتها زمان بس محفورة و مركونة بقالها سنين و دة وقتها انه يطلع...او يمكن ربنا يكرمك اكتر و تستخدم أسلوب تعامل عاجبك في بطل في رواية و فصلته علي مقاسك و لقيت نجاح لما اتعاملت مع الناس بالشكل دة

**كبرنا؟؟ ما شاء الله يا كريم كبرت اهو و بقيت بتقرأ كتب علي قد سنك

-ايه التخريف دة؟؟ اوعي تصدق او تسمع الكلام دة...الكتاب الشاطر بيروح لصاحبه ...الكتاب الشاطر اعمي اصم و ابكم...لا يعرف سن و لا يهمه شيخوخة و لا تشغله مراهقة...الكتاب الشاطر هو اخوك التوأم اللي لما تتوجع هو يحس بيك حتي لو مش معاك...هو الصاحب اللي معاك علي المر قبل الحلو...هو الحبيبة اللي بتخاف عليك و عايزاك جنبها طول الوقت...هو الاب اللي نصائحه دايما و علي طول مبتفارقش دماغك و حياتك...هو اللي حواليك اللي كل ما تكبر لازم يحترموا عقلك و سنك

-من اهم مزايا الكتاب الشاطر انه بيلغي من قاموس الاحاسيس كلمة ملل...يعني من اول كلمة لاخر كلمة تحس انك في رحلة في عالم افتراضي كنت بتتمني انك تعدي من قدامه...سهل تدور علي فيلم و مسرحية اتفرجت عليهم قبل كدة بس صعب انك تعمل مجهود عشان بتدور علي كتاب ضاع منك و لازم تلاقي نسخة مش عشان تقرأها تاني و بس ...الكتاب بيدي إحساس بالأمان لصاحبه...اه و الله بالأمان ...انه موجود جنبك في أي وقت لو احتجت جزء منه فأنت عارف مكانه

-و عشان الكتاب يبقالك كل اللي احنا قولنا عليه دة لازم من ساحر قلمه خفيف يبني جسور التفاهم و العمر بينك و بينه...سمسار معرفة مهمته يخليكوا انتوا الاتنين في احسن حال و في حالة اشتياق دائم لبعض...لما تكون صغير و تكبر مع ساحر قلمه خفيف انت بتحبه و مقتنع به بتفضل علي طول تأخد رأيه حتي لو عمرك ما شوفته بس انت قرأيتله و انك تقرأ لحد و تثق فيه من غير ما تشوفه دي من اعظم نعم ربنا علي اللي بيكتب و علي اللي بيقرأ...يعني ايه تأخد رأيه في معظم مواقف حياته و تلاقي الرد بين سطور رواياته...يعني ايه شخصية بينسج خيوطها تبقي جاكيت ليك تتدفي به وقت الشتاء ...و تبقي ليك قدوة من شخصية من خياله و محدش يعرفها غيره

-نجاح الكاتب انه يخلي اللي مبيقرأش يقرا...لا نتقل كدة عشان الكلام اللي جاي كبير

-فاكر كلمة اللي ذاكر ذاكر خلاص...اهو في قاعدة في القراءة اسمها اللي قرأ قرأ من زمان يعني اللي اتعود علي القراءة اتعود من بدري بس لما الكاتب يكون استثناء فبتتلغي القاعدة من أساسها ...الكاتب الاستثناء هو اللي يخلي اللي ميقرأش يقرأ...يعني بيعمل " محو امية القراءة" و علي رأي المثل بتحب تقرأ؟ لا ...قرأت لفلان؟ لا...]بقي متعرفش بتحب تقرأ و لا لاء؟

-الكاتب اللي قلمه خفيف هو بالظبط الاتش ار اللي بيعملك مقابلة شغل و بيخليك تعرف اذا كان عندك مؤهلات للشغلانة دي و لا لاء...يعني لو وقعت مع كاتب شاطر و اداك تصريح انك بتحب القراءة و مش بعيد النداهة تندهك و تفضل تقرأ و تقرأ

-مش احنا قولنا ان الكاتب الحريف هو اللي بيخلي اللي مبيقرأش يقرأ...طيب ايه رأيك انه لو جه في زمن الكتب فيه بتطلع في الروح و يجبر جيل كامل في بدتية عصر التكنولوجيا انه يقرأ ورق ...بذمتك دة مش يبقي استثناء؟؟

-علاقتك بأي انسان فارق الحياة بيتقسم نصين قبل الرحيل و بعده...بس علاقتنا بأي كاتب انه يقدر يعيش سنين بعد ما يموت بكلماته و أسلوبه اللي ممكن يخليك تتكلم بنفس الأسلوب...اللغز انك تحب شخص من وراء السطور هو سر بين سطور كلماته ...هو ما وراء طبيعة النفس البشرية ...هي يوتوبيا المحكومة بقوانينه ...اللغز هيفضل سحر غير مفهوم

**ايوة يعني انت مش قولت ان المقال اهداء لاحمد خالد توفيق؟؟فين بقي اسمه في الموضوع؟

-طيب و حياة عينك هو ينفع الكلام دة علي حد غيره ...و عشان نوع من أنواع الادب انك تستخدم اسمه في اخر المقال لانه حل اللغز و عشان دايما هيفضل الساحر أبو قلم خفيف

**شكرا صانع السحر...شكرا يا من جعلتني فخورا ان موهبتي هي الكتابة...شكرا استاذي نيابة عن جيلي

#ابو_قلم_خفيف

#احمد_خالد توفيق

#التتر

#سحر_الكتابة

#كريم_مجدي