جربت يا عم كريم مقالات المسرح؟ اديك اتدبست
يا اخويا في مقالات تانية...ما كانت الدنيا كويسة مع نجوم التتر و حبة الحاجات
التانية...كان لازم يعني تدخل في التقيل قوي كدة...بس بيني و بينكوا يعني
...المسرح حياة تانية خالص و يستاهل مواسم و مواسم اصل عشان تتفرج علي مسرح لازم
تكون مهيأ نفسك انك هتشوف مجهود شهور و ايام بيتعرض قدامك في ساعات قليلة ...مش بس
كدة..دة انت بتعمل ارشيف في دماغك بتنقله من جيلك لجيل بعدك و اجيال هتسلم
اجيال...و مع كل مسرحية بتشوفها دايما بتربطها بفارس زي فارس الاحلام كدة...لازم
كل الظروف تخدمه بس هو اللي بيبان في الاخر بس الفرق ان الفارس علي المسرح عشان
يفضل فارس لازم كمان موهبته و ادواته يبقوا في ضهره طول الوقت و مش اي حد بينجح
علي المسرح فما بالك بقي اللي ينجح في الاستمرار علي النجاح في المسرح
-يـــــــــــــــــــــــــــــــاه الواحد
نفسه كدة يلاقي فارس مسرح ...فارس من اول مشاهده علي الخشبة تحس انه حافظ ابعاد
المسرح...عارف انه لو وقف هنا الجمهور هيشوفه بس لو وقف هناك خالص اجمهور ممكن
يزهق و يستني لحد ما يرجع لنقطة الضوء...فارس يكون عنده "علم حركة
المسرح" و اول قانون في العلم دة فين تقول ايه؟؟
اوعي تكون اتلخبطت ...و اوعي تتسرع انك تقول
اه اتلخبطت عشان لسه هاشرح اهو..فكرة انك تقف علي مسرح قدام ناس كتير جدا انت مش
شايفهم ...مش شايف مين فيهم زعلان و لا مين فيهم كئيب اساسا...مين فيهم بيحبك فهيضحك
حتي لو كحيت و مين اللي بيكرهك لدرجة انك لو اتشقلبت مش هتخليه يبتسم...الفكرة دي
في حد ذاتها مرعبة ...و لما تلاقي فارس مسرح بالنسبة له الرعب دة و لا له قيمة زي
اللي بيتفرج علي فيلم رعب كدة و يضحك فلازم تثق انك قدام صاحب مسرح هو عارف هيقول
انهي افيه في انهي مكان او زاوية علي المسرح
-من شروط فارس المسرح انك تحس انه المخرج علي
الخشبة ...يظبط ايقاع المسرح...يعرف يظبط زوايا تحرك الممثلين اللي معاه
بعينه...لما يلاقي الافيه واخد مع الناس حتي لو مش منه فيبدأ يعليه...و لو لقي
افيه واقع يمد ايده يرفعه للسماء...من الاخر تحسه بيقول اكشن قبل كل افيه بيتقال
**استني كدة؟؟
دة المقال طلع بتاع فؤاد المهندس ...تصدق
هو...اصل طبيعي يعني لما تتكلم عن مواصفات المسرح اكيد الكلام هيوديك لسكة المهندس
...اهو عرفنا المقال علي مين ...نكمل بقي
-فؤاد المهندس هو من مؤسسين "علم حركة
المسرح" و دة تلاحظه في معظم اعمال المهندس في المسرح...ان افيهاته لوحده او
مع غيره متوزعة بين اركان المسرح و دة بيبان قوي مثلا في المسرحية الخالدة
"سيدتي الجميلة" هتلاقيه مع حسن مصطفي اللي بالمناسبة كان من اسباب نجاح
المسرحية دي ...هتلاقي الدويتو بينهم في نص المسرح معظم الوقت و هتلاقي المهندس
بيروح يتحرك و كأنه زهقان من غباء صاحبه اللي موديه في داهية...و هتلاقي في وقت
تاني مع سيد زيان و فاروق فلوكس جنب المسرح و تلاقي الحركة تقريبا في وضع السكون
لانهم هيبقوا دويتو و هيكملوا بعض فمينفعش حد فيهم يتحرك حتي لما الجميلة شويكار
تدخل معاهم هي اللي راحت عشان تكمل زاوية المشهد
-من اهم سمات مسرح المهندس التنوع ما بين
طريقة " الوان مان شو" اللي هو شخص واحد يطلع يقول المونولوج و دة مسموح
بشدة في مسرح المهندس يعني مثلا تعالي نشوف حسن مصطفي في سيدتي الجميلة و هو بيحكي
عمل ايه مع افندينا او مثلا في روحية اتخطفت مع احمد راتب و بيديله مساحة مرعبة
انه يقول اللي هو عايزه
-تعالي بقي اقولك علي حاجة انت مش واخد بالك
منها؟؟ اصلي باحس بزبوني
-مسرح المهندس من المدارس المسرحية النادرة
اللي تلاقيه تقريبا في كل مسرحية تقريبا بيطلعلك موهبة في المسرح...و مش اي موهبة
...دة بيقدمها و كأنهم نجوم من زمان و تحس ان ثقتهم علي المسرح غير طبيعية
...تعالي نبدأ بمسرحية انا و هو و هي و الزعيم عادل امام و بداية ظهور ممثل كوميدي
اسمه عادل امام بجملته المشهورة "بلد شهادات صحيح" و عايزك متركزش قوي
علي الجملة دي علي قد ما عايزك تركز علي مشاهد الزعيم و هو ممثل جديد ساعتها
باستاذ و بطل مسرح و هيبان قدامك تواضع نجم بيسند الجديد عشان يقول افيه و هتحس ان
في ماتش في الكوميديا بيحصل
**سامعك ياللي بتقول ما هو الممثل ممكن يكون
عنده الموهبة انه ينجح...ايه علاقة مسرح فؤاد المهندس بالكلام دة و لا عشان المقال
عشانه و خلاص؟؟
طيب بذمتك يا شيخ انا عمري كتبتلك كلام و
خلاص؟؟؟ عيب و الله ...تعالي اثبتلك و بالدليل القاطع الواضح بطريقة التتر
-فاكر مسرحية سك علي بناتك؟؟؟مش عايزك تتسرع
و تبصلي من فوق لتحت ...اتقل تاخد حاجة نضيفة
-في المسرحية دي في اتنين ممثلين عملوا
ايقونة كوميدية غير طبيعية ...محمد ابو الحسن و سناء يونس ...او حنفي و فوزية
...محمد ابو الحسن في المسرحية دي تقدر تقول انه بطل اول ...لا دة انت تقول و في
بطنك محصول بطيخ بحاله...كوميديا ابو الحسن في المسرحية دي تقولك ان الرجل دة ياما
وقف علي مسرح و انه هيبقي حاجة محصلتش في الكوميديا بعد كدة بس ايه اللي حصل؟؟
محمد ابو الحسن جاتله لعنة زي لعنة الفراعنة
كدة او تقدر تقول لعنة المهندس انه بمجرد ما طلع من مسرح المهندس محدش سمع عنه مع
انه لما كان في معبد المهندس كان في عز تألقه...تعالي ناخد سناء يونس و هتلاقي
بالرغم من موهبتها العبقرية الا انها معرفتش تألق و نجاح زي اللي شافته علي مسرح
المهندس و عمرها ما خدت مساحات مونولوجهات لوحدها غير و هي بتلعب علي ارض المهندس
*تعالي نكمل الانفرادات بتاعت مسرح المهندس
"بس دي انفرادات بجد مش زي بتاعت التوك شو"
-مسرح المهندس هو الوحيد تقريبا اللي عمل كل
الوان المسرح...عمل علاقة الحب الكوميدية اللي كانت ايقونتها شويكار في السكرتير
الفني و سيدتي الجميلة....عمل مسرح الاطفال مع هالة حبيبتي ...عمل مسرح استعراضي و
هو في سن كبير لما عمل عشان خاطر عيونك مع شيريهان...عمل الكوميديا الاجتماعية في
سك علي بناتك و انها حقا عائلة محترمة اللي من المرات النادرة اللي تلاقي امينة
رزق بتضحك و بتخلي الناس تضحك...اهو دة لوحده انجاز للمهندس
-في حاجة صغيرة كدة في مسرحية عشان خاطر
عيونك ....المسرحية دي فؤاد المهندس عمل تقريبا فيها كل حاجة...عمل كوميديا راقية
جدا و غني بشكل حلو بصراحة و لما جه وقت الاداء التقيل علي المسرح تلاقيه حاضر و
موجود و تقدر تشوف دة قوي مثلا في مشاهد اللي بيعرف فيها ان شيريهان مش بتحبه و
ساعتها هتحس انك قدام فارس مسرح تقيل فعلا
-يا رجل دة فؤاد المهندس عمل اللي ما هو
اصعب...انت متخيل انه يجيب طفلة عمرها ما مثلت حتي و يديها ثقة انه تقف قدام
الاستاذ و متخافش ...دة بالعكس دي كانت ادائها مظبوط بالمللي ...و انك تعمل مسرح
ابطاله اطفال دي حاجة في منتهي الصعوبة و الاصعب و الاصعب انك تعمل عرض كل
يوم...التحكم في الاطفال بيبقي صعب جدا فما بالك بعرض بيتعرض علي الهواء قدام
الناس؟؟
-مسرح فؤاد المهندس من المسارح النادرة اللي
اعتمدت علي الكوميديا الصعبة...اللي هي ايه ؟
**دة سؤال حلو
-في المسرح كوميديا سهلة انك تجيب واحد تتريق
عليه...او انك تجيب جملة مشهورة من المجتمع و تبني عليها حدوتة...او مثلا تقول
افيه في ناس تتكسف منه بس تضحك من تحت لتحت...بس انك تعمل مسرح بطعم اخلاق الحواري
المصرية القديمة فدة صعب قوي و انك تفضل مستمر عليه فدة اصعب و اصعب
**متسرحش بقي دة فاضل شوية صغيرين
-عارف افيه "لو احتاجتني قول جزر"
بتاع اسماعيل ياسين...اهو المهندس تقدر تقول عليه جزر المسرح يعني في مسرحيات تحس
ان الناس اللي حواليه هي اللي سانداه اكتر منه زي سيدتي الجميلة مثلا بسبب تجديد
اداء شويكار و خروجها عن دور الهانم الرقيقة او بتألق لحسن مصطفي غريب مع اداء ملفت
من فلوكس وزيان...و مشاهد تهلك من الضحك مع جمال اسماعيل فتحس ان التركيبة تنجح اي
عمل...علي عكس ما تشوف مثلا سك علي بناتك فتلاقي رائحة شغل المهندس في الممثلين
كلهم من اصغرهم لاكبرهم...من المسرحيات القليلة برضه اللي الديكور فيها واحد و
عينك متزهقش عشان حركة الممثلين متناسقة مع اداء الافيه...او مثلا مسرحية روحية
اتخطفت اللي هتلاقي مسرحية بتنجح باربع ابطال بالعدد (فؤاد المهندس-شويكار-احمد
راتب-بوسي) و دي حاجة مهمة في مسرح المهندس انه بيعرف يظبط ايقاع المسرحية علي
ابطال عددهم قليل بس تأثيرهم كبير
-المهندس هو مخرج علي المسرح في غير
مشاهده...مسرحياته تحس فيها طعم الدواوين المصرية القديمة حتي في طريقة لبسه اللي
في معظم مسرحياته واحدة بس اختلاف ادائه بيخليك تنسي هو لابس ايه في انهي شخصية
-افيهات المهندس خالدة في اذهان و عقول اجيال
ورا اجيال...سايب وراه مسرح يتقال عنه مراجع...يعني اول ما تدخل في مكتبة المسرح
هتلاقي "علم المهندس في فن المسرح"
شكرا يا فارس
#الفارس
#فؤاد_المهندس
#مسرح_التتر_2
#التتر
#كريم_مجدي
