-انا باحب
التحدي؟ طيب انت قد التحدي؟
-مش عارف بس انا باحب التحدي
-هي دي المشكلة بقي ان اللي بتقوله حاجة و
اللي انت قده حاجة تانية خالص...كتير مننا بيحبوا الالغاز بس الاهم من حب الالغاز
متعة حلها...و مش اي لغز يتحل و مش اي حد يحل اللغز...لا متسرحش مني...مش من اولها
دة لسة بدري
-عشان تحل اي لغز في الدنيا لازم يبقي معاك
شوية ادوات كدة...من اولها كدة لازم تتقل و تدرس كل معلومة محطوطة قدامك عشان تعرف
هتستخدمها ازاي و امتي ...و يبقي عندك ميزان تفكير...اه و الله ميزان تفكير يعني
ساعات اللغز بيحتاج تفكير برة الصندوق و حلول محدش يقدر يجيبها بسهولة و لازم برضه
تفكر في اسهل الحلول اللي ممكن تكون قدامك و انت مش شايفها عشان الميزان دة لو كفة
تقلت عن التانية يبقي هتصعبها علي نفسك و مش هتعرف توصل لحاجة
-و عشان تبقي لعيب حل الالغاز لازم تقبل كل
انواع الالغاز اصلك فضلت تحل سودوكو دايما مش هتعرف تحل الكلمات
المتقاطعة...بالبلدي كدة وسع ابعاد التفكير اللي بيديها مخك لحل اللغز...و كل ما
الابعاد دي بتزيد كل ما مخك بيدي امر لاحساسك بالمتعة انه يزيد و يكبر ...ايوة انا
جدع...انا دماغي شغالة اهي و ربنا يكفيك يا بني لما الدماغ بتصدي "انا كاتبها
بالعامية معلش"
-و كل ما هتزيد معاك مستوي الالغاز كل ما
هتعرف نقط قوتك فين و ايه اول خطوة تسهل عليك حل اي لغز...حلوة لعبة الالغاز دي
صح؟
لا استني ...انت رايح فين؟ هو انا باكلمك علي
الالغاز بس و لا ايه؟
هو دة يصح برضه يا رجل دة انت ضيفي و لازم
اكرمك
-حل اللغز بيبقي تحدي لاي شخص فينا و هو
لوحده بس تخيل بقي انك تقدر تفك لغز التتر...اه و الله...فك لغز تتر اي حاجة بيبقي
له متعتعه و صعوبته و مش اي حد يقدر يكتب اسمه علي تتر اي حاجة و ينجح...لغز التتر
لازمله دماغ ترتب الافكار و تكتب ملاحظات و تفكر بهدوء عشان توصل لحل ينجح كل لغز
بتحله و مش اي حد يحل اللغز عشان مش اي حد يبقي احمد مكي
-احمد مكي قدر يعرف لغز كل تتر يتحل ازاي و
الاهم من كدة عرف امتي يحل كل لغز فيهم...سواء تتر فيلم كمخرج او كمؤلف او كممثل او
برضه كمغني...مكي عنده من الادوات البشرية اللي تخليه يحل اي لغز او مشكلة بصنعة
لطافة ولاد البلد الجدعان او بطريقة صاحبك الدماغ اللي بتروحله و دايما في دماغك
سؤال واحد "هاعمل ايه" او " ايه الحل" و دايما هتلاقي عنده
الحل
-مكي عبقريته الحقيقة انه عارف بيعمل
ايه...في موهبة كبيرة اسمها يعمل ايه و امتي...مش مهم الوقت بس مهم التأثير
...ممكن اعمل حاجة واحدة كل 5 سنين بس طول ال 5 سنين هي موجودة و حاضرة علي كل
سيرة و قعدة...لما بتيجي قدامتنا بنقول خليها خليها نتفرج عليها..مكي بيعمل حاجات
كبيرة جدا بروح شباب الجيل و كل جيل بيشوف مكي من جيله و دي تتحسب له لانه قدر يحل
لغز فرق الاجيال...مكي عنده التفكير برة الصندوق 99 زي سرعة روبيرتو كارلوس في
اليابانية كدة"دي لعبة "...هتلاقي كل حاجة بيقدمها مختلفة و برة الصندوق
و في نفس الوقت هتلاقيها سهلة و تكتشف انك بتقول لنفسك انا كنت لسه بافكر في
الحاجة دي دلوقتي
-في لغز مكي عرف يحله بحرفنة قوي...انك تجيب
فكرة اتعملت برة و تقلدها بالظبط بتبقي سهلة انها تتعمل و تطلع وحشة او صعبة انها
تتعمل و تطلع بنفس جودة الفكرة الاصلية و دي كلها الغاز سهلة زي لما تحل لغز ميكي
لما تقلب الصفحة و تشوف الحل...بس الاصعب اللي بيعمه مكي انه بياخد الفكرة و
يعملها بطعم مكي ...طعم محل فول في امستردام...بيعملها بشكل و لون حلوين...لا
حلوين بجد
**المقدمة طويله؟ هو يستاهل و لا عندك
اعتراض؟
-خلاص تعالي نشوف الغاز مكي عاملة ازاي؟؟
-لغز مكي كمخرج ابتدي بفكرة برة الصندوق و هو
فيلم الحاسة السابعة و دي بداية شهرة مكي كمخرج...الفكرة متاخدة من برة بس اتعملت
بشكل مصري قوي سواء بالاداء او الافيهات او حتي لغة الحوار و في الفيلم دة لما
تشوفه لاول مرة هتحس بحالة مختلفة كدة زي ما تكون فاكر لحن اغنية بس مش فاكر هي
اغنية ايه...بس ما شوفت مكي و لما تقرأ التتر و تشوف مكي مخرج هتعرف انه استايل
مكي و من غيره يعرف يعمل الحالة دي...هتشوفه في اداء كل ابطال العمل سواء بطريقة
الافيهات او طريقة احداث الفيلم اللي مش مخلياه ممل و مصري برغم من فكرته المقتبسه
-تعالي بقي في لغز الممثل و اللي قدر يحله
بخطوات صغيرة علي قد المعطيات اللي معاه في شخصية دبور في تامر و شوقية و اللي كان
برغم مشاهده القليله الا انه علم مع ناس كتير...و عشان قدر يحل جزء من اللغز
بطريقة صح قدر يوصل لمرحلة وحش ماريو...مرحلة الزعيم عادل امام...من الاخر انك
تكون سبب نجاح سيت كوم حاجة سهلة خصوصا انك صغير زيهم و لسه بادئ فالدنيا لطيفة بس
انك تكون من اسباب نجاح فيلم بطولة عادل امام فدة معناه انك عارف تحل اللغز صح و
مين فينا ينسي طريقة كلامه "نورت المحاضرة يا عم الحاج" و دايما فعلا
هتلاقيه منور في مشاهده مع الزعيم و دي ثقة كبيرة جدا انه كان عايز يعمل حاجة يعني
مثلا "يا مورجان روق ال جي و روق ال دي" و اللي فضلت معلقة مع ناس كتير
-و صعب انك تعدي من لغز الزعيم و تنجح بعد
كدة بنفس الشخصية لما عمل اتش دبور و في هنا حاجة صغيرة عايزك تاخد بالك منها
...مكي شخصيته قوية قدام الشاشة...كتير من نجوم الكوميديا بيبقي ليهم ضهر يتسندوا
عليه من نجوم التتر بس مكي هتلاقي شخصيته واضحة يعني في الفيلم دة هتلاقيه موازي
لنجوم زي لطفي لبيب" له مقال" و عم حسن حسني ...مش هتلاقيه معتمد عليهم
زي اللي بينزل يشتغل عشان يشيل من علي ابوه هم المصاريف...تحسه معتمد علي نفسه في
كل مشهد...و محدش ينسي افيهات "ويندوز في بيت سريانوسي" و تريقته علي انجليزي
ارواح او حرقة دمه لما بيقول لسامح حسين "اسمها لطيفة مثلا "
-حتي لما عمل مشاهد صغيرة في فيلم "ليلة
البيبي دول" تحس شخصيته فارضة نفسها في وسط كمية النجوم اللي كانوا في الفيلم
و يجبرك تفتكر زغلول السواق باسنانه بطريقة كلامه الشعبي اللي متاخده من طريقة مكي
بس متقدرش تفرق بين مكي و زغلول
-نيجي بقي لواحد من اهم الغاز مكي و هو طير
انت و في الفيلم دة في بداية التتر هتلاقيهم كاتبين ان الفيلم متاخد من مجموعة
افكار بس نسيوا يكتبوا ان مكي هيخليك تنسي كل اللي اتعمل هو و الكدواني
طبعا"لازم اجيب سيرته في كل مقال...باحبه معلش" و يجبرك تاني انك تعيش
في حالة مصرية و كل شخصية تحس انها تتعمل في حاجة لوحدها و يمكن دي بتصعب علي مكي
حاجات انه بيحاول يجرب كتير في وقت واحد او في عمل واحد و ساعتها بتلاقي ميزان حل
اللغز مايل حبتين...بس مين ينسي سوما العاشق و فين الابتسامة الحلوة يا جو او لما
لما بيقول "هاطلع علي جمصة و اراقب اسراب القريدس و هي بتحمي بيضها من هجمات
السلطعون المتكررة" و مشاهده مع الكدواني كانت في منتهي السهولة و المتعة
لينا و ليهم ...حتي في مشاهده مع محمد سلام و هشام اسماعيل كانت بميزان حلو و دي
حاجة قوية جدا في مكي ان لكل مقال مقام يعني تعرف تمثل ازاي قدام مين
-حلو قوي اللغز دة بقي ...حزلقوم في لا تراجع
و لا استسلام و الحقية ان الفيلم دة حلاوته في بساطته انك تتريق علي الافلام
العربي بفيلم عربي زيهم و دة بيبان من اول مشهد و مينفعش الفيلم دة يجي من غير ما
تتفرج عليه و تكون حافظه مشهد مشهد...بساطة الفيلم دة تبان قوي في كل ابطال الفيلم
تحسهم براحتهم في ادائهم حتي اللي مالوش في الكومديديا كان كوميدي بميزان حلو مش
قالش و مش سخيف...و مين ينسي "حزمبول مين اللي تتشكي في بطنك...جيرمين اسم
صايص زيك و ات محصلة جيهان و لا محصلة نيرمين" ...و ايمن ابن احلام كراوية اللي
ممكن تلاقي مكي في يوم عامله فيلم ...بساطة الفيلم دة في بساطته و تفكير ابطاله
اللي عايزين الفيلم ينجح و الضحك اللي من اول ثانية لاخر لحظة
-في لغز ناس كتير الحقيقة فشلت انها تحله انك
تحول فيلم ساعتين لمسلسل 30 حلقة بس مكي بقي قدر يحول شخصية مدتها ربع ساعة لمسلسل
5 اجزاء من غير ملل و لا حشو يخليك تحس انه بيضحك عليك و دة لما عمل الكبير قوي و
خلينا نقف شوية كدة عند اللغز دة...مكي في المسلسل دة عمل المعادلة الصعبة قوي
...انه قدر يدي لناس مساحات ضحك و تمثيل كبيرة جدا كانوا هيقعدوا كتير يوروا علي
حلها زي هشام اسماعيل "فزاع" او محمد سلام "هجرس" او محمد
شاهين "توماس" او حتي ليلي عز العرب و هتشوف دنيا سمير غانم بشكل خلي
الناس كلها تعرف ان في كوميديانة اسمها دنيا تقدر تشيل مسلسلات و كل دة كان السبب
فيه مسلسل الكبير قوي...و في نفس الوقت قدر يحل لغز شخصية مكي كمبتكر للاحداث تقيل
و تقيل قوي كمان...يمكن المسلسل دة من اكتر المسلسلات اللي تشوف افيهات بيومي فؤاد
فريش او بالبلدي كدة افيها صابحة...افيهات مسمعتهاش و لا هتسمعها غير في العمل دة
من الناس دي و قمة الاقناع انك صعب تتخيل حد تاني مكان اللي بيمثل قدامك ...و مكي
تقدر تعتمد عليه و بالرغم ان نجوم كتير مكملوش العمل بس عرف يعمل حل للغز دة انه
ينور لناس جديدة انها تدخل الممر و تعرف توصل لاخره
-في الغاز مكي جرب فيها كتير زي سما علي بابا
اللي تحس لساعات انه اتظلم عشان التجريب الكتير اللي فيه او انك تحس انه كان لازم
يتعمل العرضين بطريقة منفصلة بالرغم ان كان في كوميديا حلوة في الفيلم بس من كتر
التجربة ضرت الفيلم شوية
--بعد النجاح اللي عمله هشام ماجد و شيكو و
احمد فهمي و بعد ما فهمي ساب الموضوع شويه بدأ الاتنين يدوروا علي دماغ و الدماغ
كانت مكي اللي قدر يعمل تركيبة جديدة بشكل جديد ليهم ...اه يمكن ممكن تاخد وقت
عشان تشوف المسلسل كذا مرة بس هتلاقي استايل مكي في الموضوع بقوة لان شخصيته هي
اللي بتفرض دة
-ايه دة؟مكي بيغني راب؟ دة ممكن يفشل؟ليه كدة
بس يا عم مكي ؟
لا طيب ايه رأيك انه مكي بيغني راب
مصري...راب بطعم القهاوي الشعبي ...راب تعرف تحفظه...راب حروفه واضحة و عربي...راب
بيطلع من رجل بمعني الكلمة
-لما مكي جرب يحل لغز الراب اختار حلول صعبة
جدا انه يعمل من الراب فيلم صغير بس نجح جدا في كدة...عارف لما تسرح في اغنية
كئيبة و في الاخر تكتشف انك مش مرتبط اساسا...اهو مكي عمل اللي اصعب من كدة...مكي
بيعمل من الراب افكار لازم تكون موجودة في حياتك و تأثر فيك و كل اغنية بيبقي ليها
رائحة خبرة زي قعدة ناس كبار اصحاب ابوك...و بيدي كل لغز حقه تمام لانه متأكد ان
اللغز اللي بيتخدم هو بس اللي يعرف يحله و تطمن بس لما تحس ان اللي بتعمله محدش
تاني يعرف يعمله و الاحلي انك دايما تسعي للطريق دة
**لغز التتر لازمله حاسة سابعة عند دبور يزن
علي كل حل يوصله من غير تراجع و لا استسلام و يخلص اللغز بشياكة...و لما تتفتحلة مغارة
النجاح بتاعت علي بابا لازم تكون قدها ...و احنا واقفين علي الناصية لازم اقولك
كلمتين اغلي من الياقوت يا مكي ...انت الكبير قوي
#حل_اللغز
#احمد_مكي
#التتر
#كريم_مجدي
