طلق صناعي...تجربة ابطالها سر جودتها
يــــــــــــــــــــا لو الواحد و هو ماشي
كدة يلاقي شنطة فيها مليون دولار او يتكعبل في فانوس كدة سحري يطلعله منه عفريت
يجيبله هو المليون دولار او يطلعلك عم من البرازيل مثلا يموت و تورث من وراه نفس
المليون دولار ...فاكرين انتوا طبعا الاحلام الطفوليه بتاعتنا بتاعت زمان و اللي
فضلت عايشة جوانا سنين و سنين و أجيال ورا أجيال و الفكرة بتفضل مكررة بس الفرق
بيبقي في أحلام كل واحد فينا...يعني اللي هيصرف المليون كله و في الاخر يرجع زي ما
كان و في اللي هيشتغل بيهم و بدل المليون يبقوا 100 مليون...هو دة بالظبط اللي
بيحصل في فيلم طلق صناعي...فكرة الحلم علي الحصول علي جنسية أوروبية او يعلي بيك
الطموح و تبقي عايز جواز السفر الأزرق...و محدش فينا محلمش بالحلم دة " عيني
في عينك كدة...بذمتك محلمتش قبل كدة بالجنسية المنقذة" علي الأقل لو مش عشانه
فهيبقي عشان خاطر عياله
-قصة الفيلم باختصار ان واحد عايز يولد مراته
في السفارة الامريكية عشان ولاده ياخده الجنسية...هو دة ملخص الحدوتة...تعالوا بقي
للتفاصيل من غير أي مقدمات طويلة
و اول ما تشوف أسماء الاخوة دياب علي التتر
هتضمن انك تنفيذ مختلف حتي لو الفكرة مكررة...بيبدأ الفيلم انهم بينادوا علي حسين
"ماجد الكدواني" عشان يروح علي الشباك عشان يعمل المقابلة هو و هبة
مراته "حورية فرغلي" و هنا هتلاقي " لو انت مذاكر مقال الكدواني
" ان الرجل دة عنده القدرة انه يمثل بالنضارة و بحركة جسمه اللي بتبين انه مش
مركز في المقابلة علي قد ما هو مركز في حاجة تانية خالص و دة بيبان قوي لما مراته
بتسأله الشركة بتاعته بتشتغل في ايه فيرد الكدواني بحالة من قطع التركيز و في نفس
الوقت انه عايز يخلص "بيع كتب مدرسية" و هتكتشف عدم اهتمامه اكتر لما
بيترفضه و تحاول حورية فرغلي انها تقنع الموظفة تاني فيقولها "خلاص يا هبة مش
هنتحايل علي حد" و هنا الكدواني بيمثل علي التمثيل انه بيمثل انه مش همه و هو
بيمثل دور حسين اللي هيموت و يسافر برة...و يتألق الكدواني و حورية فرغلي في مشهد
انه بيقنعها انها تاخد دواء يسرع من انها تولد و هي رافضة و خايفة و هتحس انك قدام
اتنين فعلا متجوزين في السيدة زينب و الدنيا فرماهم...و كمية الوجع اللي ردت فيه
حورية فرغلي لما قالها "دة عشانهم" فترد عليه " بس المهم انه مش
علشاني انا "
لا نسيت صحيح اقولك ان حورية فرغلي سألته انت
مش خايف عليا...فيرد الكدواني بعينه...و الله العظيم بيرد بعينه انه مرعوب علي
مراته بس ما باليد حيلة
-و يجي وقت ظهور مي كساب في دور اتكرر كتير
جدا في الفترات الأخيرة و بقي ممكن أي عنده خفة دم و لو بسيطة يتألق و يبان فيه و
هو دور الست اللي بترجم العربي حرفيا للانجليزي و اللي حط البذرة لنوعية الأدوار دي
بدرية طلبة في فيلم لا تراجع و لا استسلام و حتي تحس و انت بتضحك علي مي كساب انك
سمعت الكلام دة قبل كدة كتير بس مش فاكر فين
-و بيجي تحول في الاحداث يكون كلمة السر فيها
ماجد الكدواني لما مراته بتتأخر في الحمام و يحاولوا يدخلوا عليها و يتحول الشخص
المغلوب علي امره دة لجبروت كبييير ...و لخاطف كمان عشان يقدر يوصل لحلمه...و هنا
في المشهد مش هتلاقي كلام من الابطال بس هتلاقي تعويض ميقلش عن الكلام...هتلاقي
موسيقي الرائع تامر كروان "موجود برضه علي التتر علي فكرة" بتعوض لغة
الحوار بموسيقي ممزوج فيها ضربات القلب الخايف مع المخاطرة بأي شيء عشان توصل
لحلمك المزعوم
-و بعد ما بيخطف الكدواني المسدس من الامن
بيطلب طلب بمنتهي عفوية المواطن المصري " مراتي تقعد نص ساعة في الحمام"
و يبدأ التتر يا معلم عشان يعلن عن بداية
الفيلم عن طريق الفلاش باك
و عايزك تركز قوي في جملة الامن و هو بيقول
للكدواني و هم بيعدوا بوابة الامن " من ساعة ما عديت الباب دة انت معوتش في
مصر...بقيت في أمريكا...هنا في نظام"
-في واحد بقي عايزك تركز معاه لانه فعلا كان
بالبلدي كدة منور في الفيلم دة ...اكرم الشرقاوي او اندرو في الفيلم و هتشوف قد
ايه هو أتمكن انه يوصلك من اول مشهد إحساس غطرسة المواطن اللي شايف انه نوع اعلي
من البشر و انه لا حول الله اترمي في مكان شغل في دولة هو شايفها اقل
بكتيـــــــــــــــــر من بلده و انه أهلها كلهم بيكدبوا حتي اللي بيحب البنت
اللي هو عايزها تحبه...و مينفعش الكدواني يفوت لفرصه من غير ما يرمي افيه لما قال
علي اندرو "دة لو هو نفسه أتقدم...مش هيدي لنفسه الفيزا"
-و يبدأ بقي طابور العرض عشان لو عايز تسافر
لازم يبقي عندك حاجات كتير زي ما بتقول الأسطورة...فنبدأ بنموذج مشهد الشواذ و
اللي بيختلط فيه حياء المصريين انه مينفعش حد يقول كدة بشكل صريح و قد ايه "سيد"
مكسور انه بيتقال عليه شاذ لمجرد انه عايز يسافر و يبقي خايف انه حد يشوفه عشان
رجولته متتجرحش و دة يبان لما قال "اعوذ بالله من غضب الله...شمال"
-و عشان تيجي تسافر لازم تكون ميسيحي مضطهد
كما تقول الأسطورة برضه بس الشهادة لله اتعملت بشكل برضه حلو و دمة خفيف جدا لما
عمله ممثل اسمه محمد جمال قلبظ " محمد عبد التواب في الفيلم" لما بتسأله
الموظفة انه في الورق مسلم فيرد عليها برد في منتهي الغلب "الدين و الايمان
في القلب مش بالورق...و انا قلبي فيه يسوع"
-و يجي رزانه أداء اكرم الشرقاوي لما بيقولها
" دة كداب...اللي هنا و بيتنده علي اسمه. يطلع حتي من غير بنطلون"
-وسع وسع وســـــــــــــــــــــــع...دة عم
سيد رجب وصل و من اول وصول الرجل دة لازم تتأكد انك هتشوف حاجة في منتهي الاتقان و الحلاوة من اول ما بينزل و بيعرف نفسه و قال
" الاميرال حافظ البرديسي ...مانجر في سيكيوريتي اوف ...ايه يا
بني""
و يرد عليه الظابط اللي جنبه سكيوريتي
فيرد" ما انا قولتها يا بني "
-تعالي بقي نشوف شوية مشاهد مش هتنساها مثلا
لما الكدواني بيقول لاندروا انت من ساعة ما عديت من الباب دة معتش في مصر ...بقيت
في امريكاا و هنا في نظام " ما هو برضه المصريين مبينسوش حقهم
-تعالي شوف بقي حرفنة سيد رجب لما قال للسفير
بمنتهي العقل و الرزانة "انا خبير استرتيجي في التفاوض" و اول ما يمسك
الموبايل يظهر وش امين شرطة قسم الخليفة لما قال " حسين عبد السلام معايا؟
دكتور مين ياض يا ابن ***...فاكر نفسك في الشيراتون تطلب و احنا ننفذ"
و يتحول تاني فجأة لما بيقول للسفير " ي
فندم اهدأ يا فندم...الموضوع مش محتاج تهور...اوعدك هتتفاجئ" و يتحول تاني
" بمنتهي الهدوء و يبص للسفير من جنب عينه و يقول و الله يا ابن الكلب لو
متطلعتش علي رجلك لادخل ارجعك علي ضهرك"
-و يجي دور مدرسة الافيه الرايق اللي عملها
مصطفي خاطر بشكل موزون و محسوب قوي و دة يرجع بصراحة للمخرج...لانك لو مجمتش
كوميديان موهوب ممكن الموضوع يوسع منك قوي ...لما قال انا دكتور "قلب و اذن و
حنجرة" ...او لما قال " انا هازق انت تسحب"
-في حاجة كدة صغيرة اللي عملها دماغة عالية
بصراحة انه عمل نغمة موبايل سيد رجب " قوم نادي علي الصعيدي" ...و نيجي
بقي للجزء المحبب ليا و اللي كل ما اشوفها قلبي بيفرح...انعام سالوسة و مينفعش
تيجي غير لما تسيبلك افيه يوقعك من الضحك لما الظابط يسألها بنتك حامل فترد ست
الكل بمنتهي الخوف و العفوية و تقوله "بس و الله العظيم من جوزها"
في مشاهد بقي حلوة كدة لازم نركز عليها
-مصطفي خاطر لما قال للكدواني عن إجابة الدكنور
و قال" الرجل بيقول كلام زي الفل...شغل فنادق" فيسأله الكدواني
"دكتور يعني" و يكمل خاطر الافيه الموزون " انا شبهت علي الانسولين
و حاسس انه دواء"
الكدواني يسكت ؟؟ و الله ما يصح ...فيقوله
" دة انا لو جيبت محاسب قانوني هيعرف يعني ايه انسولين" ...شوفت بقي
الكدواني و هو بيرمي الافيه...تعلي شوفه لما بيكتشف ان الدكتور دة كان مقدم علي
فيزا و بيقوله عشان عيالك دول أطفال مصريين و ليهم حقوق مصرية فيرد الكدواني
بالبلدي كدة قصف جبهة و يقوله " انت لو مصدق نفسك مكنتش قدمت لعيالك علي
هجرة"
و لما صاحب مصطفي خاطر بيقوله ايه يا لانشون
خدت الفيزا فيرد خاطر يقوله "انا هنا خدت كل حاجة ما عدا الفيزا "
-في مشهد معمول بحرفنة قوي من اللي عامل نفسه
ميسيحي لما طلبه منه انه يصلي و انه مش علي نياته لدرجة انه دخل الادعية علي
الترانيم علي الجلاش علي كل حاجة" و قفلها لما بيقول "صلي الله عليه و
سلم و بارك علي سيدنا محمد ...و المصحف ميسيحي "
-عم سيد رجب لما سأله الفنان القدير عبد
الرحمن أبو زهرة و بيقوله عملت فيه ايه يا حافظ...فيرد حافظ بمنتهي الثقة و يقول
" المصريين يا فندم خلاص مباقوش يستحملوا..فين المصري بتاع زمان"
و مكملين مع سيد رجب لما قال " القناصة
المصريين احسن قناصة في العالم..معروفة"
و يكمل بعدها بعد ما يعرف انه الهدف لسه عايش
" الداخلية مفيهاش قناصة...معروفة"
-و تشوف الدهن في العتاقي لما سيد رجب و عبد
الرحمن أبو زهرة بيعملوا افيها سوا لما طلبوا جواب شكر من السفير لوزارة الداخلية
و لرئيس الوزراء
و تتوالي احداث الفيلك بنفس فكرة تعاطف الشعب
و استخدام السوشيال ميديا في اظهار التعاطف دة و طبعا لازم تقوم مظاهرات زي أي تعبير
عن حالات التضامن بس اخر حاجتين في الفيلم كانوا هم لقطتين الاوسكار للكدواني اللي
بيثبت انه كلمة سر في أي مشهد حلو بيتعمل ...اول حاجة لما ابنه الأول بيوصل للدنيا
و تشوف تمثيل ماجد الكدواني بتعبيرات وشه تبقي عايز تقوم تصقف و تاخده في حضنك
...و قبلها لما قال " انا عارف اللي باعمله مش صح..بس متسابليش غير الغلط
اعمله ...و الغلطان يتحاكم ...مش يموت هو و مراته و عياله " و تحس ان
المجاميع في المشهد بيستمتعوا بكل اللي بيقوله زيهم زيينا
الفيلم عامل بالظبط زي علبة الشمعدان اللي
ليها تصميم جديد بس هو هو طعم الشمعدان...و مش حاجة سهلة انك تعمل شكل مختلف لطعم
محفوظ و متكرر...و اختيار ابطال العمل اللي يعملولك الشكل الجديد اصعب و اصعب و دة
يتحسب جدا لكلا من خالد و محمد و شيرين دياب
و شكر خاص لخالد دياب ...برافو جدا انك قادر
تبقي مايسترو لكل النجوم دول
-ماجد الكدواني : خلصت فيك كل الكلام
_حورية فرغلي : شكرا علي صدق ادائك
-مي كساب :لسه عندك كتير
-مصطفي خاطر: اتقل هتاخد حاجة نضيفة
-اكرم الشرقاوي : اعمل شرير
-انعام سالوسة : انتي ست الكل
-بيومي فؤاد: انت بتنام امتي؟
-محمد جمال : هتبقي نجم في الدور التاني و التالت
-محمد علاء"سيد" : فيك حاجة لسه مجتش
-علي الطيب : انت ابن بلد فقري "دمك
خفيف يعني متفهمش غلط"
-عبد الرحمن أبو زهرة : الموهبة عمرها ما
كانت بالسن
-سيد رجب : ختامه مسك يا عمنا
#طلق_صناعي
#التتر
#كريم_مجدي
