-عادل امام مش مجرد ممثل كبير او واحد عنده تاريخ كبير من الافلام..دة بقي ايقونة نجاح ناس كتير تتمني توصل لمستوي نجاحه..عادل إمام الوحيد اللي في وسط جيله قدر يحافظ علي نجاحه طول السنين دي كلها...موضوع إنك تفضل رقم واحد في الفن دة مش صدفة او حظ..دة مجهود و ذكاء من انسان عايز ينجح..ناس كتير موهبتهم في التمثيل و الكوميديا اكبر منه بكتير بس "ذكاء" عادل إمام اعلي منهم بكتير
------------------------------------
ذكاء عادل امام هتلاقيه في اختياراته للافلام و الاهم اختياره للمؤلف و المخرج...عادل إمام عنده حاجة اسمها قوة الرفض يعني عنده القوة انه يقول لا علي عمل فني مهما كان محتاج فلوس او شهرة و دة يديك اكبر مثل برضه ان النجاح جي جي بس انت اجتهد شوية
---------/---------------------------
هو بدأ بجملة"بلد بتاعت شهادات صحيح" بس الجملة دي لسه عايشة يمكن اكتر من إفيهات كتير اتقالت في المسرحية دي..في فيلم نص ساعة جواز طلع كومبارس بيتضرب بس الضحك اللي طلع منه كان اكبر من الدور نفسه...ربنا عايزه ينجح
😃------------------------------------
ذكاء عادل امام خلاه يكتشف مخرجين عباقرة زي شريف عرفة و اشتغل مع ناس يعرفوا يطلعوا البطل متلمع زي محمد عبد العزيز و نادر جلال و غيرهم..و بدأ يكتشف مؤلفين زي يوسف معاطي اللي بقي شرط نجاح مع عادل امام لحد ما وصل لمرحلة انه بياخد اكتر ناس ناجحة في مصر عشان يشتغلوا معاه و محدش بيرفض يشتغل معاه عشان عارف انه مجرد ذكر اسمه علي تتر عادل امام هو اكبر شهادة نجاح
------------------------------------
عادل امام عبقري في اختيار افلامه...فيها طبعاً التجاري و دة علي حسب الفترة و فيها العميق اللي فيها فلسفة غريبة
------------------------------------
*فيلم الهلفوت قدم فيه قانون الغابة في فيلم يمكن ناس كتير شايفاه كوميدي بس ازاي وصلك ان شخص زي الشيال يبقي بالقوة دي و هو مش عارف"انا اشهر من مأمور المركز بس هو الباشا و انا الهلفوت"
الجملة دي توريك ان الشارع المصري يهمه اسم المنصب اكتر من الانسان نفسه و ازاي الهلفوت قدر يكسر خوفه لما جاع و بقي مش لاقي لقمة العيش..شوف بقي فينا كام هلفوت
------------------------//-----------
*الإرهابي عمله في وقت كان الإرهاب موجود في مصر و عمل الشخصية المتطرفة اللي متساقة من ناس تانية...المكبوت جنسياً اللي فجأة حياته اتحولت و عرف ان في دنيا تانية و ناس من ديانات تانية كويسين جداً برضه ممكن يتعامل معاهم بعد ما كان شايف ان هو و اللي زيه هم اللي لازم يبقوا موجودين و الباقي لا و دة في اللي وسطنا كتير
---------------------------------------
*الإرهاب و الكباب عمله في عز ما كانت حكومة عاطف صدقي خاربة البلد تصريحات كدابة و كام واحد فينا ماشي جنب الحيط و فجأة لقي نفسه شايل مصيبة...ذكاء الفيلم دة مش في عادل إمام بس دة كمان في اختيار الشخصيات...العسكري اللي رئيسه مشغله في كل حاجة لحد ما انفجر و دة موجود حوالينا...الموظف اللي طول الوقت بيصلي عشان محدش يقدر يعترض...لحد الجملة العبقرية للراحل احمد راتب"المحاكم ايديها تقيلة قوي علي الغلبان"
يفضل اهم مشهدين من وجهة نظري في الفيلم دة
-المشهد الاول بتاع الاوتوبيس لما الرجل الكبير قالك انا باقرأ جرايد من ٢٠٠ سنة و بيقرأ نفس الكلام و كان الموضوع برضه عن ارتفاع الاسعار و الفيلم انتاج ١٩٩٢ و من ساعتها الاسعار بتعلي و الانسان بيرخص
-المشهد التاني ان المصري بقي كل همه يشتغل زي الثور في الساقية و كل اللي يشغله يوم الخميس و يمشي جوة الحيط و دة حالنا دلوقتي
------------------------------------------
الحريف و منتهي المعاني الانسانية مع العبقري خان
----------/----------------------------------
تعالي بقي لاهم فيلم في اخر ٣٠ سنة "طيور الظلام"
رائعة وحيد حامد و شريف عرفة و ازاي جمع تيارات مصر كلها في ٣٣ اصحاب...ازاي قدر يناقش ان لكل قاضي المحامي بتاعه اللي يقتنع به ...انه ازاي اتحول من محامي ارياف لاقوي رجل مسيطر علي اقوي رجل في الدولة و ازاي فهمنا انا السلطة و المال لازم يتجوزوا عشان تقدر تبقي مسنود...ازاي مشهد و بيدعي علي الجماعة و هم برضه بيقوله امي من غير ما يسمعوا...ازاي وزير مش عارف يقول كلمتين يتحول لاقوي رجل في الدولة...ازاي البرلمان يبقي سلاح دفاع عن الوزراء بدل ما يبقوا سلاح دفاع عن الشعب
----------------------------------
افيهات عادل امام بقت تراث شعبي زي الامثال الشعبية
ستظل الزعيم
ليست هناك تعليقات:
إرسال تعليق