عمرو عبد الجليل

-انت قلت العطار يبقي انت اكيد قصدك العطار و السبع بنات صح؟ ما انا لو قصدي كدة ما هاكتبها...هو كسل و لا في بيننا لا سمح الله محاكم او حاجة ...خلاص يبقي انت اكيد قصدك محمود حميدة عشان مسلسل الاب الروحي و اسمعه العطارين بقي و كدة صح بقي المرة دي؟

الله يسامح مدام نادية الجندي اللي ضيعت اجيال بجو المؤامرات دة ....و يوم ما افكر في محمود حميدة اكيد مش هاخد لقب اتهرس في 6000 حلقة يعني

-خد بس ما تقفش كدة ....احنا بنهزر مع بعض مفيش حاجة يعني ...اصل بجد المرة دي هاتكلم جد و نبدأ المقال

-من زمان و اجيال كتير كدة قبلنا و قبل اللي قبلنا شافوا محل العطار ...محل تشم روايح طالعة منه علي كل شكل و لون و كل حاجة ليها استخدامها و مهما فضلت تتفرج او حاولت كل شوية تخلص علي المحل عمرك ما هتقدر تعرف كل الاصناف او الانواع اللي موجودين كلها في المحل...و حتي لو عرفتهم كلهم فهتلاقيك عارفهم كل صنف لوحده بيعمل ايه؟؟ بس اقولك علي اي تركيبة هاسمع احلي اصوات الصمت...اهو العطار دة بقي ملك التركيبات اللي يعرف ايه يركب علي ايه عشان يديك في الاخر تركيبة هو اللي عارف سرها و اثارها عليك

**هو اي حد عطار كدة اثق فيه يا عم كريم؟

-ما انت لو مش مستعجل كنت هاجيلك في الكلام بس اقول ايه؟؟

-اعظم و انجح انواع التسويق هو نقل الكلام "بس مش نقل الكلام اياه" يعني اب ينصح ابنه او اخ يقول لاخته او ام تقول لبنتها علي تركيبة زيت شعر بيعملها العطار مضمونة عشان يطول الشعر...و معظم العطارين الجامدين مش هتلاقيهم محتاجين يعملوا اعلانات و لا لو رجل كل و لا الحاجات اللي تكرهك في الدنيا كلها دي...هو ادري بالعلم اللي عنده و امكانياته من اول الحاجات البسيطة لحد ما تطلب منه تركيبة من الطبيعة كدة

-مش شرط علي فكرة تروح للعطار كل يوم بس اكيد هتحتاجله في حاجة هو عارف حلها او دايما هتفضل فاكره بحاجة خدتها من عنده عشان متأكد انك هترجعله او تستغل اي مشوار قريب منه عشان تجيب من عنده اي حاجة

-و عندي ليكوا بقي عطار مضمون من اول البن و العطارة الخفيفة لحد اعقد و اصعب التركيبات...العطار اللي عندي اسمه عمرو عبد الجليل

-عمرو عبد الجليل لما تيجي تتفرج عليه هتحتار تصنفه ايه؟؟؟ سمعت منه افيه حلو هتقول عليه كوميدي و لو شوفت مشهد تمثيل دراما هتقول عليه مستحيل يمثل كوميديا بس لما تيجي تتفرج عليه في كل مشاهده او معظمها هتكتشف و تتأكد انك قدام ممثل بلقب عطار متمكن بيدي كل دور تركيبة تليق عليه...حتي افيهاته هتلاقي تركيبتها عنده بس يعني انت عارف الافيه بتاعه ككلمات لوحدها لو حطتها جنب بعض ربنا يحاسبك لو ضحكت عليها بس بتركيبة عمرو عبد الجليل هتقع من الضحك كأنه حط عليها مكونات من عنده في المحل يعني انت مثلا تعرف ان الحبهان طعمه وحش في الاكل بس لما يتحط علي تركيبة بن تعمل بيها احلي صفقة شغل و هو هو نفس الحبهان بس اللي عمل التركبية فاهم يحط ايه عشان يطلعلك حاجة مش هتلاقيها عند حد غيرة

-من الحاجات المميزة في طريقة عمرو عبد الجليل انك لما تشوفه في الكوميديا هتحس ان دة اخره بس الحقيقة ان دة اخرك انت ...زي بالظبط لما تدخل محل العطارة و تلاقي شكل البطمانات قديم قوي كأنه موجودة من زمان بس اللي جواها وقتها في كل زمان زي موهبة الرجل دة

**عرفتوا مين العطار؟؟ ارتحتوا دلوقتي؟؟

تعالوا بقي نشوف شوية من تركيبات عمرو عبد الجليل

-تعالوا نبدأ بتركيبة كرم في دكان شحاته و انك من اصعب ما يمكن انك تكون وسط فيلم جماعي مش انت البطل فيه و في دور تأثيره تقدر تقول تاني او تالت بس تفرض نفسك بطل من ابطال الفيلم بافيهات دايما هتحفظها بالرغم انك مش هتلاقيها متركبة علي بعض يعني مثلا مين ينسي لما دخل مكتب الظابط و قاله هاستخدم التليفون و كلم صاحبه و قاله " ايوة يا عيد جيبت الدلاليب ..و عاجبك الخياط؟ ليه هم كام دلابية ..لا يا واد عمي ...انت تروح تجيبهم منه بما يرضي الله و لو مرضيش هاته في القسم انا قاعد مع البيه الظابط" او لما قال للبنت اللي بيحبها "اسمه ايه المدرس دة و قالتله مسعود" قالها بيشتغل ايه المدرس دة و في الاخر يختمها بافيه قاتل " اسمه ايه و بيشتغل ايه المدرس اللي اسمه مسعود دة" او لما قال للسواق اللي خبطه "دة انا اللي مشيته بضهري عمر ما اهلك مشيوه بوشهم"

او لو عايز تضحك اتفرج عليه لما الناس كلها بتطلب ايد اخته و هو بيقول "الناس كلها بتطلب ايد بيسة ...دة انا ناقص انا اطلبها"

و طبعا لو قولتلك ان الممثل اللي عمل اللي اتكتب دة ممكن يعمل مشهد دراما مش هتصدقني صح بس العطار هيخليك تصدق بس شوفه و هو بيقول لعمرو سعد"خد اختي يا شحاته لو هتعرف تحميها" و بعد كدة بيشرح معاناته اللي عاشها من ساعة ما جه من بلده لحد دلوقتي و هتحس انك قدام ممثل تقيل و فاهم هو بيعمل ايه و لا حتة زيادة و لا حتة ناقصة

-حلوة تركيبة صرخة نملة برضه و دور جودة المصري و هيتقدملك تركيبة كوميديا بوجع مش طبيعية من اول مشاهده مع الظابط لما قاله "دي امانه و دة اللي علمتهولنا مصر..متقولش ايه اديتنا مصر لان لو كان اديتنا مكناش اتغربنا و اتيتنا " و لما خبط الباب تلاقيه بيرد بمنتهي التلقائية "ادخل" او مشهد صلاة الجمعة و تشوف الكوميديا في ردود افعال وشه لما الظابط بيقوله انت ايه حكايتك ما انت لسه مصلي الجمعه من 5 اسابيع او لما امام المسجد سأله هي الناس فين و العيب فيه فرد بمنتهي السلاسة" بصراحة كدة يا مولانا ...انت بتطول قوي في الخطبة"...و تشوف بقي تمثيل بجد لما بيقول "احنا النمل عايزين السكر" او هتشوف تركيبة حلوة اول ما بيشوف ابنه و تلاقي بقي حنية اب تنسيك الافيهات اللي حصلت و يحليك تركز في اللي بيحصل قدامك و بس

-شوفه في ابراهيم توشكي و مع ان الفيلم في حاجات كدة متنفعش بس ما علينا ...لازم تفتكر "احنا اسفين يا صلااااااح" اللي بقت علي كل لسان بعد كدة و طريقته من التحول انه جاي و عامل فيها فارس الفرسان للخوف الشديد و هو بيقولها ...او كلمته "فشي التاتا الاول " اللي برضه غريبة بس منه بقت افيه

**اوعـــــــــــــــــــــــــــــي تسرح في اخر تركيبه اللي فيها الشفاء

-حربي العتيبي في طايع و اللي عمل فيها عمرو عبد الجليل تركيبة بين اسهل المكونات عشان يطلع بيها اصعب التركيبات...شخصية اتعملت كتير بس عملها بطعم و رائحة و كيان جديد علي اي حد...ميكس كدة لا تحسه كوميدي و لا دراما و لا شر ...هي تركيبة عطار فاهم و موهوب بجد مش بيمثل و خلاص او لما يتقال اكشن

شوفه في مشهده في السفارة لما بيقول للرجل " هو ليه مش هيكلمني انا و يقوله عشان انت صوتك عالي فيرد عليه طايع " انا حســــــــــــــــــــي عالي و صوته جايب الحدود اساسا ...او شوفه و هو بيقول مميزات عياله كأنه بيبيع بضاعة بس بأسلوب لا تكرهه و لا تحبه بس تبقي شايف موهبة بتتحرك بالكلام و تنسيق حركة العصاية مع الكلام ...او شوفه لما مسك حرامي سرق حتة اثار و مروح بيها و تلاقيه بيقول بمنتهي الهدوء و الجبروت "ودع زمايلك " و لما اقنعه و بيقوله "بذمتك انا ينفع اسيبك و يرد الرجل يقوله لا فيقوله تاني ودع زمايلك"

و شايف الجبروت دة كله هتشوف بقي اب محروق قلبه علي وفاة ابنه لما عرف ان ابنه حسن مات و هتشوف الحزن و القهرة باينين علي وشه الاول بشكل يخليك تنسي كل اللي عامله و تدعيله كمان و يبدأ يحفر القبر بالعصاية و يقول بمنتهي الوجع " باحفر قبر اخوك يا ولدي ...ولدي مش هيتشرح ...هيندفن هنا جنب اخته" و يكلم بنته و يطمنها بحنان الاب "مش هتبقي لوحدك يا سماح...حسن جايلك"

او المشهد العبقري لما بيقول لطايع "اقتلني يا طايع ...خد بتارك" و بيديله المسدس و العبقرية في المشهد دة حركة جسمه مع صوته اللي تحس انه بيترعش من القهرة و الحزن و هو بيقول "اهلي كلهم راحوا...مفضلش غيري"  و هو بيكمل "حاجة بسيطة...اضرب علي الزناد...هيريحنا كلنا "

و تشوف بجد حاجة حلوة ...لا حلوة ايه..

هتشوف عطار مفيش غيره في مجاله ...هتشوف رائحة حلوة طالعة من بن ساخن و لسه مطحون يتعمل به احلي فنجان قهوة و هو بيلف علي الناس كلها عشان يموتوه و ياخدوا بتارهم و يا اخي تحس بوجع غريـــــــــــــــب عليه و في نفس الوقت عرف يمثل ان كما تدين تدان

-عمرو عبد الجليل خطواته صحيح قليله بس ثابته و لو اتطلب منه تركيبات تانية هيعملها لان عنده من المكونات اللي تخليه يعمل اي تركيبة...العطار عمرو عبد الجليل

#العطار

#عمرو_عبد_الجليل

#التتر

#كريم_مجدي

مجتمع التتر

ها يا شباب هناكل ايه؟

-تعالوا شبرا يا عم...انا عندي مطعم ليكوا جامد جدا

-خلاص بس مش هنيجي بالعربية عشان الدنيا هتبقي زحمة و مش هنلاقي ركنة

***يلا حتة زي الافلام كدة...و بعـــــــــــــــد 3 ساعات ....هتقعدوا علي القهوة و لا هتروحوا ...لا يا عم انا مروح

-هاطلب اوبر...ايه دة؟!!! 20 دقيقة عقبال ما يجيلي و الطريق زحمة...ما المترو اهو ...يلا توكلنا علي الله

-و هنا تبدأ رحلة معرفة الوشوش...وشوش سرحانة في ملكوت الدنيا و هموم الزمن...كل واحد في دولة غير الدولة...الناس تحس انها ماشية بقوة حفظ الخطوات...هو بقي حافظ طريقه حتي لو مش راضي عنه بس في الاخر اتكتب عليه خطوات يمشيها كل يوم....و عشان تكتشف العالم دة هتلاقي الحلول بتيجي قدامك دليفري

-من اول محطة و يفتح الباب قدامي و لقيت اب و ام و ولد و بنت و هتلاقي في وشوش الاب قلق العالم كله و هو بيزق مراته و بنته الصغيرة و بيشجع ابنه و كأنه بيشجعه علي البقاء و ساعتها تحس انك لو بس عنك عربية صغيرة فدي في حد ذاتها نعمة ...لو قادر تدفع وسيلة مواصلات مريحة فدي نعمة...و رزق الاب يلاقي مكان لنفسه و لعياله ....ايــــــــــــــــــــــــــــوة معايا السماعات الواحدة بعشرة يا استاذ و الوصلة ب خمسة

-معاكي فلوس

-اه معايا

-طيب هاتي 5 جنيه

-يا ريس و النبي اديني سماعة ...تعالي يا ادم اسمعك حاجة...شوف نفسك و انت بتلعب في الجنينة

و ساعتها شوفت سعادة علي وشوش العائلة كلها تساوي مليارات الدنيا و ما فيها...10 جنيه جمعوها من بعض شرحوا صدرهم و صدر اي حد شاغل نفسه بحاجات فاكر انها هموم اخر الدنيا

-و محطة من بعض محطة تلاقي البخيل ابو بدلة اللي راكب المترو استخسار و تلاقي جنبه الافندي اللي مفيش في جيبه غير جنيهات توصيله المترو رايح جاي....و الاولاني يطلع شوكولاته ماركة و ياكلها و التاني ينادي علي بتاع العسلية يسد بيها جوعه و يدلع بيها نفسه...هتلاقي موبايلات قديمة تفتكر انها انقرضت من زمان بس نغمة رنتها مليانة رضا و حمد للي خلقه و اللي خلقك

-ناس شايلة علي همومها تحسها مش عايزة تنزل من المحطة كأنها رايحة علي مجهول بس مجهول معلوم ملامحه في المعاناه اللي بيعيشها كل يوم...حاولت افكر في همومي لقيت نفسي باطرد شيطاني اللي صورلي انها هموم...هموم ايه و انت شايف قدامك هموم تقول لهمومك يا بخت اللي يلاقي دلع و ميدلعش ....ربك مبيظلمش و بيدي كل واحد علي قد طاقته و مهما كانت همومك فاكيد ربنا مديلك حاجة تسندك...و اول حاجة بيعملها الشيطان معاك انه يخليك تتخيل المزايا اللي عندك هموم...يعني تتخيل ان ولادك تقل عليك مع ان ربنا بيرزقك عشانهم...تتخيل ان همك كله الفلوس و قلتها مع انه مديك صحة مش هتحتاج تشتري دوا...ممكن تشتم في شغلك و تبقي عايز تسيبه مع انك لو بصيت علي هدومك الجديدة هتلاقي تمنها من شغلك اللي انت مش متخيل انه رزق و نعمة من ربنا

-عارف المثل اللي بيقول اللي يشوف بلاوي الناس تهون عليه بلوته...لا في حاجة احلي

اللي يشوف رضا الناس...يحمد ربنا اكتر....احمد ربك انك بتنام كويس...انك بتلاقي مكان اصلا تنام فيه...فلوسك مكفياك بالعافية ...طيب احمد ربنا انك مش مديون...معندكش عريبة؟ بس رجلك شايلاك

الدنيا ضاقت بيك؟ ربنا بيحبك يا جدع....الابتلاء رزق و الفرج موجود بس انت اسعي...اسعي انك تعرف كمية النعم و الحاجات الحلوة اللي مالية حياتك...امشي في طريق اكتشاف الحمدلله...و هتوصل لاخر الخط انك فيك نفس داخل و نفس خارج

قول الحمدلله بقلبك قبل لسانك

#مجتمع_التتر_2

#التتر

#كريم_مجدي

محمد ممدوح

-لقيت شقة تحفة و المقدم اي كلام (بس مش زي الست بتاعت ما تديهالهم ببلاش دي)

-بس اهم حاجة قريبة من سوق او حاجة عشان لو حبينا نخزن البيت او احتاجنا حاجة ؟

-اه طبعا دي في قلب السوق

--السوق كلمة جواها مليون الف معني ...فيها مخزن لناس عايزة تجيب حاجة البيت عشان ميبقاش البيت فاضي...و فيها رزق للبياعين اللي موجودين في السوق...و فيها نجدة لناس مزنوقة تجيب حاجة في وقت متأخر...فيها وشوش و ردود افعال و كاميرا حية بتتحرك طول اليوم بتسجل مواقف لو اتحكت في افلام هتقول عليها خيال علمي و متصدقش ان في كدة بيحصل

-و السوق انواع و اشكال و مستويات...و كل منطقة و احتياجات اللي موجودين فيها...يعني في مناطق محتاجة كارفور بس سيبك بقي من الكلام دة امتعهم سوق المنشية و الخليفة و القلعة و اخطف رجلك علي جامع عمرو بن العاص و شوف حواديت علي الهواء بتحصل قدامك...اصلك مش هتلاقي التنوع دة في اي حتة و لا في اي وقت...حاسب يا استاذ...ضهرك يا هانم وسعي السكة...في السوق دة بتلاقي الثقة اجيال من بعد اجيال يعني هتلاقي عم فتحي الجزار ابوك بيشتري منه زي ما جدك كان بيشتري من جده ...و عم حسن بتاع الخضار اللي ستك بتشتري منه و لو فتح جنبه مليون بتاع خضار بس هو عم حسن ...و يا سيدي لو خدت الموز من عمك طارق وحش هتلاقي اعتذار منه و يديك احلي حاجة عشان يعوضك...تحس انك هتاخد حاجة مضمونة جدا و كأنك واحد من اهله

-و في السوق تنوع في البضاعة و الشخصيات...في اللي بيحب الفصال و في اللي كلمته واحدة و في بقي اللي يشوف ست فيروح معلي السعر عشان عارف انها هتفاصل و يشوف رجل فيعلي السعر برضه عشان مش هيفاصل و يدفع علي طول (غلابة و الله احنا)

-و زي ما في سوق في الدنيا في كمان سوق في التمثيل " متخافش علي ضمانتي...انا قولتلك علي حاجة وحشة قبل كدة" ...سوق هتلاقي في كل حاجة و اي حاجة يتخيلها عقلك و تحتاجها عينك ...ورقة الطلبات اللي علي التلاجة هترفع راية الاستسلام قدام السوق دة ...بس ورقة التلاجة المرة دي هي سيناريو اي دور و السوق هو سوق التمثيل ...سوق محمد ممدوح

-محمد ممدوح او خلينا نقول سوق التمثيل بيكسر اي ثوابت لتركيب الموهبة علي الشكل...و الحاجة الاحلي انه بيخلي المكياج كومبارس لانه بيقدر يعمل و يقدم كل حاجة من غير ما يحتاج ماكيير يساعده بشكل كبير...موهبة محمد ممدوح عايز تشوفها قوي شوفها في الادوار النفسية ...اللي فيها كلاكيع كتير و خلي بالك انه بيعملها بمنهج علم النفس بتاع الحياة مش بتاع كورسات التنمية البشرية ام 4 جنيه دي ...هتلاقي كل عقدة و عقدة في كل دور تسد عين الشمس بس دفء الشمس موجود في اداؤه بشكل ملفت للانظار و العقول جدا...تفاصيل صغيره تخليك تتأكد ان الرجل دة هيعيش طول عمره خلاص في الشخصية دي مش هيطلع منها ...في اوقات تتعاطف معاه و تبقي عايز تحضنه و اوقات معلش يعني تبقي عايز تعامله معاملة الناس اللي دمها خفيف في فيديوهات السوشيال ميديا

-و عشان السوق متنوع لازم تلاقي محمد ممدوح متنوع...و من الحاجات اللي عايزك تركز عليها قوي في تمثيل الرجل دة انه بيتعامل بمبدأ لكل مقام مقال...يعني لو دور خفيف و كوميدي هتلاقيه مديله مكانه بمنتهي الحرفنة اصله مينفعش تحت الخضار جنب الفاكهة "حتي يبقي شكلها وحش" ...تقسيم السوق عند محمد ممدوح مريح للعين و جاذب للتركيز و الاهتمام

**اسحب ورقة التلاجة من عندك بقي و تعالي نجيب الطلبات من سوق محمد ممدوح

-تعالي نبدأ بالطلبات الخفيفة يعني نقول عادل في كدبة كل يوم ...عادل في الفيلم دة بيعمل حاجة تقريبا في شريحة مش هاقول كبيرة بس موجودة بين الرجالة المتجوزين...الرجل التقليدي اللي بيحب مراته (شايف كل البنات بيشتموني و الله) بس معلش هو موجود اكيد...في الفيلم دة هتشوف خفة دم مش طبيعية من محمد ممدوح و كأنه ممثل كوميدي من زمان لما قالهم و هم مسافرين "ممكن نشيل الحشيش عشان داخلين علي الظابط" او لما كمل و قال لعمرو يوسف " هادخل علي الظابط و اقوله حتة افغاني يعني" او هتضحك من قلبك قوي و مشهد اليخت "اللي بيبعته معظم الرجالة لبعض لما حد فيهم بيتجوز" و هتلاقي محمد ممدوح بيضحكك بضحكته في اول المشهد بالظبط اول لما بيقول "انت صاحب سيف؟ ما شاء الله عسل زي بعض " و ركز بقي في التحول الغريب في اداء عادل في مشهده مع درة و هو بيقولها انها انانية و بتفكر في نفسها و بس و هتعرف ساعتها انك مش قدام ممثل شاطر ...دة انت قدام سوق تمثيل

-تعالي بقي في مكان انا باحبه بصراحة و هو سامح زيدان و دي يمكن تاني شخصية ان مكنتش الاولي اللي طلعت في الفيلم اقوي من الرواية...شخصية فيها كل معاني الحقد و النرجسية و النقص ماشية قدامك لحم و دم ...من اول ما ظهر في اول مشهد حركة جسمه بتقولك انه داخل يتشفي في اللي قدامه بشكل ظاهر جدا عليه و شوف و هو بيلف المفاتيح حوالين ايده و كأنه بيقول انه الكبير هنا...او مشهد وجعه لما بيقول لكريم عبد العزيز "علي قد ما حبيتها علي قد ما صعبانة عليا انها حبت واحد زيك"  او لما قال بمنتهي عقدة النقص اللي فيها انتقام "متعديش عليا الحاجات دي ..دة انا سامح زيدان"...و حتي نظرة عينه في عدلة النضارة و هو بيسأل كريم عبد العزيز و هو مستغرب انه ازاي ميعرفش شريف الكردي و ليها صور كتير مع بعض

-نخش بقي علي حاجة تقيلة و نقول سيد القط في مسلسل طريقي و هتشوق حاجة بقي تقيلة قوي...سوق تلاقي فيه لبن العصفور و مستحيل يخطر علي بالك حاجة و متلقيهاش ...شوفه و هو واقف قدام المرايا و عايز يقول كلام و يمثل برقبته و هي بتشاور و بتعمل لا و يبدأ يقول "انت لو قرفان من نفسك يبقي انت بتحس...و انت لو بتحس كان زمانك بقيت بني ادم يا سيد يا سفنجة" و يكمل بمنتهي العبقرية و يقول "دمرت كل اللي بيحبوك " و اللي اهم من الكلام الجسم اللي مصدق الكلام و بالتالي يخليك انت كمان تصدق الشخصية اللي قدامك و تنسي انه بيمثل او حتي تنسي ان دة مسلسل و دة دور مكتوب علي ورق...او في مشهد القمار اللي بيتطلب منه مراته تنازل لو خسر و شوفه في الاول لما بالبلدي كدة اتحمق في الاول بس بعد كدة بدأ وشه يقول تمثيل...اه و الله بيقول تمثيل

بيقول ضعف و ذل الرجال اللي مش اي حد يعمله تمثيل و لا ينفع حد يكون كدة علي الحقيقة اساسا

-عايزين جراند اوتيل موجود...و الله موجود و هتعرف في الدور دة يعني ايه اداء بالجسم قبل ما يكون بالكلام...يعني ايه الحوار يبقي بالنسبة لك لو اتشال يبقي عادي ...و دة بيبان قوي في مشهده لما شال الولد و راح لمراته و حضنها و هو متأكد انه بيحبها و مقالش و لا كلمة بس موهبة السوق قالت كل حاجة و لما قال وجع قلب كل اللي حواليه لما قال لاحمد داوود "الحاجة دي تخصك...متخصنيش" و العبقرية كلها في اللي حصل بعد كدة...انك تعمل رجل موجوع دة صعب بس انك تعمل راجل موجوع وجع طفل دة من اصعب ما يمكن لانك بتتوجع من غير ما تتكلم لانك مبتعرفش تقول انا موجوع بس تعرف تحس انك موجوع ...و تشوف براءة الدنيا و هو بيقول لامينة خليل انا لما حد بيسألني علي ابويا باقوله "مات و هو بيولدني "

-و الله ما ينفع ...سليمان عبد الدايم ....مجرد فكرة انك تمثل مراحل عمرية لشاب و رجل عجوز ممكن تبقي سهلة لو بالمكياج بس مش هتلاقي صعوبة زي طريقة تنفيذ محمد ممدوح للشخصية دي...هو اختار تفاصيل المشية اللي ارهقها العمر...طبقة الصوت اللي داس عليها المرض...كل مشهد حتي لو في نفس الحلقة هتحس انك قدام شخصيتين كل واحدة فيهم ينفع تتعمل في مسلسل لوحده ...شوفه و هو كبير و بيحكي لنسيمة موقف حصله " تصدقي بالله...اي واحدة باشوفها حتي لو في اشارة مرور باشوفك فيها" و من اصعب الادوار انك تعمل دور عنوانه و من الحب ما قتل عشان بيعمل حيرة انك تتعاطف معاه و لا تتغاظ منه و تكرهه بس في الحالتين هتحترم اللي بيعمل دة بالحرفنة دي ...في مشهده مع نيللي كريم و هما شباب و بينادي عليها بمنتهي صحة الشباب و هو بيقولها "اتطرشتي و لا ايه...هو انا ماليش كلمة عليكي" و تلاقيه اتحول في لحظة للحبيب اللي بيعشق اللي قدامه و هو بيقولها في نفس الجملة " مالك يا حبيبتي؟ ما اي اتنين متجوزين بيحصل ما بينهم كدة "

و هتلاقي مشهده لما سأل الدكتور قدامه قد ايه في عمره و لما الدكتور قاله يرد بمنتهي القوة اللي رافضة تقبل بالاستسلام "عشان احسب خطواتي اللي جاية...عشان متفاجأش"

**محمد ممدوح سوق في كل انواع و اشكال الادوار و لسه قادر يستوعب اماكن و ادوار و بضاعة جديدة في اي وقت...سوق تفرح انه في زمن بقي قريب منك عشان تشوفه و تتفرج عليه...سوق نفسك تسكن جنبه عشان يبقي موجود في اي وقت انت عايزه...يدوم الواجب يا سوق التمثيل

#سوق_التمثيل

#محمد_ممدوح

#التتر

#كريم_مجدي

الزنزانة

-ها...هتعمل ايه في موبايلك اللي باظ دة يا عم كريم؟؟

-مش عارف لسه...ممكن اصلحه و لو باظ خالص هاستني لما يجيلي فلوس و اجيب موبايل زيه

-يعني هتشتري نفس الموبايل؟؟

-اه يا بني دة استحملني كتير جدا

--الموبايل بقي من اهم الحاجات اللي موجودة في حياتنا دلوقتي لان حياتنا كلها تقريبا بقت عليه و بقي المشهد المشترك بين كل الناس في اي مكان هو العزلة...انت ماسك زنزانتك في ايدك و دة مش كلام كبير و الله...خليني اشرحلك بس

-في الحياة متعة خفية اسمها متعة انك تعيش اللحظة...تعيش الموقف...تحفر ذكرياتك بايدك و مشاعرك مش مجرد هوس انك تسجلها صور تتفرج عليها كل ما الانترنت يقطع او الباقة تخلص عندك...الذكريات ملهاش عمر افتراضي و لا ليها تاريخ صلاحية و دايما لما تحتاجها تلاقيها مش لازملها لا باقة و لا شحن

-و من علامات الزنزانة اللي معظمنا بيحط نفسه بيها انك بتبقي بنص حواسك مع اللي قدامك و نص مع الموبايل دة ان مكنش الاخير بيبقي له نصيب الاسد في تركيزك و اهتمامك بس من اخطر المشاهد اللي في الزنزانة ...زنزانتك مع ابنك "ابنك هنا للتعميم سواء ولد او بنت مع اني باحب خلفة البنات اكتر بصراحة" ...من اخطر و اتعس الحاجات اللي ممكن الواحد يشوفها في اي مكان انك تحبس نفسك بعيد عن ابنك بشكل في منتهي تقل الدم...سواء كنت في البيت او النادي او حتي و انتوا ماشيين في الشارع

-تعالي نعيش شوية مع الزنزانة دي و نشوف بتعمل ايه

-عارف ان الكائن الصغير اللي قاعد قصادك دة انت بالنسبة له كل مصادره في الحياة...انت الالوان اللي بترسم ملامح مشاهد الابيض و الاسود في خياله فتعلمه ان الاخضر هو لون الزرع و الازرق لون البحر و السماء ...انت الغلط و الصح اللي هيكمل بيهم بقية عمره...انت الحلال و الحرام...انت الغلط و الصح...عرفت انت مهم قد ايه بالنسبة له؟؟

-لما يجي يسألك عن حاجة و تقوله بعدين لحد ما تخلص قراءة حاجة علي الموبايل و لا تخلص فرجة علي فيديو...ايه المهم في اللي صديت ابنك و قفلت خياله عشان تكمله؟؟

ايه اللي هتقف عليه الدنيا عشان تحبسه معاك في زنزانتك و انت مش شايفه؟؟

-الموبايل اه صحيح في حاجات مهمة كتير بس الاهم ان في نسخة مصغرة منك مستنيه منك شوية اهتمام...شوية مياه عشان الزرع اللي قدامك يكبر قدام عينك و تلاقي حصاده بشاير تشرح قلبك...لما تروح معاه تفسحه يبقي تفسحه بجد مش ترميه في وسط شوية مراجيح و تجري انت علي زنزانتك...العب معاه...اجري وراه...هو كمان محتاج يحس قد ايه هو مهم في حياتك...و اه الاطفال بتحس...اه مبتعرفش تفكر بس الاخطر انها بتعرف تحس...هتخسر ضحكة اشتياقه ليك بالتدريج مرة عن مرة و هو بيجري عليك و انت بمنتهي تقل الدم تاني بتصده عشان مستقبل الكون هيقف علي حاجة تشوفها علي الموبايل

-بدل ما تشغله كارتون عشان يتلهي عنك فهيحب الكارتون اكتر منك...حتي يا اخي اقعد معاه اتفرج قوله مين دة و بيعمل ايه؟؟ اوعي تبني زنزانة لابنك زي ما بنيت لنفسك واحدة...خليك لاولادك اب تبني فيهم مش تبني ليهم...اوعي تتحول للسبكي يدفع بس و مالوش دعوة مستوي الفيلم يطلع ايه؟؟

-ابني تربية و اخلاق و ترابط...ابني حياة و حب و خيال جميل بتشوفه يتحقق قدامك...لاقي لنفسك طريق تمشي فيه و في اخره تلاقي حد بيسندك باخلاقه و تربيته و شخصيته...ابني في ابنك طوبة بعد طوبة مسئوليه و يعني ايه حلال و حرام...سيبله ذكرياتك معاه باقية مش مجرد صور علي براويز هيجي عليها تراب الجو و الحنين

-خليك اب ابنه يزعل و هو نازل من البيت مش يستني اللحظة اللي عدم وجودك فيها يبقي حلم جميل بالنسبة له...موبايلك لو باظ ممكن تجيب غيره بس ابنك او باظ مستحيل تصلحه او حتي تجيب غيره

#مجتمع_التتر

#انسف_الزنزانة

#التتر

#كريم_مجدي   

سيد حجاب

ما هو العرضحلجي؟؟

استني استني يا عم كريم ...انت دماغك صدت و ايدك تقلت و لا ايه؟ ما تكتب بالمرة اذكر ما تعرفه عن العرضحلجي مبينا اجابتك بالشعر...قصدي بالرسم

-قوم كدة اعملك فنجان قهوة دوبل و تعالي نتكلم مع بعض شوية...و ادي القهوة

-ايوة كدة ...نتكلم بقي...احنا كنت بنتكلم علي ايه صحيح؟ اه افتكرت العرضحلجي

العرضحلجي هو اللي بتلاقيه قاعد قدام اي مصلحة حكومية او محكمة عشان يكتب للناس المشكلة بتاعتهم بشكل قانوني و سليم سواء كانت طلب او دعوي ...و دايما هتلاقي العرضحلجي مميز حتي في قعدته...يعني عامل لنفسه مكتب تحت شمسية و معاه اقلام كتير و اللي اميز من كدة انه دماغه دايما حاضرة اصل طلب المعاش غير قضية الطلاق غير ورق الميراث و لكل مشكلة عنده تلخيص مناسب ليها بيتكتب بشكل يناسب الحتة اللي رايحها اصل مش اي حد كدة هيكتب اي كلام و يروح به...و مش شرط تكون مش متعلم عشان تحتاج للعرضحلجي ...لا دة انت ممكن تكون متعلم بس برضه تحتاجله...عشان اللعبة في الصياغة و الصياغة لعبته

-و لكل قضية سواء كبيرة او صغيرة ورق و للورق شكل يعجب و دليل ينورلك طريقك...و عشان تعرف قيمة العرضحلجي هتلاقيه بيوصف قضايا او مشاكل في ورقة واحدة مع ان ممكن تكون القضية في ورق ميتعدش بس هو عنده الملخص الوافي بالشكل المناسب عشان تبقي متفصلة علي المشكلة...و ممكن يكون في اكتر من عرضحلجي بس هتلاقي دايما النصيحة بتوديك ناحيته

-و عشان اي تتر مسلسل يعبر عن الحلقات اللي فيه و عشان يعلق في دماغك اكتر من المسلسل لازم يكون كاتبه عرضحلجي اسمه سيد حجاب ...او انا اسف طبعا عم سيد حجاب

-عم سيد حجاب شاعر درامي موهبته الكبيرة انه مش بس بيقدر يلخص حلقات طويلة و كاملة في قصيدة عمرها 4 او 5 دقائق بالكتير لا...دة بيقدر يعمل سيناريو موازي للاحداث بالحوار في اغاني التتر..انت ممكن تلاقي شاعر تتر مسلسل درامي يعمل تتر يعلم مع الناس بس صعب تلاقي مسلسل اي حد تسأله عليه يقولك دة انا حافظه من اول التتر...اهو من اول التتر دي بقي بتاعت عم سيد حجاب

-صعوبة اشعار سيد حجاب في سهولة كلماته بالمقارنة باحداث مسلسل مليان بالاحداث الانسانية ...عميق قوي الكلام دة صح؟؟

عم سيد حجاب بيشرح كيمياء ثانوية عامة لاولي ابتدائي و بيفهموها و يحلوا...شوفت السهولة في الجملة في الكلمات و الصعبة علي ارض الواقع بس عمنا سيد حجاب بيعمل دة بمنتهي السهولة ...يعني يبقي مسلسل مليان مشاعر انسانية و تقلبات في المواقف و شخصيات كتير جدا و هو بقصيدة تتر واحدة يقولك علي اللي فيها و ساعات كتير اشعاره هي بتدي للحن طعم...يعني تحس ان اللحن حابب الكلمات

-من الحاجات العبقرية في سيد حجاب انه بيفصل القصيدة علي احداث السيناريو بالحرف و في نفس الوقت تحب تسمعها اغنية منفصلة و تقرأها كأبيات ملهاش اي علاقة باحداث درامية...يعني ممكن تتفرج علي التتر و يجيلك اشباع خلاص

**كفاية كدة مقدمة عشان انا مش عرضحلجي زي عم سيد و تعالوا نشوف اشعاره و هي بتتكلم عنه

-مين فينا مفيهوش في قلبه كدة حاجة محفورة للمال و البنون و اول ما قلت اسم المسلسل افتكرت موسيقي ياسر عبد الرحمن " اللي له مقال علي الصفحة و الله" و صوت الحلو و اصل الحكاية كلمات عم سيد حجاب و اللي هتلاقيها بتلخص احداث شخصيات و تحولات الازمنة في ابيات محدودة متقدرش تنساها...حتي لما تشوف اجزاء من المسلسل هتلاقي كلمات عم سيد حجاب مناسبة له جدا كأن الجزء التاني اتعمل من قلب كلمات التتر ...و لو انت مركز هتلاقي سهولة الكلمات بتشرح معني لصعوبة احداث المسلسل اللي بيشرح مواقف سياسية و اجتماعية كتير...بس كلمات التتر واقفة علي رجلها و واثقة مين قدها ما هو اللي كاتبها عم سيد حجاب

-و زي ما صعب تلاقي مسلسل جزأين يليق عليه نفس التتر كأنه معمول من جديد فما بالك بقي كلمات تتر لمسلسل ست اجزاء و اللي تفتكره زي ما تفتكر الفلوس اللي انت مديها لحد ...حاجة محفورة في القلب قبل العقل...كلمات تتر ليالي الحلمية اللي بالرغم من تنوع احداثه و شخصياته الا ان ثبات كلمات التتر بيديله طعم اصيل ميتغيرش علي مر الازمنة حتي لما اتعمل اخر جزء اللي مالوش اي علاقة بليالي الحلمية و لا حتي بالحلمية نفسها...الحاجة الوحيدة اللي تخليك تحس ان هو المسلسل...تتر ليالي الحلمية بكلمات سهلة مكتوبة من ايد عرضحلجي فاهم و واعي

-كل واحد فينا له اصحاب غاليين عنده صح؟؟ متستعجلش و تقول صح قبل ما تقرأ دول...بص تحت كدة علي طول

ادي ايدي مد ايدك 
جرحي جرحك عيدي عيدك
ود دافي نبع صافي 
شيء كانه نيل موافي 
بين وريدي و بين وريدك
يا صديق عمري يا صاحب ذكرياتي 
انت كنز ايامي تحويشة حياتي 
و مرياتي اللي بشوف جواها ذاتي و تواجهني بعيبي 
تكشف سيئاتي 
و تأسي بحنان و استزيدك 
يا صديقي مد ايدك
ادي ايدي مد ايدك
اصدقاء و الود موصول فوق زمانا 
ليه امانا و بيه امانا و فيه امانا 
بيه علي الدنيا و علي الدهر استعنا 
و ان زمانا خانا وفي لحظة طعنا 
بيه علي الدنيا و علي الدهر استعنا 
و ان زمانا خانا وفي لحظة طعنا
تستعدني و استعيدك 
يا صديقي مد أيدك
ادي يدي مد يدك 
اد ودك قلبي ودك
دانت بعد الاهل اهلي 
و اذا يوم قلبك ندهلي 
حتلاقيني بقلبي عندك
يا صديقي مد يدك 
يا صديق عمري و احلامي و عذابي 
في ليالي فرحتك عامل حسابي 
في ليالي وحدتي بتدق بابي 
و عمر باب قلبي ما صدك
يا صديقي مد يدك
أصدقاء و الود موصول فوق ظروفنا 
مهما نبعد مهما طفنا مهما شفنا 
في ساعات شدتنا و قلقنا و خوفنا 
تستعدني و استردك
يا صديقي مد يدك

-دي كلمات تتر مسلسل اسمه الاصدقاء و كلمات التتر في التتر دة تحديدا تحس انها جدعة زي الاصحاب تمام...العبقرية في التتر دة هو الدفء اللي الكلمات شبعانة منه ...عمق كلمات بيشرحلك الاصحاب في صورة كلمات في منتهي البساطة اللي في الدنيا

***شايفك ياللي بتضحك و بتقول هي كل التترات عميقة بتتكتب بسهولة كدة...بس مش انا اللي هأرد عليك...هأسيب عمنا سيد حجاب يرد عليك

-سيد حاجب وصل لمرحلة من التمكن انه يكتب تتر دمه خفيف لمسلسل اجتماعي زي اوبرا عايدة...او يكتب اشعار فوازير مليان فرحة و بهجة زي فوازير حاجات و محتاجات للجميلة شيريهان...او مسلسل جحا للعبقري الفخراني بكل احداثه الطريفة اللي بتشرح شخصية في ظاهرها بساطة زي شخصية جحا ...و مين فينا محبش فاطمة في تتر مسلسل و من الذي لا يحب فاطمة و افتكرته دلوقتي و انا باكلمك اهو...اوعي تنكر

-سيد حجاب في مرة عمل تتر ارستقراطي...اه و الله ...لما عمل تتر هوانم جاردن سيتي و ساتها هتلاقي تتر هاي كلاس بيقول للستات حقكوا اهو...انتوا اتعملكوا تتر تاريخي يتحسب لاي هانم تسمعه...هو كان بداية التعارف لحلم الجنوبي و هو اللي رسم اول معرفتنا بارابيسك

**سيد حجاب مش عرضحلجي عادي...سيد حجاب قدرة علي الابداع...انك تسمع اغنية حلوة فالاصل هي الكلمة...اول طوبة في عمارة شكلها تخلي عينك تلمع لما تشوفها ..منهج لتلاميذ بيحبوا الشعر و حتي لو مبتحبش الشعر اول لما تسمع كلماته هتحس انها طالعة منك بس تيجي تجرب تقلدها هتلاقي نفسك بتكتب نفس القصيدة لانها بصيغة و شكل و ختم العرضحلجي...ختم سيد حجاب

#سيد_حجاب

#العرضحلجي

#التتر

#كريم_مجدي