ahmed zaki part 2

 

خير الكلام ما قل و دل و عشان تعرف قيمة المقولة دي لازم تذاكر احمد زكي ...اكبر و اوضح و احلي حاجة في موهبة احمد زكي انه معملش اعمال عددها كبير بس عمل افلام تأثيرها كبير و التأثير هنا له ناحيتين (و عايزك تركز جدا في الناحيتين دول) ...اعمال احمد زكي بتوصل للمشاهد انه عمل افلام كتــــــــــــــــــــــــــــير جدا و دة نتيجة ان في مشاهد في افلام بتبقي اقوي من الفيلم نفسه كفكرة او قصة ...و التأثير التاني انه مسبش فرصه لاي واحد بيذاكره انه يلاقي دور ناقص او مشهد مش حلو ...ما تيجي اثبتلك شوية الكلام اللي فوق دول ...يلا بيننا

 

-بدأ احمد زكي في مرحلة حفر اسم البطل الاول او بمعني ادق طريق الوصول لمرحلة البطل الاول ...دور عليه في دور فارس في فيلم طائر علي الطريق و اداء زكي في الفيلم دة هيوريك قد ايه لو كنت بتتفرج عليه في زمانه كنت هتشاور علي اللي عمل دور فارس دة و تقول الواد دة هيبقي في حتة تانية

 

-و عايزك تركز في مرحلة احمد زكي في تفاصيله الانسانية و اللي هيبدأ يعملها في الاعمال اللي جاية ...اه صحيح نسيت اقولك ان اهتمام احمد زكي بتفاصيل الشخصيات كانت بتحول احساسك من غير ما تعرف انك تشوف قدامك تفاصيل جواك انت شخصيا و انت مش واخد بالك ...احمد زكي بيحول و يستغل كل حتة في روحه انها تعمل الشخصية معاه ...شوفه لما عمل خالد في فيلم المدمن و قد ايه عرف يوصلك تفاصيل وجع الزوج اللي حاسس بالذنب و بقي مدمن ...روحه كانت موجوعة ...عينه فيها زجع تأنيب الضمير (و عايزك تركز مع عيون احمد زكي عشان فيها كتير) ...فيلم فيه تفاصيل روحية و انسانية بيعملها بمنتهي السلاسة

 

-ركز معاه بقي في عبد العزيز في درب الهوي و هتلاقي تفاصيل تانية خالص عرف يوصلها كأنه متربي و عاش في الزمن دة و موهبة احمد زكي بتخلي موهبته مطاطة تستحمل انك تشد فيها عشان تجيب كل اطراف الموضوع بكل ظروف الزمان و المكان المتاحين

 

-يعني مثلا صعب انك تلاقي حد يوصلك تفاصيل الطبال الطموح اللي واثق من نفسه بزيادة زي ما عمل في دور عبده الطبال ...تحسه مدير عام ماسك طبلة و بينقلك تفاصيل انسانية كتير و مختلفة ما بين غروره و انكساره لما بيتغدر به و ان اللي عمل الاتنين بنفس الصدق و الجودة هو شخص واحد...تقدر تقول ان احمد زكي هو ناقل الحياة الانسانية الي الفن المصري

 

-و عشان تعرف قد ايه الرجل دة مش طبيعي ...عايز اراهنك رهان كدة و انا متأكد اني هاكسب ...ادخل دور علي محمد حسن (شخصية النمر الاسود الحقيقي) هتلاقي عقلك و قلبك رافضين انهم يصدقوا ان دة مش احمد زكي ...احمد زكي في الفيلم دة زي اللي عمل عملية نقل ملامح و جسم و روح لشخصية عظيمة قدرت تحفر في الصخر و كل تفصيلة في التجربة الانسانية دي بينقلها احمد زكي بمنتهي الاحساس...هتشوف روح بتمثل...بتمثل القهر و الظلم و الحب و الاعتزاز بالنفس...تفاصيل سهل انها تتكتب علي ورق و صعب جدا تتعمل لحم و دم و الاصعب انها تتصدق

 

-و يرجع تاني في دويتو عظمة مع السندريلا مع الملحمة الدرامية حكايات هو و هي و مسلسل انساني كوميدي كدة حلو من اول التتر اللي كلنا عارفينه و حافظينه لحد لعبة احمد زكي المفضلة انه يعمل شخصيات مختلفة و ملهاش علاقة ببعض ..و قدر احمد زكي انه يكسر قاعدة ان لازم واد شكله حلو يقف قدام السندريلا...ملامح روح احمد زكي بتقدر تلون ملامح وشه بمليون لون و لون

 

-و يعمل سعد اليتيم و يبدأ احمد زكي مرحلة عنتر شايل سيفه و شايل موهبته و بيشيل اي عمل و يبدع فيه و عايز اقولك ان من بعد سعد اليتيم بيقرر احمد زكي قرار عجيب جدا...هتموت و تعرف القرار انا عارف ...احمد زكي قدر بموهبته انه يحول شخصيات مكتوبة لانه يقدر يقنعك ان اي شخصية بيقدمها هي شخصية موجودة فعلا مش شبيهة ليها يعني مثلا ممكن لما يعمل فاسد هتقول في فاسدين كتير...لا الموضوع مع احمد زكي مختلف ...احمد زكي بيخليك تقتنع ان الشخصية دي فعلا موجودة ...يعني اعتبر نفسك قدام ممثل وثائقي

 

-بيعمل علي عبد الستار في الحب فوق هضبة الهرم و بيخليك تقتنع ان علي دة شخص موجود فعلا بكل غلطاته و مشاعره و تصرفاته ...زي ما هيقنعك ان في معلم اسمه احمد ابو كامل في سوق السمك بتفاصيل الشكل و الاداء و الطبع الغدار اللي مليان حاجات مستخبية كدة صعب انها تتحط جنب بعض و تبقي مترتبة ترتيب مفهوم

 

****ممكن نركز مع بعض شوية عشان في شوية كلام حلوين جايين

 

-في مرحلة كدة في حياة احمد زكي تقدر تحسها لما تاخد قرار صح في حياتك و حاجات كتير تحصل حلوة بعد كدة مترتبة علي القرار بتاعك دة ...مرحلة احمد زكي عمل افلام قفل الباب علي كل اللي جاي بعده...قرار انه يعمل الشخصيات دي قرار مرعب لاي حد جاي من بعده انه يقرب من تفاصيل منها

 

-هو احمد سبع الليل (و الله اقشعرت) و من اول لحظة في فيلم البرئ هتعرف انك قدام فيلم وثائقي بيحكي عن الانسان اللي علي فطرته و قد ايه في تفاصيل توجع ممكن محدش فينا يقدر يوصفها او حتي يعرفها...من اول ما طلع من الترعة و الخوف من شيخ الغفر ...حتي لما اتضرب بالقفا و انه بيملك القوة للرد بالضرب و بيملك اكتر القلب الطيب و الفطرة انه ميعرفش يرد يقول ايه...تشوفه بيحترم المتعلم ازاي ...احمد زكي عمل طريقة مشي لسبع الليل ...ازاي روحه و هو كل اللي همه يخلص من اعداء الوطن و يرجع يزرع ارضه...و هو بيترمي في حضن امه و بياخد منها الفأس ...و سيبك بقي من كل دة عايزك تركز في حاجتين او مشهدين

 

مشهد و هو بيعزف و فجأة يلاقي الصول بتاعه بيزعقله و يتحول عزف الاطفال و الحلم لارض واقع و فزع و بيرمي الناي علي الارض ...و مشهد انه بيكتشف ان استاذ حسين من اعداء الوطن و المشهد دة عبقري بمعني الكلمة ازاي عرف يعمل الصدمة بين اللي بيتقاله من القادة ان دول اعداء الوطن و بين اللي اتربي عليه ان حسين وهدان مش من اعداء الوطن...صدمة شخص الفطرة اساسه ...حمايته لحسين وهدان فيها تفاصيل جسمانية و روحية كفاية انها تخليك ضامن ان الواقع ميختلفش حاجة خالص عن اللي احمد زكي بيعمله

 

-و بينقل نفسه من مرحلة سبع الليل في البرئ لقمة الغطرسة و الافتراء و النرجسية في زوجة رجل مهم و الفيلم دة حقيقي تقدر تعتبره شرح تفصيلي لنوع من انواع المرض النفسي لو قعد حد يشرحه مش هتعرف تفهمه زي ما احمد زكي وصله في شخصية العقيد احمد ابو الوفا ...احمد زكي في الفيلم دة حرفيا بيمثل بضهره...وقفته في المترو و هو مستكبر يقول انه بيحب ....طريقة معاملته مع الفكهاني و جيرانه ...و شوف بقي العظمة في المشاهد اللي بعد ما قعد في البيت ...غطرسة فرعون و عمل شخصية فيها كل تفاصيل مرض نكران الواقع ...ركز معاه و الفكهاني بيتعامل معاه ...او لما راح يشتكي و بيقول ان العقيد هشام ابو الوفا و يبلع ريقه كدة كأنه اتكعبل في الواقع و يقول سابقا ...دة عقيد سابق مش ممكن يكون ممثل شاطر  و موهوب حتي في مشاهد القتل كان في تفاصيل انسانية مرعبة ...كمية غرور في ماسكة المسدس حتي ...احمد زكي قفل الباب في ادوار كتير قوي الحقيقة

 

-انا شبعت بصراحة ...اقعدوا بالعافية و استنوا الجزء الثالث عشان شكله مش هيبقي اخر جزء

 

#احمد_زكي

#الجزء_التاني

#التتر

#كريم_مجدي

ahmed zaki part 1

و زي ما دايما بنقول ان الجواب بيبان من عنوانه فموهبة احمد زكي مكنتش محتاجة غير فرصة صغيرة عشان تخترق اي مجال جوي او فني و تروح لاقرب مجرة ابداعية ...و عشان تشوف دة و تتاكد منه لازم تشوفه في دور راضي في مسرحية هاللو شلبي و يمكن اعلي مشهد هتشوفه هو تقليده لمحمود المليجي و هنا هتكتشف انك شايف حرفيا محمود المليجي مش الشاب الصغير اللي اسمه احمد زكي ...و مش مجرد تقليد او تقمص ...هتحس انك قدام دكتور نفسي لكل الشخصيات اللي بيعملها و هيعملها و عشان تبقي دكتور نفسي شاطر لازم تتعامل مع الشخصيات المختلفة باساليب مختلفة و انك نعرف ادق و اصعب تفاصيلها و اكثرها حساسية عشان تعرف تعالجها و علاج اي شخصية في تفاصيلها و مش هتلاقي تفاصيل زي اللي موجودة في موهبة احمد زكي

-و تيجي مسرحية مدرسة المشاغبين عشان تعلن عن جيل هيكتسح الساحة الفنية بس الحقيقة علي ارض الواقع مش المسرح ان اتنين بس هم اللي حققوا الوعد دة ...عادل امام (و في مقالات عنه في الصفحة ) و احمد زكي اللي عمل دور احمد الخط المختلف خالص عن بقية الشخصيات عشان هتلاقي في وسط مسرحية كوميدية بتقدم ضحك صارخ تلاقي واحد متسرسب بموهبته و تفاصيل الشاب الغلبان المغلوب علي امره و تلاقي قدامك في وسط افيهات مشهد هو و حسن مصطفي لما بيقوله (حضرتك نسيت المعونة اللي عملت فيها مجهود كبير جدا) و هنا حتي نبرة صوته يا اخي فيها قهر و ظلم ...عادة لما تبقي قعدة فيها ضحك اللي بيكشر فيها بيتقال عليه كئيب بس احمد زكي في وسط مدرسة المشاغبين مكنش مشاغب...كان موهوب

-بعدها يفضل احمد زكي يعافر في ادوار صغيرة يعني مثلا دور سعيد في فيلم بدور او قبلها دوره في فيلم شلة المشاغبين اللي تقدر تقول انه استثمار لنجاح ابطال مدرسة المشاغبين بس الحقيقة كانت كلها ادوار بمنطق خليك متشاف عشان متتنسيش ...و لحد ما عمل دور محمود في فيلم ابناء الصمت و هتلاقي غير ان الفيلم كان معمول كويس هتلاقي شخصية محمود محبوكة بتفاصيل عملها احمد زكي بشكل روح قبل ما تبقي جسد و دي كانت قوة احمد زكي تفاصيل الروح مش الاسم او الجسم

-و يرجع احمد زكي لمرحلة ما بعد مدرسة المشاغبين و يعافر في شوية ادوار كانت في افلام او مسلسلات تناسب المرحلة دي لحد ما يبقي متولي قدام السندريلا و تحس ان ربنا بيديله الفرصة دي عشان يكافئه علي موهبته و يديله علامة انه يكمل و في الفيلم دة هتشوف ان موهبة الرجل دة اكبر من سنه...و انه يقدر يطلع من التفاصيل مشاهد اكبر من توقعك انك هتقف قدام سعاد حسني في فيلم من السير الشعبية المشهورة شفيقة و متولي ...و يقدم مسلسل اسمه اللسان المر و كان مناسب برضه للفترة دي و ان جيت للحق يعني فموهبة احمد زكي مناسبة لاي مرحلة زمنية و اي مستوي انتاجي

-و عشان المشاغبين كانت نقطة انطلاق فكان لازم ان احمد زكي يثبت انه كمان كبر مع العيال اللي كبروا و قدم كمال ...الاخ العاقل الكبير بعقله مش بعمره ...و الحقيقة في المسرحية دي (اللي ليها مقال علي التتر برضه) يقدم فيها النوعين الدرامي و الكوميدي و دة يبان مثلا في الديالوج المشهور بينه و بين سعيد صالح (ابوك هيسيب البيت يا معلم سلطان...البيت دة هيطربق علي دماغ اهالينا) و انت بتقرأ الكلام دة هتفتكر حركة جسمه و حتي لبسه البني لدرجة ان سعيد صالح شخصيا يضحك عليه

**ركز معايا بقي الله يكرمك في اللي جاية دي...قوم اغسل وشك كدة

-و زي ما كان انيس عبيد هو رائد الترجمة اللغوية في عالم الفن..كان احمد زكي بياخد اول خطوة في مشواره انه يكون رائد الترجمة البشرية و الجسدية لما عمل الايام و دور طه حسين ...و هنا بقي احمد زكي هيعملك مشكلة...عشان لو شوفت مسلسل الايام و رجعت دورت علي لقاءات حقيقية لشخصية طه حسين حرفيا و بدوون مبالغة هتفتكر ان طه حسين الحقيقي هو اللي بيمثل الدور اللي عمله احمد زكي و ان احمد زكي هو الاصل ..احمد زكي كان بيمثل معاناة الرجل الكفيف بمنتهي الاحساس بكل التفاصيل الممكنة ..و صعوبة شخصية طه حسين هي قلة لقاءاته المصورة...بس الحقيقة لحظات الحزن و الفرح ...الانكسار و النصر كان ليهم نصيب الاسد...يا رجل دة كان بيقول الكلام علي صورته مبتتكلمش و كانوا الاتنين بيتنافسوا مين الاحلي...تسمع كلام طه حسين اللي بيدور في دماغه دة دور لوحده و ملامح وشه و روحه دة دور تاني ...عبقرية المسلسل دة اتقان اللغة العربية بشكل مذهل و الكثر عبقرية ان حول شخصية طه حسين عشان تبقي لغم مش اي حد هيقدر يقدم فيها اي تفاصيل جديدة عشان اتقفلت كل جوانبها خلاص ...احمد زكي كان ممثل علي الموسيقي بدرجة راقص باليه

-و عشان موهبته مناسبة لاي حاجة هتلاقيه بيتحول من بطل درامي لدور ثانوي في فيلم الباطنية لما عمل سفروت اللي بيتحول من غلبان مش عارف يتكلم لدور ظابط و هتلاقي ادائه في الفيلم دة يمكن اعلي من الفيلم نفسه ...و يكمل خطواته اللي كانت دايما تقول ان في ممثل مرعب جاي يعمل كل حاجة ...و هنا يعمل شكري في الفيلم الكلاسيكي موعد علي العشاء و اداء تقيل بقي فيه بدايات نضج و تقل تقدر تعتمد عليهم في اي دور بقلب جامد كدة تقول انا عايز احمد زكي

-و تيجي تجربة دور اسماعيل في فيلم عيون لا تنام عشان يعمل تجربة درامية فيها مشاعر كره و في نفس الوقت حب و تيجي تجربة ممتعة الحقيقة في التمثيل و هي فيلم (لا اكذب و لكني اتجمل) و قدر في الفيلم دة انه يحول مشكلة حياتية كبيرة موجودة و ظاهرة و هي مشكلة محاولة ان الواحد يخاف انه يقول مستواه الحقيقي مع انه كمستوي دراسي مجتهد و هو من وجهة نظره ان اللي بيعمله ما هو الا رد فعل لنظرة المجتمع له ...شوفت بقي التفاصيل دي كلها بتتحول انفعالاتها و احاسيسها لشخصية بتتحرك قدامك بيعملها بمنتهي السهولة احمد زكي...و الحقيقة العبقرية انك متعرفش تتعاطف معاه و لا تنتقد تصرفه و يبان عبقرية شخصية ابراهيم و هو بيدافع عن نفسه لما تتعرف حقيقته ..انت هتتخيل انك علي مسرح ادائه احاسيس و مشاعر و تصويره كاميرا سينما

-و عشان تفاصيل موهبته لسه عليها كتير ...خصلنا اول جزء ...اقعدوا بالعافية

#احمد_زكي

#الجزء_الاول

#التتر

#كريم_مجدي

احمد زكي (الموهبة و جنالها)

في حياتنا ظواهر طبيعية بنشوفها كل يوم و سواء اهتمينا بيها او لا فهتفضل حقيقة واضحة ...حقيقة مينفعش التعديل فيها او التشكيك...و علي مر العصور و الاجيال بتفضل الظواهر دي بنفس التعبير باختلاف التأثير...يعني هتلاقي ناس بتحب الشمس و النهار و ناس بتحب الليل و القمر ...بس الاتنين شايفين الشمس و القمر واضحين...بتحب المطر او لا فدة مش معناه ان مفيش مطر ..خليك معايا متسرحش دي مش مراجعة ثانوية عامة

-و لما تيجي تراجع اللي اتقالنا في حياتنا زمان ممكن تلاقي كلام حلو يتسمع بس الاكيد هتلاقي له استثناء علي ارض الواقع يعني لما حد يقولك ايد لوحدها متسقفش اوعي تصدقه (متحاولش تسقف دلوقتي بقي بايد واحدة عشان مش هتعرف ) ..و عشان كدة صدق ان مش كل اللي ركب الفرس خيال و اقتنع ان مش كل من مسك صنارة صياد...بس اوعي تقتنع لما اقولك ان اي موهوب يبقي احمد زكي

***و الله شايفك دلوقتي و انت بتقول هوبااااااا دة تقيل قوي يا عم كريم ...هتكتب فيه ايه دة؟؟؟ بلاش احباط بقي يا اخي سيبني براحتي

-ظاهرة احمد زكي الحقيقة فيها عوامل كتير و من اهمها اثبات نظرية ان الموهبة لوحدها تكفي انها تطلع منتج له تاريخ تجديد و مالوش تاريخ صلاحية...منتج عمره ما يبوظ...كل ما يقدم تعرف قيمته...احمد زكي حرفيا معجون بمياة الموهبة ...ملبوس بجن بيحب الفن...احمد زكي لو اتفرجت عليه هتكتشف انك قدام موهبة مهما كانت الفكرة اللي هتتكتب فهتلاقي الاداء هو اللي مديها القيمة و الجودة..لو دخلت مكتبة كبيرة في اي دولة من دول العالم هتلاقي اهتمامك و الحاجة اللي انت عايز تقرأ عنها موجودة من غير شك قد سن الابرة...اهي دي بقي كلمة السر في موهبة احمد زكي...هو مكتبة فيها كل تفاصيل البشر بمختلف المهن و المشاعر ...تفاصيل العين متشوفهاش قبل القلب ...ممكن تلاقيله افلام حلاوتها بس من تمثيله...تفوق احمد زكي في تفوق تفاصيل موهبته...حركة جسمه...تنظيم نفسه (بفتح النون) ...يا رجل دة بيمثل بضهره (هتعرف ازاي غالبا في الجزء التاني )

-المرعب في موهبة احمد زكي انه زي الشمس اللي بتلف حواليها المجموعة الشمسية بمعني انك تجرب تتفرج علي فيلمين عكس بعض تماما في الشخصيات و عشان اسهلها عليك (عشان تعرف انك غالي عندي) شغل فيلم ناصر و السادات ورا بعض هتلاقي مشاعرك راحت لناصر حتي لو انت مش بتحبه و مشاعرك راحت للسادات ...هتلاقي نفسك متقبل فكرة الاختلاف في الشخصيات عشان الاتفاق علي الموهبة...مصدر الموهبة واحد...بالبلدي كدة مش هتستغرب ان اللي عمل دة هيعمل دة غير لما تخلص الفيلمين و تقفلهم...احمد زكي النداهة اللي بيندهك تمشي معاه في العالم بتاعه اللي هو راسمه لشخصية تانية

-من الحاجات الغريبة في احمد زكي ...ارتباط الشخصية به ...و قمة العبقرية هنا ان حتي لو الشخصية مش مشهورة او في منها كتير في البلد فاول حاجة تيجي في دماغك ساعتها احمد زكي ...يعني اقولك البواب نط في دماغك البيه البواب...الظابط الظالم دماغك هتروح في زوجة رجل مهم...طيب العسكري الجاهل هتلاقي البرئ...طيب الرجل المظلوم هوب هتلاقي الهروب ...تقدر تقول ان احمد زكي هو الاجابة النموذجية لاي شخصية ممكن تيجي في دماغك يكون هو عملها

**اوعي تكون زهقت ....اوعي

-لما تيجي تتفرج علي اي شخصية عملها احمد زكي ...هتلاقي بعد ما بيخلصها الشخصية بتعلن افلاسها فنيا ...دة حقيقي و الله ...تفاصيل اي شخصية بتطلع من تحت ايده مرهقة...و دة لانه بيجيب اعمق درجات تفاصيل الشخصية...روح الشخصية نفسها...بتتوجع ازاي و بتفرح ازاي ...لدرجة انك ممكن تبني فيلم كامل علي موهبة احمد زكي بس ...تحكم غريب في مشاعر و انفعالات بشرية بالصدق دة و هتلاقي نفسك شوفت الشخصية دي قبل كدة و انت معدي في اي شارع و حتي لو مشوفتهاش فانت 
المرجع بتاعك ان احمد زكي قدمها

موهبة الرجل دة بتخليك تحس انه عمل اعمال كتير قوي بالعدد بس الحقيقة انه عمل حاجات كتير قوي بالتأثير..ادواره بتحاوط علي اجيال وراها اجيال ...بتخليهم يحسوا انهم مش حتاجين بتفرجوا علي اداء تاني

عايز ندخل علي الجزء العملي و الاعمال ؟

مش دلوقتي ...اصل الموهبة كانت اساس الكلم
اقعدوا بالعافية 
سلامات

#احمد_زكي

#الموهبة_و_جمالها

#لسه_فيها_كلام

#التتر

#كريم_مجدي

adel emam part 3

زمان كانوا بيقولوا ان العقل السليم في الجسم السليم بس الحقيقة كان لعادل امام رأي اخر ...ان العقل السليم في (الاختيار السليم) و زي ما كان عنده قوة  و ذكاء الرفض في بدايته تيجي قوة و ذكاء اختيار ادواره في المرحلة اللي تقدر تعتبرها اهم حدوتة في مسيرة عادل امام و عايزك تلاحظ انه حط نهاية لافلام المقاولات بنفسه و قرر انه يعمل لنفسه طريق من الاختيارات بيحكمه ذكاء عادل امام

-هتلاقيه رمضان المرتشي في رمضان فوق البركان و جرعة كوميدية حلوة حتي مع مشاهده مع نعيمة الصغير كانت ليها طعم تاني ...و لازم تشوفه في خلي بالك من عقلك و تجربة انسانية رومانسية مع الجميلة شريهان في تجربة من اولها لاخرها تمس قلبك قبل عينك و عقلك ...و هو هو اللي هتلاقيه عامل زوج تحت الطلب مع المهندس و تجرية كوميدية خفيفة مع الاستاذ

**اتقل بقي كدة عشان اللي جاي حلو

-مين ينسي سيد الشغال و خشبة المسرح اللي تشهد بكل افيه بيتقال من عادل امام اللي بيثبت فيها ان في مسرح ممكن يقعد بالسنين...بيديك ضمان بختم النسر ضحك ممكن يتسمع و ميتشافش...ضحك كلامه بيتحفظ زي اسمنا و عنواننا عشان لو توهنا نقولهم...و عشان لما نتضايق شوية اول ما تشوف الطقم الجينز تحتة الفانلة الحمراء تضحك علي طول (شوفت ضحكت ازاي) و الحقيقة في المسرحية دي هتلاقي نقطة قوة في عادل امام ان مهما كان اللي واقف قدامه هو هيضحكك يعني هيضحكك...بيستغل اي شخصية او تفصيلة بتحصل و يبني عليها خروج عن النص اللي معاه في المسرح بيضحك قبل اللي بيشوف في البيوت و لينا في مصطفي متولي و عمر الحريري خير دليل

-و من ساعة ما بقي بيلعب مع الخسران و قرر ان اي كسبان لازم يلعب معاه و تبدأ مرحلة تكوين شخصية عادل امام ...مرحلة افلام البطل الجدع اللي اي شاب يشوفه عايز يعمل زيه ...البطل العادي مش الخارق ...ابن البلد اللي دمه خفيف ...واحد من المجتمع المصري اللي ممكن تشوفه في جيرانك ...يعني مين ينسي لما شرب حشيش و قال (انا شربت حشيش يا سعاد) في فيلم كراكون في الشارع و بركة الحاج نادي ...و تتمني انك تلاقي صاحب زي مرزوق في سلام يا صاحبي و يجدد الشراكة الحلوة مع عم سعيد صالح و اللي بيثبتوا بيها ان اللي راهن عليهم في الكوميديا كسب الرهان ...و محدش هينسي (عايز ابطل يا طلبة ) في النمر و الانثي

-و الحقيقة في الرحلة دي هتشوف انجح اختيارات لعادل امام و اللي متقدرش تقول علي فيلم انه جه بالصدفة و تعالي نشوفهم سوا كدة ....لما اختار حدوتة المولد مع سمير سيف و محمد جلال عبد القوي كان رهان جديد انه يقدر يقدم فيلم درامي بعيد شوية عن الكوميديا و فعلا نجح في دة لما عمل فيلم في مشاهر كتير جدا من فقر لانتقام لحب ...و دايما تفتكره في حنفي الابهة لما دخل الاستاد و بيقول للامن (محمود الخطيب) ...و يستمر عادل امام في قوة اختياراته و يعمل البطل الشقي في جزيرة الشيطان و شوية كوميديا مع مشاعر و خصوصا مع (صرصور البحر اليتيم) و الاستاذ شنواني ...و تلاقيه في شمس الزناتي و الافيه المشهور (بتعرف تعد لحد كام) و الفيلم دة تحديدا تقدر تقول انه نور لناس كتير اشتركوا في الفيلم

-و علي عكس كل اللي فات يقدم عادل امام واحد من الافلام اللي معمولة بشكل درامي هادي و هو فيلم اللعب مع الكبار و كان بيناقش قضية مهمة جدا ساعتها ...و تبدأ مرحلة تكوين عالم عادل امام السينمائي الموازي للواقع يعني هتلاقيه في وسط ازمات الداخلية مع الرهائن عمل الارهاب و الكباب اللي كشف فيه قصور كبير ساعتها بيحصل من الظلم و فساد المظفين و احتجاز الرهائن في فيلم تتعاطف جدا مع البطل ...هتلاقيه بيعمل يوسف المنسي و حواديت الطبقية و الفجوة الواضحة ما بين الغني الفاحش مع عدم وجود مبادئ مع الفقر الشديد مع ثبات المبادئ ...و يجي وقت المسرح بايقونة من ايقونات المسرح و هي مسرحية الزعيم و اللي هتلاقي فيها ضحك متواصل من اول لاخر مشهد و يستمر عادل امام في هواياته باضحاك الممثلين و المشاهدين و مين يعني ينسي (عبيط و اقرع و زيمباوي)

-و في وسط الاعمال الارهابية قرر عادل امام يراهن انه يقتحم العالم دة بفيلم الارهابي اللي كان درامي بشكل كبير و اللي اتعمل بشكل جميل حتي في مشاهد اكتشافه ان جاره ميسيحي اتعملت بشكل متوازن جدا ...و عشان يثبت انه بيلعب مع الكسبان فكانت الثلاثي التاريخي وحيد حامد و شريف عرفة و عادل امام يعملوا طيور الظلام و اللي تقدر تصنفه انه فيلم وثائقي يسهل فهمه من كل الاعمار و كل مشهد في الفيلم دة هتكتشف انك قدام قطعة تحطها جنب قطعة تانية و تلاقي في الاخر لوحة كبير هتشوف فيها ارض الواقع بعدها بسنين

-و عشان يقدر يسيطر علي كل معايير السوق ساعتها فيقرر انه يعمل ثلاثية بخيت و عديلة اللي هتشوف فيها ضحك حلو و بتوفي غرضها اللي هو راسمه و ساعتها هتشوف ان نظرة عادل امام للسوق كانت فعلا صح ...و يعمل حرفوش في فيلم رسالة الي الوالي و في الفترة دي يقدم وجوه جديدة بشكل كويس و كافي

-و يبدأ عادل امام مرحلة جديدة و هي الافلام المناسبة لسنه و الحقيقة كان اختياره دايما علي الناس الكسبانة يعني هتلاقيه بيعمل امير الظلام و غير المشهد القوي الرائع اللي عامله لما قعد يدي درس للناس اللي قدامه فانت هتشوف كوميديا انسانية حلوة و موزونة ...و يبدأ رهانه علي يوسف معاطي سواء في التجربة الدنماركية و الفيلم الممتع عريس من جهة امنية اللي كل اب بيشوف نفسه مكانه و افيهاته اللي عمرها ما تتنسي (عايزة تبوظي الجوازة يا انشراح ) ...و يستمر عادل امام و يقدم شريف خيري رمز الصمور في السفارة في العمارة (و مش انا عيد ميلادي النهاردة) ...و مهما اتقدم السن هتلاقيه بيعرف يرسم ضحكة كل ما تشوفه

-و يعمل دور هايل في عمارة يعقوبيان بيجمع ما بين الكوميديا و التمثيل الحلو لما قال (احنا في زمن المسخ) و (البلد دي مش عايزة مهندسين عايزة صيع)...و يناقش فساد رجال الاعمال في مرجان احمد مرجان و اللي راهن فيه علي نجاح احمد مكي و كسب الرهان في الفيلم ...و يكمل و يدخل جحر الفتنة الطائفية و يعمل حسن و مرقص مع العالمي عمر الشريف و الفيلم دة الحقيقة في مشهد انا شخصيا باعشقه...مشهد الجمع ما بين الترانيم و القرأن الكريم في الشقتين ...كان معمول بحرفنة

-و يكمل سكة رجال الاعمال و القروض مع بوبوس و يربي عياله في زهايمر ...و يبدأ عادل امام في انه يختار الاحسن في السوق عشان ينوروا معاه زي ما عمل في فرقة ناجي عطا الله و هنا عادل امام بيعمل المعادلة الصعبة ...انك عشان تنجح و تقف قدامه لازم تكون نورت و هتنور اكتر بوقوفك في بلاتوه عادل امام

-و تشوف مرحلة اختيار المواضيع هو بقي الاساس زي ما عمل مع العراف و صاحب السعادة و تركيبة كوميدية خفيفة ...مع استاذ و رئيس قسم و بعدها مأمون و شركاه و دايما كان في سباق مين اللي هيكسب و يذيع اسم عادل امام بمبدأ الاسم لوحده يبيع ...و بعدها مأمون و شركاه و عوالم خفية اللي هتلاقي في اختيار الموضوع هو الاساس...و الختام فالانتينو

**عادل امام مش مجرد مسيرة...عادل امام هو عالم افتراضي موازي للواقع اللي بنعيشه اجيال ورا اجيال...بوصلة نجاح عارفة الاتجاه الصح ...لغة عادل امام و افيهاته بقت جزء من اللغة العامية المصرية ...مفيش موقف علي ارض الواقع الا و هتلاقي افيه  من عادل امام

يركب عليه 

انتهت الحدوتة ....اقعدوا بالعافية

هتلاقوا لينكات الجزأين الاول و التاني في اول كومنت

#عادل امام

#التتر

#كريم_مجدي

adel emam part 2

من علامات الذكاء انك تقدر تتعامل مع اي مرحلة و ظروف تتحط فيها و دة بالظبط اللي عمله عادل امام اول ما بدأ مرحلة ما بعد بهجت الاباصيري...و عشان تتنقل من مرحلة نجاح مكسرة الدنيا و تقريبا بتغير فيها جلد المسرح فهتبقي عايز تنتقل لمرحلة فيها النجاح اكبر و اوضح بس الواقع كان له رأي مختلف شوية...في الفترة دي ظهرت بوادر افلام المقاولات و كانت بداية ان الفيلم يبقي بفكرة بسيطة او من غير فكرة خالص و يعتمد علي نجم شباك و نجم كوميدي و ممثلة حلوة و الفيلم يتصور بقي في 4 ايام او اسبوع ...بس الحقيقة الموضوع اختلف شوية مع عادل امام اللي الحظ الحلو بيخدم ذكاء الاختيار

-هتلاقي مشاركة عادل امام في افلام المقاولات (او خليني اقولك اختياراته) كانت في افلام فيها ضحك فعلا مش مجرد شوية افيهات واقعة و السلام ...يعني هتلاقي ضحك لما عمل عكاشة في فيلم الشياطين و الكرة ...الفيلم دة من بوادر فترة المقاولات بس هتلاقي فيه روح عادل امام من الافيهات الحلوة ...هتدور برضه في الفترة دي مجدي في البحث عن فضيحة و الافيه اللي بينه و بين سمير صبري الشهير (دة واحد صاحبي متعرفوش) و الفيلم دة كان دليل ان في بطل اهو يقدر يشيل افلام كوميدي من اول لاخر مشهد ...في مرحلة بقي تقدر تقول شعارها (لها ما لها و عليها ما عليها ) و دي كانت مع حسن يوسف في محاولة من الاخير انه يثبت انه لسه قادر يبقي بطل و دة بيدل انه كان لازم يراهن علي فرس كسبان كوميدي و كان اختياره عادل امام

-بعد فيلم ممنوع في ليلة الدخلة هتلاقي رهان جديد بياخده عادل امام في شخصية محمد في فيلم اسمه صابرين و دي تجربة درامية بحتة...و في نفس السنة تقريبا هتلاقيه بيعمل مسرحية مع سعيد صالح اسمها قصة الحي الغربي (و هتتعب شوية كتير لحد ما تلاقيها دة اذا كانت موجودة)...و بعدها بحوالي سنة يعمل دور سامي وهدان الصحفي في فيلم الخدعة الخفية قدام ملك الترسو فريد شوقي ...و كعادة عادل امام بين كل فترة و التانية هتلاقيه بيعمل مسرحية بتنقله في حتة تانية خالص و المرة دي مع سرحان عبد البصير في شاهد ماشافش حاجة و في المسرحية دي تقدر تقول حرفيا انها (وان مان شو ) او بالمعني البلدي هتلاقي عادل امام شايل المسرحية علي كتفه من اول حرف لاخر حرف ...و مش هتلاقي مشهد في الضحك واقع من اول دخول الاسد لحد لحظات الدراما في الاخر و مين ينسي مشهد المحكمة اللي تقدر تعتبره من المشاهد الخالدة في عالم المسرح و الافيهات اللي بقت بتتقال في الحياة العادية كأنها جزء من اللغة العامية المصرية

-و عشان مش لازم كل حاجة تيجي علي صينية من ذهب فترجع تاني موضه افلام المقاولات بس الحقيقة في الفترة دي كانت مرحلة انتقالية بين جيل بيسلم الراية و بين جيل تاني جرعة الكوميديا فيه قليلة فيقرر ذكاء عادل امام انه يستغل حتة الصدارة الفاضية دي و يحاول يدور علي اصعب طريق عشان لما يوصل يقفل الباب سنين كتير قوي

-بدأت المرحلة دي بشوية افلام كتير للتواجد و دي تقدر تعتبرها من افلام المقاولات اللي فيها ضحك ...لحد ما تيجي سنة اختياراته تقع علي حاجتين عكس بعض تماما كأنه عايز يغطي اكبر جزء من الساحة ...عمل رجب فوق صفيح ساخن و اللي يعتبر اكبر فيلم في كمية ضحك في المرحلة دي ...و تلاقيه عمل مسلسل احلام الفتي الطائر اللي بيجرب فيه عادل امام انه يقتحم عالم الدراما و يقول انا ليا مكان محجوز في الصفوف الامامية و الحقيقة دة تم بعد المسلسل دة

-و انت بتراجع و بتذاكر عادل امام لازم تفتكر المقولة اللي بتقول (من زرع حصد) و هتطبق دي علي ارض الواقع الخاصة بعادل امام...هنا بيقرر عادل امام انه يمشي في خطين ...خط الكوميديا اللي ماشي عليه و ناجح فيه و خط ان تكون افلامه ترجمة للي بيحصل علي ارض الواقع بحيث انك عشان تعرف احداث السنة يكون من ضمن مراجعك افلام عادل امام ...في المرحلة دي هتلاقي تنوع غير طبيعي في ادواره

-يعني هتلاقيه بيعمل المحامي احمد نافع في فيلم خلي بالك من جيرانك مع استاذه فؤاد المهندس بس المرة دي هو البطل و شايل الفيلم ...و هتشوفه في جابر و الاداء الحلو في فيلم احنا بتوع الاوتوبيس و طبيعة الفيلمين عكس بعض تماما و هتلاقي العامل المشترك بينهم هو اسم عادل امام اللي بيتسرسب يوم عن التاني في طريقه انه مش بس يعمل تاريخ فني ..دة هيبقي مادة تتذاكر في انك ازاي تستغل ذكاءك و توظفه لحد ما توصل انك تبقي مرجع و سند للي عايز يتعلم...هتلاقيه عامل مدحت الشاب الرومانسي بتاع الستات في فيلم غاوي مشاكل و فجاة يختار شخصية زيكو في رجل فقد عقله و الفيلم دة هتلاقي فيه كمية ضحك غير طبيعية...شوفت بقي كل اللي فاته؟

-يتحول كل الشخصيات سواء الدرامية او الكوميدية لشخصية جمعة الشوان في مسلسل دموع في عيون وقحة اللي تقدر تعتبره بعد رأفت الهجان انه من احسن الحاجات دراميا اللي اتعملت من وقتها لحد دلوقتي و عايزك تركز جدا في اختياراته لان مش اي حد هيبقي عنده قوة انه يختار و ينقي بالشكل دة ...و يتنقل عادل امام من مرحلة تثبيت الاقدام لمرحلة البطل و الحقيقة في المرحلة دي هتلاقي تنوع عبقري منه و زي ما يكون عايز يعمل كل اختيارات الدراما

-صعب انك تقف قدام السندريلا سعاد حسني بس هو قدر يعمل كدة لما عملوا المشبوه اللي كان خط غريب عن عادل امام بس دي كانت بداية مرحلة الرهان الحقيقي في السينما ان الرجل دة ممكن يعمل دراما بعيد عن الخط الكوميدي و يطلع بجودة متقلش عن اللي بيقدمه نجوم الدراما ...و دة اتحقق في فيلم المشبوه و فيلم امهات في المنفي و عشان تبقي ذكي فكان لازم يرجع لملعبه الاساسي تاني و دة اللي حصل لما عمل بعدهم علي طول فيلم علي باب الوزير اللي كان بداية مشروعه مع يسرا و اللي الحقيقة كانت افيهات غير طبيعية و عمل فيلم الانسان يعيش مرة واحدة و هنا عادل امام قدر يعمل نوعين من الحوار او خلينا نقول 3 انواع اخفهم هو الحوار الكوميدي و هتلاقيه بيستخدمه مع الناظر او اللي بيلعبوا معاه قمار و الحوار الرومانسي و الحالم مع يسرا و اخيرا الحوار الدرامي و اكثرهم قوة و دة مع تقريبا كل مشاهده مع علي الشريف(له مقال علي التتر) في شخصية بكري

**خد نفس بس الاول عشان اللي جاي تقيل قوي

-عادل امام يملك من موهبة الذكاء جرعة مرعبة بتظهر في تنوع اختياراته ...يختار عمل ايا كان هو ايه بس يكون شايف انه هينجح و الحقيقة انه بينجح سواء في وقت عرضه او بعدها بسنين ...و هنا فترة بداية نضج طريق الصدارة و الزعامة من اول ما عمل عصابة حمادة و توتو و هتلاقي ان الرسم البياني لمستوي الافلام بيعلي ...بعدها عنتر شايل سيفه و خمسة باب اللي قدم فيه كوميديا مختلفة شوية فيها لمسة دراما ...و يتقابل مع السندريلا تاني في صورة درامية هادئة و جميلة في حب في الزنزانة و بيكسب عادل امام الرهان انه يقدر يقدم الرومانسية من غير مشهد كوميدي واحد

-و يرجع عادل امام بفيلم المتسول انه بيناقش قضية كانت في اولها في الزمن دة انها تتحول لشغلانة و يستغل عادل امام دة انه يترجمها في فيلم كوميدي من غير مشهد جد ...و يقدم الصورة الهزليه للمحامي في شخصية حسن سبانخ في فيلم الافوكاتو و اللي فتح فيها ابواب كتير محدش كان عارف يفتحها ازاي ...و مع كل جرعة الكوميديا دي يرجع بقانون ساكسونيا في فيلم الغول و الحقيقة الفيلم دة في اجزاء في الحوار تقدر تركبها علي فيلم وثائقي يأرخ الفترة دي

-و كان عند عادل امام الجرأة انه يقدم روايات هي في الاصل تقيلة جدا زي فيلم حتي لا يطير الدخان و برضه من غير مشهد كوميدي واحد و دي كانت خطوة مهمة جدا عشان تنورله طريق بيعمله لنفسه ...طريق في علامات مش مجرد اعمال فنية و السلام...هو خط موازي للدراما مع اللي بيحصل علي ارض الواقع...يعني من الاخر هتكتشف ان عادل امام هو او من عمل التريند

-و في وسط ما هتلاقيه بيعمل الهلفوت بصورة كوميدية بائسة و جملته المشهورة (انا اشهر واحد هنا مع المأمور بس هو الباشا و انا الهلفوت ) و هتشوف عادل امام بيقول كلام عقلاني من شخصية رصيف الشارع ياما علمها...لحد ما تيجي مرحلة انا باحبها جدا

-فيلم الحريـــــــــــــف..الفيلم اللي حرفيا تقدر تقول عليه اتعمل بمزاج و مخدش حقه...مفيش مشهد في الفيلم دة تقدر تقول عليه ضعيف ...من اول المؤلف لكل اللممثلين للمخرج قدموا صورة درامية من تفاصيل رائعة للشارع و الشخصية المصرية و هنا ذكاء الرهان علي فيلم بالنوعية دي بالرغم انه محقق نجاحات في افلام كوميدية كتير بس عادل امام في الحريف غير و الفيلم كله غير...الموسيقي في الفيلم هي خط درامي لوحده ...فيلم اتظلم كتير بمرور السنين بس دايما افتكر جملة (انا هالعب مع الخسران ) عشان عادل امام بعد كدة هيغير الشعار دة و هيلعب دايما مع الكسبان

عايز تعرف ازاي ؟؟؟

استني الجزء ال 3 و الاخير من مقال #عادل_امام

اقعدوا بالعافية

#عادل_امام

#التتر

#كريم_مجدي

adel emam part 1

انا المخ و انت العضلات ..اوعي تقولي انك مش فاكر الجملة دي اتقالت فين و امتي ؟

و لو مش عارف (و دة هيبقي عيب ) هتعرف وقتها و معناها كمان ...حاجات كتير في الدنيا ممكن تكذب الا الورقة و القلم و انك تعرف بالظبط انت عايز ايه؟؟ و عشان تعرف انت عايز ايه لازم تجاوب علي 3 اسئلة

هتعمل (ايه) و (امتي) و (ازاي) و اوعي تفتكر ان اجابات الاسئلة دي سهلة لان مش اي حد يقدر يعرف يجاوب و تبقي اجابته صح؟ و تعرف حقيقة مكانك و ازاي تطلع خطوة لقدام...و عشان تعمل كدة في دنيا التتر لازم يبقي عندك موهبة وذكاء و التانية دي اهم و ركز عليها جدا ...انك تكون موهوب حاجة صعبة بس انك تكون ذكي دي حاجة اصعب و اصعب ...و عشان يقدر عادل امام يوصل للمرحلة دي لازم يكن ذكي

-عادل امام مش مجرد تاريخ يتذاكر او مكانة صعب حد يكررها او يقرب منها حتي ..هو الاجابة النموذجية لل 3 اسئلة ..هو اكتر واحد هتلاقيه عارف يعمل ايه و امتي و ازاي ...و من هنا هتشوف تاريخ عمره ما يكذب لان هتلاقي تاريخ عادل امام التمثيلي بيقابله تاريخ من الاحداث الحقيقية اللي حصلت و عرف عادل امام انه يترجمه لاعمال فنية تعيش بين الاجيال و هنا بقي اكبر دليل علي ذكاء شخصية فنان عارف هو عايز ايه...لو انت فاكر انيس عبيد رائد الترجمة فهتلاقي عادل امام بيعمل اللي اصعب من ترجمة الكلام و هي ترجمة الاحداث

-تقدر تقسم تاريخ عادل امام لمراحل كتير ...ما تيجي نقولهم سوا كدة بصوت عالي ( و عشان تبقي عارف المقال طويل دة عادل امام يعني )

-عشان تبقي كبير لازم تبدأ كبير و الحظ لما بيخدم بيبقي قاصد يروح لمين و مش هتلاقي احسن من استاذ المسرح و تبدأ معاه طريق طويل من النجاح و السيطرة ...مفيش احسن انك تبدأ مع فؤاد المهندس بالجملة اللي كسرت الدنيا وقتها لما دسوقي وكيل المحامي قال (بلد بتاعت شهادات صحيح ) و هنا هتتأكد ان الحظ بيفتح ابوابه للي عايز ينجح و بجملة واحدة هتلاقي بداية عادل امام مع اصعب انواع الفنون و هو المسرح و ممكن جملته دي من اهم الحاجات اللي هتفتكرها في مسرحية انا و هو و هي و اللي اتحولت لفيلم استثمار للنجاح بنفس الشخصيات

-و يكمل عادل امام طريقه مع خطوة جديدة مع المهندس في مسرحية انا فين و انتي فين في دور هيكل و اللي عمله بطريقة فتحت قدامه الطريق انه يبقي في فيلم زي مراتي مدير عام و اللي قدر عادل امام في دور ابو المجد انه يحجز مكان و يظهر في وسط فتوات كوميديا في وقتها و هتلاقي مشاهد محفورة لعادل امام تفتكرها دايما و تضحك دايما لما تشوفها زي مشهد لما اتعصب علي شادية مديرته و فجأة لما شخطت فيه يتحول لكائن اليف

-و هنا بقي هتلاقي الحظ جنبه حاجة بتسنده و تقويه ...قوة الرفض ...انك في عز ما انت عايز تنتشر بتصمم انك تعمل ادوار حتي لو صغيرة بس بتحطلك طوبة في ارض صلبة تمشي عليها ...و هتلاقي دة في دور امين في فيلم كرامة زوجتي و جملته المشهورة (يا مثبت العقل و الدين) و من هنا هتبدأ تستكشف موهبة ذكاء في الطريق انها تتحول من حفر طريق البداية لبناء طريق الصدارة ...و من هنا هتشوفه انه بقي من الناس اللي موجودين مع نجوم الوقت اللي هو فيه زي ما فيلم الرجل دة هيجنني مع المهندس...و بعد شوية هتلاقي انه تحول لبطل فعليا في دور اسماعيل في لصوص و لكن ظرفاء و في الفيلم دة هتشوف كوميديا ماري منيب بتخدم ظهور عادل امام و انك تشاور علي شاب صغير و تقول انه يقدر يعمل حاجة...لما تلاقي خد و هات في الكوميديا بينه و بين موهبة تقيلة زي ماري منيب لازم تقتنع ان ذكاء الاختيار له اكبر عامل من عوامل النجاح

-عادل امام بيبدأ مرحلة البطولة الجماعية في فيلم كيف تسرق مليونير و في الفيلم دة هتحس بحاجتين موصلين ببعض ان كان في فرق في تقل الموهبة بينه و بين محمد عوض و بيكمل صورة حلوة مع الجميل عبد المنعم ابراهيم و الاتنين خدموا عادل امام انه يظهر بالشكل اللي يخلي الناس تركز معاه اكتر ...و يستمر عادل امام من وشوش الخير في افلام الثنائي شادية و صلاح ذو الفقار(الانجح في وقتها) و يظهر في دور شافعي في فيلم عفريت مراتي

-و تبدأ مرحلة تثبيت وجهة النظر انك تقدر تعتمد علي الشاب الجديد اللي اسمه عادل امام من خلال شوية ادوار زي عبده نوفالجين في فيلم انا الدكتور ...و دايما هتلاقي عادل امام في الوقت دة ممكن يقول جملة واحدة تبقي مصدر انك تفتكر الفيلم كله زي اللي حصل في فيلم نص ساعة جواز لما قال (انا عايز ابوس ...اشمعني استاذ يوسف بيبوس ) ...و دور شكري الصحفي في فيلم 7 ايام في الجنة اللي هتشوف خيط مختلف من التمثيل

-هتلاقيه في دور خليفه في مسرحية غراميات عفيفي و المرة دي مسرح مختلف مع ثبات مستوي الضحك لعادل امام و الثبات دة هيوصلك لدور امين في فيلم برج العذراء مع الراحل صلاح ذو الفقار ...و حمادة في فيلم غرام في الطريق الزراعي و يعلم بدوره في وسط مستوي كوميديا حلو و يأكد علي فرق الموهبة و يبين ان في موهبة في طريقها لدور البطولة ...و بعدها يعمل دور شرشر في فيلم اضواء المدينة

**و كل المقدمات ليها ايه؟؟ الله يفتح عليك...ليها نتائج

-اول اجابة لل 3 اسئلة هتلاقيها في بهجت الاباصيري في مدرسة المشاغبين و هنا بيتحقق حلم الزعامة الكوميدية علي ارض الواقع و يبدأ من ارض المسرح...في مدرسة المشاغبين كل افيه بيطلع من عادل امام بيكسر الدنيا من اول دخوله علي خشبة المسرح و هو بيتكلم مع الناظر و بيقوله (مش انت قولتلنا كدة؟ هتوجعوا دماغنا ليه بقي ؟ ) و في المسرحية دي هتلاقي عادل امام بيعمل كل فنون المسرح من الافيه الصارخ لفرش  الافيه و مين ينسي اقعد يا واد...الطم يا واد يقوله الوليه اتجننت يا واد...دراعك بيوجعك قوي ياض يا مرسي ...لاغاليغو و كل واحد يخلي باله من لاغاليغو...و تتحول مدرسة المشاغبين لعلامة من علامات المسرح و يستعد بهجت الاباصيري لدخور مرحلة جديدة

**مستني انت اقولك المرحلة الجديدة ؟؟ في الجزء اللي جاي

اقعدوا بالعافية

#عادل_امام

#التتر

#كريم_مجدي  

انا المخ و انت العضلات ..اوعي تقولي انك مش فاكر الجملة دي اتقالت فين و امتي ؟

و لو مش عارف (و دة هيبقي عيب ) هتعرف وقتها و معناها كمان ...حاجات كتير في الدنيا ممكن تكذب الا الورقة و القلم و انك تعرف بالظبط انت عايز ايه؟؟ و عشان تعرف انت عايز ايه لازم تجاوب علي 3 اسئلة

هتعمل (ايه) و (امتي) و (ازاي) و اوعي تفتكر ان اجابات الاسئلة دي سهلة لان مش اي حد يقدر يعرف يجاوب و تبقي اجابته صح؟ و تعرف حقيقة مكانك و ازاي تطلع خطوة لقدام...و عشان تعمل كدة في دنيا التتر لازم يبقي عندك موهبة وذكاء و التانية دي اهم و ركز عليها جدا ...انك تكون موهوب حاجة صعبة بس انك تكون ذكي دي حاجة اصعب و اصعب ...و عشان يقدر عادل امام يوصل للمرحلة دي لازم يكن ذكي

-عادل امام مش مجرد تاريخ يتذاكر او مكانة صعب حد يكررها او يقرب منها حتي ..هو الاجابة النموذجية لل 3 اسئلة ..هو اكتر واحد هتلاقيه عارف يعمل ايه و امتي و ازاي ...و من هنا هتشوف تاريخ عمره ما يكذب لان هتلاقي تاريخ عادل امام التمثيلي بيقابله تاريخ من الاحداث الحقيقية اللي حصلت و عرف عادل امام انه يترجمه لاعمال فنية تعيش بين الاجيال و هنا بقي اكبر دليل علي ذكاء شخصية فنان عارف هو عايز ايه...لو انت فاكر انيس عبيد رائد الترجمة فهتلاقي عادل امام بيعمل اللي اصعب من ترجمة الكلام و هي ترجمة الاحداث

-تقدر تقسم تاريخ عادل امام لمراحل كتير ...ما تيجي نقولهم سوا كدة بصوت عالي ( و عشان تبقي عارف المقال طويل دة عادل امام يعني )

-عشان تبقي كبير لازم تبدأ كبير و الحظ لما بيخدم بيبقي قاصد يروح لمين و مش هتلاقي احسن من استاذ المسرح و تبدأ معاه طريق طويل من النجاح و السيطرة ...مفيش احسن انك تبدأ مع فؤاد المهندس بالجملة اللي كسرت الدنيا وقتها لما دسوقي وكيل المحامي قال (بلد بتاعت شهادات صحيح ) و هنا هتتأكد ان الحظ بيفتح ابوابه للي عايز ينجح و بجملة واحدة هتلاقي بداية عادل امام مع اصعب انواع الفنون و هو المسرح و ممكن جملته دي من اهم الحاجات اللي هتفتكرها في مسرحية انا و هو و هي و اللي اتحولت لفيلم استثمار للنجاح بنفس الشخصيات

-و يكمل عادل امام طريقه مع خطوة جديدة مع المهندس في مسرحية انا فين و انتي فين في دور هيكل و اللي عمله بطريقة فتحت قدامه الطريق انه يبقي في فيلم زي مراتي مدير عام و اللي قدر عادل امام في دور ابو المجد انه يحجز مكان و يظهر في وسط فتوات كوميديا في وقتها و هتلاقي مشاهد محفورة لعادل امام تفتكرها دايما و تضحك دايما لما تشوفها زي مشهد لما اتعصب علي شادية مديرته و فجأة لما شخطت فيه يتحول لكائن اليف

-و هنا بقي هتلاقي الحظ جنبه حاجة بتسنده و تقويه ...قوة الرفض ...انك في عز ما انت عايز تنتشر بتصمم انك تعمل ادوار حتي لو صغيرة بس بتحطلك طوبة في ارض صلبة تمشي عليها ...و هتلاقي دة في دور امين في فيلم كرامة زوجتي و جملته المشهورة (يا مثبت العقل و الدين) و من هنا هتبدأ تستكشف موهبة ذكاء في الطريق انها تتحول من حفر طريق البداية لبناء طريق الصدارة ...و من هنا هتشوفه انه بقي من الناس اللي موجودين مع نجوم الوقت اللي هو فيه زي ما فيلم الرجل دة هيجنني مع المهندس...و بعد شوية هتلاقي انه تحول لبطل فعليا في دور اسماعيل في لصوص و لكن ظرفاء و في الفيلم دة هتشوف كوميديا ماري منيب بتخدم ظهور عادل امام و انك تشاور علي شاب صغير و تقول انه يقدر يعمل حاجة...لما تلاقي خد و هات في الكوميديا بينه و بين موهبة تقيلة زي ماري منيب لازم تقتنع ان ذكاء الاختيار له اكبر عامل من عوامل النجاح

-عادل امام بيبدأ مرحلة البطولة الجماعية في فيلم كيف تسرق مليونير و في الفيلم دة هتحس بحاجتين موصلين ببعض ان كان في فرق في تقل الموهبة بينه و بين محمد عوض و بيكمل صورة حلوة مع الجميل عبد المنعم ابراهيم و الاتنين خدموا عادل امام انه يظهر بالشكل اللي يخلي الناس تركز معاه اكتر ...و يستمر عادل امام من وشوش الخير في افلام الثنائي شادية و صلاح ذو الفقار(الانجح في وقتها) و يظهر في دور شافعي في فيلم عفريت مراتي

-و تبدأ مرحلة تثبيت وجهة النظر انك تقدر تعتمد علي الشاب الجديد اللي اسمه عادل امام من خلال شوية ادوار زي عبده نوفالجين في فيلم انا الدكتور ...و دايما هتلاقي عادل امام في الوقت دة ممكن يقول جملة واحدة تبقي مصدر انك تفتكر الفيلم كله زي اللي حصل في فيلم نص ساعة جواز لما قال (انا عايز ابوس ...اشمعني استاذ يوسف بيبوس ) ...و دور شكري الصحفي في فيلم 7 ايام في الجنة اللي هتشوف خيط مختلف من التمثيل

-هتلاقيه في دور خليفه في مسرحية غراميات عفيفي و المرة دي مسرح مختلف مع ثبات مستوي الضحك لعادل امام و الثبات دة هيوصلك لدور امين في فيلم برج العذراء مع الراحل صلاح ذو الفقار ...و حمادة في فيلم غرام في الطريق الزراعي و يعلم بدوره في وسط مستوي كوميديا حلو و يأكد علي فرق الموهبة و يبين ان في موهبة في طريقها لدور البطولة ...و بعدها يعمل دور شرشر في فيلم اضواء المدينة

**و كل المقدمات ليها ايه؟؟ الله يفتح عليك...ليها نتائج

-اول اجابة لل 3 اسئلة هتلاقيها في بهجت الاباصيري في مدرسة المشاغبين و هنا بيتحقق حلم الزعامة الكوميدية علي ارض الواقع و يبدأ من ارض المسرح...في مدرسة المشاغبين كل افيه بيطلع من عادل امام بيكسر الدنيا من اول دخوله علي خشبة المسرح و هو بيتكلم مع الناظر و بيقوله (مش انت قولتلنا كدة؟ هتوجعوا دماغنا ليه بقي ؟ ) و في المسرحية دي هتلاقي عادل امام بيعمل كل فنون المسرح من الافيه الصارخ لفرش  الافيه و مين ينسي اقعد يا واد...الطم يا واد يقوله الوليه اتجننت يا واد...دراعك بيوجعك قوي ياض يا مرسي ...لاغاليغو و كل واحد يخلي باله من لاغاليغو...و تتحول مدرسة المشاغبين لعلامة من علامات المسرح و يستعد بهجت الاباصيري لدخور مرحلة جديدة

**مستني انت اقولك المرحلة الجديدة ؟؟ في الجزء اللي جاي

اقعدوا بالعافية

#عادل_امام

#التتر

#كريم_مجدي  

انا المخ و انت العضلات ..اوعي تقولي انك مش فاكر الجملة دي اتقالت فين و امتي ؟

و لو مش عارف (و دة هيبقي عيب ) هتعرف وقتها و معناها كمان ...حاجات كتير في الدنيا ممكن تكذب الا الورقة و القلم و انك تعرف بالظبط انت عايز ايه؟؟ و عشان تعرف انت عايز ايه لازم تجاوب علي 3 اسئلة

هتعمل (ايه) و (امتي) و (ازاي) و اوعي تفتكر ان اجابات الاسئلة دي سهلة لان مش اي حد يقدر يعرف يجاوب و تبقي اجابته صح؟ و تعرف حقيقة مكانك و ازاي تطلع خطوة لقدام...و عشان تعمل كدة في دنيا التتر لازم يبقي عندك موهبة وذكاء و التانية دي اهم و ركز عليها جدا ...انك تكون موهوب حاجة صعبة بس انك تكون ذكي دي حاجة اصعب و اصعب ...و عشان يقدر عادل امام يوصل للمرحلة دي لازم يكن ذكي

-عادل امام مش مجرد تاريخ يتذاكر او مكانة صعب حد يكررها او يقرب منها حتي ..هو الاجابة النموذجية لل 3 اسئلة ..هو اكتر واحد هتلاقيه عارف يعمل ايه و امتي و ازاي ...و من هنا هتشوف تاريخ عمره ما يكذب لان هتلاقي تاريخ عادل امام التمثيلي بيقابله تاريخ من الاحداث الحقيقية اللي حصلت و عرف عادل امام انه يترجمه لاعمال فنية تعيش بين الاجيال و هنا بقي اكبر دليل علي ذكاء شخصية فنان عارف هو عايز ايه...لو انت فاكر انيس عبيد رائد الترجمة فهتلاقي عادل امام بيعمل اللي اصعب من ترجمة الكلام و هي ترجمة الاحداث

-تقدر تقسم تاريخ عادل امام لمراحل كتير ...ما تيجي نقولهم سوا كدة بصوت عالي ( و عشان تبقي عارف المقال طويل دة عادل امام يعني )

-عشان تبقي كبير لازم تبدأ كبير و الحظ لما بيخدم بيبقي قاصد يروح لمين و مش هتلاقي احسن من استاذ المسرح و تبدأ معاه طريق طويل من النجاح و السيطرة ...مفيش احسن انك تبدأ مع فؤاد المهندس بالجملة اللي كسرت الدنيا وقتها لما دسوقي وكيل المحامي قال (بلد بتاعت شهادات صحيح ) و هنا هتتأكد ان الحظ بيفتح ابوابه للي عايز ينجح و بجملة واحدة هتلاقي بداية عادل امام مع اصعب انواع الفنون و هو المسرح و ممكن جملته دي من اهم الحاجات اللي هتفتكرها في مسرحية انا و هو و هي و اللي اتحولت لفيلم استثمار للنجاح بنفس الشخصيات

-و يكمل عادل امام طريقه مع خطوة جديدة مع المهندس في مسرحية انا فين و انتي فين في دور هيكل و اللي عمله بطريقة فتحت قدامه الطريق انه يبقي في فيلم زي مراتي مدير عام و اللي قدر عادل امام في دور ابو المجد انه يحجز مكان و يظهر في وسط فتوات كوميديا في وقتها و هتلاقي مشاهد محفورة لعادل امام تفتكرها دايما و تضحك دايما لما تشوفها زي مشهد لما اتعصب علي شادية مديرته و فجأة لما شخطت فيه يتحول لكائن اليف

-و هنا بقي هتلاقي الحظ جنبه حاجة بتسنده و تقويه ...قوة الرفض ...انك في عز ما انت عايز تنتشر بتصمم انك تعمل ادوار حتي لو صغيرة بس بتحطلك طوبة في ارض صلبة تمشي عليها ...و هتلاقي دة في دور امين في فيلم كرامة زوجتي و جملته المشهورة (يا مثبت العقل و الدين) و من هنا هتبدأ تستكشف موهبة ذكاء في الطريق انها تتحول من حفر طريق البداية لبناء طريق الصدارة ...و من هنا هتشوفه انه بقي من الناس اللي موجودين مع نجوم الوقت اللي هو فيه زي ما فيلم الرجل دة هيجنني مع المهندس...و بعد شوية هتلاقي انه تحول لبطل فعليا في دور اسماعيل في لصوص و لكن ظرفاء و في الفيلم دة هتشوف كوميديا ماري منيب بتخدم ظهور عادل امام و انك تشاور علي شاب صغير و تقول انه يقدر يعمل حاجة...لما تلاقي خد و هات في الكوميديا بينه و بين موهبة تقيلة زي ماري منيب لازم تقتنع ان ذكاء الاختيار له اكبر عامل من عوامل النجاح

-عادل امام بيبدأ مرحلة البطولة الجماعية في فيلم كيف تسرق مليونير و في الفيلم دة هتحس بحاجتين موصلين ببعض ان كان في فرق في تقل الموهبة بينه و بين محمد عوض و بيكمل صورة حلوة مع الجميل عبد المنعم ابراهيم و الاتنين خدموا عادل امام انه يظهر بالشكل اللي يخلي الناس تركز معاه اكتر ...و يستمر عادل امام من وشوش الخير في افلام الثنائي شادية و صلاح ذو الفقار(الانجح في وقتها) و يظهر في دور شافعي في فيلم عفريت مراتي

-و تبدأ مرحلة تثبيت وجهة النظر انك تقدر تعتمد علي الشاب الجديد اللي اسمه عادل امام من خلال شوية ادوار زي عبده نوفالجين في فيلم انا الدكتور ...و دايما هتلاقي عادل امام في الوقت دة ممكن يقول جملة واحدة تبقي مصدر انك تفتكر الفيلم كله زي اللي حصل في فيلم نص ساعة جواز لما قال (انا عايز ابوس ...اشمعني استاذ يوسف بيبوس ) ...و دور شكري الصحفي في فيلم 7 ايام في الجنة اللي هتشوف خيط مختلف من التمثيل

-هتلاقيه في دور خليفه في مسرحية غراميات عفيفي و المرة دي مسرح مختلف مع ثبات مستوي الضحك لعادل امام و الثبات دة هيوصلك لدور امين في فيلم برج العذراء مع الراحل صلاح ذو الفقار ...و حمادة في فيلم غرام في الطريق الزراعي و يعلم بدوره في وسط مستوي كوميديا حلو و يأكد علي فرق الموهبة و يبين ان في موهبة في طريقها لدور البطولة ...و بعدها يعمل دور شرشر في فيلم اضواء المدينة

**و كل المقدمات ليها ايه؟؟ الله يفتح عليك...ليها نتائج

-اول اجابة لل 3 اسئلة هتلاقيها في بهجت الاباصيري في مدرسة المشاغبين و هنا بيتحقق حلم الزعامة الكوميدية علي ارض الواقع و يبدأ من ارض المسرح...في مدرسة المشاغبين كل افيه بيطلع من عادل امام بيكسر الدنيا من اول دخوله علي خشبة المسرح و هو بيتكلم مع الناظر و بيقوله (مش انت قولتلنا كدة؟ هتوجعوا دماغنا ليه بقي ؟ ) و في المسرحية دي هتلاقي عادل امام بيعمل كل فنون المسرح من الافيه الصارخ لفرش  الافيه و مين ينسي اقعد يا واد...الطم يا واد يقوله الوليه اتجننت يا واد...دراعك بيوجعك قوي ياض يا مرسي ...لاغاليغو و كل واحد يخلي باله من لاغاليغو...و تتحول مدرسة المشاغبين لعلامة من علامات المسرح و يستعد بهجت الاباصيري لدخور مرحلة جديدة

**مستني انت اقولك المرحلة الجديدة ؟؟ في الجزء اللي جاي

اقعدوا بالعافية

#عادل_امام

#التتر

#كريم_مجدي  

mahmoud abd el aziz part 1

لكل حاجة في الدنيا معايير بتحكمها و يتحكم عليها منها ...و عشان تعيش في الدنيا اكيد هتفكر في يوم من الايام ان يبقالك قدوة ..قدوة تتعلم منها و تمشي علي خطاها من غير ما تحاول تقلدها عشان متبقاش استنساخ اعمي لحقوق ملكية محفوظة و متسجلة باسمها و عشان تطبق المعايير لاي قدوة هتحبها و تقرر تكمل حياتك و انت باصصلها فوق كدة انك تلاحظ طريقة التعامل مع مختلف المواقف و الحكايات ...حكمة الشخصية اللي قدامك بيعرف يتعامل مع الازمات ؟؟ طيب لو اتحط في مواقف مختلفة هيعرف يتعامل معاهم كلهم بنفس الطريقة و نفس الكفاءة و لا هيمشي علي سطر و يسيب سطر

المهم يا سيدي عشان مطولش عليك و دة لان صاحب المقال لوحده هياخد مننا وقت كبير و عشان ان اللي اتقال عليه لحد دلوقتي هو مش كفاية لشرح تفاصيل موهبته ...حلمك عليا ؟؟ هو انا قولتلك انا البورم اللي هاديه حقه ؟؟

مقولتش بس تعالي سوا كدة نفكر بصوت عالي انت و العبدلله اللي بتقرأ كلامه

عشان تاخد قدوة في عالم الفنون فأكيد هيبقي من اول اختياراتك محمود عبد العزيز ...و من غير ما تتكلم انا سامعك بتقول ايه ؟؟

مهما كتبت عنه مش هاوفيه حقه (بلاش احباط بقي يا عم) و عارف ان في ناس ياما اتكلموا عنه بس اديني باحاول

-محمود عبد العزيز هو منهج ممتع للمذاكرة ...موهبة غير خاضعة للتقييد او التحجيم ...و لو عايز تعرف ابسط الحاجات الايجابية في موهبة محمود عبد العزيز هو تحدي الطبيعة ...تحدي صورة الرجل اللي شكله حلو و طريق الشكل الحلو في السينما معروف و ثابت بس طريق ذهاب فقط من غير عودة ...محمود عبد العزيز كسر قواعد الواد الحليوة و يقول لنفسه و للناس انا اقدر اعمل اي حاجة

-و عشان يكمل علي التحدي اللي فات فهتلاقي محمود عبد العزيز هو من اكتر الناس اللي مكنش الوحيد اللي تقريبا عنده تنوع في اختيار شخصياته من كل الطبقات الاجتماعية و الشكلية و كمان الدرامية ...هتلاقيه بيعمل كوميديا ينافس بيها شباك تذاكر احسن نجوم الكوميديا و هتلاقيه عامل اعمال من كلاسيكيات الدراما تتمني بس انك تعدي من قدام الكاميرا فيها

-موهبة محمود عبد العزيز موقفتش عند التحديات دي و بس ...فكرة انك تعمل في مدة قريبة جدا حاجات تصنيفها كلها من حيث الجودة و حلاوة التمثيل تقريبا متقارب جدا فدة شئ في منتهي الصعوبة ...زي كدة لما تذاكر كيمياء و تاريخ و تروح تقفل المادتين في الامتحان ...فكرة الرهان علي انه يعمل اي شخصية في اي حدونة اجتماعية و ميخفش انه يقع او الناس تقوله كفاية دة يخليك تفكر هو الرجل دة عايز ايه من موهبته؟؟؟ازاي بتطاوعه قوي كدة و بتسمع كلامه

-من التفاصيل المهمة جدا في موهبة الرجل دة انه قادر لو في وسط نجوم هو اللي يطلع بالعلامة و الافيه اللي يتحفظ و يربط نفسه بالفيلم عن غيره...شخص قادر يتحكم في موهبته و يوظفها صح دي ممكن تبقي سهلة في دور او اتنين بس انه يقدر يتحكم فيها في كل دور ميعملهاش اي حد و محمود عبد العزيز مش اي حد

**متقوليش انك زهقت...المقال 3 اجزاء اصبر عليا ....هاقولك اخر حاجة اهو

-سامعك ياللي بتقول ما في ممثلين عملوا كل الادوار ...هاقولك مختلفناش بس الرجل دة عنده مبدأ عاجبني ...انه بيهتم بالكيف و الكم ..يعني هتلاقي اعمال بادوار متنوعة جدا بنفس طريقة الابداع و الاتقان يعني هتلاقيه عامل كوميدي كتير و عامل افلام فلسفية كأنه هيعرض علي مسارح العالم و هتلاقيه عامل الدراما الاجتماعية الشعبية بعدد كبير من الافلام و تنوع اكبر من الادوار

و عشان الرجل دة فعلا قدوة فخلينا نذاكره مرحلة مرحلة كدة

-مرحلة الواد الحليوة او البطل اللي شكله حلو و دي فترة عدي عليها معظم ابطال الفن المصري ...و هتلاقي في المرحلة دي محمود عبد العزيز عمل فيها فيلم حتي اخر العمر و هنا هتلاقيه البطل النمطي للواد الحليوة و هتلاقيه بعدها عمل الحفيد في دور الزوج اللي عايز الاستقرار و الخلفة و كان الحقيقي دور مش مستاهل مجهود اكبر من كدة لانه كان بسيط و صغير ...و عمل في المرحلة دي مسلسل اسمه شجرة اللبلاب و عمل فيه دور فعلا حلو ...و بدأت مرحلة الواد الحليوة مكملة معاه لما عمل طائر الليل الحزين قدام الجميلة و كان قدامه عمالقة زي محمود مرسي و عادل ادهم بس عمل عادل عزام بطريقة متوازنة جدا و نكمل بقي مع ضاع العمر يا ولدي و عيب يا لولو يا لولو عيب ...و لما عمل دور دياب في شفيقة و متولي و تبدأ تقول في رائحة تمرد في شخصية الواد الحليوة ...مع انه كمل فيها في فيلم و لا يزال التحقيق مستمرا بس انك هتلاقي ان في نضج حصل و تقل و الاهم من كدة هتشوف بنفسك انه قادر يوظف موهبته في خيوط الشخصية

-و هتعرف تشوف دة لما تتفرج عليه في شخصية طارق فتحي في فيلم اعدام طالب ثانوي و هتلاقي الكفة بتميل علي طريق الموهبة اكتر من الشكل زي فيلم وكاة البلح اللي عمل فيها دور عبدون اللي بيحب و عايز ينتقم و هنا هتلاقي ان الموهبة بس هي اللي بتتحرك و سايبة الشكل ورا الكاميرا

-في سنة و تحديد 82 عمل محمود عبد العزيز و بدأ البطولة الثلاثية الرائعة لما عملوا العار و اكيد هتفتكر دكتور عادل اللي متعرفلوش بقي هو انساني و لا كوميدي و لا تراجيدي بس اللي هتعرف انه محمود عبد العزيز عمل منه علامة و شخصية متنوعة من رفضه لفكرة تجارة المخدرات لافيه حقها يا ابو كمال و لغاية لما عقله راح منه في اخر الفيلم ...تخيل بقي بعدها بسنة عمل درب الهوي و شخصية صالح اللي مختلفة تماما عن القيم و المبادئ و ساعتها هتعرف ان محمود عبد العزيز كسب رهان تنوع الشخصيات ...و في المرحلة دي بدأ يعمل افلام ليها طابع اجتماعي و بيناقش قضايا مهمة جدا زي العذراء و الشعر الابيض اللي مش هتلاقي فيه كوميديا و خفة دم محمود عبد العزيز ...و تزوير في اوراق رسمية و الفيلم كان بيناقش قضية انسانية بطريقة متوازنة جدا

**اخر حاجة بس في الجزء دة

-في فترة او تقدر تقول عليها سنة محمود عبد العزيز قرر انه يخليها فترة التنوع المتطرف و هاقولك يعني ايه حالا

-لما تعمل فيلم زي عفوا ايها القانون بكل تفاصيله و مشاكله و حساسيته و تعمل فيه شخصية الرجل الضعيف جنسيا و بيتسبب الضعف دة في مشاكل نفسية و فجأة يتحول الخجل لخيانة و الخيانة تتحول لندم...كل دي مراحل في شخصية واحدة في فيلم واحد...و لما تلاقي نفس الشخص بيعمل علامة من علامات السينما و هو فيلم الكيف و شخصية المزاجنجي اللي عمر ما واحد فينا ينسي (طريقة) الحوار يعني مينفعش تنسي طريقة اقناعه ليحيي الفخراني و هو بيقوله ان الغش هو التحايل علي اعطاء صفة الجودة لشئ غير جيد و مينفعش تنسي انا هنا يا ابن الكئيبة ...انت متخيل معايا ان دة هو دة

مش بس كدة لما تعمل فيلم خفيف زي الشقة من حق الزوجة و الكوميديا الصارخة مع جورج سيدهم و عبدالله فرغلي و نعيمة الصغير و الافيه العالمي بتاع هي الرائحة يا كريمة ...و الطباشير و هو هو نفس الشخص اللي هتلاقيه بيعمل اعدام ميت بكل تفاصيله الوطنية و اللي برضه كان في لمسة كوميدية لما بيقول نورت يا ابو جودة

اللي فات دة بقي كانت بداية الخروج من مرحلة الواد الحليوة لمرحلة ان في قدوة جاية في السكة و لسة الكلام مخلصش

اقعدوا بالعافية

#محمود_عبد_العزيز

#التتر

#مشروع_كتابة_جديد

#اعمل_شير

#كريم_مجدي