محمد خان

كل حاجة في الدنيا حكاية ...حياتنا حكاية...و كلامنا حكاية...و الصح حكاية و الغلط انك تعمل عكس الحكاية...و عشان تبقي بطل الحكاية مش هتيجي بين لحظة و التانية ...اصل انك تبقي بطل في وسط تفاصيل حياتك مش حاجة سهلة و البطل لازم يبقي فاهم كل تفاصيل حكايته اللي عايش جواها حتي و هو مش موجود في المشهد بس يبقي عارف اللي بيحصل حواليه...الموضوع صعب انا عارف بس عشان يتقال عليك بطل ..و الموضوع يستاهل صح؟ بس قبل ما تقول صح لازم تفكر في سؤال مهم جدا؟؟

**هي الحكاية لازم يبقالها بطل واحد؟؟ ما هو ممكن يبقالها اكتر من بطل ؟؟

**شوفت راجعت تفكيرك ازاي؟؟

-الحكاية ممكن يبقالها ابطال كتير بس اصلها لازم يكون واحد و دي بقي مرحلة تانية خــــــــــــــــــــالص ...اصل الحكاية هو اقوي حلقة فيها...مش مهم تكون ايه الحكاية بس المهم اصل الحكاية ايه عشان لما تعرف اصلها هتاخد قرارك هتدخل عالم الحكاية و لا تاخدها من قاصرها كدة و تقول لا يا عم مش هالعب

-و عشان مينفعش مقدمات كتير المرة دي بالذات "و عشان لسة هنتكلم كتير قدام شوية" ...ندخل في الموضوع

-لما بتيجي تختار فيلم تتفرج عليه يوم الاجازة و انت قاعد علي الكنبة جنبك فنجان قهوة و شوية فشار و لو ملكش في جو الدباديب دة خليك زيي و اضرب اكل و انت قاعد بتتفرج...اول حاجة عينك بتيجي عليها اسم بطل حكاية الفيلم صح ؟؟

بس بعد المقال دة اوعدك مش هتبص لاسم بطل الحكاية...هاخليك تدور علي اصل الحكاية

رهان؟

يلا بيننا

-في حكايات السينما في اصول محددة و ثابته بس في اصل حقق المعادلة الصعبة...اصل الحكاية هو محمد خان ...محمد خان مخرج و اصل كل حكاية بيخرجها...في مخرجين كتير موهوبين بس اللي بيميز خان انه عمل كل حاجة "و دي هنشرحها بالتفصيل" ...صعب جدا انك تلاقي ممثل عمل كل الادوار بمختلف الطبقات بس الاصعب و الاصعب انك تلاقي "مخرج" عمل كل حاجة و يفضل اصل كل حاجة واحد زي محمد خان و الاصعب و الاجمل انك هتكتشف ان الاصل واحد كل ما تتفرج علي اي مشهد من مشاهد افلامه

-محمد خان عنده القدرة انه يحول اي سيناريو لاخراج بطعم شوارع القاهرة ...طعم المشربية في البلكونات القديمة....كادرات خان تحس انها بشر بيتحرك مع الممثلين و الكادر عند خان بيبقي هو بطل الحكاية و الفيلم...عارف هدوء اربعينات القاهرة الساحرة...اهو دة طعم افلام خان...هات ورق فاضي و اديهوله هيطلعلك منه فيلم يستاهل تقول عليه الله...خان عنده هدوء الاخراج يعني تحس ان الفيلم طالع رايق حتي لو في صراعات و ازمات بس تلاقي نفسك مستسلم نفسيا للاحداث

-من اهم و اهم و اهم مميزات خان ورا الكاميرا انه معندوش نجم بيعمل حاجة واحدة...دايما بتعرف افلام خان لما تلاقي ممثل بيعمل حاجة مش بتاعته و بيتألق فيها بشكل مبهر او تلاقي ممثل جديد بس قدام كاميرا خان تتأكد انه ممكن ياخد جوائز او انه معجون بمياه الاستوديو

**ما تيجوا ناخد شوية من حواديت خان و نكتشف اصلها ايه

-احمد ذكي في كل افلامه هتلاقيه هو اصل الحكاية سواء بموهبته او حضوره صح؟؟ بس افلامه مع خان هتعرف ان اصل الحكاية اللي ورا الكاميرا ...تعالي مثلا نبدأ باحلام هند و كاميليا  و هتلاقي اخراج خان في الفيلم دة بتعيش معاه الواقع بكل تفاصيله الحياتية اللي ممكن تلاقيها في جيرانك و اصحابك و قرايبك...في الفيلم دة هتلاقي تمثيل هادي جدا من ابطال العمل التلاتة و اولهم احمد ذكي و الانسانية في اخراج خان لازم تلاقيها حاضرة و موجودة...انسانية تركيزه علي الظلم و القهر و علي الغدر و الخيانة...تفاصيل تخليك تقول ان الفيلم لمس معاك في حاجة في حياتك

-احنا لسه مع ذكي و خان اللي عملوا مع بعض واحد من اروع الافلام الانسانية في تحول الشخصية الانسانية في كل الجوانب...فيلم زوجة رجل مهم قدم فيه خان كل تحولات شخصية من السلطة لفقدانها و من الحب الي الانتقام و من الشماتة للانتصار...في الفيلم دة كان في تمثيل بالضهر و عشان تحس بموهبة ذكي عايزك تركز مع كادر خان و ميرفت امين بتستفز جوزها و هتعرف ساعتها ان بطل الرواية موهبة ذكي بس اصل الحكاية الكادر و صاحبه...زي مثلا المشهد العبقري بين الصحفي اللي اتظلم و الظابط اللي ظلم و مع الحوار الرائع لازم يتقدم بشكل واقعي جدا و يمكن انت متعرفش اسم الممثل اللي عمل دور الصحفي بس اكيد هتفتكر طريقة كلامه و ازاي ان الكادرات اتوزعت صح بين البطل و بين واحد جاي يعمل مشهد و ماشي ...زي مشاهد انكسار الظابط بعد خروجه من الخدمة كانت دايما مركزة علي تعبيرات وشه في انها تجيب التحول من الغرور و الغطرسة لانكار انه القوة ضاعت

-مستر كاراتيه و هنا بقي فعلا هتلاقي كادرات خان هي اللي شايلة الفيلم من اول مشهد في الفيلم في الارض الزراعية و انت هتحس انك شوفت المشهد دة في الواقع مش مجرد تمثيل و خلاص و لو جيبنا احمد ذكي علي جنب شوية هتلاقي بقية الابطال ميطلعوش فيلم ناجح زي دة بس اللي ورا الكاميرا قادر يعمل فيلم متوازن هادي بطعم الشوارع المصرية بأي تركيبة  و دي يبان في مشاهد الحب بين احمد ذكي و نهلة سلامة مثلا او مشاهد الصحوبية بين ذكي و ابراهيم نصر

-رحلته مع احمد ذكي اتعملها احلي نهاية لما عملوا ايام السادات و الفيلم دة يثبتلك ان الاتنين دول ممكن يقدموا اي حاجة مع بعض و لو جيت عملت مقارنة بين روح السادات و روح ذكي هتلاقيهم واحد بشكل يقولك في موهبتين اسمهم ذكي و خان ممكن يعملوا تفاصيل التفاصيل من غير ما انت تقول ان دة تمثيل

**قوم اشرب مياه كدة عشان اللي جاي حلو

-عارف انك هتسأل ان احمد ذكي ممثل ينجح اي عمل بموهبته...ايه اللي هيخليني اعرف ان سر النجاح محمد خان؟؟

**اومال انا قولتلك اللي جاي حلو ليه

-تقدر تقولي ايه الفيلم اللي عادل امام مقالش فيه و لا افيه؟؟ خلي بالك و لا افيه؟

طيب اصعبها عليك اكتر...ايه الفيلم اللي عادل امام عمل تمثيل بجد؟؟

-ايوة هو الحريف...اهو بقي الحريف دة اخراج خان و هنا هتشوف عادل امام بشكل غير اي حاجة تانية و هتقتنع به"بغض النظر ان عادل امام بيعرف يلعب كورة اصلا و لا لاء" بس خد بالك من المشهد بتاع "انا هانزل مع الخسران" و هتشوف الزعيم ممثل مطيع تحت ايد مخرج عارف هو بيعمل ايه...او مثلا مشاهد الحب المخلوطة بالغلب بين فردوس عبد الحميد او الزعيم او المشهد الكبير بين الحريف و ابوه و اول حاجة هتيجي في دماغك ساعتها ان دة مش عادل امام...دة ممثل تحت ايد مخرج تقيل اسمه محمد خان

-في افلام خان في حاجة حلوة فعلا...برائحة الخضرة و الزرع و دة هتشوفه قوي في فيلمين اولهم مشوار عمر و في الفيلم دة هتشوف تفاصيل في الريف ممكن متشوفهاش في اي فيلم تاني مش بس في التمثيل لا...دة في التفاصيل المملة لحياة الريف من بيوت و طريقة كلام و توزيع التمثيل علي كل ابطال العمل اللي تحس انهم مع خان عاملين زي التايه اللي لقي اهله او زي المدير اللي يعرف يشغلك...يعني مثلا هتلاقي تمثيل حلو جدا من مديحة كامل...تمكن غير عادي من ممدوح عبد العليم...هتلاقي تمثيل حقيقي برة برواز فتي الشاشة لفاروق الفيشاوي

-و بخصوص التوهان لازم تعرف ان خرج و لم يعد كان اخراج خان ...و مين غيره اللي هيعرف يطلع فريد شوقي بالصورة الغير تقليدية دي " مع انه عملها كتير" بس في خر و لم يعد هتلاقي مشاهده مع الفخراني فيها معاني انسانية تعدي مستوي الواقع ...حتي ليلي علوي هتحس ان من المرات القليله اللي مش هتبص علي شكلها و هتركز في تمثيلها و طريقة اتقانها للغة الحوار بشكل يقول ان في مخرج قوي عرف يذاكرلها

-طيب اسألك سؤال اصعب من سؤال الزعيم؟؟

**سعاد حسني تفتكر ايه في ادوارها مفيهوش دلع؟؟ اعصر دماغك يا اخي

-انا اقولك...موعد علي العشاء و زي ما قولنا فوق بقي هنا بتلاقي سعاد حسني الممثلة اللي بجد و بتلاقي حسين فهمي مش مجرد شاب شكله حلو و السلام...هتلاقي مشاهد حلوة و واقعية بجد بينهم و خصوصا في مشاهد المواجهة مثلا...طعم خان هتلاقيه في كل مكان و كادر في الفيلم

-طعم شوارع خان بيبان قوي في فيلم "في شقة في مصر الجديدة" و "بنات وسط البلد" و في الفيلمين طول و مع خان نفسه هتلاقي المكان بطل مشارك في العمل و دة يمكن هتلاقيه في معظم اعماله ...المكان اللي متعرفش دة ديكور و لا حقيقة بس تتأكد انك شوفت الناس دي و مشيت في الاماكن دي قبل كدة

**مش مهم تكون بطل الحكاية عشان مش هتبقي بطل لكل حكاية بس ممكن تبقي اصل كل حكاية بتشارك فيها...ممكن تكون محمد خان

#اصل_الحكاية

#محمد_خان

#التتر

#التتر_رجع

#كريم_مجدي

عبد المنعم مدبولي - الجزء التاني

العواف

اللي اول مرة يشوف المقال دة احب اقولك ان دة جزء تاني من مقال عبد المنعم مدبولي و هتسألني طبعا هو الجزء الاول اتكتب فيه ايه؟

لا بقي معلش ارجع بقي للجزء الاول او هاجيبلك اللينك في الكومنتات

-اما بقي الناس العاقلة الراكزة اللي عارفين الجزء الاول احب اقولكوا ان الكلام اللي فات مالوش اي علاقة بالمقال و المقال هيبدأ حالا

-لما قولتلك في الجزء الاول ان صاحب بالين كداب بس صاحب تلاتة مدبولي ...النهاردة انا جاي اثبتلك البال التالت اللي هو اسهل من البالين التانيين؟ صح؟

اوعي تقول صح ...عشان البال دة اصعب بكتير و هاقنعك بالدليل

-ينفع تبقي رئيس ناجح و مرؤوس مطيع؟؟؟ فكر في الاجابة

-مدبولي عمل معادلة لنجاحه علي خشبة المسرح في منتهي العجب الحقيقة...و مع ان مدبولي هو مخرج صنايعي عارف ازاي يحرك مسرحية لنجوم مسرح بطريقة و طعم و شكل مدبولي و وصلت الصنعة ان نجوم المسرح دول حتي بعد انفصالهم عن مدبولي بيبقوا مكملين في سكة مسرح عبد المنعم مدبولي...و عشان تتحول من الكلام اللي فات دة لممثل علي المسرح و بالمناسبة مدبولي عمره ما كان اسم اول علي المسرح "متستغربش" ...مدبولي عمر ما اسمه جه بطل اول...بس دة بالاسم بس عشان بالفعل مدبولي كان بطل كل مسرحية شارك فيها

**ما تيجي اقنعك...اصله مش بالكلام و بس

-تعالي نبدأ بمسرحية مطار الحب اللي هتشوف فيها مدبولي بالاسم مش بطل اول بس تعالي اتفرج علي المسرحية هتلاقي الفعل مختلف...يعني مثلا معظم مشاهده مع يوسف شعبان "اللي دمه مش خفيف علي المسرح" هتلاقي مدبولي ساند كل المشاهد اللي هو موجود فيها و غالبا مش هتلاقي الموضوع دة في حد غير مدبولي...مش هتلاقي حد بيسند كل مشهد هو موجود فيه...مدبولي عمل من ابطال سينما نجوم علي المسرح بس تعالي شيل مدبولي من المسرحية مش هتفتكر اي حاجة من المسرحية حرفيا و دي معادلة مدبولي ...معادلة الجندي المجهول

-في مسرحية مطار الحب لاحظ حاجة مهمة قوي ...ان مدبولي كان فيها منقذ كل ما يلاقي مشهد او افيه انه هيقع هتلاقيه بيتدخل بشكل محترف و سهل و من غير ما تحس بوجوده او حتي تحس ان المشهد كان واقع ...و دة هتلاحظه في مشهد المكرونة العبقري اللي كان محور المسرحية كلها تقريبا

-في مسرحية هاللو شلبي في دور عنبر هتلاقيه ساند بشكل كبير سعيد صالح و بالعكس هتشوف حاجة غريبة في المسرحية دي ...هتلاقي ان مدبولي مخرج علي خشبة المسرح خصوصا في تحركاته و طريقة و وقت ما بيقول الافيه ...هتشوف واحد واثق في قدرات نفسه بشكل مرعب عشان عارف انه لو اتدخل في المشهد في اي وقت انه هيخلي المشهد عالي في الضحك و التوازن في الكوميديا حاجة في منتهي الصعوبة لانك لو تقيل علي المسرح يا تبلع اللي قدامك يا هتعمل نفسنة و تحاول تطفي اللي قدامك و ساعتها عمرك علي المسرح بيكون قصير و قصير جدا كمان

*مدبولي بيعمل التوازن دة بقي بحلافنة ملهاش حل ايها السادة...انه بيدي الافيه علي قد اللي قدامه يعني هتلاقي الافيه اللي بيقوله قدام سعيد صالح غير اللي بيقوله قدام احمد ذكي مثلا و هتعرف ساعتها ان الافيه لازم يكون قوي قدام واحد عالي علي المسرح زي سعيد و تدي مساحة اكتر للتمثيل قدام احمد زكي

**و استني عشان الحتة دي هتبان اكتر جدا قدام شوية

-تعالي بقي نشوف ناظر المدرسة في مسرحية السكرتير الفني و دي فيها حاجتين بقي ...فكرة انك تخرج نص لبديع خيري و نجيب الريحاني و تمثيل فؤاد المهندس دي حاجة صعبة جدا انك لازم تعمل برواز حلو لصورة جميلة...او تكون شوية الملح اللي "ظابط الاكل" و اللي من غيره حتي لو الاكله دي مكوناتها من اغلي حاجة هتطلع طعمها وحش...بس انك تقدر تظبط التوازن ما بين الممثل اللي عامل دور الناظر و ما بين قائد العمل من وراء الكواليس ...و في المسرحية دي هتلاقي مدبولي عامل ماتش كوميدي جميل بينه و بين المهندس في كل مشاهده و قدام الناس المهندس البطل بس لو ركزت شوية ب 3 جنيه بس هتلاقي مدبولي هو المتحكم في كل افيهات اللي بتتقال علي الخشبة دي...هتلاقي مدبولي هادي كأنه عارف بيمثل بعين المخرج و دي حاجة في منتهي الصعوبة

-مدبولي عمل من امين الهنيدي نجم مسرح من النجوم اللي يتعملهم حساب علي الخشبة المرعبة دي ...مخرج مع حلمك يا سي علام و مشارك في لوكاندة الفردوس و المسرحية دي تقريبا مع نفس ابطال حلمك يا سي علام بس هتلاقي لوكاندة الفردوس اتقل مع مدبولي...ايقاع المسرحية افضل في كل حاجة...هتلاقي الابطال عارفين يقولوا ايه و امتي ....و خلاص اظنك اقتنعت ان لما مدبولي مشهد واقع بيعمل ايه؟

ايــــــــــــــــــــــــوة ...الله ينور عليك

***متزعقش ...و بالراحة عشان انا باتخض

-اكيد مش هاقدر انسي ...مينفعش انسي اكبر دليل علي كلامي في الجزء دة

-بص يا سيدي انت هتجيب ممثل جديد بدل ممثل اعتذر زي احمد بدير لما جه مكان حمدي احمد و تجيب ممثلة اول مرة تقف علي المسرح زي شادية ...هتقولي بس دي شادية يا عم

**هو انا هاسكتلك يعني

-تحديدا المسرح مالوش مقاييس يعني ممكن تلاقي واحد مكسر الدنيا في السينما و ميعرفش يقف علي رجله ربع ساعة علي المسرح...الموضوع بالظبط لما تتعين في شركة كبيرة جدا فبتبدأ تعرف اول تفاصيلها بتبقي محتاج نصيحة صادقة من حد تقيل عارف داوخل و تفاصيل التفاصيل و عشان كدة هتلاقي مشاهد شادية يا مع مدبولي يا مع سهير البابلي

**ما علينا...عايزك بس تركز معايا في الكلمتين اللي جايين دول ...اقولك علي حاجة؟؟ قوم اعمل شاي و اعمل حسابي

-مدبولي في المسرحية دي بالذات كان يتفك ب 3 ممثلين

**اهدي بس و الحق المياة عشان غليت...هاقولك ليه

-مدبولي في ريا و سكينة كان بيعمل كوميديا علي 3 مستويات ...مستوي مع احمد بدير و دة مستوي الاستاذ و التلميذ و هتلاقي مشاهدهم مع بعض ان افيهات بدير هي حصاد للي بيعمله مدبولي حتي لما بدير غلط و قال كل شيقا انكشفن و بان "هو قالها كدة مش كاتبها غلط هتلاقي عقاب الاستاذ بالسخرية لما عمل علي بدير حفلة بمعني الكلمة و انت هتعرف قيمة مدبولي لما هتلاقي بدير بيحاةل يلم الدور عشان لو عارف لو فتح السد هيحصل فيضان و مين ينسي صوته الجميل و هو بيلحقهم و بيقول "كنا هنروح في داهية لكن ربنا ستر"

-المستوي التاني اللي كان مع شادية و دة مستوي الضهر او السند و هنا بقي هتلاقي اب علي المسرح...شادية لوحدها متعملش ضحك بس مع مدبولي الديكور يعمل ضحك...مشاهدهم مع بعض هي قصة حب كوميدية بشكل حلو و متوازن جدا و هتحس ان فيها رائحة المهندس و شويكار او علاقة الرجل بالست علي المسرح اللي الفضل بيها يرجع لمدبولي ...مشاهد ضحك مدبولي مع شادية علامات متتنسيش يعني لما قال "هتيجي تطلبيني من اهلي" او لما قالها " انا كذاب "

-تالت مستوي و دة مستوي الوحش بقي مع مرعبة المسرح سهير البابلي و دة بقي فارس لفارس و الميدان واسع ...ملحمة كوميدية غير طبيعية حولت قصة مأساوية لايقونة علي المسرح علي مر العصور...مين يقدر ينسي مشهد كتب الكتاب و الحوار اللي بينهم اللي يخليك تعرف ان المسرحية دي هتفضل تعيش و تعيش و مهما اختلفت الاذواق او اختلت المعايير هتفضل الكوميديا هي اللغة اللي يفهمها اي جيل

**مدبولي معادلة سهلة في كتابتها صعبة في تنفيذها ....وجوده علي الخشبة ضمان لمسرحية تعيش ...شيله من المعادلة لنفس المسرحية هتلاقيها افيهات محطوطة جنب بعض

**مدبولي جندي مجهول علي الافيش...جندي مقاتل علي المسرح

#عبدالمنعم_مدبولي

#الجزء_التاني_الجندي_المجهول

#التتر

#كريم_مجدي