عبد المنعم مدبولي-الجزء الاول

-اصل عادل امام هيسدد ديون مصر بس يحطه صورته علي الجنيه...انت تعرف ان محمد صبحي اساسا مش مسلم بس هو متسمي كدة ...لو انت حضرت الاساطير دي فأكيد جه في دماغك سؤال تاني خالص ...هو مين الجندي المجهول دة اللي مدفون علي الطريق ؟؟ يعني عمل ايه عشان ياخد التكريم دة كله؟؟ و معقولة يعني جابه اي حد من الحرب كدة و عملوله رمز تذكاري يعدي عليه اجيال ورا اجيال يسألوا نفس السؤال ...و كل واحد و خياله طبعا يعني اللي يقولك دة اكيد قتل بتاع 3000 واحد كدة و اللي يقولك لا ياعم دة اكيد دمر 6 مليون دبابة بس الحقيقة و بمرور الوقت اكتشفنا اولا ان طفولتنا مرحلة ما يعلم بيها الا ربنا و ان الجندي المجهول دة رمز

-رمز لكل واحد عمل حاجة في حرب اكتوبر و من هنا بدأت فكرة الرمز تتطور ...يعني لما تقول الجندي المجهول فأنت اكيد مش هتفكر هو كان بيحارب تحت اي سلاح...او بمعني اصح هتعرف ان الرمز اللي محطوط دة لاي دور اتعمل في الحرب...كمان علي المسرح بيبقي في رمز لما يتقال اسمه هتعرف ان هتشوف حاجة حلوة...لا حلوة قوي ...و لما تشوف اكتر من مسرحية هتعرف ان فيها سيرته

-رمز متعرفش هو هيعمل ايه علي المسرح ...يعني انت لو نجم مسرح تقيل فأنت هتعرف تقف و تتحرك صح "و تقدر تراجع مقالات نجوم المسرح اللي فاتت" ...و لو انت عرفت تمثل و تخرج فأنت معجون بمياة المسرح ...بس لو انت بتألف و تخرج و تمثل و تلحن فأنت رمز...رمز لاي عمل بيتعمل علي المسرح...لو عرفت تعمل كدة فأنت اكيد عبد المنعم مدبولي

-مدبولي مش مجرد علامة من علامات المسرح...مدبولي كسر قاعدة ان صاحب بالين كداب ...عشان مدبولي كان صاحب اكتر من بال و الغريب انه قدر يعملهم كلهم بشكل متوازن و موزون

-متوازن لانك و انت شايفه علي المسرح لحم و دم و علي الافيش اسمه علي صاحب الاخراج مش هتعرف تفرق مين فيهم المخرج و مين فيهم الممثل و موزون لانك هتتأكد انه ملتزم جدا بمساحة دوره يعني مش ماشي بمبدا "صاحب الكورة" و دي هتعرف تكتشفها في مسرحية "مطار الحب" و ساعتها هتشوف المخرج اللي عمل مسرحية من نجوم مالهمش في الكوميديا زي يوسف شعبان و ميرفت امين عمل كوميدي يفضل في تراث المسرح ...و هتلاقي دور مدبولي هو اللي ساند مساحة الكوميديا علي المسرح يعني هتلاقيه بيخرج العمل علي الهواء كل يوم...هتلاقيه بيسند الافيه الواقع من اي ممثل...يفرش افيه ليوسف شعبان عشان يعمل افيه الناس تضحك عليه و تنسي انه طالع من ممثل مش كوميدي و الحقيقة اللي هتطل بيها ان لمسرح مدبولي طعم "و خليني اقولك ازاي له طعم"

**تحب اشرحلك زيادة صح؟؟ تعالي هاشرحلك

-في عالم المسرح انك تشوف المسرحية في عيون الابطال بدل الجمهور دي حاجة في منتهي الصعوبة لانك بتبقي مسئول انك تخلي اللي طبعه صعب يضحك و النكدي يقع من كتر الضحك ...يعني ناس بتتغير كل يوم تقريبا بمختلف ظروفهم اليومية سواء جاي المسرح فرحان او زعلان...مسئول عن تاريخ ممكن يتعمل بعد ال 3 خبطات بتوع خشبة المسرح ...تاريخ هيفتكرك به اجيال ورا اجيال مع اختلاف الازمان و تنوع مقاييس الضحك...يعني بتعمل حاجة اصعب من حفلات ام كلثوم اللي مبقتش تتسمع من اجيال جديدة بس المسرحيات عاملة زي مباني وسط البلد بتشم رائحتها قبل ما تشوفها و مع اختلاف الاجيال من الحاجات القليلة اللي بيتفقوا عليها هي الضحك

-مدبولي كان يمكن بيعمل حاجة غريبة و قوية جدا في الاخراج...انه كان قادر يفصل ما بين كونه ممثل كوميدي تقيل جدا و ما بين انه بيخرج مسرحية لبطل تاني و مش بس كدة دة مبيخرجش لاي بطل...مدبولي و بالصريح الذي لا يقبل الشك هو من مؤسسي تاريخ فؤاد المهندس المسرحي و كان شريك اساسي في تكوين صورة في الظاهر كانت لمسرح المهندس لكن عمليا كانت مدرسة مدبولي...و عشان تخرج مسرحية للمهندس اللي انت بتلعب في نفس ملعبه لازم تكون مخرج واثق جدا من ادواتك

**و اعرف منين بقي ان دي مسرحيات فيها طعم مدبولي ؟ هادوقها مثلا

-بغض النظر ان السؤال في نوع من انواع السخرية بس خليني اقولك ازاي و هاقنعك " هي اول مرة يعني"

-لما تيجي تتفرج علي المسرحية و تلاقيها ماشية بمبدأ "توزيع الميراث" يعني هتلاقي كل واحد واخد مساحة الضحك اللي تخدم موهبته...يعني ايه؟

يعني هتلاقي توزيع الافيهات علي الابطال مبنية علي الموهبة...اللي هيقدر يشيل افيه تقيل يضحك الناس هتلاقيه واخد مساحة كبيرة و اللي موهبته علي قد الافيه المتوسط هتلاقيه دايما في حالة رد الفعل طول المسرحية زي مثلا شويكار في انا و هو و هي و السكرتير الفني و حواء الساعة 12 و هتلاقيهم المسرحيات التلاتة من اسباب النجاح الكبير لمسرح المهندس كممثل و مدبولي كمخرج...هتلاقي شويكار مالها بقي يا سيدي

دايما هتلاقيها واقفة قدام المهندس مستنية منه الافيه عشان هي ترد عليه و تشوف الناس بتضحك علي رد فعلها و دة يمكن اللي استخدموه الثنائي شويكار و المهندس في سيدتي الجميلة مثلا ...و زي ما قولتلك ان في مسرح مدبولي في مساحة لكل ممثل علي قد قدرته و تحمله علي المسرح ساعتها يعني مثلا في انا و هو و هي هتلاقي اشهر جمل الزعيم "بلد شهادات صحيح" و هتعرف ان الجملة دي كانت كافيه قوي عشان تعلم مع الناس و كانت متفصله علي مقاس ممثل مبتدئ اسمه عادل امام

-في مسرح مدبولي كانت العلامة الابرز انه يبقي قاسم امين المسرح "و دة بجد مش هزار" مدبولي خلق مساحة للممثلات بشكل كبير يعني هتلاقي في مطار الحب ميرفت امين و طبعا شويكار مع المهندس و عقيلة راتب في مسرحية اسمها "حلمك يا سي علام" و هنا هتلاقي ماتش كوميدي في منتهي الروعة بين امين الهنيدي و عقيلة راتب هتعرف ان اللي مرتبه مدبولي " مش عشان المقال عليه" بس عشان هتحس انك شايف المهندس و شويكار بس الحقيقة انك شايف شكل مسرح صاحبه اسمه عبد المنعم مدبولي

-خليني اقولك بقي ان ساعة لقلبك دي كان مدبولي مؤلفها...متخيل تألف مسلسل اذاعي يتعمل منه مسرح و راديو و تلاقي اجيال ورا اجيال حفظاه...مدبولي حتي لما يعمل راديو بيعمله بشكل مسرحي فيه طعمه

-لما تقول صاحب بالين بعد كدة متقولش انه كدب...قول ان فاضل بال تالت متكلمناش عنه

**استنوا بقي الجزء التاني من الجندي المجهول

#عبد_المنعم_مدبولي

#الجندي_المجهول

#طعم_مدبولي

#التتر

#كريم_مجدي

younis shalby

من زمان كدة و في امثال شعبية في منها اللي له لازمة و في منها اللي مالوش اي لازمة...و من الامثال الشعبية اللي كان الناس بتاخدها باكتر من شكل هي اللي تكسب به العب به ...يعني من الاخر لو لقيت حاجة بتكسبك في تعاملات او تنجحك في شغل او تجيبلك منفعة امسك بيها بايدك و اسنانك و افضل استخدمها...حاجة كدة زي الكارت (واحد و ستة) في الدومينو الامريكاني "هابقي اشرحلكوا اهميتها في الكومنتات" ...و المثل دة ممكن ينفع في حاجات كتير في الدنيا بس في المسرح هيكون ناقص حتة صغيرة قوي

-في المسرح طبعا لازم اللي تكسب به تلعب به عشان في المسرح انت بتعتمد علي علم الاحتمالات...يعني الافيه لو عجب الناس يبقي من النص حتي لو مش مكتوب...و الارتجال لو ظبط مع ضحك الناس بيبقي موقف مستمر كل يوم

**هو انا نسيت اقولكوا الحتة الصغيرة اللي باقية في المثل؟؟

-اللي تكسب به "طوره و العب به" و دي اهم تكملة خصوصا لو عايز تنجح في مكان مرعب زي المسرح...و اشهر واحد معملش كدة هو يونس شلبي

-كتير مننا بيقتنع انك لو اتحطيت وسط ناس بتذاكر فانت كمان هتذاكر بس الموضوع في حاجات تانية كتير...يونس شلبي بدأ فعلا بداية اي مبتدئ شهرة ميحلمش بيها لما عمل مدرسة المشاغبين وسط ناس تضحك الحجر ...و عمل لنفسه طريقة كان مميز بيها جدا بس الحقيقة كانت هي نفس الطريقة اللي وقعته من مكانه اللي وصل له "ازاي؟ جايلك في الكلام اهو "

-يونس شلبي في المسرحية دي كان منصور ابن الناظر اللي مبيجمعش في الكلام و هتتأكد في كل مشهد انه بينفذ النص الاول من المثل اللي في اول مقال "قولتلك متفوتش المقدمة" يعني مين ينسي "ابويا اتحرق هيييه" و كتير من الافيهات اللي مستحيل تتنسي و اللي توج بيها نفسه تالت انجح شخصية في المسرحية...و طبعا لو المقدمات سليمة هيبقي البرهان و النتائج لازم تطلع مظبوطة صح؟؟

-لا مش صح "ما انا قولتلك بقي ...المسرح علم احتمالات اصلا" ...من هنا اقتنع يونس شلبي ان الطريقة اللي يبقي فيها نجم مسرح انه ميجمعش...يبقي تايه علي المسرح في الافيهات و يضحك بس الحقيقة انه هيتوه في عالم الكوميديا...بس قبل ما يتوه استمر يونس شلبي انه يلعب باللي هيكسب به ...و لما عمل العيال كبرت هتلاقيه هو هو اللي في مدرسة المشاغبين بس بالالوان حتي ابوه كان واحد و باستثناء كام افيه زي لما شخط في حسن مصطفي لما قاله "استني يا رجل انت مش شايفني باتكلم في التليفون" ...بس غير كدة لو جمعنا المشاهد بتاعته في المسرحيتين هتحس انه روح من المدرسة راح البيت

-طيب ايه المشلكة ؟؟؟مش الرجل ناجح في الاسلوب؟؟ اللي هيخليك تكتب عنه مقال نقد؟؟

-انا خلصت المقال؟؟؟ رد عليا ...ما تستنوا يا اخوانا

-يونس شلبي حاول يلعب بنفس الاسلوب فاتحبس فيه...حط نفسه في احتمالين اصعب من بعض ...يا الناس هتدخل تشوفه تايه و ساعتها بالتكرار هتزهق لانها هتبقي متوقعه اللي هيحصل "راجع مقال مسرح مصر بالمرة" يا الاحتمال التاني و دة الاصعب ان الجمهور ميضحكش ...و النتيجة واحدة...انك تتنسي

-يونس شلبي اعتمد زي المطاعم اللي ليها اسم ...اعتمد انه تلميذ في مدرسة المشاغبين يعني الضحك بالسمعة و دة اكبر رهان خسران ممكن يراهن عليه اي ممثل خصوصا علي خشبة المسرح...و دة اللي حصل معاه بالحرف ...يعني اتفرج علي مسرحيات مثلا "الدبابير-الواد الجن-صورة ملهاش اصل-الصول و الحرامي" شوفت بقي اسامي ممكن متكونش سمعت عنها ...هتلاقي الناس و هي بتحييه في ظهوره هي شايفة مدرسة المشاغبين و العيال كبرت مش شايفين يونس شلبي ...بيضحكوا علي افيهات حافظينها من المسرحيتين مش اللي بتتقال قدامهم و دي اصعب عقاب علي خشبة المسرح انك تبقي موجود بس عشان اسمك علي الافيش ...و عشان كدة برة المسرحيتين دول مش هتلاقي تاريخ يتحط في ارشيف المسرح بطلها يونس شلبي

-و يمكن التطور اتعمل بشكل عكسي لما حاول يعمل مسرح خليجي و لو اتفرجت علي اي مسرحية فيهم انت مش بس مش هتضحك...انت هتحول او هتقفل المسرحية تعاطفا معاه انك مش عايز تشوفه في المستوي دة

-الظلم اللي اتعرضله يونس شلبي حاجتين...و الحاجتين اسمهم استسهال ...استسهال من يونس شلبي نفسه انه قرر يعمل نفس الاسلوب و ساعتها كان قدامه يا يجمع في الكلام و هو نفسه نسي طريقة الكوميديا غير بالتوهان و هاقولك بالدليل ليه؟

لان في افلام كانت فيها كمية ضحك فعلا حلوة و لما عمل مسلسل عمله بشكل كويس بس علي المسرح اعتمد علي سمعته ...و الاستسهال من عامل الانتاج اللي كان عايز الربح السريع فبقي يعمل المسرحيات اللي ملهاش لا نص و لا فكرة "برضه راجع مقال مسرح مصر" ...هات النجم يقول اي حاجة و الناس هتضحك يا عم...هو دة المبدأ اللي كانوا الطرفين متفقين مع بعض انهم يعملوه عشان ينجحوا بس للاسف الموضوع نجح نجاح مرتبط بوقت عرضه مرتنبطش بزمن نجاح

-المبدأ شامل ناس كتير بس يمكن كان اكبر مثال عليه يونس شلبي ...لانه كان قدامه اكبر فرصة انه يبقي نجم من نجوم المسرح الكوميدي بس زي ما تاريخ المسرح بيرفع لسابع سما ممكن يوقع لسابع ارض

-قانون المسرح لا يحترم من لا يحترم هيبته

#يونس_شلبي

#مسرح_التتر

#التتر

#كريم_مجدي