التوك شو ...فانتازيا...الحلقة ال 3

و ظهرت نتيجة الثانوية العامة و طبعا أولادنا نجحوا بتفوق (و متفهمش ازاي) بس هم عارفين نجحوا ازاي و عارفين دايما هينجحوا ازاي لانهم علي طول عارفين الفائدة فين و بيروحوا عليها من غير تردد...و برغم اختلاف شخصية كل واحد فيهم الا انهم فيهم حاجة واحدة مشتركة "المصلحة" و اكيد مقصدتش المصلحة الجماعية...و ايوة زي ما جت في دماغك دلوقتي و اوعي تنكر انك فهمت اللي اقصده.

**ما تيجي نشوفهم بقي بعد ثانوي هيعملوا ايه في الجامعة...و يا عيني علي أيام الجامعة

المكان :كلية كله ماشي لاعداد الكوادر المطيعة

الجامعة : جامعة النايل السات

الزمان : في اول يوم دراسة اكيد يعني

-ايه دة؟؟ هي مال الجامعة فاضية كدة ليه النهاردة؟؟ تكونش لسه الاجازة مخلصتش و دة مقلب عاملينه فينا هههههههههههه

-ما احنا كنا مرحومين من افيهاتك العظيمة دي يا عم تامر ال3 سنين اللي فاتوا...و بعدين اللي جابك جامعة الغلابة اللي زيينا؟

-غلابة ايه يا عم أسامة احنا هنضحك علي بعض ...ما انت و انت عارفين ان المكان هنا للي معاه واسطة يا عايز يقول حاضر و نعم  و عشان كدة اخترونا علي الفرازة يا بني

-و تفتكر بقي هنطلع حاجة من الكلية دي

-مش مهم بس الأهم انك هتقبض كتير...شهرة و نفوذ...شفت اسهل من كدة...حاضر و نعم بفلوس

-طيب يلا بيننا ندور علي بقية اصحابنا

-مبرووووووووووووووووووك يا هيما انت نجحت اهو أخيرا...بس نجحت ازاي يا عم؟؟ اومال فين المبادئ و القيم و الجو بتاع ثانوية عامة دة؟؟

-البركة في عمرو يا يوسف اول ما دخل المدرسة و جابلنا الامتحانات و انا ملقيتش حجة و بعدين بيني و بينك كدة يا جو لقيت الموضوع جامد و قولت اشمعني العيال دي صريحة كدة و هتكسب فقلت بلاش اضحك علي نفسي و اركب المركب...و تعالي قولي هنا انت لسه في الجامعة ياض ازاي؟؟دة انت دفعتي في المبادئ

-يا هيما انت متخيل ان في حد يقدر يقنعني بحاجة انا مش مقتنع بيها؟ انا لو عايز انجح هانجح بصباع رجي الصغير يا بني

-يوسف يا حسيني الكلام دة اللي تقوله في اتحاد الطلبة...انطق و قولي مبتنجحش ليه؟ انا عارفك تنك و مبتحبش تقول علي حد صح غيرك

-بصراحة يا إبراهيم يا اخويا مشكلتي دايما هي العند كل ما ادخل امتحان اكتب الإجابة اللي انا ذاكرتها بس سواء بقي ليها علاقة بالسؤال و لا لاء بس بيني و بينك سمعت انهم هينجحوا الدفعة كلها السنة دي عشان محتاجين كوادر للمرحلة اللي جاية

-يسمع من بوقك ربنا يا يوسف...في محاضرات النهاردة؟؟

-دة النهاردة اهم محاضرة يا هيما لوزير اعداد الكوادر

-ازيك يا عمرو يا قدوة ...و الله واحشني جدا

-واحشك ايه يا حمادة...دة انت كنت قاعد معايا في البيت امبارح و كل يوم كنت بتكلمني

-و لا عمري اشبع منك يا صاحبي ...دة انت اللي بتجيب المعلومات من اصلها...هو انا انسي لما خليتهم يطلعوني من جنبك في التختة و يجيبولي تختة لوحدي اقعد عليها عشان اقدر اذاكر و ادخل الكلية الجامدة دي؟

-و الله يا احمد الحقيقة انا كنت زهقان منك و كنت قربت انساك من كتر ما انت ساكت

-كنت باسكت عشان اتعلم منك يا عمرو يا اخويا و يا استاذي و يا ....

-احمد يا موسي متعرجش في حارة مكسحين يا حبيبي...دة انا مربيك علي ايدي بلاش كدة معايا

-تصدق يا عمرو انا من كتر ما اتعودت بقيت كل ما ادخل العمارة اقعد ابوس في البواب

-دة بقي طبع يا حمادة زي كرات الدم كدة..بس اوعي تبوس أي دكتور في الجامعة

-لا ما انا جيبتلهم هدايا تقديرا لمجهوداتهم و علمهم

-مش باقولك كرات دم يا حمادة

-ازيك يا لميس صباح الفل

-صباح الخير يا مني...طيب ما انتي بتلبسي حلو اهو؟

-و ايه المشكلة يعني يا لولو؟

-اصلهم بيقولوا...يلا ربنا يسترها علينا بقي

-لا معلش يا لولو العبيها علي غيري دة احنا عشرة ثانوية عامة و فهماكي كويس ...بس مش عارفة ليه يا لميس مش مستريحة للكلية؟

-ليه بس؟

-اصلها كلية مقفولة علي نفسها كدة و محدش بيقولنا حاجة من ساعة ما دخلنا و بعدين دة ايه الكلية دي اللي بتاخد من مدرسة واحدة؟؟ انا شكلي هاحول فنون مسرحية اهي كلها ترفيه و مفيش عليها مشاكل

-انتي ايه يا بنتي؟؟؟ ما بتصدقي تنطي من المركب...طيب ما تجربي الكلية دي و نشوف اخرها ايه؟؟

-خلاص نجرب احنا كدة كدة مش هنخسر حاجة

-اومال فين معتز يا جماعة؟

-معترض علي التنسيق يا سيدي بيقول انه موجه و في ظلم لحرية اختيارنا للكليه

-ظلم ايه دة هو اللي كاتب الرغبة بايده؟

-مش عارف و الله يا وائل بس انت مش عارف بيقول عليك ايه؟؟

-و الله انت غلبان و علي قدك قوي يا أسامة حتي لما حبيت تسخن جي تجرب فيا انا

-دة مين اللي هناك دة؟؟؟ دي داخلة معتز النارية

-ايه يا ميــــــــــــــــزو ...اومال ايه بقي مش جاي و معترض؟

-لا معلش يا وائل هو انا مش هافرط في حقي من اول يوم و بعدين انا في شركات برة كلموني لما عرفوا اني دخلت الكلية دي

-و هتعمل ايه برة بقي يا عم معتز؟

-نفس اللي انت هتعمله و حياتك يا سي وائل

-طيب يلا بيننا علي المحاضرة يا فالح عشان بيقولوا دي اهم محاضرة

-اكيد مؤامرة و بيكدبوا عشان يلمونا و يجبرونا اننا نحضر بس الله غالب يا وائل

-مؤامرة ايه بس اللي هيعملها قيادات بحجم الدكاترة و بعدين انت مش شايف دكاترة أمريكا و فرنسا جامدين ازاي...ليه بقي منشجعش الدكاترة بتوعنا اللي اقوي من دكاترة تركيا؟

-لا يا عمرو دكاترة تركيا من اعظم الدكاترة في العالم و الفضاء الخارجي و الداخلي

-و الداخلي كمان...طيب مش عايز أقول كلام قدام الناس ميصحش ...هاقوله في تويتر يا ميزو و انتي عارفني دايما باجيب معلومات...مش من بيتنا الكلام اللي باقوله

**و اتجمعوا ولادنا في المحاضرة الاولي و اول ما دخل الدكتور كلهم في صوت واحد الا صوت واحد

**أستاذ صفــــــــــــــــــــــــــــــــــــــوت...هو حضرتك أستاذ في الجامعة و لا المدرسة و ايه اللي جابك هنا ؟

-مش هتفرق المسميات دلوقتي يا أولاد...المهم انكوا تعرفوه اني عارفكوا من اول يوم اتولدوا فيه و قولت لنفسي هم دول اللي هيحققوا حلمي اللي طول عمري باحلم به...و لا ايه يا عمرو؟؟ من اول ما شوفتك و انت مولود عند مدير المستشفى عرفت انك هتبقي مختلف عنهم و نفوذك هيعدي كل حدود عقلهم

-مدير المستشفى؟؟!!! دة محدش يعرف الموضوع دة غير عم ......... ريمـــــــــــــــــــــــــــــــــــــــــوت

-ايوة يا أولاد انا عم ريموت ...و عارف انتوا عايزين تسألوا تقولوا ايه؟ مين صفوت دة؟ بس اكيد اللي بيقرأ المقال هيعرف

-من اول ما دخلت المستشفى و اشتريت اول تلفزيون بريموت ساعتها...و اول ما بدأت امسك الريموت و انا حلمي اني لما اجيب أي قناة الاقي نفس الكلام اللي باحبه بس بطرق مختلفة بس دايما توصلني لنفس الهدف و لنفس المعني...و عشان كدة من اول يوم جيتوا للدنيا قررت اني اتابعكوا لحد الاخر لانكوا شبه بعض في كل حاجة

-انا من زمان باقول ان عم ريموت دة احسن واحد عليا اول ما اتولدت

-و تصدق يا احمد انك الوحيد اللي مدخلتش اوضته اليوم دة اصلك كانت اوضتك جنب اوضة عمرو

***يلا يا ولاد هنبدأ اول و اهم محاضرة

"دايما لازم تعرف ان صاحب الشغل دايما علي حق و ان الزبون اللي بيتفرج عليك مالوش أي حق ...دة حتي من اسمه زبون...بس اول قاعدة في تلبيس السلطانية انك تحسس الزبون انه صاحب مكان و اوعي تخليه يقرب او حتي يحاول يفهم دماغك...خليه يبقي زي دماغك ...تابع مش اكتر...و لازم تعرفوا ان كلكوا بتعملوا نفس الحاجة بس الزبائن بتختلف...يعني الزبون اللي هيجي لعمرو ممكن ميحبش وائل بس الأهم ان الزبون اللي عند عمرو يخرج من عنده متفرقوش من اللي خارج من عند وائل...كلكوا ايد واحدة تدافعوا عن بعض الا لو حد خرج برة الخط ساعتها اعمل نفسك مش شايفه عشان هيبقي متهيألك انه ماشي عكس بس الحقيقة هو ماشي علي نفس الخط بس صاحب الشغل اختلف...لازم تقدر تقنع الناس بالحاجة و عكسها يعني لو قولتلهم في يوم علي لون كرسي انه اسود لازم تيجي بعدها تقنعهم انه بقي ابيض و بيلمع كمان حتي لو الكرسي لسه اسود...كل واحد فيكوا هيشد نوع معين من الزبائن و محدش يجري ورا حد هم هيجوا لحد عندكوا...قدام الزبائن كل واحد فيكوا رمز للشفافية و التضحية و انكار الذات بس بينكوا و بين بعض الدرجات دايما متساوية بس برضه في حافز هيفرق بين المتفوق و اللي نص نص...الحافز دة هو تأثيرك في تفصيل السلطانية...الزبون طالع من عندك مقتنع بنسبة كام في 100 و ساعتها بس هتعرف ان وراك ناس كتير هتقولهم يمين ماشي هتقولهم شمال ماشي...و اوعي منك له تصدق نفسك او حتي تحس بذاتك لان اللي قادر يطلعك سابع سماء قادر ينزلك سابع ارض...اخر قاعدة لازم تحفظوها انتوا نجوم مجتمع بس نجوم بتنور ببطاريات و عمر بطارية كل واحد فيكوا بتخلص لما يستخدم الاختراع اللي اسمه العقل"

و نتقابل في الحلقة الجاية...اقصد المحاضرة الجاية

**هذا الجزء هو اكثر جرأة و هزليه لانه نابع من حقيقة و دايما الحقيقة بتوجع...الفنتازيا الهدف منها الضحك بس مش عيب انها تنور مناطق في ناس كتير مش شايفنها

الابداع مينفعش يبقي ابداع لو عقلك مش حر

#الفنتازيا_لسه_مكملة

#الجزء_الثالث

#ربنا_يسترها_عليا

#التتر

#كريم_مجدي

التوك شو -الحلقة 2- المدرسة

المكان : مدرسة المصالح المشتركة الثانوية المشتركة برضه

المرحلة: ما احنا قولنا فوق بقي الثانوية المشتركة...نصحي شوية

خلاص الأولاد كبروا و عدوا ابتدائي و اعدادي و مدرسين انتحروا و مدرسين بيتعالجوا نفسيا و مدرسين اعلنوا اعتزالهم من كتر الطلاب بتوعنا ما خلوهم يشوفوا النجوم في عز الضهر...و جينا أيها السادة الي اهم مرحلة في الحياة الدراسية و اللي هيتحدد علي أساسها مستقبلهم و مستوي ضغط الدم عندنا احنا

-يلا بيننا نبدأ اول يوم دراسي

يلا بينـــــــــــــــــــــــــــــــــــا

-ازيك يا لميس عاملة ايه؟

-مش كويسة يا وائل خالص

-ما هو شكلك باين عليه في ايه بس؟

-في ايه بس يا وائل؟ قاعدة 3 شهور في البيت و مفيش أي حاجة باعملها غير اني اسخن بابا علي ماما و البواب علي مراته لحد ما طلقها

-ابوكي طلق امك

-لا يا عم البواب طلق مراته و من ساعتها و الملل هو اللي موجود...احكيلي انت عملت ايه في الاجازة؟

- روحت الجيم

-طيب كويس جدا و عملت ايه؟

-4 مصابين و 16 في حالة خطر و صاحب الجيم جاله صرع يا عيني و مات

-انت دفعت اشتراك الشهر كله شكلك يا وائل...تعالي نشتري حاجة من الكافيتيريا قبل الطابور

-الو...ايوة يا أسامة ...انت فين يا بني؟ دة النهاردة اول يوم

-لا ما انا نقلت مدرسة تانية اصل .......

-ايه نقلت مدرسة تانية؟؟؟ اكيد اضطهاد و رفضوا انهم ينقلوك معانا...قولتلك 100 مرة يا أسامة اعملك كام داخلة نارية من بتوعي و انت محدش هيجي يقعد جنبك...اكيد قالولك ان عندك مشكلة انك عزلت  و هتتعب لما تروح المدرسة و ترجع البيت...ايه يا أسامة يا اخي مبتردش ليه؟

-انت مديني فرصة يا معتز...و بعدين سايبك تخلص المقدمة النارية بتاعتك يا سيدي بس عايز اقولك اني نقلت بمزاجي مدرسة حكومية عشان باحب امشي جنب الحيط ما انت عارفني

-عارفك يا أسامة بس الله غالب و الله...الله غالب

 -شوفت مين لحد دلوقتي يا معتز؟؟

-مش عايز اشوف حد يا عم

-لو سمحت هو شئون الطلاب فين؟؟

-ازاي متعرفيش شئون الطلاب فين؟؟؟دي المدرسة عاملة إرشادات سهلة جدا جدا و دة بيدل ان مدير المدرسة اللي انا لسه معرفهوش عنده قدرة إدارية تتفوق علي مدير المدرسة الإعدادية ...و اكيد مبيعملش كدة لوحده معاه كتيبة مدرسين علي اعلي مستوي من التعليم و المهارة

-يا بني ايه كل دة؟؟؟ انا اسفة اني باقولك فين شئون الطلاب ...بعد اذنك

-اسمي احمد

-مسألتش علي فكرة علي اسمك

-الله عليكي يا مدرسة أخيرا لقيت بنت معايا في المدرسة...محدش هيقدر عليكي يا بهية

-هي ايه المدرسة الاوفر دي...انا شكلي هانقل منها قريب و انط من المركب...اسمي مني ....انتي اسمك ايه؟؟

-اسمي لميس و سمعتك و انتيب تسألي احمد علي شئون الطلاب...تعالي معايا يمكن نلاقي اتنين علاقتهم ببعض كويسة

-اشمعني يعني ؟

-هتفهمي لما نروح

-اهلا و سهلا بحضراتكوا في عام دراسي جديد و طالبكوا عمرو

-اهلا يا عمرو يا بني اتفضل

-ارجو يا سيادة المدير مكنش عامل ازعاج لحضرتك بس انت عارف انا دايما باجيب المعلومة من اعلي مصدر و مبحبش التوقعات انا بتاع معلومات

-انا عارف يا بني غني عن التعريف دة انت اخو الغالي عماد...اخوك يا بني ياما حلل مناهج و عمره ما نجح في و لا تحليل بس ها نقول ايه؟ عبقري

-الله يخليك يا سيادة المدير...الفصل بتاعي هيكون فين؟

-دة كلام يا بني...مكان اخوك طبعا....يا ادريس وصل عمرو ابننا في مكان اخوه بالظبط

-اه صحيح يا سيادة المدير انا هاجيب عماد اخويا يقعد يذاكرلي شويه في الفصل بتاعي

-متخافش يا عمرو يجي في أي وقت و هادخله عند لميس كمان

-ايه دة؟؟؟ ايه اللي قاعد و لابسلي حمالات دة؟!! يـــــــــــــــــــــــــــاه إبراهيم ...ازيك يا إبراهيم

-ازيك دى تندرج تحت مسمي اللغة العامية و اللغة العامية نوعين...عامية شوارع و عامية حواري

-يا إبراهيم ارحمني بقي ...انت عمرك ما هتتغير

-ازيك يا عمرو..و عماد عامل ايه؟؟ مع اني يا اخي عامل فيها معارض "معاكوا يعني" بس باحبك ياض يا عمرو انت و اخوك...تحسوا انكوا شبهي

-يا هيما كلنا شبه بعض ...متحورش ...بس المهم قولي انت ايه اللي مخليك لحد دلوقتي في المدرسة

-كذا سبب ...لاني شايف اني فاهم كل حاجة و باقرأ كتب محدش بيقرأها غيري و تيجي ايه كتب المدرسة جنب أمهات الكتب اللي بقرأهم يا عمرو و بعدين من يوم ما اصحابنا عرفوا ان مجلة الحائط اللي كنت باعملها و باقول فيها شعارات كانت أي كلام بطلوا يغششوني في الامتحان

-ما انا قولتلك العب علي المضمون يا هيما...مسمعتش كلامي

-مش مهم يا أبو عمرو المهم الحمالات لسه موجودة ...الا قولي بتشوف الواد تامر ؟

-راح يا سيدي مدرسة لغات قال ايه شايف ان المدرسة بتاعتنا قليله عليه

-هتلاقيه رايح عشان المدرسة بتلبس فيستات

-الله يسامحك يا لميس ايه بس اللي عملتيه مع الناس؟

-بس شوفتي كانوا بيفطروا مع بعض ازاي و فجأة لبسوا بعض بسندوتشات الفول ...شكلها سنة حلوة من أولها

-و الله حرام عليكي

-حرام ايه يا مني دة انتي اول ما المدير قال و السلام عليكم و رحمة الله خبطتي علي الترابيزة و قولتيله و عليكــــــــــــــــم السلام و رحمة الله و بركاته كأنه بيقول خطاب و بعد ما مشي كنتي بتقولي احسن كان لازم يخرج من الاوضة

-طيب يلا غيري الموضوع...شوفتي مسلسل نيللي كريم الجديد

-أيـــــــــــــــوة غيري الموضوع يا مني...انتي شكلك شاطرة قوي في تغيير المواضيع في الوقت المناسب

-يادي النيلة وائل جاي

-كدة يا لميس

-في ايه يا بني مالك؟

-ادخل شئون الطلاب الاقيهم كلهم ماسكين في بعض كدة ...اعمل انا ايه دلوقتي ؟؟

-معلش يا وائل خير ربنا كتير و السنة لسة طويله

-انتوا جداد معانا هنا صح؟

-اه صح انا اسمي معتز و دة احمد و لو سمحت مش عايز اكمل كلم معاك غير لما عمرو يمشي

-سايبهالك يا معتز يا بتاع الوجبات الخارجية...ياللي تحب الكتب الخارجة اكتر من كتب المدرسة

-مش احسن منك ياللي بتدافع عن كتب المدرسة و بتقول نصبر عليها و انت بتاخد الامتحانات قبلها

-و مالها كتب المدرسة بس يا معتز ...دي حتة كتب كافية اننا نتعلم كل حاجة بوضوح و سهولة...دة حتي كتاب الإنجليزي في منه لونين ازرق و التاني اخضر يعني تنوع عشان منزهقش

-لا و انت الصادق يا سي احمد الكتاب الأزرق دي رسالة مكوكية عنكبوتيه معناها ان سنة زرقاء عليكوا و الأخضر دي رسالة تحذيرية انك هتطلع تأكل برسيم

-انتوا الاتنين غلطانين...اللونين اصلهم اغريقي و بنحدروا لكذا اتجاه و .....

-يا نهار مش فايــــــــــــــــــــــــــــت إبراهيم لو فتح مش هيقفل انا ماشي عشان اروح اخد امتحانات الشهر ...اعمل حسابك في نسخة يا هيما؟

-بس انا هاقولك لا قدام الناس بس اوعي تنسي تجيبلي نسخة يا واد عايز انجح

-انت بقالك كتير بتسقط

-ايوة يا معتز...انت مش شايف الحمالات يا بني و الكتب اللي دايما حاططها قدامي؟؟

-هو انت قرأت كل دة؟

-يا احمد اهم من الشغل تظبيط الشغل

-طبعا هتلاقي إدارة المدرسة هي اللي سقطتك عشان قولت كلمة حق في وش الظلم

-لا محصلش يا ميزو

-يبقي عشان مبتتكلمش و غلبان فقالوا دة سهل ندوس عليه بس متخافش يا هيما تعالي معانا و الله غالب

-يا بني هو أي اعتراض و خلاص

-ما هو اكيد يعني يا معتز سبب انه يسقط انه....

-اخرس ياض انت ...انا عارفك من ساعة ما كنت بتقعد جنب عمرو اديت مبتفتحش بوقك

-ايه دة يا احمد؟؟ عشان كدة اول ما دخلنا و شوفنا عمرو لقيتك ساكت خالص

-دة طبع يا معتز ربنا يكفيك شره

***و فجأة الفصل بقي كومبليت

-يلا اتفضلوا كل واحد في مكانه

-انا الأستاذ صفوت المدرس بتاعكوا و اللي هاعلمكوا اللي هتمشوا عليه بقية حياتكوا...اتفضلوا ارموا مخكوا برة و ركزوا معايا

****هذا المقال برضه نابع من شخصيات حقيقية و أي اسقاط فهو مقصود جدا المرة دي و اكتر من المقال اللي فات كمان و كل الافيهات المذكورة أعلاه مقصودة اكتر و عشان كدة هأنكر اكتر

#فانتازيا_التوك_الشو

#الحلقة_الثانية_المدرسة

#التعليم_في_الصغر_كالنقش_علي_الحجر

#لسه_الفنتازيا_مكملة

#التتر

#كريم_مجدي