كل واحد له طريقته في الرد علي السؤال علي اي طريق في مصر
1-يعني لو واقف عند كشك و سألته لازم يخرجلك من الكشك
عشان يشرحلك عملي حتي لو قالك نظري جوة الكشك بس العملي احسن طبعا و يشرحلك الحاجة
و ساعتها بيجي في خيالك انور السادات و هو بيشرح للقادة خطة حرب اكتوبر
و لازم تسمع اهم
جملة(هو قالك فين)
طيب ما انا لسه قايلك ايه لازمته جو اكتب الواجب دة 10
مرات يعني و بعدين لو هروحله قالي فين بالظبط هاخبي عليك ليه هو انا طارق علام و
جاي اكسبك جنيهات دهب
2-النوع الثاني و دة اسمه الكائن الويندوز
و دة لما تسأله يقعد 10 دقائق كدة يحمل و في الاخر برضه
يسألك هو قالك فين اومال انت ليه
restart كنت
بتعمل
3-النوع الثالث و دة اسمه (الكائن المحبط)
اللي اول ما يسمع العنوان يقولك ياااااا دة زحمة قوي مش
هتلحق و هتتبهدل و هتقابل نيازك و حمم بركانية و احتمال تلاق سلاحف النينجا هناك و
مش هتعرف توصل...طيب يا عم قولي و انا كبرت و هاعرف احدد مصيري
4-النوع الرابع و دة الكائن المباحث
اللي لما تيجي تسأله يقولك ليه يا عم رايح هناك او ايه
اللي هيخليك تروح او عايز مين هناك و دة غالبا هتلاقيه واقف علي ماكينة تصوير عشان
ياخد صورة من البطاقة...دة في الاخر لازم توضحله انك شاب طايش و تحاول تقنعه انه
يسيبك تجرب
5-الكائن التشويقي
و الكائن دة دايما مكانه العربية و معندوش اي احساس
باحداثيات الطريق لو كان علي الصحراوي و بعد سؤالك هيبتدي يديك اول الوصف و بعدين
يسكت و يقولك تعالي ورايا و تعالي ورايا دي تعتمد علي سرعته و دماغه يعني المطلوب
منك تتخيل انك مخبر و هو حرامي يعني لو هيمشي علي 20 انت لازم تمشي زيه حتي لو متأخر
و بعدين ما تقولي يا معلم انت عاملي مفاجأة و لا حاجة و
لا هتوديني مكان احلي مثلا
6-الكائن الغامض
اللي لما تسأله يسكت و يقولك اول الطريق و يسكت و كأنه
بيلوم نفسه انه قالك معلومة و يوصفلك حاجة في نص السكة و يقولك اسأل هناك و ساعتها
بيجي في دماغك عبده الكرف مع الفنان محمود عبد العزيز في الكيف
و دة غالبا بيكبر فيك اعتمادك علي نفسك
7-الكائن البرنس او بديل ال جي بي اس
دة بقي لازم تاخد منه سوفت كوبي علي الموبايل دة ممكن
يشرحلك العنوان و يديك علامات توصل بيها كمان...دة ممكن يقولك عند السوبر ماركت
اللي هناك و هتلاقيه لابس قميص ازر... لا استني النهاردة الاحد؟؟
هتلاقيه لابس اصفر
8-في بقي النسخة التريال منه اللي هو عايز تروح شبرا
يوديك دار السلام...اي حتة هيوديك دار السلام
9-الكائن ال جوجل
اللي هو مفيش حتة في مصر ميعرفهاش و دة هتعرفه بسرعة
عشان ممكن يطلعك كوبري يوديك 6 اكتوبر او الشروق من نفس الطلعة
و ممكن يعدل عليك كمان و يديك اسامي قديمة للعنوان و
يقولك هو بقي اسمه كدة من امتي محدش قالي؟؟
دة بقي استمتع معاه و لو نازل بدري شوية و عارف العنوان
خليك و خد منه تفاصيل اكتر
10-الكائن القدوة
و دول غالبا انقرضوا و دة اللي لو معرفش بيقول
معرفش...دة ممكن تعتبر نفسك طالعله من الفانوس...يعني اعزمه علي الغدا او وصله اي
حتة...اديله مرتب شهري عشان دة خلص خلاص و لازم نحافظ علي السلالة دي
ليست هناك تعليقات:
إرسال تعليق