الخميس، 11 يوليو 2019

محمد سلام


اللي اهم من الشغل تظبيط الشغل...و عشان تطلع شغل حلو لازم تعرف تبين شغلك او بالبلدي كدة تعرف تسوق مجهودك...و عشان اصعب حاجة في عالم التمثيل هي الكوميديا فاللي اهم من الضحك هي طريقة الضحك و ان كان صعب انك تخلي الناس تضحك فالاصعب و الاصعب انك يبقي ليك طريقة للضحك...و عشان تعرف ايه طريقة الضحك؟؟ طول بالك عليا عشان ارتحت شوية من المقالات الطويلة ...نرجع نتكلم و نقول بقي

-طريقة الضحك لو عايز تفهمها لازم نتناقش انتوا و العبدلله عن محمد سلام...و الحقيقة لازم اول الكلام عنه يبقي في اعتراف صغير...ان سلام من اهم اسباب نجاح اي عمل تلاقي عليه اسمه علي الافيش ...موهبة محمد سلام بتتلخص في كلمة الطريقة...مستقل في موهبته بشكل واضح زي الشمس ...اي عمل قدام اي نجم مهما كان اسمه او موهبته هتلاقي محمد سلام واقف علي رجله في الكوميديا...حتي الضحك له طريقة ان الافيهات دي لو اتركبت علي شخص تاني ممكن متضحكش او متبقاش حلوة من الاساس ...و دايما هتلاقي حاجة غريبة كدة كل ما تيجي تقول الافيه بتاعه هتلاقي نفسك بتقولها بطريقته هو...و دة بقي تأثير طريقة محمد سلام...و بالرغم انه طلع مع مجموعة كبيرة من المواهب بس هو قدر يعلق لنفسه شوية صور بتكون موهبة اسمها محمد سلام

**ما تيجوا اثبتلكوا الكلام اللي فوق دة بالدليل

-في فيلم تقدر تقول عليه فيلم تجاري شوية كان اسمه اي يو سي و شخصية ايهاب الطالب الفاشل و هتلاقي من وسط الفيلم كله حاففظ كام افيه نصهم من محمد سلام يعني مثلا لما قال "باركيلي ياما انا حمار و غبي" او لما بيقول لدكتور الجامعة المزيف "وريني ديل من بتوع افاتار " ...لازم تضحك لما بيقول "انا قولت لامي اني جيبت 75 % راحت قالت لابويا اني جايب 85% ...ابويا بقي مش يليمها و يسكت راح قال لاصحابه اني جايب 95% "

-طريقة محمد سلام خلت عنده ثبات انفعالي في الكوميديا بشكل يخلي عقلك الباطن يعتبره بطل للفيلم زي مثلا قلاش في كابتن مصر مع محمد امام ...يعني مثلا لما قال لمحمد امام "انا هاعمل حاجة العالم كله يتكلم عنها ...هاخفي الهرم و اوديه اول فيصل " او لما قال لزميله في السيرك "ياريتني قتلتلك و مخلتكش عايش في العذاب دة يا صاحبي


-بالدليل و المنطق و العقل لازم تعتبر محمد سلام من اهم اسباب نجاح دنيا سمير غانم في الكوميديا لانه كان وجوده في المشاهد زي خط جرينتش كدة...بيقدر يعلي الكوميديا بشكل مبهر الحقيقة و دي ميزة كبيرة في طريقة محمد سلام انه قادر يعلي اي مشهد كوميدي حتي لو المشهد نفسه حقق ضحك كبير مع الناس بس تحس ان سلام زي العامل الحفاز في معادلات الكيمياء...و دة هتشوفه جدا مثلا نيللي و شريهان و مشاهده الحلوة اللي كان بطلها بكل مقاييس الكوميديا...او مثلا لما عمل باسم في مسلسل اللالاند و مشهده العالي مع محمد ثروت لما قاله "احنا نكهرب المياه فيرد سلام بمنتهي التلقائية يا فاجر " و قبلها لما قاله قولها هي الفكرة انا دلدول يا جماعة معاكوا

-حتي لما عمل ربع رومي كان تقريبا هو البطل الفعلي علي ارض الكوميديا لان طريقته بتقدر تمشي مع اي بطل او موهبة ممكن تكون قدامه

**خد نفسك شوية بس متسرحش مني عشان اللي جاي تقيل

-ممكن تفرض طريقة كوميديا معينة قدام ابطال كتير بس اللي عمله سلام مع احمد مكي يقولك انه قدر يفرض طريقته قدام موهبة ليها طريقتها المستقلة و المميزة جدا و عشان كدة تقدر تقول ان مكي و سلام اكتر اتنين استفادوا من بعض بشكل كبير...ماتش مفيهوش وقت ضائع لان عمر ما الكورة هتقف و لا عمر الكوميديا هتخلص بينهم...وجود محمد سلام كان شرط اساسي في اعمال مكي (او معظمها يعني )

-و لانك لازم تحترم استقلالية الكوميديا فانت لازم تتأكد ان مهما دور سلام كان صغير بس تأثيره بيبقي كبير و دة بيبان مثلا في لا تراجع و لا استسلام لما قال اصل عربيتي الجديدة فتيس عالي و انت عارفني بقي في السواقة مش قد كدة

-او مثلا في فيلم طير انت و فين الضحكة الحلوة ...او مثلا لما بيقول لمكي "دة انا الانتيم يا كبير " و لما قام فجأة و بيقول علي فكرة بقي مرات الكبير

**جاهزين لمرحلة الوحش ؟؟؟
ايوووووة هي بعينها

-محمد سلام هو تقريبا البطل الوحيد اللي فضل موجود مع احمد مكي في سلسلة الكبير و شخصية هجرس اللي عملت من محمد سلام بطل منطقي و محوري جنب مكي في المسلسل ...و في عبقرية في الشخصية دي ان مش هتلاقيلها مشهد واقع
***ها هاسيبلك فرصة تدور؟؟؟ خلصت تدوير ؟؟ شوفت مفيهاش مشهد واقع
-التوازن اللي خلقه محمد سلام في شخصية هجرس مع شخصية جوني و الفرق الكبير في المستوي الاجتماعي و الثقافي بتخلق كوميديا صعب انك تقول علي مشهد فيهم احلي من التاني بدليل ان محدش ينسي جملة "خدني معاك يا سي دوني" او مثلا لما قال للي في القهةو "اللي عايز يتصور مع سي جوني صورة سكيورتي " و الدويتو في المسلسل دة كان بينافس بشكل كبير جدا الدويتو ما بين الكبير و هدية و كان اوقات كتير بيتفوق...من اهم اسباب نجاح شخصية هجرس انها معمولة بتلقائية غير طبيعية يعني انت لو غمضت عينك مش هتتخيل هجرس غير محمد سلام ...و لو اتفرجت علي المسلسل كامل هتلاقي ترتيب سلام في مكان الصفوف الاولي

**محمد سلام موهبة و ذكاء في استخدام الموهبة...بيعمل كوميديا بطريقته...طريقة بتخليه الضحك مربوط بدعوة حلوة لما بيعمل مشهد ينسي الهم و يعلي صوت الضحك

#محمد_سلام
#اللي_اهم_من_الضحك_طريقة_الضحك
#التتر
#كريم_مجدي
#الموسم_الثامن_توكلنا_علي_الله

الثلاثاء، 4 يونيو 2019

يحيي الفخراني 2


مش انا قولتلكوا من نفسي ان في حاجات كتير لسه مقولتهاش ...انتوا ليه مستعجلين ؟؟؟
-يلا نبدأ من جديد و بدون اي مقدمات عشان الشرح جاي في نص الكلام

-هدايا بابا نويل في الدراما علامات...علامات تتحفر في القلب قبل العقل ...حدوتة تعيش فيها و تحس انك جزء منها مش مجرد مشاهد بيتفرج و السلام ..و عشان زي ما اتكتب في المقال الاولاني ان الفخراني ممثل بالبلدى كدة مالوش ماسكة يعني الهدايا تناسب الكبير قبل الصغير و دة هتشوفه بوضوح لما عمل حمادة في يتربي في عزو و في الحلقات الاولي من المسلسل هتلاقيه مسلسل خفيف بيوضح ان ازاي الدلع في التربية ممكن يفسد عائلات و اجيال كاملة مش بس فرد...بس الحقيقة الفخراني في المسلسل دة عمل دورين مش دور واحد و الحقيقة الاوضح ان الشخصيتين طلعوا احلي من بعض...فكرة انك تقدر تخلي الناس تضحك لما بتقول يا حمادة يا جااااااااااااامد و تقدر برضه تخلي البلد كلها تعيط لما ماما نونا تموت و المشهد العبقري اللي بتتجول فيها طفل و تشوف صورتها و تعيط بتيجي من موهبة عبقرية و يقدر احساسه يوصل للناس الصغيرة قبل الكبيرة ....زي مشهد لما راح زار المقابر و قالها الدنيا بقت ضيقة جداااا يا نونا ...تحس به لدرجة انك هتفتكر اقرب شخص ليك فقدته


-طيب و هو ماشي في العراق لقي ايـــــــــــــــــــــــــــــــه ؟؟
طبعا كلنا عارفين اجابة السؤال دة من كتر ما حبينا حالة عباس الدميري و لطفي الجنايني اللي عملها في مسلسل عباس الابيض في اليوم الاسود و يحيي الفخراني في المسلسل دة حرفيا كان اب و ضهر و سند لكل الابطال و المشاهدين كمان...انك ازاي تبقي عبقري لدرجة انك توصل مشاعر وجع و فراق و احتياج عائلة لاب مفقود و اب لعائلة مفقودة....و الاتنين وصلهم بمنتهي السلاسة ...شوية مشاعر تتسرسب جواك و انت شايف ابوك في اي شخصية فيهم ....في المسلسل دة الفخراني عمل كل المشاعر الانسانية بنفس درجة الاتقان...عارف الدكتور اللي انت متعود عليه اللي ممكن يكون سبب شفاك بمجرد ما تشوفه...اهو دة بالظبط اللي عمله ....بتفرحله لما تلاقيه بيتقدم خطوة و تزعل لما تلاقيه بيضحك عليه....و اول ما يقول السؤال هتلاقي نفسك كورال بترد وراه



-بابا نويل لما راح الصعيد برضه ساب هدايا عمرها ما تتنسي ...ازاي هتنسي الليل و اخره و انه عرف يعمل ان الصعيدي ممكن يحب من غير كسوف او احراج...حنية و طاقة حب من غير ما تستخبي ورا وش صلب ...طريقة الفخراني في اداء شخصية رحيم الشناوي يخليك تنسي شكله ابو عيون خضراء و تركز في تفاصيل كلامه...شوية هتلاقيه جامد صلب كالوتد و يدافع عن حبه زي الفارس و قدام حبيبته هتلاقي طفل صغير عايز اللي ياخد ايده

-و مهما قرأت عن شيخ العرب همام عمرك ما هتحس و لا هتتخيل زي ما عملهالك الفخراني و وصلهالك الفخراني دليفري لحد عندك...تمك غريب في طريقة الكلام و اداء غير طبيعي لهيبة الكبير و الحكيم...حتي في لحظات الضعف هتلاقي الهيبة مصاحبة الاداء و ماشية معاه خطوة بخطوة....من الاخر الفخراني قدر في المسلسل دة يقنع اللي بيحب يقرأ انه يشوف و هيتبسط اكتر


-مش معقول بابا نويل يلف مصر كلها و ينسي اسكندرية ...و عشان كدة قرر الفخراني انه يمثل بصوته في اول تتر زيزينيا و في الاخر عرف نفسه "بشر عامر عبد الظاهر"  ...في المسلسل دة ملحمة لوحدها اسمها الفخراني...ملحمة من الاداء المتوازن الهادي ....اداء اسكندراني جدع تحبه و تشوف في اصحابك حد زيه...برنس تحترمه في تمثيله و تقدره انه الفخراني

-ما تيجي ننزل الحلمية و نشوف ابن الباشوات سليم البدري و تشوف كمية مشاعر العزة و الانكسار...القوة و الضعف في مسلسل بيعتبر لوحده كتاب تاريخ بيوثق مشاعر انسانية ....من المرات النادرة انك تعرف تعمل شخصية تبقي عبارة عن كتاب تاريخ متزهقش منه و دة صعب جدا انك تشوف مشاعر تاريخية...مهما وصفلك كتاب يعني ايه باشا يتكسر عمرك ما هتتخليها زي ما بابا نويل عملها و وصلك المعلومة زي حتة حلويات شرقيه اوبسبوسة بالسمن البلدي من حلواني الحلمية و في كل المشاهد بتاعته مع العمدة هتستمع بالاختلاف الطبقي في اداء سهل و بسيط خصوصا في المراحل الاولانية و تتبسط سواء هو كسب التحدي او خسره


**شوفت مستعجل ازاي؟؟؟ هو انا يا بني لسه خلصت؟؟؟
اتقل كدة

-بابا نويل له هدايا متتنسيش مع السينما

-يلا نبدأ مع عطية عبد الخالق و خرج و لم يعد ...هما بقي الفخراني بيمثل فلسفة في شكل اجتماعي جميل عينك تستريح قبل عقلك بالاداء الهادي المناسب جدا للقصة و الحوار ...شوية مشاهد في النقاش عمرها ما هتتنسي مع فريد شوقي و قصة حب حلوة تتمني تعيشها مع ليلي علوي ...الفيلم دة حقيقي ممكن توصفه فيلم وثائقي تشوف فيه جمال البلد في ساعتين و تستمتع بالحالة اللي معمولة بحرفنة و ذوق

-هو اللي عاش معانا في ارض الاحلام مع الجميلة و الرائعة فاتن حمامة و مش سهل ابدا انك تتبروز و انت معاك فاتن حمامة بس كعادة بابا نويل بيقدر يعمل اصعب حاجة باسهل صورة...الفيلم لما تشوفه هتحس ان مكانه مكتبه اسكندرية او متحف برلين ...هتحس انك ماشي في شوارع الزمالك...هتشم رائحة هواء نصيف من غير عوادم او حاجة تعكره

-هو مبروك الكبير سنا الصغير في العقل ...العملاق في الاداء ...فكرة انك تمثل فكرة الحب البرئ اللي مفيش وراه اي مصالح او اهداف ...الحب اللي مالوش غرض...الحب اللي تتمني تحبه و تتحبه هتلاقي بابا نويل بيعمله و يعيشك الحب دة معاه بطريقة تخليك تحتار تحط تعريف للحب اللي بجد...حب مبروك النقي
***لسه مخلصتش ...اقوم هات شوية بسكوت و كحك

-بابا نويل في المسرح حاجة تانية خالـــــــــــــــــــــــص
-لما عمل راقصة قطاع عام هتتخيل انك هتسوف يحيي الفخراني في دور جد بس هتتفاجئ بخفة دم و افيهات حلوة جدا...افيهات طالعة من ممثل تقيل علي خشبة المسرح و بالرغم ان كان معاه نجوم كوميديا تقيله في المسرحية دي هتلاقي الفخراني بطل قد مسئولية الافيش مش مجرد اسم ترتيبه الاول و خلاص

-في مسرحية اسمها كيمو و الفستان الازرق فيها بقي طاقة ضحك غير طبيعية و دي بقي يحيي الفخراني تقريبا شال مسئولية الضحك كله فيها

-من اصعب الروايات اللي ممكن تقرأها في حياتك هي الملك لير...رواية فيها كمية مشاعر و تناقضات انسانية صعب تبقي لحم دم...بس علي مين؟؟ دة بابا نويل
الفخراني اعلن نفسه ملك لير مستقل غير قابل لتخيل اي شخصية غيره تعمل لير ...هو عمل لير احلي من لير نفسه

**الفخراني مش مجرد موهبة...الفخراني ملحمة تاريخية تتحكي للاحفاد و يحبها الاجيال
شكرا بابا نويل

#يحيي_الفخراني
#بابا_نويل
#التتر
#كريم_مجدي



الجمعة، 31 مايو 2019

عمار الشريعي


ايه دة يا بني ؟؟؟؟ القهوة من غير وش ....اتفضل رجعها
-بس حضرتك دوقها هتعجبك
-يا بني باقولك من غير وش هتعجبني ازاي بس...دي اهم حاجة في القهوة وشها

-و وش القهوة في اي عمل في السينما هو التتر و عشان تعمل وش قهوة حلو يستاهل ان الناس تجيلك عشان تشربه من ايدك فمش من السهل ابدا انك تعمل تتر الناس تسمعه لحن و تقول هي الكلمات...مش تغني معاه ...لا اللحن هو اللي بيتكلم ...هو اللي تنده النداهة في وسط شجر مش باين منه غير نور بعيد في بيت واحد سهران عارف انه مستني لما يخلص لحن التتر انه هيوصل بيته في ميعاده

-وش القهوة في اي تتر لازم يكون اللي عامله عمار الشريعي ...عبقرية الشريعي مش انه مجرد عمل الحان لمسلسلات ناجحة...عبقرية عمار الشريعي انك تبقي عارف من اول دقة مزيكا ان البن دة من عنده و انك هتشوف وش قهوة عمرك ما هتشوفه في حياتك...عمار الشريعي لما بيعمل موسيقي فكأنه بيحط تصميم لمدينة فاضلة فيها كل حاجة ماشية بالمسطرة...الشوارع نضيفة و الناس تضحك في وشك و مفيش لا خناقات و لا مضايقات...و الحقيقة لما تيجي تسمع للشريعي هتلاقي نفسك في مرحلة سلام نفسي غريب ...هتلاقي نفسك مولع اللمبة الحمراء و مش عايز اي ازعاج

-موسيقي عمار موسيقي طيبة ودودة و غير انها بتحكيلك حدوتة المسلسل في كام دقيقة بس فيها حاجة عبقرية انها تخليك تحب الكلمات اكتر و اكتر يعني لو الكلمات الحلوة اتركبت علي الحان مش قد كدة لا هتفتكر الكلمات و لا هتحب تسمع اللحن بس مع عمار هتلاقي نفسك حافظ الكلمات حتي لو سامع الموسيقي بس من غير اي اغاني

-مدرسة عمار الشريعي تقدر تقول عليها المسرحية الموسيقية لانه تقريبا الوحيد اللي قدر من خلال التتر انه يربطه باحداث المسلسل و مش بس كدة ...دة قدر كمان يربطه بشخصيات لحم و دم في المسلسل...يعني من الاخر ....طيب تيجي نتراهن؟؟
**انك تقولي 10 مسلسلات تفتكرهم من خلال الحانهم ؟؟؟ و قولهم في دماغك؟؟ هتلاقي منهم علي الاقل 6 الحان عمار الشريعي

-كدبت عليك انا؟؟؟ الموضوع ان الشريعي كان سبب اساسي و رئيسي في نجاح اي مسلسل او فيلم عمل الالحان و الموسيقي بتاعتهم...بيعمل موسيقي بتتحرك و تحس و تقول...من الحاجات العبقرية في عمار برضه انه بيغزل الحانه بهدوء شديد جدا و تحس فعلا ان اللحن ممزوج بهواء نضيف يفتح صدرك كدة و يقولك في امل و الله يا عم بس انت اسمع عمار


*ما تيجي نشوف شوية من اعماله ...و انا باقول شوية اهو من اولها عشان مش هاقدر اقولهم كلهم....و خلي بالك عشان هنطلع بنتيجة في الاخر تأكد كلامي اللي فوق بس ركز معايا...اقولك ؟؟ قوم اعمل قهوة بس بوش

-عمرك ما هتقدر تتخيل مسلسل زي ارابيسك غير لما تيجي في ودانك رنة عود الشريعي في اول التتر...الحقيقة ان تتر ارابيسك كان من اسباب نجاح العمل لانه كان بيبقي التنبيه ان في حاجة حلوة هتتقال دلوقتي و لما تشوف احداث المسلسل هتشك ان عمار الشريعي مشترك في تأليف المسلسل دة لانك لما تسمعي التتر تاني هتلاقي قدامك احساس البطل اللي كان في المشهد اللي اتعمل صوت و صورة و احساس...الحقيقة في التتر انك هتتبسط لو سمعته اغنية كاملة و هتتبسط برضه لو سمعته لحن بس ...و دة يثبتلك ان عود الشريعي هو كلمة السر او بمعني تاني وش القهوة

-لما تيجي تعمل مسلسل زي حديث الصباح و المساء بكل احداثه بتأليف البعقري نجيب محفوظ لازم تعمل موسيقي لتتر يستحق انه يبقي  ساند نجاح المسلسل بشكل كبير و هتلاحظ في اللحن دة انه ماشي مع احداث المسلسل باللي بيتولد و اللي بيموت و دايما هتحب تسمع التتر قبل و بعد المسلسل و هتدور عليه حتي عشان تسمعه لوحده


-الله علي وش القهوة قدام البحر او انت قاعد علي محطة الترام في اسكندرية و يا عيني علي عمار و انت بتسمع تتر زيزينيا و من اول ضربة موسيقي و دخول عمار يا اسكندرية هتشم رائحة البحر ...و لما تتعود علي انك تسمع الشريعي اشتري مني بقي...هتلاقي نفسك مش محتاج تتفرج علي المسلسل لان كل اللي هيربطك في المسلسل اتعمل خلاص يعني تقدر تقول ان موسيقي عمار عاملة كدة زي راحة البال لو وصلتلها مش هتحتاج حاجة بعدها

-مين فينا محاولش يعزف موسيقي رأفت الهجان و هو صغير او معملهاش نغمة علي الموبايل النوكيا 3310 بس في المسلسل دة الحقيقة تأثير عمار و عود الشريعي وصل لابعد و اجمل مستوياته لانك هتلاقي لاول مرة موسيقي ثبات انفعالي بتدعم ردورد فعل محمود عبد العزيز ساعة العبور مثلا او ساعة سماع النكسة و بالرغم من شوية حاجات اوفر في المسلسل الا ان من اسباب نجاحه هي موسيقي الشريعي اللي هتربطك بلحظات انكسار و انتصار و لا مليون مشهد هيعرف يوصفهم


-لو انت مركز في الكلام فوق و زمانك شربت القهوة او رميتها لو طلعت من غير وش ...فهتفتكر اني قولتلك ان موسيقي عمار الشريعي موسيقي فيها امل كدة للحياة و دة اللي بيعمله بالحرف في موسيقي فيلم البري في مثلا محبوس يا طير الحق ...و قلبك بس هو اللي يسمع الموسيقي دي لانك هتحس بقهر بس في نور بعيــــــــــــــــــــــــــــــــد هتمشي بامان و انت بتمسع موسيقي تهدي قلبك كدة و بتقولك هتوصل

-من الحاجات اللي باحبها جدا انا شخصيا تتر مسلسل اوبرا عايدة لاني باحس ببهجة غير طبيعية و انا باسمعه ...باحس بمراجيح العيد و ان لما اكبر و اخلص جامعة اخيرا هاستريح "وسعت مني دي"
بجد لما تسمع تتر زي المسلسل دة هتلاقي فرحة اطفال كدة حتي لو عندك90 سنة
**ممكن القهوة تجيلك طعمها حلو بس من غير وش ...بس انت نفسك قفلت اصل اللي اهم من القهوة وشها حتي لو طعمها حلو
ساعات ممكن تلاقي العمل مش قد كدة بس مينفعش تلاقي تتر مكتوب عليه اسم الشريعي و متحسش انه احسن وش قهوة شوفته في حياتك
تعمر بالحانك يا عمار

#عمار_الشريعي
#وش_القهوة
#التتر
#التتر_راجع
#كريم_مجدي    

يحيي الفخراني


نص الشعب المصري عيبه انه طيب و نصه التاني نفسه في هدية و عشان تجيب هدية لحد لازم تجيبله هدية تعجبه او بمعني تاني احلي انك تجيبله اللي هو محتاجه  ...و كل مناسبة عن التانية و سنة تيجي وراها سنة اختيار الهدية بيبقي اصعب و اصعب و رمز الهدايا في العالم كله هو بابا نويل او سانتا كلوز بس خلينا نقول بابا نويل عشان هيتغير كمان شوية "متستعجلش لسه المقدمة...انت نسيت و لا ايه يا عم "
-من الحاجات اللي ارتبطت برأس السنة و احتفالاتها ان في شخص اسمه بابا نويل بينزل يوزع هدايا علي الناس و بيكون سبب انه يفرحهم و ينشر بهجة مرتبطة بسنة جديدة مليانه طموح يتحقق في السنة الجديدة و امنيات ماليه الدنيا و ما فيها...و لو هتسأل 10 اشخاص عن تصورهم لشكل بابا نويل هيقولولك 10 شخصيات مختلفين في الشكل بس المضمون واحد ...مضمون الفرحة و الهدية ...مش مهم الشكل ايه ... المهم الفرحة اللي بيتجي معاه....حتي هدومه اللي معروفة الروب الاحمر و الذقن بتبقي مختلفة علي التخين غير الرفيع او الطويل او حتي القصير ...المهم هيجيب ايه معاه و المهم انه يجي اساسا

-هدية بابا نويل بتبقي غالية علي الواحد لانها دايما بتجيله في توقيت واحد ...نفس احساس قعدتك في صالة الوصول في المطار مستني حد غالي عندك و اول ما تشوفه قلبك هيدق من الفرحة و عينك هتلمع من اشتياقك لقعدته و كلامه...لما تيجي تغمض عينك و تقول لنفسك هو ايه اللي بيميز بابا نويل في الهدايا يعني؟؟ يفرق ايه عن طقم الكوبايات بتاع عيد الام؟
-يفرق ان عبقريته تتلخص في ان هديته مناسبة للغني و الفقير و بتفرح المحتاج و اللي شبعان و مش عايز حاجة ...ازاي تختار هدايا لناس متعرفهاش و تعجبهم ...حاجة صعبة مش كدة؟؟

-ممكن تبقي صعبة لو هتجيب هدايا لناس متعرفهاش و بتبقي اصعب لما تقدم فن يعجب معظم و يعيش مع كتير من الناس ...صعب تبقي بابا نويل و الاصعب انك تكون يحيي الفخراني

-من زمان وارتبط تاريخ الدراما بلقب الفخراني و دة عايش من زمان و عدي علي اجيال و اجيال بابا نويل الدراما بالنسبة لهم هو يحيي الفخراني ...نركز سوا بقي شوية عشان هنشرح شوية حاجات حلوة

-دراما يحيي الفخراني هي دراما رائحة المطر علي كورنيش البحر في اسكندرية...اللسان في رأس البر ....قعدة المشربية في الحسين...بركة السيد البدوي في طنطا...دراما منك ...يعني متحسهاش غريبة عنك...و الدراما هما هي اداء الفخراني نفسه اللي هنشرحه كمان كام جملة
-من زمان و مسلسلات الفخراني طبق رئيسي علي سفرة رمضان يعني تقدر تقول عليها قطايف رمضان ...القطايف اللي بجد مش اللي محشية ورق جرايد بتاع اليومين دول ....بس عشان تقف قدام موهبة الفخراني او بمعني ادق عشان تعرف سر تركيبته لازم تعرف كام حاجة كدة
-موهبة الفخراني انه محايد جدا في اداءه و موهبته يعني اللي بيفكر قوي هيلاقي ممثل تقيل عارف بيضحك امتي و يبكيك امتي و اللي عايز دراما خفيفة هيلاقي دراما بميزان دهب حساس عشان ميبقاش دمها تقيل و لا تنزل لمرحلة التفاهة ...من الحاجات اللي بتميز يحيي الفخراني انه موهبته معاها الة الزمن و مش هزار و الله ...موهبة ممكن تحسسك انه عنده عشرين سنة و اوقات تانية تحسها موهبة خلاص في اخر العمر...هتلاقيه بيتعامل مع الممثل اللي قدامه بمنطق انه بيدي كل واحد وضعه ...هتلاقيه قدام المبتدئ عكاز يتسند عليه و قدام التقيل منافس قوي بيقوي عصب المشهد عشان يطلع عليه القيمة

-موهبة الفخراني انه لما بيعمل مسلسل هتلاقيه بيجمع العائلة ...هتلاقي الصغير فاهمه و الكبير حابه ...خليني اقولك ان يحيي الفخراني من الناس القليلة اللي معملتش شخصية زي التانية مش بس في خيوط الشخصية...حتي في طريقة الاداء و كأنه عايز يعمل مسلسل بطولة اسم الشخصية مش مجرد اسم علي افيش

**عايزك تاخد نفس عميق و تعرف ان المقال جزأين ....تعالي نشوف شوية هدايا او اعمال من بابا نويل الشهير بيحيي الفخراني
**اه نسيت اقولك اني مش هاقدر اقول كل الاعمال...من اولها اهو

-هو الشر المحبوب ...هو الشيطان الملعون...هو ونوس ...مسلسل كله اتقدم ببدلتين بس جوة البدلتين شخصيات و خيوط....تلاقيه بيوسوس بحرفنة تخليك يعجبك كلامه و تمشي وراه و فجأة يخوفك من لدعته و انتقامه..في المسلسل دة تقدر تقول ان يحيي الفخراني عمل 4 او 5 مسلسلات جوة بعض لانه كان بيتعامل مع كل شخصية بطريقتها و داخلتها و دة برة و جوة المسلسل ...مش مفهومة دي صح؟

-يعني هتلاقيه مع هالة صدقي ادائه يناسب المشهد انه بيبقي ونوس العاشق المتصابي و مع اولاده مع الطماع بيبقي نصاب و مع الشيخ بيبقي طالب علم...و مع صبيانه المعلم اللي ميتردلوش كلمة و في الحقيقة كان اقوي مسلسل عمله في ونوس مشاهده مع نبيل الحلفاوي (له مقال علي التتر ممكن تدور عليه) مش بس عشان موهبة الحلفاوي التقيلة لا ...لان كانت موهبة الفخراني بتعلي لدرجة انه هيوريك الصراع بين الشيطان و الانسان في اوضح صورة ...عايزك تركز في عبقريته في مشهد ختام المسلسل و هتشوف ونوس بيتجلي و هو بيتوعد البشر كلهم و بيقول (انا غلطت غلطة واحدة...و هو خطاء مبيتعلمش ) و الغل اللي طالع من الكلام يخليك تعرف قد ايه الرجل دة عبقري و متمكن و قد ايه ربنا كريم معانا
او الفخر اللي بيقول به " انا المتعلم..انا الذكي...انا الزاهي ...انا اللي مخلوق من نار...انا احسن منه...انا اللي عبدتك قبله"
او لما قال " مش امك كانت بتدعيلك ربنا يكفيك شر ساعة الغفلة...انا ساعة الغفلة "
او لحظة الشماته لما خلي غريب ينتحر و ضحك عليه و قاله حد يصدق ونوس يا غبي


-تعالي نشوفه في الميكس الهايل في اوبرا عايدة ....شخصية متعرفلهاش هي نصابة فعلا و لا هو روبن هود الاسكندرانية...هو فعلا المحامي الشاطر و لا الرجل الجدع و لا العاشق المصدوم...الحقيقة في دة كله هي موهبة الفخراني في تجسيد كل المشاعر دي في مجموعة حلقات...علاقته بالناس الغلابه فتلاقيه واقف جنبهم و تلاقيه بيحب تاني اول ما شاف عايدة...هتشوفه بيخليك تعيط لما البيت يتهد و يخليك تضحك لما قال لوكيل النيابة اتلهي و تضحك اكتر لما بيشرح معني اتلهي بشكل بسيط و سهل و ميتمسكش عليه غلطة...هتلاقيه المبهدل في نفسه و تلاقيه لابس اشيك بدلة سموكن في اوبرا عايدة قاعد بيتفرج


-هو جحا صاحب النوادر و الاساطير و الاكيد ان بابا نويل المرة دي قرر يتحدي جحا نفسه في نوادره فبدأ يصبغها بالوان الفخراني ...طريقة كلامه في المسلسل تقولك انه ازاي عرف يغزل جحا بخيوط موهبة الفخراني الكبيرة...و هتلاقي مشاهده مع حماره و السلطان فيها رائحة الفخراني او التوازن اللي يخليك تستمتع بجحا و نوادره

**عارف ان لسه مقولتش حاجات كتير بس استنوا الجزء التاني

#بابا_نويل
#يحيي_الفخراني
#التتر
#كريم_مجدي



الثلاثاء، 26 فبراير 2019

atef el tayeb


لو اتمشيت في وسط البلد هتلاقي العبد علي يمينك " و اوعي تمشي من غير ما تجيب دنش او بيتزا" و هتقعد تتفرج علي المحلات و العمارات و نظرتم فيها مزج ما بين الاعجاب الشديد و الزعل انها اتحولت من تحفة معمارية لمخازن و محلات للترزي و تضييق فساتين الافراح بس و انت مكمل مشي في انواع من المحلات اللي اسمها "هو في حد بيدخل المحلات دي" او في روايات تانية "هي المحلات دي بتكسب منين " و من اشهر انواع او نشاطات المحلات دي "الجاليري" و هنا لازم تقف قدام زجاج كأنه بوابة قصر صغير ...نور اصفر خفيف لمعانه بيظهر علي كريستالة من ايام الملك...هدوء ساعة عصاري في فنجان قهوة علي ترابيزة في الجنينة...وقار باشا بيقرأ الجرائد بعد الفطار مع فنجان شاي ....هتشوف نجفة شكلها يظهر في اوضه واسعة سقفها عالي فوق سرير مطلي شباكه بمياة الذهب

-و لما تدخل عالم الجاليري و لو جربت تدخل تسأل لازم تلاقي اللي بيحكيلك واقع في غرام كل قطعة بيشرحلك هي ايه و من زمن مين و مين اللي استخدمها كمان...و لو روحت اي جاليري في اي مكان هتشك ان اللي شغالين فيه تقريبا ليهم نفس الشكل و الطبع يعني هتلاقيه هادي قوي ممكن يوصل لمرحلة البرود بس عايز اقولك انه معذور لانه عايش في فجوة زمنية بتخلي اعصابه فعلا رايقة...و زي ما قولتلك فوق بكام سطر هتلاقيه عاشق لكل اللي موجود في الجاليري

-بس لما السنين بتعدي بيك و تنزل وسط البلد كتير هتكتشف ان المحلات دي ليها زبونها المخلص زي بالظبط افلام الجاليري المصرية ليها صاحب مكان اسمه عاطف الطيب

-عاطف الطيب او "مخرج الجاليري" نوعية مختلفة شوية من المخرجين ...في طبيعة اي فيلم عشان يشدك لازم يكون في تغيير مفاجئ سواء بقي في احداث او في تغيير مسار في شخصية من شرير لطيب و العكس بس صعب تلاقي فيلم احداثه علي نار هادئة و برضه يشدك...اهي هي بالظبط طريقة الجاليري اللي بيعملها عاطف الطيب في افلامه....ممكن تلاقي افلامه فكرة تقليدية بس الاحداث الانسانية اللي جواها مش هتفتكر غير انها موجودة في افلام عاطف الطيب

-من المميزات العبقرية في مخرج الجاليري ان فكرته هي البطل مش اسم بطل الفيلم و ي حاجة عبقرية صعب تلاقيها في اي مخرج...يعني هات اي ممثل و دخله الجاليري هتلاقيه خد علي المكان و بقي صاحب مكان كمان ..لما تتفرج علي فيلم في اخره اسم عاطف الطيب لازم تتأكد انه مجرد ترتيب روتيني ان اسم المخرج يجي في الاخر بس هو في الحقيقة اسمه اكتر حاجة مؤثرة في جودة الفيلم

**تعبت من المشي ؟؟؟
-طيب تعالي ناكل حواوشي من عند شلبي و احكيلك عن جواهر جاليري عاطف الطيب

-شوفت كام فيلم عن التار "الثأر" في الصعيد؟؟ كتير جدا صح؟؟
بس شوفت كام فيلم زي الهروب...شوفت سكت ازاي و بغض النظر عن دور هنيدي خلينا نقول شوية حاجات حلوة في الفيلم دة
-الفيلم كفكرة تقليدية بس جوة الفيلم بيتحول سيناريو الفيلم لمجموعة من احاسيس غير طبيعية ...و بالرغم ان الفيلم في حواديت انتقام كتير بس عمرك ما تحس انك متوتر او منفعل و في احداث الظلم هتلاقي نفسك بتشوف كادرات للكاميرا توضحلك قد ايه الاحداث حقيقية و متصدقة...من المشاهد العبقرية اللي في الفيلم دة مشهد تصوير احمد ذكي و هو فوق القطار "و طبعا مع عبقرية احمد ذكي" فانت لقيت مخرج يطلعه في صورة حلوة و واقعية ...اداء عبقري من زوزو نبيل في احداث الفيلم...من المرات القليلة اللي تلاقي هالة صدقي بتمثل و تنسي انها بتمثل ...محمد وفيق اتبروز في دور الظابط الوصولي ...عبد العزيز مخيون مشاهده مع احمد زكي خصوصا في كادر الليل كان التنقل بينهم موزون بالحرف

-لسه مكملين مع فكرة الافلام التقليدية  كفكرة و العبقرية كتنفيذ و فيلم البرئ اللي من اول الافيش هتحس انك قدام فيلم بطله بس هيكون احمد ذكي بس الحقيقة من اول ما يشتغل الفيلم لاخره هتلاقي ان القطر اللي جه فيه احمد ذكي و الهام شاهين هو كمان بطل في الفيلم...يعني اول مشاهد الفيلم هتلاقي ممثلين اتحداك تعرف اسمهم هتلاقيهم بيقولوا كلامهم في المشهد بمنتهي الحرفنة و التمكن و الحقيقة يعني ان في الفيلم دة في اثبات مهم جدا انك ممكن تلاقي كرسي لوحده و شكله غالي بس لما يتحط في الجاليري بوضع معين و زاوية رؤية معينة العين هتشوفه احسن...و دي حاجة اساسية في الفيلم دة بالذات يعني هتلاقي تمثيل من نوع الرايق في اداء ممدوح عبد العليم او في مشاهد السجن العبقرية من محمود عبد العزيز ...حتي لما اغنية السجن اشتغلت هتلاقي كادرات الفيلم بتتوجع ...خلي بالك بس من مشاهد احمد ذكي لما عرف انه بيضرب ابن العمدة اللي عمره ما كان من الاعداء و دي حاجة مميزة جدا في كاميرا عاطف الطيب انه بيعرف يعمل دويتو بحركة الكاميرا ...زي استجواب محمود عبد العزيز لجميل راتب او احمد راتب مثلا


-عاطف الطيب كان شريك اصيل في تكوين الافلام التقيلة لاحمد ذكي ...مش مصدق؟؟ ادينا قولنا فيلمين فوق و هنقول كمان ضد الحكومة ...ازاي قدرت كادرات و تركيب موسيقي بتاعت عاطف الطيب انها تتحول زي ما المحامي تحول من فاسد و يرجع لاصله التاني الطبيعي...تعالوا نشوف مثلا دويتو الكاميرا في المسجد في المشهد اللي جمع بين احمد ذكي و ابو بكر عزت او مشاهد التهديد بين احمد ذكي و احمد خليل و كالعادة من اصغر واحد لاكبر اسم في الفيلم هتلاقيهم بيمثلوا بروقان جدا زي المنتصر بالله اللي ضحتكه هتسمعها لما افكرك بمشهد القطار و احمد ذكي بيقول للظابط "و دي حتة حشيش مالناش دعوة بيها" او لما اتحول لممثل قوي جدا لما قال لمحمد نجاتي "انت بقي يا سيدي سيف...بس هاقولك علي حاجة؟ الاستاذ كان عنده حق "

**يلا قوم نقعد في جروبي نشرب قهوة

-عاطف الطيب اثبت انه يقدر يتعامل مع اي نجم في الفترة دي و مش بس كدة دي بيطلعه في صورة مختلفة خالص زي محمود عبد العزيز في الدنيا علي جناح يمامة و في الفيلم دة فيه كمية ضحك و مشاعر غير طبيعية من البطل و من سناء يونس و مين ينسي "الاكلات الغامقة" و انعام سالوسة و شعبان حسين ...الفيلم دة عبقري انه قدر يجمع ما بين الواقعية الشديدة جدا و ما بين الكوميديا الرايقة جدا

-شوفت محمود عبد العزيز في الكوميدي...اهو مع عاطف الطيب عملوا حاجة عكس اللي فوق خالص لما عملوا ابناء و قتلة ...و هنا هتلاقي العبقري محمود عبد العزيز بيطلع كمية تمثيل كأنه عايز يثبت نفسه و شريف منير كان اداء متمكن جدا بشكل يخليك تحس انه بيمثل من زمان  

-تعالي نشوفه مع نور الشريف في فيلم ليله ساخنة مثلا و هتلاقي دويتوهات ما بين نور الشريف و لبلبة حلوة في التمثيل و في المشاعر الصادقة اللي ممكن تشوفها عادي  

**عاطف الطيب هو االجاليري ...هو العالم المنعزل عن اللي براه و يعيشه اللي جواه...يعني هتدخل في عالم و تطلع في عالم تاني خالص

#عاطف_الطيب
#الجاليري
#التتر
#كريم_مجدي  

الأحد، 10 فبراير 2019

الفتنة


المسيح الدجال علي الارض
عنوان صادم انا عارف ...بس تفاصيل العنوان اكيد هتبقي صادمة بشكل اكبر من العنوان بس قبل ما المقال يبدأ لازم اقول ان التفاصيل لا تحتوي علي اي محتوي ديني لاني اقل من اني اتكلم في حاجة عظيمة بالشكل دة...يلا نبدأ المقال؟؟

-من علامات يوم القيامة الكبري هي ظهور المسيح الدجال و بيبقي كل وظيفته هي "الفتنة" و كلمة الفتنة مش مجرد حروف ...الكلمة دي بتبقي عبارة مفرمة ورق لكل اللي كتبته في حياتك عن حياتك و فجأة تكتشف ان كل اللي كتبته في حياتك مزور ...مبادئ تتكلم عنها طول حياتك و مع اول موقف فتنه تلاقي نفسك من غيرها...اخلاق متغطي بيها في وسط برد البشر و في اول محطة اغواء تلاقي نفسك عريان..و بدأت افكر هو احنا هنتفاجئ بالمسيح الدجال يوم القيامة؟؟؟ و لا كل واحد و السيرة الذاتية بتاعته و عنصر المفاجأة هيبقي موجود ساعتها...يعني هل ممكن انسان يفضل طول حياته قدام الناس ماشي علي الصراط المستقيم و اول ما يقابل الفتنه اول حاجة يبعد عنها هو الصراط المستقيم نفسه؟؟!!
سؤال صعب انا عارف بس عشان ربنا رحيم بينا جدا فكل حاجة مكتوبة في الاخرة موجود منها عينة بصورة صغيرة في الدنيا ...جنة و نار...نعيم و جحيم...فتنة و ثبات

-فكرة الفتنة موجودة في العالم كله من زمان الزمان و الفتنة انواع ...في فتنة السلطة و فتنة الخوف...و فتنة ضعف الايمان بس يمكن اقوي فتنة موجودة في الدنيا هي فتنة المال...المال...اللغة الرسمية للسعادة في هذا العالم اللي بيقيس مستوي سعادتك برصيدك في البنوك...فجأة تتحول حياتك لمجرد ارقام...اخلاقك بتبقي مجرد قربان بتقدمه لرقم حسابك في البنك...احترامك لنفسك بيغطيه كتر المال...بتستغني عن ماضي عشان تستمتع بالحاضر و مش مهم يتقال عليك في المستقبل

-بس الفرق في فتنة المال في الدنيا ان ماضيك بيبقي واضح و حاضرك ظاهر و مستقبلك باين....من كام شهر كدة ظهرت فكرة الفتنة في حياتنا ...تعالوا احكيلكوا الحكاية و انتوا استنتجوا براحتكوا

-في مصر في مجالات كتير جدا ممكن تكسب في الاستثمار بس فجأة بتشوف قدامك مزج ما بين فيلم مرجان احمد مرجان و مسلسل كيد النسا ...و اي استثمار في العالم هدفه هو الربح بس انك تلاقي استثمار هدفه بس يكون الفتنة و انك تتفرج علي الناس و هي بتنحني قدام فتنة المال فدي حاجة اكيد مش هدفها ربح الاموال...بيبقي هدفها ربح النفس

-الحاجة اللي ب 10 فجأة تبقي بمليون ...و عمرك ما تلوم علي فكرة الفتنة علي قد ما تبقي مصدوم من اللي وقعوا فيها...معاك هتقولي لو خدت قد مرتبك 100 مرة مش هتروح؟؟
***حلو السؤال دة جدا
-لو هاعمل نفس شغلي باضعاف مرتبي ابقي ساذج لو مش هوافق بس خليني اقولك ان في فرق كبير ما بين انك تعمل شغلك و ان يبقي شغلك وسيلة تغيير مبادئ و اخلاق و مواقف تتحاسب عليها طول حياتك...يعني مينفعش اقول الحاجة و عكسها لمجرد تغيير في رقم حساب البنك ...الفكرة مش مجرد ناس قبلت بالفتنة...الفكرة الاكبر انك لما تسمع الناس دول نفسهم بيحاربوا اللي هم بيحاربوا عشانه دلوقتي...يعني انت بتأيد فكرة انت كنت ضدها قبل الفتنة و مش بس كدة دة انت بتشوف تأييد كأنه متربي علي الفكرة دي مع الرضاعة

-و بدأت الفتنة تتسرسب لحاجات كتير ...و فجأة بيتحول رد فعلك من متابع جيد للشخص دة لهروب من مجرد ظهوره قدامك و هم الحقيقة بيبان عليهم قوي...فعلا تلاقي الوشوش بتقفل و الكلام رائحته فتنة ..معاك ان كل واحد حر في تصرفاته بس متحاولش تقنعني بالحاجة و عكسها في اقل من شوية ايام

-الاصعب من كل اللي فات انك تقدم مبررات ان الناس اللي وقعت في الفتنة كانت محتاجة بس المشكلة  لما تلاقي تاريخ متحرك في شخص لو اعتزل بكرة هيكسب دعوات الناس اللي حبت فنه و برضه رصيده في البنك هيبقي كويس بس تقول ايه بقي ...البحر يحب الزيادة

-فجأة بتحول من شخص الناس تتمني تتصور معاه لفنان مبتدئ بيتصور جنب المنتج اللي اكتشفه و الحقيقة الصورة بتبقي مهينة ...مهينة لانك مش هتلحق تمثل في لحظة التصوير...بتبان صغير جدا في وقفتك...بتضحك بمنطق دكتور الجامعة اللي قال افيه سخيف فانت لازم تقع من الضحك...الموضوع اكبر من انه رصيد في البنك علي فكرة بس تفتكر انك قعدت سنين تعمل في تاريخ هتبقي محتاج ايه تاني؟؟؟
**اللوم عمره ما بيبقي علي صانع الفتنة...لانه بيبقي تاجر بيعرض بضاعته...العتاب و اللوم بيبقي اللي داخل يشتري و هو باصص تحت رجله
**الانسان ماضي بيتعمل عشان حاضر يتعاش عشان مستقبل سيرته تبقي حلوة فيه

**الفتنة موجودة بس في الاخر خليك فاكر ...اللي وقعك في المصيدة مش هيعرفك تاني عشان هتفضل في عينه رخيص
#التتر
#كريم_مجدي

الأحد، 3 فبراير 2019

التسويق


العين بتأكل قبل الفم و برضه العين بتقتنع قبل العقل ...و خليك فاكر الكلمتين دول عشان هنحكم عليهم بعدين
-ارخم حاجة في اي مسلسل حلو و بيشد الناس هي فقرة الاعلانات و بمبدأ ان المسيطر اقتصاديا مسيطر سياسيا فالمنتح هيتعرض عليك يعني هيتعرض ...الفكرة كلها بقي انك تحول الاجبار دة لرغبة في المشاهدة...لامر يطلع من عينك يروح لعقلك انه يقتنع ان المنتج دة يستاهل يتشاف و تدور عليه...و في الاعلانات بيبقي في حاجات ثابتة كدة و تعالي نقولهم سوا

-في اعلانات اسمها اعلانات شيريهان و دي عبارة عن حالة افلاس في الابداع يعني بتجيب لحن مشهور و تركب عليه كلمات و طبعا المفاجأة هنا في ايه؟؟ ايوة بقي هو دة الابداع انك تجيب ممثلين مشهورين او مطربين يغنوا في الاعلان و دة وضح قوي في اعلانات فودافون و اورانج و اتصالات...و الحقيقة انهم وصلوا لقمة الافلاس في رمضان اللي هو المفروض للاسف انه موسم اعلانات قوي للمشاهدة و دة معناه ان الاستسهال احسن بكتير من انك تفكر في فكرة جديدة مع ان الفكرة اللي ممكن تكون بتكسر الدنيا حاجة في منتهي البساطة زي مثلا فكرة كوكاكولا بتاعت كتابة الاسماء علي الكانزات "معلش باكتبها بالعربي" بس كوكاكولا الحقيقة عملت حاجة في التسويق عبقرية انها وصلت احساس للعميل انه صاحب المنتج و دايما اي عميل في الدنيا لو اديته قلم رخيص جدا بس عليه اسمه هيبقي عنده احسن من قلم السادات و هو بيمضي كامب ديفيد مثلا

-فكرة ب 4 جنيه خلت منتجات كوكاكولا في فترة تتفوق علي منافستها المباشرة بيبسي بشكل واضح و صريح مع اعتماد بيبسي علي الشكل التقليدي للاعلانات ...اغنيه علي نجم مشهور جدا بيشرب زجاجة بيبسي فاضيه و بيعمل نفسه انه مستمتع بالطعم...و تعالي بقي نشوف نوع تاني من الاعلانات اللي عكس كوكاكولا اللي توصلك احساس انك مش عايش في مصر زي بالظبط لما تجيب ممثل كبير زي يسرا مثلا في اعلانات شركة مقاولات و هي بتثق في الاسامي الكبيرة و الاعلان ينزل علي قناة مجانية بيشوفها ناس متعرفش حتي اسم الشركة دي ايه...حتي الفئة اللي بيتوجهلها اعلان زي دة مبتبقاش محتاجة اعلانات ...اصل بالعقل كدة لما تجيبلي هاني سلامة و هو بيرقص تانجو في شقته و انه قاعد علي البسين عشان زهقان فأكيد استاذ مدحت اللي في السجل المدني مش هيسيب المدام و هي بتعمل شوبينج و يروح ياخد في الكومباوند دة...فالناس اللي زي دي بتعمل الاعلانات لمجرد ان في ادارة في الشركة مهمتها انها تعمل اعلانات

-و نكمل في مجال العقارات اللي لما المرشدي حب يعمل اعلان للشباب و قالك الشقة ب 300 الف جنيه تطلع ست في الجلاش و اللي كتب الافيه دة لازم يقعد مع الخليل كوميدي ساعتين لوحدهم كعقاب..لما قالت ما تديهالهم ببلاش احسن...المشكلة في الاعلانات اللي زي دي هي الفصل عن ارض الواقع ...يعني الاعلان مش بتاعنا يا باشا ...مش بتاع واحد قاعد علي قهوة بيشرب شاي كشري عشان الفتلة غالي ...الصورة اه حلوة بتاعت النجم بس صورة بروازها كدب ...الممثل مهما كان شاطر بيبقي ضعيف جدا لما "بيمثل " في الاعلان

-دومتي عملت حاجة زي الفنكوش كدة و دة حقيقي فعلا لما فجأة تلاقي السوشيال ميديا كلها بتتكلم عن سندوتشات دومتي الجديدة اللي بتتهرب في البيت زي المخدرات و تنزل كمية قليلة جدا في السوق تخليك تفضل تدور علي المنتج دة في كل اكشاك و محلات البلد...هي قدرت تخطف انتباهك و عقلك من غير حتي ما تجرب المنطق و دي اللي عملته حملة انت مكانك مش هنا بتاعت البنك الاهلي و دي مكن من كتر بساطتها بقت افيه الناس بتقوله في الشارع

-من فترة قريبة محمد صلاح قفل كل حسابات السوشيال ميديا بتاعته و اخر حاجة كتبها ان دة وقت التواصل الحقيقي ...و الحقيقة ان محمد صلاح مكنش نجم الحملة دي علي قد ما كانت شركة الشحن بتاعت دي اتش ال هي النجمة و الفكرة كانت هي حجر الاساس في الموضوع...انك ازاي تمهد لفكرتك و تخلي الناس تعيش جواها بشكل يخيليهم يبتسموا و هم كل شوية بيتفرجوا علي اعلان حاجة ممكن ميستخدموهاش و لا مرة في حياتهم بس صدقوها...زي بالظبط لما مسلسل ابو العروسة عمل فكرة انه يعمل اكونت فعلا بشخصية سيد رجب في المسلسل و الحقيقة فكرة عبقرية انه ازاي قدر يشدك بحاجة تربطك باحداث المسلسل و تخليك تعيش احداثه

-لما تبقي ماشي علي الدائري في امان الله و تكتشف ان محمد فؤاد اللي عمره ما عمل دور غني في حياته عامل اعلان عن كومباوند سكني عن الرفاهية...طيب اذا كان محمد فؤاد مش قوي في تمثيل الادوار الفقيرة هاقتنع انا ازاي بفكرة الاعلان...الموضوع مش حشو نجوم علي قد ما هو حشو دماغ بطعم حلو لما ادوقه اقول الله

-مينفعش اعلان احتياج التبرعات تبقي بشكل مهين كدة زي اعلانات دلال عبد العزيز كدة " يلا ربنا يكون في عونكوا معلش" بس الحقيقة في الجانب التاني اعلان مجدي يعقوب كان في منتهي البهجة و لما قام يسقف انت تبقي عايز تقوله احنا كلنا نقوملك...الموضوع ببساطة احساس بالفرح و انت بتساعد غيرك لان دي في حد ذاتها فرحة

-من الشركات اللي بدأت تعمل نوع مختلف من الاعلانات اتصالات اللي بدأت باعلانات ميدو و ادوارد اللي قالوا علي عيوب فيهم فعلا و اعلان بيومي فؤاد كان ظريف لحد الاعلان الحلو و الحلو جدا بتاع احمد حلمي اللي فكرته مناسبة جدا جدا للمنتج اللي بيتسوق عنه علي عكس فودافون اللي مصممة تعيش في دار السلام و القلعة ما هو مش عشان هتجيبوا مغني شعبي هتبقوا شركة الشعب...او زي اورانج اللي مصممة تعيش في دور شوكولاته جيرسي واكلة الجو ...يا جماعة عيب و الله دة حتي لما جيبتوا الناس بتوع السوشيال ميديا خلتوهم يغنوا ...نفس منطق البلد كلها بقت مصورين...اومال مين اللي هيتصور ؟

***معلش هاخدك كدة في مشوار صغير لكوريا الجنوبية اشرحلة فيها الفكرة الصغيرة ممكن تعمل ايه

-كان في اتنين سوبر ماركت "طبعا مش فاكر اساميهم" كانوا متصدرين المشهد في كوريا بس رقم واحد كانت فروعه اكتر و السوبر ماركت التاني فروعه اقل و مكنوش يقدروا يفتحوا فروع تانية...فعملوا فكرة انهم يأجروا حيطان مترو الانفاق و يعملوا ملصقات صورة طبق الاصل شكل السوبر ماركت من جوة و كل منتج عليه كود ممكن تطلب الكمية و النوع اللي انت عايزه من خلال الكود دة و يوصلك علي البيت قبل ما توصل و في خلال سنة وصلت مبيعات السوبر ماركت التاني لرقم واحد

**الاصل في نجاح اي اعلان لمنتج هي فكرته مش هات نجم تقيل الناس تنبهر لما تشوفه بيعمل اعلان سمن او زيت و هو مش مقتنع اساسا بالمنتج...الفكرة هي اللي بتخليك تحس ان الاعلان دة يخصك ...الاعلان دة بتشوف زيه و انت ماشي في الشارع ...اعلان تشم رائحة الصدق فيه...يكون اول مبدأ في الفكرة احترام عقل اللي بيشوف...قبل ما تبقي ادارة تسويق خليك ادراة تصديق

**المقال دة مجرد رأي من مشاهد عادي

#التتر
#كريم_مجدي
  

الجمعة، 25 يناير 2019

محمد خان


كل حاجة في الدنيا حكاية ...حياتنا حكاية...و كلامنا حكاية...و الصح حكاية و الغلط انك تعمل عكس الحكاية...و عشان تبقي بطل الحكاية مش هتيجي بين لحظة و التانية ...اصل انك تبقي بطل في وسط تفاصيل حياتك مش حاجة سهلة و البطل لازم يبقي فاهم كل تفاصيل حكايته اللي عايش جواها حتي و هو مش موجود في المشهد بس يبقي عارف اللي بيحصل حواليه...الموضوع صعب انا عارف بس عشان يتقال عليك بطل ..و الموضوع يستاهل صح؟ بس قبل ما تقول صح لازم تفكر في سؤال مهم جدا؟؟
**هي الحكاية لازم يبقالها بطل واحد؟؟ ما هو ممكن يبقالها اكتر من بطل ؟؟
**شوفت راجعت تفكيرك ازاي؟؟
-الحكاية ممكن يبقالها ابطال كتير بس اصلها لازم يكون واحد و دي بقي مرحلة تانية خــــــــــــــــــــالص ...اصل الحكاية هو اقوي حلقة فيها...مش مهم تكون ايه الحكاية بس المهم اصل الحكاية ايه عشان لما تعرف اصلها هتاخد قرارك هتدخل عالم الحكاية و لا تاخدها من قاصرها كدة و تقول لا يا عم مش هالعب

-و عشان مينفعش مقدمات كتير المرة دي بالذات "و عشان لسة هنتكلم كتير قدام شوية" ...ندخل في الموضوع

-لما بتيجي تختار فيلم تتفرج عليه يوم الاجازة و انت قاعد علي الكنبة جنبك فنجان قهوة و شوية فشار و لو ملكش في جو الدباديب دة خليك زيي و اضرب اكل و انت قاعد بتتفرج...اول حاجة عينك بتيجي عليها اسم بطل حكاية الفيلم صح ؟؟
بس بعد المقال دة اوعدك مش هتبص لاسم بطل الحكاية...هاخليك تدور علي اصل الحكاية
رهان؟
يلا بيننا

-في حكايات السينما في اصول محددة و ثابته بس في اصل حقق المعادلة الصعبة...اصل الحكاية هو محمد خان ...محمد خان مخرج و اصل كل حكاية بيخرجها...في مخرجين كتير موهوبين بس اللي بيميز خان انه عمل كل حاجة "و دي هنشرحها بالتفصيل" ...صعب جدا انك تلاقي ممثل عمل كل الادوار بمختلف الطبقات بس الاصعب و الاصعب انك تلاقي "مخرج" عمل كل حاجة و يفضل اصل كل حاجة واحد زي محمد خان و الاصعب و الاجمل انك هتكتشف ان الاصل واحد كل ما تتفرج علي اي مشهد من مشاهد افلامه

-محمد خان عنده القدرة انه يحول اي سيناريو لاخراج بطعم شوارع القاهرة ...طعم المشربية في البلكونات القديمة....كادرات خان تحس انها بشر بيتحرك مع الممثلين و الكادر عند خان بيبقي هو بطل الحكاية و الفيلم...عارف هدوء اربعينات القاهرة الساحرة...اهو دة طعم افلام خان...هات ورق فاضي و اديهوله هيطلعلك منه فيلم يستاهل تقول عليه الله...خان عنده هدوء الاخراج يعني تحس ان الفيلم طالع رايق حتي لو في صراعات و ازمات بس تلاقي نفسك مستسلم نفسيا للاحداث

-من اهم و اهم و اهم مميزات خان ورا الكاميرا انه معندوش نجم بيعمل حاجة واحدة...دايما بتعرف افلام خان لما تلاقي ممثل بيعمل حاجة مش بتاعته و بيتألق فيها بشكل مبهر او تلاقي ممثل جديد بس قدام كاميرا خان تتأكد انه ممكن ياخد جوائز او انه معجون بمياه الاستوديو

**ما تيجوا ناخد شوية من حواديت خان و نكتشف اصلها ايه

-احمد ذكي في كل افلامه هتلاقيه هو اصل الحكاية سواء بموهبته او حضوره صح؟؟ بس افلامه مع خان هتعرف ان اصل الحكاية اللي ورا الكاميرا ...تعالي مثلا نبدأ باحلام هند و كاميليا  و هتلاقي اخراج خان في الفيلم دة بتعيش معاه الواقع بكل تفاصيله الحياتية اللي ممكن تلاقيها في جيرانك و اصحابك و قرايبك...في الفيلم دة هتلاقي تمثيل هادي جدا من ابطال العمل التلاتة و اولهم احمد ذكي و الانسانية في اخراج خان لازم تلاقيها حاضرة و موجودة...انسانية تركيزه علي الظلم و القهر و علي الغدر و الخيانة...تفاصيل تخليك تقول ان الفيلم لمس معاك في حاجة في حياتك

-احنا لسه مع ذكي و خان اللي عملوا مع بعض واحد من اروع الافلام الانسانية في تحول الشخصية الانسانية في كل الجوانب...فيلم زوجة رجل مهم قدم فيه خان كل تحولات شخصية من السلطة لفقدانها و من الحب الي الانتقام و من الشماتة للانتصار...في الفيلم دة كان في تمثيل بالضهر و عشان تحس بموهبة ذكي عايزك تركز مع كادر خان و ميرفت امين بتستفز جوزها و هتعرف ساعتها ان بطل الرواية موهبة ذكي بس اصل الحكاية الكادر و صاحبه...زي مثلا المشهد العبقري بين الصحفي اللي اتظلم و الظابط اللي ظلم و مع الحوار الرائع لازم يتقدم بشكل واقعي جدا و يمكن انت متعرفش اسم الممثل اللي عمل دور الصحفي بس اكيد هتفتكر طريقة كلامه و ازاي ان الكادرات اتوزعت صح بين البطل و بين واحد جاي يعمل مشهد و ماشي ...زي مشاهد انكسار الظابط بعد خروجه من الخدمة كانت دايما مركزة علي تعبيرات وشه في انها تجيب التحول من الغرور و الغطرسة لانكار انه القوة ضاعت

-مستر كاراتيه و هنا بقي فعلا هتلاقي كادرات خان هي اللي شايلة الفيلم من اول مشهد في الفيلم في الارض الزراعية و انت هتحس انك شوفت المشهد دة في الواقع مش مجرد تمثيل و خلاص و لو جيبنا احمد ذكي علي جنب شوية هتلاقي بقية الابطال ميطلعوش فيلم ناجح زي دة بس اللي ورا الكاميرا قادر يعمل فيلم متوازن هادي بطعم الشوارع المصرية بأي تركيبة  و دي يبان في مشاهد الحب بين احمد ذكي و نهلة سلامة مثلا او مشاهد الصحوبية بين ذكي و ابراهيم نصر
-رحلته مع احمد ذكي اتعملها احلي نهاية لما عملوا ايام السادات و الفيلم دة يثبتلك ان الاتنين دول ممكن يقدموا اي حاجة مع بعض و لو جيت عملت مقارنة بين روح السادات و روح ذكي هتلاقيهم واحد بشكل يقولك في موهبتين اسمهم ذكي و خان ممكن يعملوا تفاصيل التفاصيل من غير ما انت تقول ان دة تمثيل

**قوم اشرب مياه كدة عشان اللي جاي حلو

-عارف انك هتسأل ان احمد ذكي ممثل ينجح اي عمل بموهبته...ايه اللي هيخليني اعرف ان سر النجاح محمد خان؟؟
**اومال انا قولتلك اللي جاي حلو ليه

-تقدر تقولي ايه الفيلم اللي عادل امام مقالش فيه و لا افيه؟؟ خلي بالك و لا افيه؟
طيب اصعبها عليك اكتر...ايه الفيلم اللي عادل امام عمل تمثيل بجد؟؟
-ايوة هو الحريف...اهو بقي الحريف دة اخراج خان و هنا هتشوف عادل امام بشكل غير اي حاجة تانية و هتقتنع به"بغض النظر ان عادل امام بيعرف يلعب كورة اصلا و لا لاء" بس خد بالك من المشهد بتاع "انا هانزل مع الخسران" و هتشوف الزعيم ممثل مطيع تحت ايد مخرج عارف هو بيعمل ايه...او مثلا مشاهد الحب المخلوطة بالغلب بين فردوس عبد الحميد او الزعيم او المشهد الكبير بين الحريف و ابوه و اول حاجة هتيجي في دماغك ساعتها ان دة مش عادل امام...دة ممثل تحت ايد مخرج تقيل اسمه محمد خان

-في افلام خان في حاجة حلوة فعلا...برائحة الخضرة و الزرع و دة هتشوفه قوي في فيلمين اولهم مشوار عمر و في الفيلم دة هتشوف تفاصيل في الريف ممكن متشوفهاش في اي فيلم تاني مش بس في التمثيل لا...دة في التفاصيل المملة لحياة الريف من بيوت و طريقة كلام و توزيع التمثيل علي كل ابطال العمل اللي تحس انهم مع خان عاملين زي التايه اللي لقي اهله او زي المدير اللي يعرف يشغلك...يعني مثلا هتلاقي تمثيل حلو جدا من مديحة كامل...تمكن غير عادي من ممدوح عبد العليم...هتلاقي تمثيل حقيقي برة برواز فتي الشاشة لفاروق الفيشاوي

-و بخصوص التوهان لازم تعرف ان خرج و لم يعد كان اخراج خان ...و مين غيره اللي هيعرف يطلع فريد شوقي بالصورة الغير تقليدية دي " مع انه عملها كتير" بس في خر و لم يعد هتلاقي مشاهده مع الفخراني فيها معاني انسانية تعدي مستوي الواقع ...حتي ليلي علوي هتحس ان من المرات القليله اللي مش هتبص علي شكلها و هتركز في تمثيلها و طريقة اتقانها للغة الحوار بشكل يقول ان في مخرج قوي عرف يذاكرلها

-طيب اسألك سؤال اصعب من سؤال الزعيم؟؟
**سعاد حسني تفتكر ايه في ادوارها مفيهوش دلع؟؟ اعصر دماغك يا اخي
-انا اقولك...موعد علي العشاء و زي ما قولنا فوق بقي هنا بتلاقي سعاد حسني الممثلة اللي بجد و بتلاقي حسين فهمي مش مجرد شاب شكله حلو و السلام...هتلاقي مشاهد حلوة و واقعية بجد بينهم و خصوصا في مشاهد المواجهة مثلا...طعم خان هتلاقيه في كل مكان و كادر في الفيلم

-طعم شوارع خان بيبان قوي في فيلم "في شقة في مصر الجديدة" و "بنات وسط البلد" و في الفيلمين طول و مع خان نفسه هتلاقي المكان بطل مشارك في العمل و دة يمكن هتلاقيه في معظم اعماله ...المكان اللي متعرفش دة ديكور و لا حقيقة بس تتأكد انك شوفت الناس دي و مشيت في الاماكن دي قبل كدة

**مش مهم تكون بطل الحكاية عشان مش هتبقي بطل لكل حكاية بس ممكن تبقي اصل كل حكاية بتشارك فيها...ممكن تكون محمد خان

#اصل_الحكاية
#محمد_خان
#التتر
#التتر_رجع
#كريم_مجدي

ahmed zaki part 2

  خير الكلام ما قل و دل و عشان تعرف قيمة المقولة دي لازم تذاكر احمد زكي ...اكبر و اوضح و احلي حاجة في موهبة احمد زكي انه معملش اعمال عددها ك...