سيد رجـــــــــــــــــــــــــــــــــــــــــــــــــــــب

سيد رجـــــــــــــــــــــــــــب "عندما يصبح العمر مجرد رقم"

لازم تتأكد انك كل ما تسمع اسم الرجل دة لازم هتاخد نفس عميق كدة و تبتسم و تقول الله.

تقول الله عشان هتشوف جمال في الشخصية دي صعب تشوفها في شخصيات كتير..صعب انك تلاقي ملامح طيبة و رجولة و صبر زي اللي وش الرجل عم سيد رجب..لازم تتأكد ان مفيش كلمة هتسمعها من الرجل دة الا و ليها وزنها و قيمتها اللي ممكن تبقي شعار لحياتك او اكيد هتتعلم منها حاجة

عم سيد رجب اللي ممكن تلاقيه اغني اغنياء العالم و بيتكلم زي امراء العائلة الملكية و يمكن باتقان احسن كمان و هتلاقيه برضه الصنايعي اللي بيشتغل بايده و تلاقيه التاجر ابو جلابية و كل واحد منهم هينسيك التاني..سيد رجب هو موسوعة مواهب كاملة متنقلة في صورة انسان.

سيد رجب هو الموهبة اللي كل ما صاحبها يكبر بتكبر معاه..هو اللي هتشوفه كبير حتي لو فاسد و تحس انه قدوتك و هو ردل كبير عدي عليه الزمن و فرمه قطر الوقت

من المرات النادرة اللي هتلاقي فيها الموهبة بتاخد بايد صاحبها لو عايز يعمل اي حاجة..يعني الرجل دة لو حب يمثل موهبته هتسمحله..لو فكر يألف موهبته مش هتقوله لاء..لو فكر حتي يغني موهبته هتبقي الموسيقي اللي بتسنده..حتي لو حب يرقص هتلاقي موهبته هي ايده و رجله اللي بيحركوه

سيد رجب هو رحلة حول العالم هتشوف فيها مدارس تمثيل و مواهب كتيرة و متعددة موجودة في شخص واحد اسمه عم سيد رجب

"قول اكشن انت بس" هي انسب جملة ممكن يقولها عم سيد لاي مخرج بيشتغل معاه..هو عنده بوصلة ذاتية بيعرف بيها يعمل ايه و امتي بس انت قول اكشن

يلا بيننا بقي نركب قطر المواهب مع عم سيد رجب :

-عايزك تدور علي فيلم روائي قصير كدة اسمه"اللون الازرق" و شوف عم سيد في دور مختار المريض النفسي..5 دقائق من الموهبة الربانية بيعرضها بمنتهي التلقائية و انك تنسي مين دة و تركز بس مع مختار..من اول مسكته لفرشاة الرسم و عمرك ما تتخيل ان حد رسم اللوحة دي غيره..و امشي معاه و هو بيسأل عن لون كل حاجة حواليه و هتكتشف ان المرض النفسي ممكن يكون في الصوت..مشية سيد رجب في المشية بتاعته حتي لازم تقتنع ان دة مريض نفسي بجد و شوف طريقته الواقعية جدا لما زادت عليه المؤثرات الصوتية..و لازم تحس بمعاناة لما تسمعه بيقول "هو الموت لونه ايه"

-بتحب السيرة الهلالية؟؟ كله عند سيد رجب موجود و جرب تسمعه و هو بيقول السيرة الهلالية..شوف النطق و هو طالع صح و شوف تنقلات نبرة صوته و هو بيطلع و بينزل في الالقاء و هتحس انك بتسمعها بطريقة مختلفة خالص عن اي حد

-في زمان مسرحية اسمها "المحروسة" و عايزك تركز مع سيد رجب في دور مدرس التاريخ الموجوع قوي من تزوير التاريخ و تشوف عم سيد و هو بيحكي عن التاريخ المزيف بمنتهي المعاناة و تحس كأنك واحد من تلاميذه

-في مسلسل حارة اليهود شوفه في الفتوة و التحول ما بين القوة و العجز و ساعتها هتعرف ان الرجل دة ممكن يعمل اي حاجة

-تعالي بقي ننزل في محطة الكوميديا "يعني هو سيد رجب هيسيبنا في الكوميديا..ميصحش"

-تعالي مثلا في مسلسل بين السرايات و دور المعلم سالم و علاقته بجوز بنته ابراهيم و لازم تشوفه في الكباريه و بيقول استغفر الله العظيم و بعدها علي طول بيشرب..او لما قال لابراهيم اقنعني عشان اصورلك 600 نسخة من الورق دة فرد عليه ابراهيم عشان خاطر الشباب و بمنتهي الثقة رد المعلم سالم قاله "الحمدلله انا مش شاب يعني اول القصيدة بايظة"

-عايز تحب الشر اتفرج عليه في ولاد رزق و انت تتمني انك تبقي الشرير المضحك او تبقي واحد من صبيانه...لما قال لاحمد عز تعالي الاهلي بطولاااااااااااااات او لما قاله وسع كدة لما اتفرج و تشوفه و هو بيقلب ديب طيب لما قال ترضالي الخسارة يا ابراهيم

-لسه الطريق طويل اوعي تزهق..دور كدة علي اخر مشهد في مسلسل فوق مستوي الشبهات و شوف التجسيد المثالي لجملة و من الحب ما قتل و شوف تعبيرات وشه و هو بيكتم نفس اللي بيحبه..هتلاقي نفسك رايح في العالم بتاعه و هتحس بكل الوجع اللي هو حاسس بيه

-شوف سيد رجب و هو المريض بالكوليرا في واحة الغروب و كل دوره في المشهد هلاوس من شدة المرض هتلاقي نفسك مش مركز قوي في الحوار اللي بيدور عنه...او هو خلاك تسمع الكلام عنه و تركز مع الهلاوس مع انه مش موجود في المشهد

-"ايه بقي يا عم رمضان الحلاوة دي" عم رمضان هو دوره في مسلسل رمضان كريم و هنا هنقعد مع بعض او بمعني اصح هنقعد في حضرة الموهوب سيد رجب

-هتشوف الاب المصري زي ما الكتاب بيقول..الاب المصري اللي في الحارات الشعبية الاصيلة اللي تقومله انت و اصحابك لو عدي قدامكوا

-و شوف كوميديا سيد رجب و هو بيقول للمنجد و باصص للانتريه بتاع بنته "دة هيخلص بعد الفطار" او لما اتكلم مع مراته و بيقولها "يا ولية باقولك هاقلع البدلة"

-هتشوفه الاب الحنين و الموجوع لما بيقول لروبي"اعمل فيكي ايه يا ضنايا" ساعتها بس هتحس ان ابوك ممكن يكون جواه بركان بس غصب عنه بيلاقي نفسه واقف عاجز قدام عقاب عياله و سيد رجب وصل الاحساس دة صح قوي

-و تشوف طيبة عم رمضان و هو بيدي فلوس لواحد ارتشي و بيقوله شوفت الفلوس الحلال حلوة ازاي

-و لازم نقفل باحلي مشاهد سيد رجب و هو بيستغرب انه دة بقي حال شهر رمضان و المشهد دة البطل فيه هو صوت سيد رجب اللي يوصلك اي حاجة هو عايز يوصلهالك و يخليك تتخيل المشهدين..مشهد رمضان الحقيقي اللي بيتمناه عم رمضان و التاني مشهد رمضان الحالي اللي واجع عم رمضان...مش هنتكلم كتير عن المشهد دة بس هنحط اللينك بتاعه عشان مهما الكلام اتقال هيبقي اقل من اداء سيد رجب

https://www.youtube.com/watch?v=8HB0na7UAd8

ايها السادة نحن نملك ما هو اكثر موهبة من مورجان فريمان فيا صناع السينما اصنعوا من سيد رجب بطل عالمي بنكهة و طعم مصري خالص

عم سيــــــــــــــــــــــــــد شكرا انك اديتنا فرصة اننا نستمتع بالكتابة عنك 

انعام سالوســــــــــــــــــــــــــــــــــــــــــــــــــــــــــــــــــــة

انعام سالوسة

تقدر تقول عنها "وش الخير" في اي عمل فني بتشارك فيه..انعام سالوسة يعني من اكبر مواهب التمثيل المتكامل اللي حصل في تاريخ الدراما و السينما..انعام سالوسة تحس انها مش بتحس بغربة في مكان التصوير يعني لازم تتأكد ان الست دي ممكن متكونش بتقرأ الدور و تحضره..دي يادوب بيجيبوها من بيتها عشان تعمل الدور و ترجع البيت تكمل عادي

الجمال في شخصية الست دي انها تقدر تضحكك و تبكيك في نفس الشخصية و ممكن كمان في نفس المشهد و ساعات تلاقيها الام المصرية اللي شايلة هم عيالها فوق كتافها و ساعات تلاقيها الام اللي بتتريق علي عيالها بشكل كوميدي جدا..انعام سالوسة موهبة كبيرة في الكوميديا و موهبة اكبر في الدراما.

-انعام سالوسة هي الام المصرية الجدعة في "همام في امستردام" و تلاقي موهبتها باينة قوي في المشهد اللي بتواسي فيه ابنها و بتحكيله عن ابوه و هو بيوصيها علي عيالهم و تشوف منتهي القوة و الضعف في نفس الجملة في جملة "ايه يا همام عايز امك تبقي اجدع منك" و تلاقيها في نفس الدور بتعمل الكوميديا في جملة "احسن دة ابوها زي ما يكون في زوره بقرة" او ركز في تعبيرات وشها و هي بتقول علي الفيزا "اينعم صحيحة"

-هي ام سعيد اللي شايلة عيالها في عسل اسود و هي راضية و صابرة بكل  حاجة صعبة في الدنيا عشان تفضل مخلياهم واقفين علي رجليهم و تمارس انعام سالوسة هوايتها في الجمع ما بين الدراما و الكوميديا..يعني لازم تضحك و هي بتقول لاحمد حلمي "بكرة تجيلك مناعة و تناحة و تتعود علي المياه بتاعتنا" و تشوف الطيبة كلها ساعة لما بتدي عيالها العيدية و هي بتقول هتفضلوا تاخدوا مني فلوس لحد ما ربنا يكرمكوا...و ترجع للكوميديا تاني بينها و بين احمد حلمي لما سألها عن اسمها الحقيقي قالتله"ام سعيد" فسألها اومال سعيد اسمه ايه قالتله" ماجدة" و تحس بموهبة الست دي في تعبيرات وشها في اخر مشهد ليها و هي بتقرأ الجواب

-"ان شاء الله و الف الف مبروك" مين فينا ينسي المشهد دة في فيلم عايز حقي...و الافيه "اخويا من بعيد بيني و بينه 12 اخ"

-مينفعش تنسي دورها في الارهاب و الكباب..موظفة الحكومة اللي زي الكتاب ما بيقول..عمرك شوفت حد يقول اسم شخص و تضحك صعبة مش كدة؟ انعام سالوسة عملت استاذ رشاد افيه لما قالت لعادل امام "عند استاذ رشاد" و كأنها رسالة مسجلة هي حفظاها بس طلع الاسم افيه يفضل محفور في اذهان اكل اللي اتفرجوا علي الفيلم

و ازاي بتتناقش مع عادل امام انه اتضحك عليه لما اشتري البسلة رخيصة عشان بايته و تشوف انعام سالوسة مع يسرا و هي مكسوفة تحط مكياج كأنها بنت في العشرينات

-هي اللي حولت اشهر جمل فيلم تيتو للرائع خالد صالح لاشهر افيهات فيلم الحرب العالمية الثالثة لما قالت لاحمد فهمي "انا ماما يلا" و في اول مشاهدها لما بتقول لواحد من رجالتها ابقي هاتلي مئوار تاني عشان دة اتزفر خلاص..هي اللي خلتك تتخيل انها خمست بالعربية و اراهن انها ممكن في الحقيقة متكونش بتعرف تسوق.

سيبك بقي من كل دة و شوفها و هي قاعدة جنب هتلر و هو بيشرح لاشرار العالم الخطة و بيسألها انتي بتعملي ايه؟ فترد بمنتهي التلقائية : باعمل سندوتشات و كأنها برضه في دور الشريرة مبتنساش انها ام و اخيرا مينفعش منتكلمش عن طريقة قراءتها للتعويذة و ازاي هي اضافت للكلام الكوميدي القاء كوميدي تفوق علي الكلام نفسه

-و محدش يقدر ينسي دورها مع احمد حلمي في اكس لارج و افيه لو مسكتش ياض يا كرم هاقولهم كمنت بيتعمل ايه و انت صغير..او لما خدت الاكل من حلمي و قالتله "هات هات انا مش صايمة"

-تعالي نرجع لورا شوية و نشوفها في ليالي الحلمية في دور وصيفة زوجة العمدة سليمان غانم و الدويتو الرائع بينها و بين صلاح السعدني

-في مسلسل زمان كان اسمه يا رجال العالم اتحدوا و تشوف انعام سالوسة في دور الزوجة المستبدة و الكوميدية في نفس الوقت مع حسن حسني

-يا مرك يا نعمة يعني اشهر جملة في مسلسل ذئاب الجبل و ازاي عملت دور الزوجة اللي بتسمع كلام جوزها عشان بتحبه

-في فيلم"فيلم ثقافي" لما سألتهم كلهم اساميهم ايه و كلهم كانوا مقتنعين انها مسيحية و في الاخر لما سألوها عن اسمها قالت "ام مصطفي "

-و اخيرا في رمضان اللي فات في خلصانة بشياكة في دور الدادة و ويزو بتقولها الرجل بالنسبة لك ايه فردت بمنتهي التلقائية "زي المقشة عشان مبيملاش عينه غير التراب "

من الاخر كدة احنا استمتعنا جدا و احنا بنكتب عن الست دي..انعام سالوسة مش ضيفة شرف او بالاشتراك مع...انعام سالوسة نجمة من نجوم التتر