محمد شرف..عندما يصبح الولا حاجة افيه

محمد شرف..عندما يصبح الولا حاجة افيه
---------------------------------------
 افيهاته بتنجح افلام..عم محمد شرف او بتعريف تاني"اسطي الافيهات"...نجاح اي فنان كوميدي بيتقاس دايما بالافيهات اللي الناس بتفتكرها و تفضل تستخدمها في حياتها اليومية و محمد شرف بيعمل من الفسيخ شربات يعني ممكن يقولك جملة مش متركبة علي الموقف بس هو بطريقته بيفصلها علي الموقف زيه زي اشطر ترزي ممكن يعمل من قماش دايب احلي بدلة من باريس
--------------------------------------
محمد شرف صاحب مدرستين في علم الافيه او لو هنفصلها اكتر هو رائد مدرسة "الافيه المتطرف"
 يعني ممكن يقولك جملة عادية جدا و منطقية جدا بس يخليك تستقبلها افيه يموتك من الضحك زي افيه "انت بتسأل اسئلة غير منطقيه" اللي قالها قدام احمد حلمي ظرف طارق و هنا الافيه هي طريقة كلام محمد شرف لجملة لو حد تاني قالها مش هيبقي ليها طعم و تلاقيه بعدها علي طول بيقول افيه هو ملكية خاصة لمحمد شرف زي انت "فوق الفظيع" و الاتنين لنفس الشخص في اقل من دقيقتين
------------------------------------
 و ما دام جبنا سيرة احمد حلمي..فمحمد شرف يعتبر من اسرار نجاح حلمي و من اكتر الناس اللي بتسيب بصمة في افلامه..و تعالي من اول "زكي شان" و دوره اللي ميعديش مشهدين او تلاته و نبدأ بمشهده مع العم حسن حسني لما قاله لازم لما اخش مجال المخدرات مينفعش اخرج منه قبل سنتين..و طريقته في الافيه دة توريك قد ايه ان الافيه عند الرجل دة سهل جدا لدرجة انه ممكن يقول افيه بوشه بس و دي موهبة جبارة...نيجي بقي مع مشاهده مع حلمي في نفس الفيلم و هو بيقوله اضرب كمان خليني اتوب و تشوفه انه محور المشهد مش حلمي
------------------------
 عبقريه شرف في دور العمدة في فيلم الرهينه و افيهاته اللي عايشة و هتفضل عايشة..مين ينسي كارت الفيزا...او لما قاله هي سعدية اتجوزت...و تلاقيه مالوش حل في اشهر جملة في الفيلم"هو احنا من امتي بنسأل الاسئلة دي"
--------------------------------
 مع حلمي برضه ظرف طارق في الافيهين اللي قولناهم في تاني فقرة و مع مجدي كامل و هو بيشرحله مميزات الحشيش اللي هو جايبهو يوصل لمرحلة من جمال موهبته لما قال"واحد مصري هيشجع ايه..نيجريا طبعا"
---------------------------------------
 لسه مع شراكته مع حلمي و مين فينا ينسي المعلم مشمش في جعلتني مجرما..و افيه يبقي مقلتش بذر يبقي الشهادة لله و لا مش الشهادة لله..او لما الظابط قاله ايه دة يا معلم مشمش فرد بمنتهي اللامبالاة و الثقة "دة صالون ثقافي"

*و مين ينسي نسيم في انا اسف علي الازعاج و هو بيقدم اقصي المواطن المغلوب علي امره بطريقة تخليك تتعاطف معاه و تسمع ضحكتك من قلبك طالعة...افيه ما انت تلاقيك مش بتلبس تحت الحاجات دة رد فعل تلقائي لابن البلد اللي دايماً رده حاضر ...و قد ايه كان عبقري لما قال انه عامل نفسه شايف مع ان النضارة من غير عدسات
-------------------------------------------
-------------------------------------------
 من اشهر افيهات محمد شرف هو "لوك لوك" و دة بقي عامل زي الامثال الشعبية المحفورة في تراث الكوميديا المصرية..و متحاولش تسمع الافيه دة من حد غير شرف
--------------------------------------------------------------------
 تعالي بقي نفتكر دوره في حرامية في تايلاند و افيهاته مع طلعت زكريا و هو بيقوله فيها ايه لما نشرب و لما قاله "تصدق صح" و لما كريم عبد العزيز عرض عليه الفلوس فشرف اخترع رقم مالوش وجود "خمشاشر"
و اخر مشهد له و هو بيضرب و بيقوله تصدق اختك ممكن تطلق في الحركة دي يا ديزل
----------------------------------------------------------------
 محمد شرف عمل دور سامبو في مسلسل ارابيسك و دة بعيد عن سكة الكوميديا بس الدور دة يوريك قد ايه الرجل دة حريف تمثيل و يفضل سامبو من علامات مسلسل ارابيسك
------------------------------------------------------------------------
 محمد شرف عنده القدرة انه يعلي فيلم مش ناجح زي اللي عمله في فيلم "مستر اند مسز عويس" بتاع حمادة هلال لما قال قولي يا ستي تقبلي انك تتجوزي المأذون
------------------------------------------------------------------------
 شرف اسطي كوميديا يعني ممكن يطلعك من الموقف كله و يرجعك له تاني بمزاجه و الغريب انك بتمشي معاه لحد الاخر و عمرك ما هتسأل هو هيخلص امتي
--------------------------------------------------------
 اللي يشوف الرجل دة علي الحقيقة يعرف انه مش متكلم جيد و دة يخليك تحس انه موهوب بالفطرة و تحس انه بيركبه جن قدام الكاميرا
----------------------------------------------------------
 محمد شرف هو شرف لاي ممثل انه يقف قدامه و مش لازم نستني لما يموت عشان نعرف الناس مين محمد شرف
----------------------------------------------------
محمد شرف من النجوم اللي التتر ظلمهم و شرف لينا اننا نكتب عنه
---------------------------------------------------
و اخيرا
 يارب ما حد يستغل مرضه انه يعمل شو و خلاص او يعطف عليه بدور مالوش لازمة و يقل من قيمته و تاريخه
#محمد_شرف

المنتصر بالله "اســــــــــــــــــــــــــــــطي المسرح"

المنتصر بالله "اســــــــــــــــــــــــــــــطي المسرح"

مش اي حد يقف علي المسرح و مش اي حد يبقي غول مسرح بس في اختراع اسمه المنتصر بالله و دة بقي اسطي مسرح.
المنتصر بالله لعبته المسرح..المسرح اللي بالنسبة لفنانين كتير فيلم رعب بس بالنسبة للرجل دة هو المتعة بكل ما تحمله المعني من كلمة
-------------------------------------------------
المنتصر بالله مش مجرد فنان دمه خفيف..المنتصر بالله هو مجرة من الكوميديا بتجري في فضاء لوحده و مالوش منافس و تقدر تقول ان الرجل دة مينفعش يتقارن بحد من جيله و تقريبا هو من الناس القليلين اللي مثلوا في فترة مسرح المقاولات و كان بيعمل مسرحيات تعيش في تاريخ المسرح الصري
---------------------------------------------
المنتصر بالله حالة غريبة و هو انك تضحك اول ما تسمع صوته و مش مستني منه افيهات عشان تضحك لان مهما دماغك فكرت عمرك ما هتقدر تتوقع اللي هيقوله او هيعمله
-----------------------------------------
صعب انك تلاقي ممثل مسرح كل حاجة عملها تبقي محفوظة و مميزة بس المنتصر بالله كل ادواره في المسرح هي علامات مميزة
----------------------------------------
من المميزات الرجل دة انه كان منافس قوي لكل اللي وقف قدامهم في المسرح و كان ساعات كتير بيتفوق عليهم
------------------------------------------
تعالوا نبدأ رحلة الاستمتاع بالمنتصر بالله

مع الاستاذ فؤاد المهندس في "علشان خاطر عيونك" هتلاقي منافسه او بمعني تاني هتلاقي خد و هات مش مجرد مشهد بيتعمل كل يوم بينه و بين فؤاد المهندس
حتي في افيهاته هتلاقي السهل الممتنع يعني لما قال للمهندس"انت اللي متعرفش القوي العاملة" الافيه سهل جدا بس متركب صح قوي و طالع من اسطي حقيقي
----------------------------------
و لازم تفتكر افيه"دة الواحد يخش السوبر ماركت بمليون جنيه يشتري شوية جبن يطلع بسبع صاغ و نص "
---------------------------------
افيهاته موقفتش لحد هنا و في اللحظة اللي انفجر فيها المسرح من الضحك لما قال"تقوله يقوم يروح قايم...كنت فين لما ابويا مات"
-------------------------------
و لازم متنساش هو و الرائعة شريهان لما بدلوا اصوات بعض

و نكمل رحلته مع الاستاذ و افيه
لما سأله المهندس مصر دي مين؟
فرد المنتصر بالله
مصر هي ام عباس
 لو عايز تستمع بالضحك بجد لازم تشوف مسرحية اسمها"عائلة سعيدة جدا" و هتشوف المنتصر بالله فعليا هو بطل المسرحية اللي حتي لو فضل ساكت برضه هتلاقي عينك عليه
---------------------------------------
هتشوفه ساعة لما مراته قالتله ما الدكتور البيطري ممكن يعالج بني ادمين فقالها بمنتهي السرعة انا عالجتك انتي و بصراحة ملقتش فرق كبير قوي يعني
-------------------------------
و اول لما لقوا الجواب و كل واحد فيهم بدأ يدافع عن نفسه قدام مراته الا  المنتصر بالله فعمل حاجة صعب علي اي ممثل موهوب مش بس كوميدي انه يعملها و هي "الافيه الحركي"
انه غمل نفسه انه بيوشوش مراته و بيعمل تمارين بايده و الناس ضحكت من غير ما يقول و لا حرف
----------------------------------
و توصل قمة العبقرية في مشهد الغسيل و هو بيشرح المقادير و ازاي بيطبخ و يغسل و يقفل المشهد بافيه عبقري لما قال "من ساعة ما بدأت اغسل و انا باحس بحاجات غريبة و نفسي غامة عليا و نفسي في الحرنكش"
---------------------------------
و لازم تعيد المشهد لما ناموا كلهم علي الارض و هو بيقول"عودة الندل"
------------------------------
و محدش هينسي جملة الفراندة شوف الفراندة بصوته المميز

و لو عايز تشوف كوميديا سياسية شوف المنتصر بالله في مسرحية "العالمة باشا"
و هو بيقدم دور المسئول الحكومي الفاسد في دولة عالم تالت
شوفه و هو بيقدم حلول اننا نعمل"طفل البلاليص" بدل طفل الانابيب او لما غني ما انا استغربت قدام العظيمة سهير البابلي و لو عايز تضحك اكتر شوفه و هو بيحط الاحتمالات لرئيس الحكومة
بس المميز في الرجل انه انه كان سابق عصره في افيهاته يعني ممكن يقولك افيه بسيط يشرحلك في علم من العلوم السياسية المعقدة
----------------------------------------
لما قال طول ما انت في الحكم تفتش بس لو طلعت من الحكم تتفتش
--------------------------------------
و سبق عصره لما قال ان المسئول له 3 صور
اول صورة اول ما بيمسك المنصب
تاني صورة اللي بيديها للجرايد عشان تمجده
و تالت صورة و هو بيتحاكم
 و اخيرا نقدم لكم شلولو في شارع محمد علي او صاحب اشهر كوبليه في تاريخ المطربين""يا ليــــــــــــــــــــــــــــــــــــــــل""
و ازاي المنتصر بالله نجح انه يحول نكتة قديمة دمها تقيل الي موال بيغنيه واحد صوته وحش لافيه يكسر المسرح من الضحك
--------------------------------------------
في المسرحية دي المنتصر بالله كان منور جدا و كان ساند كل ابطال العمل...و لازم تفتكر موال "تراهني اروح اضرب الرجل دة علي قفاه"
و مينفعش تنسي الافيه الارتجالي مع وحيد سيف و شوف عين المنتصر بالله و هي بتحضر للافيه قبل دماغه لما قال"قرد جاكتته حمراء" و دة يوريك يعني اي ممثل مسرح و يعني ايه اسطي مسرح
-------------------------------------
اول لما استغل ان وحيد سيف كان عنده داء الهوهوه و فال"متجبيش سيرة العضم يا حبيبتي عشان وراكي كلب"
لدرجة ان وحيد سيف نفسه انهار من الضحك
-------------------------------------
او لما سأل هشام سليم هو الحمام بينور فقاله دي التلاجة يا غبي و رد المنتصر بالله تلاجة غسالة يعني هي هتحمض

لو فاكر فيلم ضد الحكومة هتلاقيه المساعد العقر اللي بيخلص اي حاجة للمحامي الفاسد..مينفعش تنسي ضحكته لما احمد زكي رمي حتة الحشيش من القطر قدام الظابط
-----------------------------------
او لما قال للمحامي متنساش البدلة السودة و الكرافتة السودة و الجزمة السودة عشان ليلتنا تبقي بيضاء
 ------------------------------------------------------------------------------------------------------------
 افتكروا اسم الرجل دة و خلوا اولادكم يتفرجوا عليه...عشان في فنان مسرح و في غول مسرح و في المنتصر بالله

احمد فتحي او "الكوميديان بالفطرة"

يمكن من المرات القليلة اللي نكتب فيها عن نجم من نجوم التتر اللي لسه موجودين علي الساحة بس هو اجبرنا اننا نكتب عنه في التوقيت دة لانه فعلا نجم بيظلمه التتر في كل عمل بيشارك فيه .

-احمد فتحي او "الكوميديان بالفطرة" او بمعني اوضح"الكوميديان الغني" صعب قوي انك تلاقي كوميديان فيه كل معاني الانسانية تحسه موجود في كل بيت مصري..تحسه صاحبك اللي يتمنالك الخير..اخوك اللي مستعد يضحي عشانك بأي حاجة

-احمد فتحي ملبوس بعفريت اسمه الكوميديا التلقائية يعني بيقول الافيه و لو المشهد اتعاد اتأكد انه هيقوله بشكل مختلف خالص عشان بمجرد انه يعدي من قدام الكاميرا فده افيه لوحده كافي انه يوقعك من الضحك..و لازم تحضر نفسك انك هتسمع افيه عمرك ما هتسمعه غير منه

-احمد فتحي مش سنيد للنجوم, دة هو صانع بهجة الافلام او المسلسلات اللي بيظهر فيها..عبقرية احمد فتحي انه عامل زي الزيبق بينتشر في اي وسط يتحط فيه بمعني انه لو فيه اي عمل فني مش مكتوبله دور فيه ممكن احمد فتحي يفصل نفسه علي اي دور..النهاردة هنكتب عن كوميديان و انسان مختلف جدا عن اي حد

-عاطف قرني في بنات العم او خلونا نقول فاكهة الفيلم من اول ما ظهر لحد ما الفيلم خلص..محدش يقدر ينسي لما اتكلم مع رجاء الجداوي و قالها احنا من البرنامج الاذاعي"لن يقفل باب مدينتنا فأنا ذاهبة لاصلي" و تحس ان الافيه طالع بتلقائية ولاد البلد اللي قاعدين علي القهوة سوا و محدش يقدر يمسك نفسه لما قال"انا عارف الدماغ دي دماغ بانجو"..و قمة التلقائية لما بيقول شمياء او في الافيه لما بيقول لشيكو "لا خليكي معانا احسن هترجعي تعملي ايه" و كأن في ايده مقاييس الجمال و هو اللي بيحدد مين يرجع و مين لا...او افيه "نحلق الشنب دة دة الحضري حلق شنبه"

-تعالوا نشوف الشناوي في كابتن مصر و اغنية داليدا اللي حولها فتحي لافيه كل ما حد يسأله انت منين فتلاقيه بيغني بفخر قوي"سوهاج بلد الموواويل " او افيه لما بيقول"ليه ساعة كتير ما كفايه 5 دقايق" و منتهي الثقة اللي في افيه"هاروح اعمل عمرة للي قتلته هو انا هاعمل عمرة لابويا ليه"...تعبيرات وشه في الدور دة لوحدها يتعمل عليها افلام و ركز علي وشه لما بيصد ضربة الجزاء في اخر الماتش...او في تقليده للعظيم احمد زكي في فيلم الهروب و في المشهد دة بيظهر احمد فتحي الموهوب لما اتحول من انه بيتكلم جد قوي لقمة الكوميديا بعد ما رجع لشخصية الشناوي الحقيقية

-في مسلسل وش تاني مع كريم عبد العزيز و شخصية سمعة المسطول دايما و نشوفه لما كريم قاله انت مبرشم تاني فقاله "نفحة من زبون هاقوله امي بتزعق" و لما كريم عبد العزيز في مشهد راكب جنبه العربية و بيقوله اطلع فرد احمد فتحي بمنتهي البراءة "ازاي" و الافيه هو كلمة واحدة بس طريقة احمد فتحي حولت الكلمة دي لافيه يضحك

-و لازم تفتكر جحيم في الهند و تشوف الصول اللي بيعزم علي العساكر كلهم بسجاير الا اللي مبيعزمش عليه و افيه "يا جماعة الخير"

-او مين فينا ينسي بعزق و يتعاطف معاه في الكبير قوي في افيه""حسانين" لما قال لاحمد مكي ان الرجل اللي بيحرسه هرب منه و قال انت جيت يا حسانين و مكنش فيه حسانين و لما مكي قوله مضربتش عليه نار ليه فرد بعزق و قاله ضربت بس جت في حسانين

-احمد فتحي هو صاحب اشهر افيه في تاريخ الاعلانات..هو النجار اللي قال بيلوء و كتير مننا مش فاكر الاعلان كان علي ايه بس محدش ينسي ان الباب كان بيلوء

-مين ينسي وقفته قدام الزعيم و حبه لانيسة و ازاي الرجل دة جواه موهبة في المشهد اللي عادل امام قاله فيه ان انيسة ضاعت و استمتع بالانسان الغلبان الطيب و هتعيش مع احمد فتحي دقايق من الانسانيات المتواصلة

-نيجي بقي لسيد العفريت في الحرب العالمية الثالثة و اللون الليلاه بتاع العفريت اللي اتحول لاخضر من كتر الركنة و الافيه دة حصري لاحمد فتحي بس و لما هشام ماجد قاله خرجنا من هنا فيرد سيد العفريت في منتهي الثقة "الباب مقفول من برة ما اللي يطلب طلبات يطلبها بالعقل"

و نيجي لمشهد العمر بالنسبة لاحمد فتحي و هو اهم مشهد في الفيلم و اللي مقالش فيه و لا كلمة و هو مشهد رقص العفريت اللي طلع فجأة من تحت و الرقص العالمي علي اغنية العو و مهما اتفرجت علي الفيلم دة اكتر من مرة الضحك هيزيد علي المشهد دة

-و هنيجي لاهم دور عمله و هيعمله احمد فتحي علي الاطلاق و هو دور احمد فتحي في برنامج معكم و اللي ظهر فيه احمد فتحي انه ابن البلد الجدع اللي حفر في الصخر عشان الناس تعرف موهبته..الانسان اللي جواه معاني و جمال مش موجودين في ناس كتير للاسف..الفطرة اللي تعشقها...الطيبة اللي تتمني تبقي فيك انت...تستغرب ازاي الرجل دة كدة و يطلع منه كل الكوميديا دي...احمد فتحي بيأكد في البرنامج انه فعلا الطيبون للطيبات.

احنا فخورين اننا بنكتب عن الانسان احمد فتحي اللي عمل مدرسة كوميديا خاصه به هو

السر ورا احمد فتحي انك لو شفت الفيلم من غير دوره و من غير ما تعرف انه له دور هتتفرج عادي بس لو جيت تتفرج علي الفيلم نفسه و هو موجود عمرك ما هتتخيل الفيلم من غيره

انت محصلتش يا احمد يا فتحي