التوك شو " حلقة الولادة" الحلقة الاولي

الزمان : في يوم ما يعلم به الا ربنا

المكان : مستشفي يا اختي كدة ينفع و كدة ينفع للنساء و التوليد

التوقيت : ما بعد الثامنة مساءا

-الحقني يا دكتور في كارثة

-انا عارف انه يوم مش معدي يوم ما بابقي معاك نبطشية...خير يا ريموت مالك؟

-في سبع حالات ولادة وصلوا المستشفى دلوقتي

-سبع حالات؟!!!!!!! ليه يا ريموت هم متفقين مع بعض و لا ايه؟؟

-اهو رزق يا دكتور

-طبعا ما انت هتقعد تتقلب ما بينهم و تقلب رزقك كالعادة ...يلا اتفضل دخل كل ام فيهم علي غرفة عمليات واحدة و كلم كل دكاترة الولادة يجوا حالا

**و من هنا نبدأ نقول انها عملية ولادة تاريخية لان اللي هيجوا الدنيا دول هيقلبوها من اول ما ينزلوا من بطن امهم...و انت و لا تتعب نفسك الممرض "ريموت" هيلف عليهم في أماكنهم واحد واحدة عشان هيبقي فيهم بنات و يفرجنا عليهم من اول لحظة

---يا ساتر يارب الحقوني يا امــــــــــــــــــــــــــــــــن

-مالك يا ريموت في ايه

-في حريق قام في غرفتين من غرف الولادة اول ما العيال اتولدوا

-و ايه اللي عمل الحريق يا ريموت

-يا سيدي اول ما دخلت اول غرفة لقيتها بنوتة زي القمر و اول ما نزلت لقيتها بتقول لدكتور التخدير " عمو انت اللي اديت ماما الحقنة؟" قالها اه يا حبيبتي ليه؟ البنت قالتله "اصل دكتور الولادة اول ما دخل الاوضه عند ماما قالها "معلش اصل دكتور التخدير اللي معايا مش قد كدة بس متخافيش انا هاقوله يعمل ايه بالظبط بدل ما يبوظ الدنيا" و نزلوا ضرب في بعض يا عم و فجأة ضرب جرس الإنذار في الاوضة اللي جنبهم

-و ايه علاقة الاوضه التانية يا ريموت بس؟

-اصل يا سيدي حصل كدة بالظبط بس مع الممرضات الواد نزل من هنا و اختار احلي ممرضة و قالها "بيتهموكي باجراء عمليات تجميل...و لازم تردي في اطار احترام الحوار" و هاتك يا ردح و الواد في منتهي اللامبالاة مع انه نازل زي القمر و شعره فضي

-لا يا عم احنا نبعد عن الاوضتين دول مش ناقصة حرائق الله يباركلك بس قولنا هيسموهم ايه عشان نسجلهم؟

-البنت يا سيدي لميس و الولد وائل

**يا ريمـــــــــــــــــــــــــــــــــــــــــــــــــــــــــــــــــــــــوت

-اجري يا بني شوف دكتور شرقاوي عايز ايه ؟؟

-ايوة يا دكتور تحت امرك

-يا بني تعالي اقطع الارسال...قصدي الحبل السري عن الواد دة...مش عايز ينزل

-مش نــــــــــــــــــــــــازل و ارفض قطع الحبل السري لانها مؤامرة عشان تبعدوني عن امي و دة في منتهي الوحشية و لازم لما أوصل الدنيا اعمل داخلة نارية عشان تصدقوا كلامي

-كلام ايه يا بني ؟؟ و نصدق ايه بس؟؟ يا بني الله يرضي عنك انزل عشان نلحق نلبسك هدومك

-شوفت اديك قلت هتلبسني يعني بتهددني بس الله غالب و مش هانزل غير لما الفيديو ينزل علي اليوتيوب

-طيب خلاص يا حبيبي هانزلك الفيديو يلا بقي مستعد عشان نقطع الحبل السري

-انا اللي أقول اقطع عشان انا دايما صح...هاقولك اقطع...تقولي خلصت يا معتز

-انت سميت نفسك كمان

-اومال اسيب حد يتحكم فيا و يختارلي اسمي ...دة الله غالب يا اخي

**يا ريمـــــــــــــــــــــــــــــــــــــــــــــــــــــــــــــــــــــــوت

-انا كدة بطارياتي هتفضي ...في ايه يا دكتور أبو العينين

-يا بني تعالي الحق الواد اللي نازل يبوس في الدكاترة و يشكرهم عمال علي بطال...دة اول لما نزل سأل علي عسكري الامن في المستشفى عشان يشكره

-دة من أولها يعني كدة؟؟

-يا ريموت الحقه قبل ما يروح لوزير الصحة يشكره

-طيب هو اسمه ايه عشان احايله؟

-اسمه احمد يا سيدي

-يلا يا احمد عشان نقطع الحبل السري

-ايه دة؟؟ الله ...دة انت هتعمل عمل بطولي هيوضحلنا مدي الترابط بين الام و الامن "قصدي الابن" و بعدين قبل ما تقطع عايز اشكر عسكري الامن في المستشفى

-يا بني تشكره ليه؟؟ انت كنت شوفته؟ دة حتي كان نايم لما دخلت

-شوفت كان نايم و دة دليل انه كان تعبان و بيؤدي واجبه بمنتهي الوطنية و لازم نعذره شوف كدة أي عسكري في أي مستشفي في العالم هتلاقي العسكري بتاعنا يتفوق بمراحل...دة احسن من أبو تريكة

-طيب يلا يا بني متتعبنيش معاك..اقطع دلوقتي

-اقطع طبعا ...هو انا هاعرف قد حضرتك يعني

**لما ادخل اشوف الاوضة التانية شكلها هادي و مفيهاش زيطة زي اللي فاتوا

-ايه دة؟؟ دة الواد نازل بشهادة ميلاده؟؟ اسمك ايه يا حبيبي؟

-اسمي الطفل أسامة كمال يا حضرة الممرض

-و ليه ماسك شهادة ميلادك في ايدك كدة؟؟

-انا باحب امشي قانوني من اول يوم...افرض حد سألني عن شهادة ميلادي

-و مين هيسألك يا بني و انت في السن دة؟

-معلش يا عمو انا باحب امشي في السليم

-خلاص يا حبيبي براحتك...انا هاسيبك و هارجع اتطمن عليك تاني

**اخر اوضة....يا ساتــــــــــــــــــــــــر دة كان يوم و لا يوم الانتخابات

-مالك يا حبيبي مكشر كدة ليه و تنك في نفسك كدة

-اصل عملية الولادة تمت بشكل غير علمي و كانوا لازم يسمعوا كلامي و انا باقولهم انزل يمين مش شمال

-و انت يا بني تفهم ايه بس في الولادة

-انا افهم في كل حاجة...انت مش شايف الفيست؟؟

-هو الفهم بالفيست يا بني دلوقتي؟؟

-لا بس المفروض يعرفوا الطفل الوقور اللي فاهم من الطفل اللي نازل كدة و خلاص زي ما يكون نازل أولاد رجب هههههههههههههههههههه

-انت بتضحك علي ايه يا بني

-باضحك ان دمي خفيف و كدة

و الله؟؟ و انت اسمك ايه بقي يا نجم الكوميديا

-بعد اذنك مينفعش تقارن بيني و بين اللي بيمثلوا من غير رسالة هادفة

-خلاص يا سيدي انا اسف لحضرتك...اسم الباشا ايه؟

-تامر

-طيب استأذنك امشي انا يا أستاذ تامر؟؟

-ايه هتروح تغير البطاريات؟؟؟ هههههههههههههههههه

-مع السلامة يا بني

**ايه دة؟ دول 6 أطفال بس اومال فين الطفل السابع...ايه يا ريموت انت دماغك لفت و لا ايه؟؟

***و لا لفت و لا حاجة ...هم كانوا 7 عيال و الله...ايه دة استني كدة؟؟ هو النور منور في مكتب مدير المستشفى ليه دلوقتي؟؟ و من امتي مدير المستشفى بنفسه بيقعد لحد دلوقتي؟؟ لما ادخل اشوفه لو محتاج حاجة و بالمرة اشوف قاعد ليه؟؟

-محتاج حاجة يا دكتور؟

-تعالي يا ريموت...مش عايز اوصيك علي ابننا عمرو...يدخله لبن من البودرة بتاعتي و البامبرز السعودي يا ريموت مش الشعبي بتاع العيال التانيين

-تحت امرك يا دكتور ...محتاج حاجة يا عمرو

-اهلا بيك يا ريموت يا حبيبي انت فله شمعة منورة و عايزين نقعد مع بعض كدة عشان نشوف عندنا ايه اليومين اللي قاعدينهم هنا...و ياريت لو عندك أفلام كارتون اجنبي عشان اربطها بالافلام العربي

-نعم؟!!!

-يا ريموت اعمل اللي باقولك عليه و هتفهم بعدين...و بعدين سيادة المدير هيمضي علي تصريح دخول الأفلام دي

-تحت امرك يا عمرو بيه

يــــــــــــــــــــــــــــــــــــــــــــــــــــــــــــا أخيرا دخلتهم الحضانة...اهو استريح من همهم شوية...بس العيال دي مش سهلة...لما أقوم اشوفهم بيعملوا ايه ؟

-ايه مستوي الحضانة دي...اهمال شديد...ازاي يسيبه اللبن جنبنا كدة و معناه ايه؟؟ بيحرمونا من كالسيوم لبن الام اللي من حقنا...دة حتي ربنا ميرضاش بالظلم و الله غالب

-يا معتز يا اخي بلاش ظلم دة احنا لسه جايين الدنيا هنفهم ايه احنا بس في اللبن...اكيد الناس دي فاهمة اكتر مننا و لما بتقدملنا حاجة لازم نشربها

-و افرض حاطين فيها سم يا سي احمد يا موسي؟

-يبقي هم شايفين ان مصلحتنا اننا نحس بسكرات الموت عشان  نحس بقيمة الحياة

-يا جماعة انا شايف ان إجراءات الولادة تمت طبقا لمواثيق وزارة الصحة المتعارف عليها عالميا و لا ايه يا تامر؟

-و الله يا أسامة انا شايف ان محدش هيفهم زينا...احنا اللي بنشرب اللبن و احنا اللي هنقشط و لازم و انت بتتكلم تبقي تنك كدة يا أسامة شد شوية...الا هو فين تامر و وائل؟؟

-تعبوا يا سيدي من كتر الخناق و ....

-ايه ناموا؟

-لا يا تامر يناموا ايه يا اخي...دول بيخلصوا علي ناس في الطوارئ دلوقتي

-و فين صحيـــــــــــــــــــــــــــــح الولد السابع اللي كان معانا...اكيد مقعدينه في حضانة فايف ستارز يا سيدي...عشان تعرفه ان التفرقة واضحة من أولها و اكيد جايبينله لبن في ببيرونة عليها رسومات تفتح النفس

-يا معتز بلاش تظلمهم هم اكيد شايفين ان حالته صعبة شويه دة انا حتي سمعت ان مدير المستشفى شخصيا كشف عليه؟؟

-كشف عليه ازاي يا احمد؟!!! دة مدير المستشفى تخصص انف و اذن

-بس مدير....و أي منصب لازم يكون بيفهم يا معنز

**يا نهار مش فايـــــــــــــــــت لازم ارجع لعمرو اوضته عشان نشوف هنعمل ايه... يا ليلتك اللي مش فايته يا ريموت...لازم اوصله قبل الإعلانات ما تخلص

***ملحوظة

هذا المقال فانتازيا نابع مش شخصيات حقيقية و كل الافيهات المذكورة أعلاه مقصودة لحد ما اتمسك و هأنكرها

#فانتازيا_التوك_شو

#الحلقة_الاولي_الولادة

#لسة_الفنازيا_فيها_وفيها

#التتر

#كريم_مجدي

خيرية احمد

خيرية احمد

ها يا ماما عاملة ايه النهاردة اكل؟

-عاملة كشري علي الله بس يتاكل؟

-و ايه لازمته التنغيص بس؟

-ما انتوا بتاكلوه زي القرود في الشارع و بتيجه هنا في البيت مش عارف بيحصلكوا ايه؟؟

وحشتكوا دخلات التتر صح؟؟ و المصحف صح انا عارف

اصل كلنا عدينا بالموضوع دة...حب اكل الشارع او بمعني انضف المحلات اللي في الشارع...ممكن تبقي متأكد ان الاكل اللي في البيت انضف و معمول باتقان اعلي و مضمون بس في حاجة بتشدك انك تاكل نفس الاكل في الشارع و دة بيبقي له مصطلح كلنا بنقدمه مبرر لنفسنا هو "ربنا محلل رزقه كدة" هنعترض يعني ؟

بس غير ان رزقه كدة...في حاجات كتير ممكن تحلل في عينك الاكل برة البيت...يعني مثلا الجو اللي في المحلات...شوية الهواء اللي بتشمهم و انت بتأكل...مجرد فكرة انك لابس و نازل دي لوحدها تفتح نفسك اصل بالعقل كدة نفسك مش هتتفتح و انت بتأكل علي ورقة جرايد صفحة الوفيات و لو انتوا عائلة غنية بقي هيبقي علي مفرش اكبر منك ب 5 سنين مثلا ...هو كدة...الرزق كدة....ربك ممكن يحلل رزق ناس عشان يديهم مع ان هتلاقي كتير غيرهم بيعملوا نفس الحاجة بس هم عندهم حتة زيادة اسمها رزق القبول

-و عشان الفن و التمثيل نسخة مصغرة من حياتنا فبرضه في رزق القبول في التمثيل و دة مش هتلاقيه في ناس كتير لانه بيعتمد علي رزقه...يعني ممكن تلاقي في وقت ظهوره في ممثلين بيقدمه نفس اللي بيعمله بس هو ربنا رزقه بقبول انك كل ما تفتكره تضحك او حتي علي الأقل تبتسم...رزق القبول دة عند خيرية احمد

-خيرية احمد دايما هتلاقي عندها الرزق دة بالرغم انها مخدتش الشهرة و النجاح الجامدين قوي بس خدت اللي احسن من الاتنين...خدت موهبة فطرية تدل قلب معظم الناس اللي بيشوفوها او بيضحكوا علي جملة قالتها زمان...كوميديا خيرية احمد هي كوميديا "اكل الشارع" ...الكوميديا اللي تشم فيهم هواء الضحك النضيف و الخفيف...هي هي نفس الكوميديا يمكن في ناس تانية بس سبحان الله هي عندها الرزق انك تقبلها منها...الرزق في موهبة خيرية احمد انك تحس انها من منطقتك او خلينا نقول تحس انه المحل اللي بتأكل منه و مكمل معاك عمرك لحد ما تكبر و تفضل فاكر كل تفاصبله و المكان اللي بتقعد فيه...و تفضل فاكر يافطته كانت مكتوبة ازاي و كل ما تعدي عليه تضحك و تدور فيلم سينما في دماغك

****يلا البسوا بقي عشان هنخرج في شوارع و مطاعم خيرية احمد...هم مش كتير صحيح بس محفوظين

-نبدأ بفيلم عريس مراتي و تخيل معايا كدة محلات اكل كبيرة و مشهورة جدا في شارع واحد و يجي محل صغير لسه فاتح و بيعمل حاجات بسيطة يأكل منهم الجو...حاضر هاوضح اكتر من غير زعيق

يعني انت متخيل فيلم فيه إسماعيل ياسين و النابلسي و زينات صدقي "اللي بدأنا بيها الموسم الخامس" و معاها مين كمان أستاذ الكوميديا علي مر العصور فؤاد المهندس و من الحاجات اللي متقدرش تنساها في الفيلم دة هي كلمات خيرية احمد...و هو دة بقي رزق القبول يعني مين فينا ينسي محموووووووووووووووووووووود يا حبيبي و تعالي نفتكرهم واحد واحد كدة و ادينا ماشيين في الشارع ...لما قالت للمهندس "محمود انت نايم يا حبيبي؟ حوداااااااا"

و لما قالتله " انام من غير ما اتعشي يا حبيبي" و طبعا فؤاد المهندس مش هيسكت و هيقولها "يا ستي روحي اتعشي براحتك" تقوله بمنتهي البلاهة الكوميدية جدا و اللي جواه ذكاء كوميدي و فطرة مش طبيعية "نفسي في علبة تونا يا حودا " و لما قالها بكرة اجيبلك بكرة" تقوله "يعني بلاش اتعشي الليلة يا محمود"

او المشهد القاتل لما قالتله "محموووووووووود انت بتعملي مرجيحة يا حبيبي" و لما قالتله " انت نسيت تربط دة في الحبل التاني يا حبيبي"...و لما المهندس جاب الفيشة و يقولها صوباعك يا حبيبتي تقوله بنبرة صوت بتدي لاي كلام طعم كوميدي من الدرجة الاولي و تقوله "عينيا يا حودة" و في عز ما هي بتتكهرب تقوله " متبقاش تقولي بنسحب كهرباء كتير يا محمود"

-و يستمر استغلال صوت و طريقة خيرية احمد في محموووووووود لدرجة ان بقالها فقرة كاملة في السلسلة الرائعة ساعة لقلبك و بالرغم من  قوة ساعة لقلبك ساعتها الا ان مصدر قوة كوميديا خيرية احمد اللي خلي الناس تستني حلقتها مع المهندس عشان يسمعوا مراته هتقول ايه او بمعني اصح خيرية احمد هتقول ايه؟

عارف يعني ايه تجتمع انت و المهندس في عمل واحد و الناس تبقي مستنية اللي انت هتقوله و انك تمهد افيهات لعملاق كوميديا زي عمنا المهندس...دي حاجة لازم تيجي من موهبة ربنا مديها القبول ان كلامها يفضل عايش حتي لو بالصوت بس...لدرجة ان الدور اتسمي خيرية لانك مش هتقدر تفرق ما بين كوميديا الواقع و التمثيل

-دور علي حاجة اسمها "الزوجة الصاروخية " و شوف المهندس و هو بيقدم دخول لافيه خيرية مراته لما بيقول و قاعد و لا بيا و لا عليا اسمع صوت و كأنه بيفتح الستارة عشان خيرية تدخل بأشهر كلماتها "محموووووووووووووود" و اسمعها و هي بتقوله مش محتاجين في المصيف غير المايوهات يا حبيبي" فيقولها و هنغير فين فترد عليه كالعادة بمنتهي البساطة القاتلة و تقوله " نبقي نروح مصر نغير و نرجع يا حبيبي"  و دور بقي مثلا علي محمود و خيرية في السينما او لازم تسمع في الملاهي عشان تشوف رزق الكوميديا بتاع خيرية احمد اللي بتاخد تصقيف ساعات اعلي من المهندس " و الله بدون مبالغة" لما بتقوله عايزة اروح الملاهي يا محمود فيقولها ليه يا شيخة عايزة تروحي فترد خيرية " اهو نتلهي شوية يا محمود"

-او لما عملت غرام في الطريق الزراعي

-و مش سهل ابدا انك لما بتختفي فترة انك مش هتتنسي و دة اللي حصل معاه بالظبط ان من علامات الرزق للست دي انها برغم اختفاءها الا ان كوميديتها فضلت تتكلم عنها و تفكر الناس بيها حتي لو في وسط الاختفاء دة في كام حاجة بيعدوا بسرعة بس الأساس موجود

-و زي ما قولنا فوق كدة انك مش سهل تبقي في مبارزة كوميدية مع عمالقة كوميدية برضه هيبقي صعب ان أي ست تتحط في دور مقابل لدور سناء جميل زي ما اتحطوا سواء ركنين مسلسل ساكن قصادي اللي اتربي عليه أجيال و أجيال و مين فينا ينسي ضحكة خيرية احمد في المسلسل دة اللي ممكن تحفظها اكتر من تتر المسلسل نفسه...في المسلسل دة خيرية احمد عملت حاجتين انها قدرت تعمل كوميديا عائلية خفيفة علي معدة أي واحد مكشر مع المعلم محمد رضا و في نفس الوقت كانت مراية او "مرأة" لكوميديا سناء الجميل الارستقراطية و تستبدلها بالكوميديا البلدي و دي حاجة كمان مش سهلة لان في الكوميديا صعب انك تقلب الافيه في وقت كانت الدراما واخدة خط الدراما الإنسانية

-و زي أي محل لما بيكبر بيبقي الأداء بيكبر و ينضج عملت خيرية احمد بحكم السن انها تعمل دور الام في مسلسلات كتير زي مسلسل العميل 1001 و هتشوفها و هي بتعمل دور الام المصرية اللي عدي عليها كل الوجع و كل الافراح...و ازاي قادرة تربي أنواع مختلفة من الأبناء و شوف وجعها لما عرفت ان ابنها استشهد هتلاقيها عملته برضه لا من غير افورة و لا مزايدة...عملته صادق ...زي مشاهد لما بتواسي جوزها اللي شاف ذل النكسة في الحرب و تحس بجدعنتها في التمثيل

-و زي ما قدمت الام العاقلة...مش هتهدي غير لما عملت الام الكوميدية في فيلم ظاظا و الكوميديا اللي قدمتها في الفيلم ساعة لما قامت و جريت و تحس ان في طاقة كوميديا ملحقتش تطلع

***في ناس اشتهرت من افيه واحد و لما حاولو يكرروه قابلوا فشل زريع بس الرزق انك تشتهر بشخصية او طريقة أداء و تعملها كل مرة بشكل مختلف و دة رزق خيرية احمد ...خير الكوميديا ضحكته و خير خيرية احمد في كلامها اللي لسه بيضحكنا لحد دلوقتي...الله يرحمك

#خيرية_احمد

#رزق_القبول

#التتر

#كريم_مجدي