-اصحي يا
كريــــــــــــــــــــــــــــــــــم عشان نلحق
-في حد يصحي بشر بالشكل دة...خير نلحق ايه
بقي؟
-خلاص رمضان بكرة عايزين ننزل نشتري بقية
حاجات رمضان...و في عروض ياما دلوقتي
-ما احنا عارفين ان في رمضان من رمضان اللي
فات و كل سنة نتخض الخضة دي و نروح نجيب الحاجة في اخر يوم و نلاقيها زحمة
-يلا بلاش مناهدة الناس كلها بتعمل
كدة...هتيجي انت و تعمل فيها أبو العريف
**صح ...كل الناس بتعمل كدة قبل رمضان ... و
عشان تعمل رمضان في البيت لازم تحس بشوية حاجات منها مثلا انك تتفاجئ كل سنة ان
رمضان جاي بكرة و تنزل بنفس أداء عربية البلدية لما بتنزل بحملة و تشيل كل حاجة في
طريقها و كأن الحاجة اللي هتشتريها هتخلص مع اول يوم رمضان...يعني تجيبلك بتاع 6
طن ارز علي 5000 فرخة علي 4 مليون بيضة علي بطة عشان اول يوم لازم بطة و محشي عشان
الفلكلور ميحصلوش حاجة
-و زي ما في موسم عروض في كل الأسواق في
رمضان و قبله في كمان عروض في التلفزيون في رمضان...ما تيجوا نشوف اللي بيحصل في
التلفزيون في رمضان ...تخيل معايا بس الأول أي عرض في أي سوبر ماركت بيبقي مالوش
علاقة بالسلع الأساسية يعني ممكن تلاقي عرض علي البقسماط او البسكويت بالعجوة مثلا
و لو لقيت عرض علي سلع أساسية فيا هتلاقيها صلاحيتها قربت تنتهي فالنس محتاجين
يبيعوها بأي ثمن يا حاجة درجة تانية او تالتة و محتاجة تأخد فرص
-هو دة بالظبط التلفزيون في رمضان...نفس كل
حاجة في أي مسلسل بيحصل...من اول ان كل ابطال أي مسلسل لازم يكملوا تصوير في رمضان
عشان هم برضه بيتخضوا ان رمضان فجأة جه و لازم نجهز عشان مرتبطين بموسم ...و طبعا أي
قناة بتبقي عاملة زي أي سوبر ماركت كل اللي يهمها تجيب رجل الزبون اللي هو حضرتك
طبعا...تجيبلك نجوم عندها تزغلل بيهم عينك...تعملك إعلانات في كل مكان ان شاء الله
حتي في دولابك...تفضل تذيع في إعلانات و تجيبلك احلي لقطات في المسلسل عشان تفضل
مستنيه زي بالظبط فترة التخفيضات لما يقولم قطعة و عليها قطعة مجانا بس علي حاجات
معينة اللي هي محتاجة مواصفات خاصة و تعليم برة عشان ربنا يكرمك و تجيب العرض و
تكون سعيد الحظ
-و تقسيم القنوات بيبقوا 4 اقسام...تعالوا
ناخدهم من تحت لفوق كدة
-في قنوات اللي ماشية الجنب الحيط و معروفة
ان اللي معهوش ميلزموش بس هتسيبك؟ و الله ما يحصل بتعرضلك مسلسلات رمضان اللي من
10 سنين و دي بتعتمد علي المحب للنوستالجيا او العودة الي الذكريات و غالبا محدش
بيتفرج ليهم غير 4 انفار بس إعلانات قليلة
"و الإعلانات دي هنجيلها متخافش "
-و في قنوات تانية عاملة زي محلات الكشري
اللي بتقفل في رمضان و دي غالبا بتبقي قنوات الأفلام اللي شغالة طول السنة بس
عطلانة الشهر دة و هتلاقي عليها الاقبال بيزيد مع اول يوم العيد و برضه دي مش
هتسيبك ممكن تقلب قنوات مسلسلات في رمضان بس علي خفيف يعني مسلسل او برنامج حتي
-في بقي قنوات اللي ماشية بمثل عين في الجنة
و عين في النار يعني نفسها تبقي في الموسم بس فلوسها ممكن تجييبلك نجوم بس مش صف
اول بس اهي اديها بتحاول و دى بتككل سحورها نوم ...قصدي يعني شوية برامج علي
مسلسلات قديمة
-تعالي بقي لقنوات المجمعات الراقية...فتوات
المسلسلات و دول بقي يا معلم بتبقي محتاج تعمل جدول زي جدول الجمعية كدة و تشوف
مين هيقبض امتي او بمعني اصح اللي هتتفرج عليه علمه عشان متتلخبطش...القنوات دي
بتأخد أوائل الدفعة او نجوم الصف الأول و دايما تلاقي ترتيبهم في المواعيد واحد و
كأن صاحب القنوات دي شخص واحد يعني دايما هتلاقي المسلسل الكوميدي او برنامج المقالب
علي الفطار عشان تبقي حاجة خفيفة كدة"اينعم انت بتخلص فطار قبل الحلقة ما
تبدأ بس مش مهم" و بعد كدة بقي تدخل في مرحلة تكسير العظام من اول الساعة 8
كل قناة بتبقي عاملة زي المطاعم ينزلك الشوربة الأول و بعدين السلطة و يروح خابطك
الطبق الرئيسي في الاخر
***انت فاكر انت كدة خلصت ...تبقي
غلبان...انت عايز تتفرج علي مسلسل كدة...ليه؟
هي وكالة من غير اعلان؟
-عارف ابوك لما يدخل عليك في اللخظة اللي انت
مبتذاكرش فيها؟؟
اهو في عز ما انت مندمج يا كبير يجيلك اعلان
يفوقك و الحقيقة انك مبتلحقش تندمج لانك غالبا بتتفرج علي إعلانات في وسطها
مسلسلات و الإعلانات برضه تتقسم :
-إعلانات القص و اللزق...اللي هي تجيب لحن
قديم علي كلمات جديدة و ناس مشهورة بيبقوا غالبا معندهمش شغل في رمضان فيشتغلوا في
الإعلانات "طبعا الكلام دة مش علي بيومي فؤاد" و دي غالبا بيزيد عليها
يا استعراض يا حكاية اجتماعية فيها استعراض برضه
-إعلانات التبرعات و كأنك بتصلي بس في وقت
الامتحانات...اللي هو دايما ينكد عليك في ان صيامك مش مقبول لو متبرعتش للناس دي
-في الإعلانات التقليدية بقي "هتقولي
يعني يا كريم اللي فاتوا دول مش تقليدي" لا بس في تقليدي و في تقليدي قوي
يعني إعلانات الزبادي و الزيت و السمنة و كأن مخرج الإعلانات شغال في جمعية
استهلاكية
-و زي ما في قنوات الفتوات في إعلانات الفتوات
و دي بقي بالنسبة لي فقرة كوميدية جدا و هي اعلان الكومباوندات و دي فجأة تحس انك
بتصوم في لندن...الممثلين نفسهم بيحسوا انهم بيمثوا مشهد ضعيف في فيلم تجاري من
السبعينات أيام أفلام المقاولات و غالبا الإعلانات دي بتتعمل عشان حاجتين ...ان في
بند في الشركة بيقول ان لازم يبقي في اعلان و ان الناس تشتم فيتشهروا
-و تحس ما شاء الله ان الناس صدفة بتفكر في
نفس الحاجة يعني ميعاد واحد مثلا لبرامج الطبيخ...و ميعاد واحد لبرامج المقالب و
نفس الميعاد الثابت يا رجل يا مؤمن للبرامج الدينية و كأن اللي بيشتغلوا في
البرامج دي بيخرجوا مع بعض اول ما يخلصوا شغل و البرامج بتتقسم برضه " معلش
استحملوني"
-في برامج المقالب و دي بتجيب
"ممثلين" بيتعمل فيهم المقلب يعني ممثل بيعمل نفسه بيعمل مقلب في ممثل
تاني بيعمل نفسه اتخض و انت بتعمل نفسك مصدق و ربنا يديم المعروف ما بيننا
-اما برامج الطبيخ فدي غالبا معمولة للخيم
الرمضانية او للمتجوزين جداد و عايزين يجربوا اختراعات في الاكل زي الزلابية بحمص
الشام مثلا او البط بصوابع زينب ...مفيش ست بيت عندها طاقة تتفرج علي أصناف اكل
متعرفش تجيب مكوناتها حتي عشان تعملها لناس لو اتأخر عليهم الاكل 10 ثواني علي
الفطار ممكن يأكلوها هي شخصيا
-البرامج الدينية...لا هو انا عبيط...مش هاتكلم
عليها طبعا هي مش فراخ اصلها...دة ممكن اتقتل فيها دي بس بقي فيها تمثيل برضه
المقال حلو مش كدة ...تعالوا نكمل
**نيجي بقي لاهم حلقة في سلسلة رمضان"لا
مش التراويح يا جدع" المسلسلات و دي بتتقسم برضه "معلش اخر تقسيم"
-طبعا لازم يكون في حتة في التورتة للصعيد و
الصعيد في المسلسلات الحمدلله يعني متغيرش من أيام ذئاب الجبل هو هو الديكور و
طريقة الكلام ...حتي السلطة و العلاقة ما بين كبير البلد و اللي تحته هي هي...طيب
يا جماعة معلش زودوا ان شاء الله محل حلواني يفتح...ناس تلبس قميص و بنطلون عادي...و
دة غالبا هتلاقي ان البطل عامل الاب و ابنه و انه لازم الاب يموت بدري بدري عشان
نلحق رمضان من اوله بقي
-مسلسلات مدام نادية الجندي استايل...يعني
تتظلم في اول المسلسل و تقعد ال 30 قاطع نفسك و نفسنا انك تنتقم من اللي ظلموك ...و
بعدين النجم ميتحملش ظلم 10 أيام ...يعني اخرك في ظلم البطل 11 رمضان عشان النجم
يلحق ياخد حقه
-مسلسلات الموضه زي لو فتح محل حلاق و نجح
تلاقي 6 محلات حلاقين فتحوا جنبوا و دول هتعرفهم بقي لما تلاقي مسلسل من أيام الملك
و ما قبل الملك أيام البدل و الطرابيش
-في بقي مسلسلات اللي تخليك بتتحول الي
المحقق كونان و دايما تلاقي اللغز في ليلة القدر "اصلك دعيت كتير و اكيد ربنا
هيستجيب الدعاء و يقولك مين اللي قتل او سرق" و دايما في المسلسلات دي هتلاقي
المشاهد بتخلص في فتحة باب و تبريقة من البطل و لو البطلة ست هتصوت كأنه شاف جن في
رمضان او مسدس في ضهرك اول مكالمة تليفون
-مسلسلات اللي بتعتمد علي اسم صاحبها بس للأسف
جواها فاضي و دي بتبقي عاملة زي انت رميت الشنطة دي فيها كتاب دين...يعني لو قولت
المسلسل وحش...تلاقي اللي يقولك ايه؟!!!!!!! انت مش عارف مين البطل و كأنك غلطت
فيه مثلا
-و تلاقي نجوم كل المسلسلات بيسألوا الناس علي رأيهم في اول حلقات المسلسل اللي هي طبيعي تبقي فيها اثارة عشان تجيب رجل المشاهد...اصلك لو عرفت اللي فيها من اولها هتكمل المسلسل ليه؟
**احنا اللي عملنا رمضان موسم لكل الكلام اللي
اتقال فوق دة و بقي الغريب انك متتفرجش و يتبصلك بصة كدة من فوق لتحت انت ازاي مش
متابع ؟!! وكل القنوات ما شاء الله بتقي هي اعلي نسبة مشاهدة و خناقتنا مين الاحسن
اللي بتزود النسب دي...رمضان ارقي انه يبقي موسم...عشان انت لو محتاج تتابع كل دة
انت محتاج ترامادول عشان تجيب طاقة و تركيز لكل دة...في اعمال قوية جدا بيتظلم
مجهود اللي عملوها في وسط الزحمة دي بس اللي بيتفرج هو اكتر واحد بيتظلم...رمضان
30 يوم في السنة بس التلفزيون واصل 11 شهر في السنة
احنا اللي خلينا رمضان مش رمضان
#مين_اللي_قال_رمضان_موسم
#التتر
#كريم_مجدي
