George Sedhom 29-3-2020

القرش الابيض ينفع في اليوم الاسود ...و يا بني امسك ايدك شوية ...حوشلك قرشين ينفعوك وقت زنقة ...اكيد جالك وقت من الاوقات و سمعت جملة من الكلام دة سواء بصيغة النصيحة او الامر ..و في مننا اللي بيحوش تحت البلاطة بنظرية البخيل و انا و في مننا اللي قلبه جامد شوية و بيقرر يعمل مشروع  و في الحالتين بيبقي هدفك ان لما يجيلك وقت زنقة يبقي لك ضهر تتسند عليه او تسيبه لعيالك يعيشه منه (دة طبعا بعد التربية )

و عشان تعمل كدة مش هتيجي غير بمجهود و مجهود مش سهل ...يوم ورا التاني يعدي...يوم حلو جدا و يوم صعب قوي ...و لازم تكون مؤمن ايمان كامل و يبقي عندك يقين انك هتوصل للي انت عايزه ...و عشان تحوش في عالم الفنون يا تحفر في الصخر بموهبتك يا تستني ضربة الحظ و الاصعب ان يكون وقتك جاي بتحكمه جودة المواهب و مفيش شهرة غير لما فعلا تكون موهوب

-لما تيجي ترجع بالزمن لورا شوية هتلاقي موهبة غريبة كدة ...متعرفلهاش تعريف او تحديد ...تشوفه بس يرسم علي وشك ضحكة امل ...يوحشك و هو غائب ...تحس انه واحد منك كدة...شوفته قبل كدة و اتكلمت معاه كمان...تقتنع ان حد في مرة قاله دعوة و باب السماء كان مفتوح و قاله ربنا يحبب فيك خلقه يا جورج يا سيدهم

-عم جورج دايما تحس ان موهبته عاملة زي تحويشة العمر وقت ما تحتاجله هتسحب منه ...عم جورج في اي عمل هتلاقيه سند و ضهر للي حواليه ...دايما هتلاقي عنده فرش الافيه اللي يوقع من الضحك ...مش مهم هو يضحك بس المهم ان الضحك يتعمل ...و لو دورت شوية كمان ب 10 جنيه كدة هتلاقي ان عم جورج عمل معادلة صعبة جدا جدا ...انه كان تحويشة عمر للي حواليه و لنفسه ...مش سهل انك تلاقي ممثل الظروف منعته انه يكمل مشواره الفني اللي كان ناجح جدا و يفضل موجود علي شوية الاعمال علي حبة الضحك اللي حوشهم لنفسه و للناس

-جورج سيدهم كان اخر حجر اتزان في مسرح سمير غانم ...و بالرغم من موهية سمورة العبقرية علي المسرح الا ان بعد جورج سيدهم هتلاقي مستوي الافيهات نفسه اعتمد علي عوامل تانية كانت اقل بكتيييير من عم جورج ...ما تيجي نشوف تحويشة جورج سيدهم كانت عاملة ازاي :

-و عشان الدعوة استجابت و عشان جورج سيدهم موهبة تخليك تضحك من مجرد النظر بالعين فأي دور حتي لو صغير هتلاقيه منور و باين و مؤثر و دة يبان جدا لو هو لوحده ...يعني تعالي شوفه في صميدة عبد الصمد الجرسون في فيلم كرامة زوجتي و هتلاقي وقت ظهوره بيضيف مرح كدة عامل زي لما تجيب لعبة لطفل و تلاقي لمعة الفرحه في عينه

-تعالي شوفه مثلا في دوره الصغير جدا في اونكل زيزو حبيبي لما عمل دور ظريف المذيع و كلمته المشهورة "بعد ما احكيلكوا حكاية الفيل هاحكيلكوا حكاية الدرفيل" و ديالوج مخدش 10 دقائق في وسط فيلم ساعتين بس هتفضل علامة في تاريخ السينما ...زي لما طلع في دور صغير في "غريب في بيتي " و تحس ان رزقه ان جه ان الفيلم كله قائم علي مبدأ النصاب اللي هو عامله

-موهبة عم جورج مش بس كوميدية ...عايزك تركز في لسنا ملائكة و اتفرج علي المشهد اللي بينعي فيه الضيف احمد و هتلاقي انه فعلا بيعمل اي دور باحساس تمثيلي او حتي واقعي ...تعالي شوفه كمان شوفه في دور حسني في فيلم الجراج و دة بعيد عن الكوميديا ب مش بعيد عن موهبة جورج سيدهم ..او مثلا عبد الرحيم في فيلم "الشقة من حق الزوجة"  و دور المدرس اللي ماسك في ايده الطباشير دايما و هتلاقي في كل دور تحويشة صغيرة بتعمل رصيد انساني بيكبر يوم عن التاني

-مينفعش تعدي سيرة جورج سيدهم و منقولش ثلاثي اضواء المسرح اللي كانوا سابقين عصرهم حرفيا و فعليا في الاسكتشات و اللي لو سمعت الاسكتشات دي مليون مرة كل مرة هتفضل تهز في رجلك و تغني معاهم و لازم تفتكر اسكتش "ابناؤنا في الخارج" و هو بيقول انا الطــــــــــــالب عبد المعطي عبد الحق جاد الحق شراب عضو البعثة التعليمية بالمعهد الزراعي ...و مش هتقدر تنسي كل مرة جورج سيدهم عمل دور ست و كان لايق عليه جدا و تشوفه فعلا ست حلوة ...او دوره في اسكتش يرضيكي يا ماما حوا ...مبسوط يا بابا ادم  و هتلاقي فيه بهجة ممزوج بحدوتة مأساوية

**خد نفس كدة و قوم اعملك كوباية شاي عشان اللي جاي حلو...اللي جاي مسرح

-تعالي شوف حسن في مسرحية موسيقي في الحي الشرقي و هتحس انه طفل من ضمن الاطفال اللي موجودين مع سمير غانم ...وقت ظهوره في مع كل مشهد هتلاقيه زي خزانة الفلوس بيفرش الافيه لاي حد عايز يخرج ضحكة من الجمهور ...زي ما هتلاقيه بالظبط في مسرحية جوليو و رومييت و الغريب يا اخي انك متحسش انه البطل بس لما تخلص المسرحية اول واحد بتفتكره هو

-جورج سيدهم قدر يقدم صورة كوميدية للدكتور صاحب الضمير و المبادئ لما عمل دكتور الزناتي خليفة في مسرحية اهلا يا دكتور و في المسرحية دي هتلاقي طاقة تحويش لعم جورج مش طبيعي ...كوميديا واثقة من نفسها كدة ...ارجع كدة اتفرج علي المسرحية دي و شوف تأثير جورج علي المسرحية في وقت غيابه و وقت ظهوره

-خد تعالي كدة...المسرحية اللي جاية دي بقي مش محتاجة مذاكرة ...دي عاملة زي التطعيم كدة ...محفورة

-حنفي في مسرحية المتزوجون و في المسرحية دي بالذات هتتأكد من موهبة جورج سيدهم من فرش الافيه لعتاولة المسرح زي سمير غانم و نجاح الموجي (اللي له مقال في الصفحة ) يعني مين ينسي الحوار بينه و بين نجاح الموجي لما قاله تعرف ايه عن سياسة الوفاق و رد عليه نجاح لموجي لما قاله يا بخت من وفق رأسين في الحلال فيرد باقوي رد (دي سياسة امك دي )

او لما فرش افيه من اشهر افيهات نجاح الموجي لما قاله بتفهم في السياسة ياض يا مزيكا فيرد نجاح الموجي (انا الشعب ) ...او لما قال لسمير غانم مش دي اللي كان لونها بيج يالا ....او جملته المشهورة يا نفيسة الانسان بياكل عشان يعيش مش يعيش عشان ياكل ...او ساعة لما اتشقلب في مشهد الاكل اللي كان فيها انفجار ضحك للناس عايش و هيفضل عايش

في نهاية الكلام و مش نهاية سيرته ...يفضل جورج سيدهم تحويشة ضحك وقتها يجي ساعة لما تحتاجها ...و اللي يسأل علي حنفي ...حنفي ساب المعمل و في مكان احسن دلوقتي ...الله يرحمك يا عم جورج

#تحويشة_العمر

#جورج_سيدهم

#التتر

#كريم_مجدي

bahgat Kamar 24-3-2020

و زي ما بتقول العادات و التقاليد ان لكل مشكلة حل ..المهم الاول انك تعترف ان في مشكلة من الاساس (متخافش مش مقال تنمية بشرية) ...و عشان تدور علي اي حل محتاجه لازم تشوف المشكلة من برة و تدي لخيالك تصريح مفتوح يحط اي احتمالات ممكن تحصل و ممكن اكتر متحصلش

و في عالم المسرح و السينما مشكلة كبيرة مش اي حد بيلاقي الحل...مشكلة انك تعمل حاجة تعيش اجيال ورا اجيال من غير ما يبقي ليها تاريخ صلاحية محدود...حب متجدد لاي عمل بيزيد بعد ما تتفرج عليها مرة بعد مرة ...عمل فني يتحول خلال السنين لمكتبة تحكي اللي فيها لاولادك و احفادك...تاريخ ملموس و محفور في دماغ كل الاعمار

حسيت بالصعوبة ؟؟؟ تعالي بقي اصعبهالك اكتر

-فكرة انك تمثل قدام الكاميرا و تعمل تاريخ حاجة صعبة بس انك تكون صاحب الفكرة في بداية عمل ينفع يبقي تاريخ فانت بقيت حل المشكلة و عشان كدة لو دورت في المسرح اللي هو اصعب المشاكل هتلاقي حل اصيل لمشكلة تاريخ المسرح...حل اسمه بهجت قمر

-بهجت قمر هو حل لمشكلة انك تقرر تعمل عمل فني يعيش و مالوش علاقة لا بتاريخ و لا بزمن ...موهبة بهجت قمر في الاساس هي سهولة الحوار لدرجة انك تحس ان معظم اللي بيتقال دة ارتجال او مش لازم حد يكتبه و دة في حد ذاته اصل موهبة بهجت قمر...فكرة بسيطة يوصلك بالحوار انه يفضل محفور جواك سنين ورا سنين ...و الحقيقة لما تيجي تذاكر الرجل دة (ايوة مذاكرة من بتاعت الورقة و القلم دي ) هتلاقي نفسك بتضحك و بتقول هو العمل دة كان تأليف او حوار بهجت قمر ...علامات كان هو اول اسم محطوط علي الورق ...بعدها الورق اتحول لتمثيل و التمثيل اتحول لتاريخ يتحكي و يتقال عليه مقالات ...عرفت بقي حل المشكلة ؟؟

**تعالي بقي نشرح الحل ...نبدأ بحل مشكلة المسرح

-بهجت قمر حرفيا بيدينا عيدية في كل عيد بيعدي علينا سواء الجيل بتاعنا او اللي قبلنا او حتي اللي بعدنا (دة لو الكورونا حل عن سمانا ) ..عارف خالك الغني اللي كان يديك اغلي عيدية ...اهو بهجت قمر بقي خالنا الغني بتاع المسرح ....يعني مثلا مينفعش العيد يعدي من غير العيال كبرت ...اهو بقي العيال كبرت علي ايد بهجت قمر بكل شخصياتهم اللي حية جوانا لحد دلوقتي (سلطان و عاطف و كمال و سحر و بابا رمضان و ماما زينب ) فكرة بسيطة لاسرة مصرية تفضل حكاية و تاريخ ضحك من القلب ...فكرة عملت من مسرحية مصنع نجوم و طاقة ضحك متجددة كل ما تشوفها

-و تاني ايام العيد هيعيد علينا بمسرحية ريا و سكينة (شوفت استغربت ازاي ) و المسرحية دي فيها من الحوار اللي بيتعامل معاملة الاقوال المأثورة و محفورة في قلوبنا قبل دماغنا...و كان الحوار مصدر من مصادر القوة اللي خلت من المسرحية دي حجر اساس في تاريخ المسرح الكوميدي...و من مميزات الكبيرة اللي هتلاقيها في بهجت قمر انه ممكن يبقي حل لمشكلة انه يعمل حوار من فكرة اساسا واقعية و ينقلك من متفرج لقصة كانت موجودة لحوار انت بتعيشه في اي زمن بتكون فيه ...و دي حاجة مش سهلة ابدا

**لسه العيد مخلصش ...اتقل بس

-لما تتفرج علي شارع محمد علي و هتتفرج علي ملحمة مسرحية ...من المسرحيات القليلة اللي هتلاقي فيها كل حاجة من استعراض لدراما لضحك طبعا...و من المميزات العبقرية في المسرحية دي ان اي حد له حتي مشهد واحد هتلاقيه بيضحك زي عمنا و عم التتر يوسف عيد (اول مقال علي التتر) او ثريا ابراهيم (ليها برضه مقال علي التتر ) ...في المسرحية دي هتلاقي بصمات بهجت قمر انه حول شارع موجود لحوار تحس انك سمعته و بتسمعه و هتسمعه كل شوية ...حوار مش مستغربه بالعكس انت عايش جواه ..مسرحية مشاهدها تليق علي اي موقف موجود في عصر السوشيال ميديا ...حوار مش واقع حتي في مشهد واحد...في توازن غريب و دة حل مشكلة كبيرة في عالم المسرح...انك متجيش في حتة و تجريها ...حتي يبقي عيب في حق المؤلف

-و نكمل مع شريهان (اللي ليها مقال برضه علي الصفحة ) و نشوف عشان خاطر عيونك مع الاستاذ فؤاد المهندس و من العلامات الكلاسيكية في تاريخ المسرح و تحس انها مسرحية ماشية في خط لوحدها كدة

-و من جبروت بهجت قمر انه يكون جزء من جريمة انك تشوف امينة رزق بتعمل كوميدي و بتعمله حلو في مسرحية انها حقا عائلة محترمة...مسرحية واخدة نفس خط الهدوء و في ضحك كتير جدا بين الرائعين المهندس و شويكار

  اه صحيح ...طالما جيبنا سيرة المهندس و شويكار لازم اقولك ان بهجت قمر كان شريك اساسي في حالة النجاح اللي كان بينهم لما عمل حوار عن سيدتي الجميلة ...المسرحية اللي فيها هتعرف حلول بهجت قمر لما تلاقي من اكبر واحد لاصغر واحد مساحته محفوظة من الضحك...سيد زيان و فاروق فلوكس للجميل حسن مصطفي ...دة جمال سليمان يا رجل كان كوميدي ...مسرحية فيها حيوية القرن الواحد و العشرين ...حوار لو اتعمل بالالوان دلوقتي ممكن يجيب اعلي ايرادات في المسرح

-في مسرحية اسمها انا فين و انتي فين بطولة الثنائي برضه المهندس و شويكار ...دور عليها و اتفرج و مش هتندم و اسيبك بقي تكتشف بصمات بهجت قمر فيها

و عشان اللي يعمل مسرح يعمل اي حاجة تانية تعالي نبدأ رحلة السينما بنقطة نهاية المسرح (في المقال )

يعني تعالي نشوف مثلا سفاح النساء اللي كان فيه الحوار هو بطل العمل او فيلم انت اللي قتلت بابابا و هتلاقي بقي في الفيلم دة بالذات محمد رضا (المقال اللي جاي ) هو بطل الفيلم مع ان مشاهده قليلة بس الحوار عمل منه اهمية غير طبيعية

-من المعشوقات في السينما مع العملاق فريد شوقي 30 يوم في السجن و استمتاع غير طبيعي بالحوار اللي ما بين الابطال علي مدار الفيلم من غير لا زهق و لا ملل و هتلاقي طاقة الضحك المتجددة مكملة معاك

**لسه مخلصتش ...اتقل تاخد حاجة نضيفة

-بهجت قمر عمل فيام قضية عم احمد و ساعتها هتلاقي نفسك بعيد خالص عن سكة الكلام اللي فوق بس برضه هتلاقي الحل ان الحوار هو البرواز اللي بيحط شكل جميل للفكرة و بيدي مساحات للممثلين انهم يعملوا تاريخ مصور مش مجرد اعمال فنية

-مشكلة انك تعمل حاجة تعيش مع اختلاف الازمان و الاذواق بس حلها مع بهجت قمر

#حل_المشكلة

#بهجت_قمر

#ما_تعمل_شير

#اعمل_شير_لك_كحول_هدية

#التتر

#كريم_مجدي

هاني شنودة

عمرنا ما هنتقدم ابدا طول ما احنا شغالين بالورق كدة؟؟؟ بذمتك يا شيخ كام مرة قلت او سمعت الجملة دي ؟

قول متخافش يا جدع ...ما هو اصل مفيش حد فينا معداش علي مصلحة حكومية و كان ختم النسر مش باين او داخ عشان يختم ورقه بختم النسر

ختم كدة لو موجود علي اي ورقة بتبقي مضمونة و فيها الثقة الكاملة انها تبقي سمسار بين الناس و بعضها...يعني لو معاك ورقة مختومة بختم النسر اعتبر نفسك تعرف تعمل اي حاجة...و علي قد العذاب اللي بتشوفه لحد ما تشوف الختم بعينك علي الورقة بتاعتك علي قد ما في ختم نسر تاني ممكن يبقي معاك بمنتهي السهولة و من غير مجهود و لا عصبية و لا سنين تعدي في الطوابير

لا رشوة ايه انت هتحبسنا؟؟ اهدي كدة و صفي النية و تعالي اشرحلك

-عارف الحالة اللي بتجيلك لما بتقعد تغني لحن اغنية و تبقي نفسك تعرف اسمها و تبقي عايز تسأل جوجل و تقوله ايه الاغنية اللي اولها تارتارتا ...و تسأل جوجل و التتر موجود ؟؟؟ و الله عيب

-من الناس اللي قدروا يعملوا موسيقي تتشال في دولاب الذكريات...لوحة جميلة تتعلق في مدخل الشقة عشان تديله طعم...نوستالجيا الاجيال ...موسيقي تقولك انت مهما كبرت و عدي العمر بيك هاخليك شباب و تقول الله

-هاني شنودة او صاحب ختم النسر في الموسيقي ...لما تيجي تدعبس او لو زي حالاتي تذاكر هاني شنودة لازم تخلي بالك عشان هتندهك النداهة و هتتحول من تلميذ بيذاكر لعاشق بيستمتع بحب الموسيقي ...موسيقي هاني شنورة تقدر تقول عليها موسيقي متجددة و كل ما تسمعها هتكتشف فيها حاجة جديدة ...في تفاصيل الموسيقي هتلاقي الفرحة موجودة ...فرحة مفاجأة هدية عيد ميلادك...ابتسامة اول ما تشوف حبيبتك...ايد بتخبط علي الرجلين اللي بيتهزوا عشان تمشي مع الموسيقي

-و لما تسمع موسيقي هاني شنودة هتعرف انها زي ختم النسر بتركب علي اي حاجة...انواع مختلفة من الافلام منها الدرامي و الكوميدي بس فيها شئ مشترك جواه تفاصيل مختلفة و لكل لحن تفاصيله و لكل عمل ذكرياته المستقلة ...و دي صعب تلاقيها في اي حد ...الحالة اللي بيعملها هاني شنودة في اي لحن بيشيل اسمه صعب انك تلاقي موسيقي بعمر الشباب مهما عدي عليها الزمن

ما تسيبكوا من جوجل شوية و تدوروا علي هاني شنودة جوة التتر؟؟ سيب جوجل يا استاذ و خليك هنا

-عارف اول ما اقولك شمس الزناتي ايه اللي هيجي في دماغك؟؟؟ ايــــــــــــــــوة زي ما مخك بيقول لودانك كدة حالا (تا تا ...تا تا ....تا را را ) افتكرت موسيقي هاني شنودة اللي خلت من الفيلم هدية حلوة جيل يديها من بعد جيل...و ممكن تفتكر احداث الفيلم كله من الموسيقي ...و لو ركزت في الموسيقي هتلاقي فيها تفاصيل الفرحة و حركة الخيل و الصحوبية و الجدعنة و حتي لما ايقاع الاغنية يهدأ هتفتكر لحظات الضعف و الهزيمة في الفيلم مع انه نفس اللحن

-تعالي اتفرج علي فيلم المولد و هتفتكر الموسيقي و تربطها برضه بأحداث الجري ...و الحقيقة انك هتلاقي شخصية هاني شنودة في اللحن دة عشان هتلاقي فيه مزيج من الدراما شوية اللي فيها مشاعر اللي هتلاقيها برضه صوت و صورة في احداث الفيلم ...تفاصيل بيعملها و هو عارف سرها...عارف سر ان الموسيقي تتحول من مقدمة للفيلم لفيلم تاني تأليف و تمثيل و اخراج هاني شنودة

-يا جماعة يا جماعة كل يوم عاملين اذاعة...دي مشاكل عائلية...شئ بيحصل كل ساعة

اراهنك انك تكون قرأت الاغنية كلمات بس ؟ عرفت بقي انها زي هدية عيد ميلادك اللي كنت مستنيها من زمان...تتر عائلة شلش اللي لحد دلوقتي لو اتركب علي اي مسلسل هينجح...موسيقي التتر تسمعها بنفس هادئة ...حاجة كدة لو مخنوق شوية و سمعتها صدفة هتدي لنفسك اجازة دقيقتين تغني مع اللحن و ترجع لمشاكلك عادي بعد كدة

-تعالي اسمع تتر غريب في بيتي هتلاقي فيه شقاوة سعاد حسني مع الاداء الحلو و الكوميديا من نور الشريف و الحقيقة ان للفيلم دة طبيعة لوحده كدة...هتبقي فاكره باحداثه و تربطها بالموسيقي اللي حصلت ساعتها في المشهد و دي حاجة مميزة من الطرفين

-نكمل مع الزعيم و نشوف نوعين مختلفين من الافلام مع موسيقي صاحبها واحد...الافوكاتو و كوميديا في التمثيل و الموسيقي ...الموضوع تفاصيله في لحن قادر انه يرجع بك بالزمن من غير ما تحس لا بغربة و لا تضايق لو فضلت تعيد فيه...و موسيقي الغول ...موسيقي انسانية فيها خيوط الظلم اللي هتلاقيها ماشية بالتوازي مع احداث الفيلم و بتعبر عنه

-فاكر مشهد السرقة اللي فيلم عصابة حمادة و توتو ...يا جدع مش الموسيقي ؟؟ المشهد

برضه مصمم انك فاكر الموسيقي ...ما هو برضه السبب اللي خلاك تفتكر تفاصيل المشاهد باللحن

-دور كدة علي لونجا 79 ...يلا دلوقتي ...انا مستنيك مش هاكتب حاجة

سمعتها قبل كدة صح بس مش عارف فين؟؟ دوس علي نفس شوية يا جدع

بالظبط كدة هي موسيقي الكاميرا في الملعب و الرجل اللي بيشوط و يكسر الجون اللي معمول بالطوب...اهي دي بقي لحن عادي و الاجيال سمعته برنامج كرة...مش باقولك ختم نسر

-من الحاجات اللي عمرها ما تتنسي من تاريخ السينما و اللي الحقيقة باعتبرها افضل حاجة اتعملت في تاريخ صناع الفيلم...فيلم الحريف ...و عشان الواحد يقول الحق ...الفيلم من اكبر واحد لاصغر واحد كانوا في مستوي الابداع فما فوق ...بس عشان المقال عن هاني شنودة فلازم التتر يديله حقه...موسيقي الحريف بالذات قدرت توصل كل المعاني الانسانية الصعبة في صورة لحن بطعم المشي في شوارع وسط البلد و خلي من الشوارع حواديت...حواديت توديك ازمات و توصل لحلول في وسط الحواديت ...موسيقي يتبني عليها مليون حدوتة و حكاية ...كل مشهد في الفيلم هتلاقي ترجمته الموسيقية في لحن هاني شنودة

-ٍلما تقرأ اغاني صلاح جاهين هتحس فيها بدلع سعاد حسني بس هاني شنودة قدر يركب لحن فيه الدلع بيزيد لما عملوا ماشية السنيورة و اللي هتفضل موجودة سنين ورا سنين

-الحقيقة في موسيقي حلوة كتير حوالينا ...بس في موسيقي مضمونة بضمان البقاء و الذكريات...موسيقي مختومة بختم النسر...موسيقي هاني شنودة

#هاني_شنودة

#ختم_النسر

#الموسم_الثامن

#التتر

#كريم_مجدي

#مش_هازعل_لو_عملت_شير