المسرح 1

قبل اي كلام هيتقال في المقال دة لازم اقول حاجتبن

-المقال اهداء لاتقل اتنين وقفوا علي خشبة المسرح الكوميدي " نجاح الموجي و عادل خيري"

-المقال دة بداية موسم للمسرح هيبقي موجود باستمرار ان شاء الله و الموضوع مش مقارنة هيطلع فيها حد كسبان...المقال هدفه دراسة نجاح لكل انواع المسرح "علي قد ما اقدر يعني"

*نبدأ المقال...يلا بيننا

استني قوم اعمل قهوة يلا

-ايام العيد مهما مرت الايام و اتغيرت الاجيال ليها علامات و مقدمات من اول لبس العيد و هو مرصوص رصة حلواني لحد تكبيرات صلاة العيد و العيدية اللي عمرك ما خدتها سواء و انت صغير لما اهلك بياخدوها منك او سواء و انت كبير فبتديها للاصغر منك و بعد الصلاة الفطار مع اللمة و فرحة الوشوش و البلالين و انت شايف الناس مهما كانت همومها بس بتفرح اليوم دة...و من اهم مظاهر و علامات العيد بتبقي مسرحية العيد و لازم تلاقي حاجة مشتركة في مسرحيات العيد بقالها زمان ...محمد صبحي و عادل امام ....الاتنين اللي استمر نجاحهم علي خشبة المسرح سنين و سنين

-علي خشبة المسرح صعب انك تكون بطل و الاصعب انك تكون قائد...سهل انك تضحك بس صعب انك تحفر الضحك في ضخور زي الفراعنة رموزها سهلة و يفضل فاكرها الكبير قبل الصغير ...حلو انك تقول افيهات تخلي الناس تقع من الضعك بس الاحلي انك تقول اقوال مأثورة تمشي علي اي موقف في الدنيا زي القاموس كدة تترجم به مواقف الحياة لافيهات كل الناس عارفاها و اللي بيبقي حافظ الافيهات كأنه معاه لغة دلوقتي

-كل واحد في الاتنين اختار نوع المسرح اللي تفوق فيه يعني صبحي اختار "المسرح العلمي" و عادل امام اختار "المسرح التجاري" و الاتنين ليهم خلطة واحدة باختلاف كمية المقادير "مش طريقة عمل التشيز كيك متخافوش" الخلطة بتبقي موهبة و طريقة

في المسرح العلمي و دي مدرسة صبحي الطريقة بتبقي زيادة شوية عن الموهبة يعني دايما هتلاقي طريقة التنفيذ هي الاهم ...ركز في اي مسرحية لصبحي و هتلاقي تحركات الابطال اللي معاه دايما واحدة....تحركات ممكن يختفي فيها صبحي في وقت من الاوقات بس دايما هتلاقي حاضر كمخرج في تحركات كل اللي حواليه ...يعني لو المونولوج مع حد غير صبحي دايما بيقصد انه يخلي اللي بيقول الكلام العين تبقي عليه...تركيزك معاه عشان كدة دايما هتلاقي ان اللي بيتكلم عينه مش علي صبحي عي قد ما هتحس انه لوحده علي المسرح و دي في منتهي الصعوبة لان في المسرح مفيش كاميرات تركز علي وش الممثل عشان توريلك انفعالاته او حتي طريقة كلامه

-اما بقي في المسرح التجاري او طريقة عادل امام لازم تلاحظ ان معظم الافيهات رايحة ناحية الزعيم اللي بيكون ظاهر في معظم الكادرات اللي هو مبيتكلمش فيها مع ان ابطال و فرقة عادل امام موهبتهم تقيلة جدا في الكوميديا بس هتلاقيهم ملتزمين بقانون الزعيم...القانون اللي يسمحلك تقول اي حاجة ارتجال بس بشرط ان يكون عادل امام شريك فيها ...الزعيم بذكائه قادر يخطف الكادر من اي مشهد مشارك فيه حتي لو مبيتكلمش فيه

-في مسرح صبحي في قانون للافيهات ...اه قانون فعلا و قانون في ثواب و في عقاب و الاتنين بيبقوا في ايد الجمهور...قانون الدويتوهات بمعني ان اي مسرحية لصبحي و خلينا نقول مثلا "سكة السلامة 2000" هتلاقي من اول مشهد لاخر مشهد محدش بيقول افيهات او مونولوج لوحده و لو في موقف لازم حد يقول مونولوج بنفسه هتلاقي التاني بالبلدي كدة بيسنده ان شاء بجملة و دي بتبقي ميزة ان بتلاقي الافيه طالع مظبوط بالشعرة و حتي لو الاتنين مش جامدين قوي في الكوميديا بس هتلاقي التعاون ما بينهم طالع قوي جدا زي الدويتوها بين شعبان حسين و خليل مرسي مثلا في المسرحية دي

-في مسرح الزعيم بقي في قانونين للافيهات ...اولهم و اهمهم باصي للزعيم و دة بيبان جدا مثلا في مسرحية الواد سيد الشغال ...هتلاقي معظم الافيهات مثلا رايحة ناحيته حتي لو الافيه حلو جدا بس لازم الزعيم هو اللي يجيب الجون زي مونولوج شحيبر بينه و بين مصطفي متولي و مشيرة اسماعيل ...و القانون التاني قانون "وان مان شو" و دة مسموح به في المسرح التجاري زي ما تفتح حتة من الشباك عشان شوية هواء يدخلوا و دة بيبان مثلا في مسرحية الزعيم بالرغم من وجود مواهب حريفة زي احمد راتب مثلا بس في مسرح عادل امام لو هتقول مونولوج لوحدك لازم يكون بحدود قوي

-في المسرح العلمي هتلاقي صبحي هو السند للابطال اللي معاه او بمعني تاني هتلاقي مصنع المنتج بتاعه انك تشوف ممثلين تحس انهم مولودين علي المسرح مع ان في الحقيقة هتلاقيهم ان كل علاقتهم بالمسرح قبل صبحي زي علاقتك باللغة اليابانية كدة و اكبر دليل علي دة سيمون سواء في كارمن او في لعبة الست ...سيمون كانت تحركاتها علي المسرح مثالية بشكل كبير و تحس ان شغل صبحي فيها باين في التحركات زي ما قولتلك او حتي في طريقة الافيه

-في المسرح التجاري ذكاء الزعيم بيجي انه بيختار اللي يسنده و يعرف يباصيله الافيه الصح اللي يخلي الافيه اللي بعده يبقي نموذجي للزعيم يقوله و يكسر به الصاله بس هتلاقي الافيه في الاخر متسجل براءة اختراعه باسم عادل امام...زي مثلا المونولوج بينه و بين مصطفي متولي في الزعيم لما مصطفي متولي بيقول القوات تتقدم و تلاقي الزعيم بيبني عليها مونولوج بيوقع من الضحك بس تفتكر دايما مونولوح عادل امام و دة اللي بيحصل في معظم مسرحياته

***اقتنعت صح؟؟؟ لا و لسه بقية الاقناع جاي بس انت متسرحش

***في نقطة مشتركة بين الاتنين و هي اختيار افراد الفرقة اللي مع كل واحد فيهم بس خليني اربطلك فن اختيار الابطال مع استخدامهم

-في مسرح صبحي في بافطة كبيرة جدا في اول اي عمل او قعدة ترابيزة اسمها "ممنوع الارتجال" بمعني ان مفيش حرف يتقال برة النص اللي مكتوب و عشان كدة دايما صبحي بيختار ابطال بالبلدي كدة "بيسمعه الكلام" عشان لو حد تقيل قوي في الكوميديا عمره ما هيستحمل انه يلتزم بنص كوميدي حتي لو كان مثالي ....اما بقي في مسرح الزعيم فعادل امام دايما بيختار الابطال اللي عندهم ارتجال منظم يعني ارتجل زي ما انت عايز و لو الارتجال جاب مع الناس نثبته و دة بيبان في تسجيل مسرحية الواد سيد الشغال و هتلاقي ان الارتجال في التسجيلين بتوع المسرحية هو هو بس اختلاف طريقة تمثيل الابطال انه ارتجال

-المسرح مدارس و كل مدرسة ليها مميزاتها و ليها عيوبها و برضه ليها جمهورها....عالم المسرح زي النداهة لو ندهتك انت دخلت في دوامة من المستحيل انك تطلع منها...الموضوع مش مقارنة علي قد ما هو ازاي كل مدرسة ليها طريقة نجاح و المهم انك تبقي عارف الطريقة دي...المشترك في نجاح اي مدرسة كوميدية علي المسرح انك تصمم تكمل علي نفس الطريقة اللي نجحتك في الاول سواء مسرح علمي بالورقة و القلم او مسرح تجاري هدفه الضحك...الموضوع في الكوميديا مش شرط و مش لازم يكون موضوه له هدف بس الشرط الاساسي انك يكون مسرح له احترامه عشان لو نجحت في المسرح هتنجح في اي حاجة تانية لان المسرح دنيا تانية

#المسرح_و_انواعه

#محمد_صبحي

#عادل_امام

#التتر

#كريم_مجدي